Read Jinghpaw Common Language Bible 2009 TARA JAHPRANG 32 Bible Online

TARA JAHPRANG 32 - Jinghpaw Common Language Bible 2009 bible

TARA JAHPRANG 32

¹“Sumsing lamu hte ginding aga e, nye a ga ni hpe na la u, ngai kaning nga tsun nga ai ga hpe ani sha madat la u.

²Nye a sharin shaga ai ga gaw marang si ni zawn htu hkrat nna, ginding aga ntsa e numri zawn rai nga na ra ai. Nye a ga mung hpun bawng ni a ntsa e marang mahpawng zawn, tsit lali ai tsingdu ni a ntsa e marang shaya zawn htu bun na ra ai.

³Ngai gaw dai MADU a mying ningsang hpe shakawn na nngai; shi a amyu masha ni gaw shi a galu kaba ai amu hpe tsun dan na mara ai.

⁴“Dai MADU gaw chyalai n-gun hte hpring ai nanhte a dahpran shara rai nga ai; shi a lam yawng mayawng hkum tsup nna ding hpring nga ai. Nanhte a Karai Kasang gaw sadi sahka hte teng man nga ai rai nna shi galaw ai amu teng man ai hte rap ra nga ai.

⁵Rai ti mung nanhte mahtang sadi n dung, shi a amyu masha tai na n ging nga myit dai; yubak kap nna masu hkalem ai amyu rai nga myit dai.

⁶Angawk angak hte myit n su ai amyu masha ni e, nanhte gaw dai MADU hpe dai zawn galaw ai gaw lam jaw nga a ni? Shi gaw nanhte a kawa, nanhte hpe hpan da ai wa rai nga ai, shi gaw nanhte hpe amyu baw shatai nu ai.

⁷“Lai mat wa sai moi chyaloi nhkoi prat na lam hpe myit sawn yu u; kaning rai byin lai wa sai lam nang hpe tsun dan lu u ga; na a kawa hpe san u. Moi na lam tsun dan lu mu ga, nanhte a dingla ni hpe san mu.

⁸Tsaw Htum ai Wa gaw amyu baw ni hpe shanhte a lamu ga ni hpe jaw ya nna, amyu masha ni hpe karan ya ai shaloi; shi gaw Israela a kasha ni a numbat hte maren, amyu masha ni a lamu ga jarit ni hpe masat ya nga ai;

⁹rai ti mung shi chyawm gaw Yaku amyu matu mara ni hpe shi a matu lata la nu ai.

¹⁰“Katsi katsang, akrin akraw, nbung sha ahpawt ai nam mali hku brak hkawm nga ma yang, shi shanhte hpe mu la wu ai. Shi hkum hpe makawp maga da wu ai zawn shi shanhte hpe makawp maga ai hte lanu lahku la nga ai.

¹¹Galang gaw shi a ulung ni hpe pyen sharin na matu, singkaw kahpyan nhtawm de a ntsa e shalen nna shim ai hku awn la ai zawn, dai MADU mung Israela hpe hkrat mat ai kaw na makawp maga la nga ai.

¹²Dai MADU gaw maigan hpara a karum lam n lawm ai sha, shi a amyu masha ni hpe woi wa nu ai.

¹³“Shi gaw shanhte hpe tsaw grau ai shara ni up shangun nna yi hkauna hta tu ai nsi naisi ni hpe sha nga ma ai. Lunghkrung lunghtawn hkan na lagat ntsin mu tam nna lungbra ni hta tsanlun hpun ni tu abya nga ai.

¹⁴Shanhte a dumsu, bainam ni chyu alaw alam jaw ma ai; ra n rawng ai dumsu yam nga, sagu bainam shanhte hta nga nga ai. Kaja htum ai hkaulan mam hte jet ai sabyi ntsin shanhte lu ma ai.

¹⁵“Dai MADU a amyu masha ni sut su wa ti mung, gumlau hpyen she nhtang tai; mu mai ai lusha hte shanhte hpum sau ma ai. Shanhte a hpan MADU Karai Kasang hpe kabai kau ma ai; chyalai n-gun hte hpring ai hkye madu hpe ningdang kau ma ai.

¹⁶Shanhte nawku ai hpara sumla a majaw, dai MADU hpe n dawng shangun; shanhte galaw ai n hkru ai amu hte shi hpe pawt sindawng shangun nga masai.

¹⁷Shanhte gaw karai jet n re ai ni hpe mung, shanhte a kaji kawa ni galoi mung n chye ai hpara ningnan ni hpe mung, Israela ni galoi mung n madat n mara yu ai hpara ni hpe mung hkungga nawng ya ma ai.

¹⁸Shanhte hpe asak jaw ai wa, chyalai n-gun hte hpring ai hkye la MADU, shanhte a Karai Kasang hpe nan malap kau manu ai.

¹⁹“Dai lam hpe MADU mu nna masin kahtet pawt sindawng shi a shayi shadang sha ni hpe ningdang kau wu ai.

²⁰Shi gaw, ‘Ngai shanhte hpe kachyi mi pyi karum la na nngai n rai,’ ngu nna tsun wu ai; ngai gaw ndai du ja let sadi n dung ai amyu masha ni hta hpa byin wa na lam yu yu na we ai.

²¹Shanhte a hpara sumla ni hte ngai hpe masin pawt shangun nna; mying gun hpara ni, ngai hpe yu manawn nga ma ai; dai hpara ni mahtang karai jet ni n rai ma ai. Dai rai nna, hti n mai ai amyu hpe ngai lang nna shanhte hpe masin pawt shangun na nngai; angawk angak re ai amyu hte mung shanhte hpe manawn shangun na nngai.

²²Nye a masin kahtet ai gaw wan zawn grung wa nna, ginding aga ntsa na arai shagu hpe hkru kau na ra ai. Dai gaw mungkan ga a lawu tsang [6] de du hkra dep nna, bum ni a npawt nhpang ni hpe hkru kau na ra ai.

²³“Ngai gaw shanhte a ntsa e n htum lu ai ru yak tsin-yam tsindam ni dat dat nna; nye a pala ni yawng hpe shanhte hpe ninghkap ai hta lang na we ai.

²⁴Shanhte gaw kawsi kyet nna machyi makaw hte si mat na mara ai; hkrit hpa ana ahkya ni hte mung shanhte si na mara ai. Shanhte hpe htim na nam na matse labye dusat ni hpe mung, achye na atuk rawng ai lapu ni hpe mung shangun dat na we ai.

²⁵Hpyen majan gaw nmaw lam ni hta si hkrung si htan shabyin nna; hkrit kajawng hpa gaw dum nta ni hta adup hkra na ra ai. Mahkawn hte shabrang ni si htum mat nna; chyu chyu ai ma chyangai ni hte dingla baw hpraw ni pyi lawt lu na mara ai n rai.

²⁶Kadai mung shanhte hpe n dum lu manu ga, shanhte hpe ngai tsep kawp shamyit kau na mawe ai.

²⁷Rai ti mung shanhte a gumlau hpyen ni nye a masha ni hpe dang kau ma ai shaloi, shanhte lu galaw ai ngu nna shanhte a shakawng shakat gumrawng na lam hpe ngai ahkang n lu jaw nngai; shanhte hpe ngai hkum nan agrawp kau nngai.’

²⁸“Israela gaw byak ai amyu baw rai nga ai rai nna; hpaji byeng-ya kachyi mi mung rawng nga ma ai n rai.

²⁹Shanhte gaw hpa lam a majaw sum mat ma ai hpe n mu lu ma ai; kaning rai byin sai lam hpe shanhte n chye na lu ma ai.

³⁰Marai langai sha masha hkying mi hpe, marai lahkawng e sha mun mi hpe hpa majaw dang kau lu a ta? Dai MADU shanhte a Karai Kasang shanhte hpe kau da nu ai; chyalai n-gun hte hpring ai shanhte a Karai Kasang shanhte hpe ap kau nu ai.

³¹Shanhte a gumlau hpyen ni nan, shanhte a hpara ni n-gun kya nga ma ai hpe mung, Israela Karai Kasang zawn chyalai n-gun n rawng nga ai hpe mung shanhte chye ma ai.

³²Shanhte a gumlau hpyen ni mahtang Sodom hte Gomora mare yan zawn arawn alai hten za mat nhtawm; hka nna gung rawng ai sabyi si si ai sabyi ru ni hte mung,

³³lapu atuk hte galaw ai sabyi ntsin hte mung bung nga ai.

³⁴“Shanhte a gumlau hpyen ni kaning rai galaw manu ai hpe, dai MADU dum ya nga ai; shanhte hpe ari jaw na htuk ai aten hpe shi ala nga ai.

³⁵Dai MADU gaw shanhte hpe matai htang nna, ari jaw na rai wu ai; shanhte hkrat sum ai aten du wa nna, kyindut hkrum na nhtoi ni wa nga sai.

³⁶Shanhte n-gun htum mat ai hpe shi mu ai shaloi, dai MADU gaw shi a amyu masha ni hpe hkye mawai la na ra ai. Shanhte hpe karum la na masha n nga ai hpe shi mu ai shaloi, shi gaw shi hpe daw jau ai ni hpe matsan dum ai myit madun dan na ra ai.

³⁷Shaloi, dai MADU gaw shi a amyu masha ni hpe, “Nanhte kam hpa yu manit dai dai chyalai n-gun hte hpring ai gumgun hpara ni kanang rai nga sani?

³⁸Nanhte dai ni hpe nawng jau ai shagu hkungga hta na sau man hte shanhte hpe jaw sha nna, lu na sabyi ntsin shanhte hpe nawng ya manit dai. Ya chyawm gaw shanhte nanhte hpe sa karum manu ga; shanhte gaw nanhte a shingbyi shara de kagat sa nna hkye la manu ga.

³⁹“‘Ngai hte ngai chyu sha Karai Kasang rai nga nngai; karai shaje kadai mung karai jet n rai nga ai. Ngai sat nna ngai jahkrung nngai, ngai jahpye nna ngai shamai nngai; ngai galaw ai lam hpe kadai e mung ninghkap lu ai n rai.

⁴⁰Ngai gaw teng teng ahkrung nga ai Karai Kasang rai nga nngai hte maren; nye a lata hpe ngai sharawt nhtawm dagam let,

⁴¹tu ala ai nye a nhtu hpe ngai galaw garang nna, teng man rap ra ai amu galaw nga sai hpe mu na mara ai. Nye a gumlau hpyen ni hpe ngai matai htang nna, ngai hpe n ju n dawng ai ni hpe ari jaw na mawe ai.

⁴²Nye a pala ni shanhte a asai hpe kahte hkrat shangun nna, ngai hpe ninghkap ai ni yawng hpe nye a nhtu hte kahtam sat kau na we ai. Ngai hpe htim gasat ai ni kadai hpe mung shalawt dat na we ai n rai; hkala hkrum ai ni hte bawng masha ni pyi si htum mat na mara ai.’

⁴³“Masha amyu baw ni e, nanhte gaw dai MADU a amyu masha ni hpe shakawn lu na rai myit dai; shanhte hpe sat ai ni yawng ari jaw ai hkrum na rai ma ai. Gumlau hpyen ni hpe shi matai htang nna, shi a amyu masha ni galaw shut ai yubak mara hpe raw dat ya na rai wu ai.

⁴⁴Mawshe hte Nun a kasha Yawshu yan gaw ndai mahkawn mangoi ga hpe shakrai dan mu ai rai nna Israela amyu masha ni dai hpe na lu ma ai.

⁴⁵Mawshe gaw Karai Kasang a sharin achyin ai ga matsun dai amyu masha ni hpe jaw ya ngut jang,

⁴⁶shi gaw, “Dai ni, ngai nanhte hpe jaw ya sai hkang da ai ga yawng mayawng hte hpe teng teng madat mara hkan sa na rai myit dai. Ndai tara ga ni hpe nanhte a kashu kasha ni bai htawn tsun dan lu na rai myit dai: shanhte mung Karai Kasang a sharin achyin ai ga ni yawng hpe sadi sahka hte madat mara hkan sa na rai ma ai.

⁴⁷Ndai sharin shaga ai ga ni gaw kaman nmai nhkai re ai ga ni sha n rai; dai gaw nanhte a asak hkrun lam rai nga ai; nanhte madu la hkyen ai dai Yawdan hka wora hkran na mungdan hta asak galu nga malit ga gaw, dai ga ni hpe madat mara hkan sa nga mu,” ngu nna tsun wu ai.

⁴⁸Dai MADU gaw dai shani jang, Mawshe hpe, “Yerihko mare hte tawtap re ai Moba mung hta nga ai Abarim Bum ni de,

⁴⁹sa wa nhtawm Nebo bum de lung wa nna, Israela amyu masha ni hpe ngai jaw hkyen ai Hkanan mung hpe mada la u.

⁵⁰Na a nhpu Arun gaw Hora Bum e si mat ai zawn, nang mung ndai bum ntsa hta si mat na rai ndai,

⁵¹hpa majaw nga yang, nan lahkawng mahtang Israela amyu masha ni a man e, ngai hta sadi n dung kau nga manit dai. Zin nam mali, Kadesha mare makau na Meriba hka e nanhte nga nga myit yang, amyu masha ni a man e, nanhte ngai hpe n sawn n sang di myit dai.

⁵²Nang gaw dai mungdan hpe tsan tsan kaw na mu mada lu ti mung, Israela amyu masha ni hpe ngai jaw ai mungdan de nang shang lu na ndai n rai,” ngu nna tsun wu ai.