Read Jinghpaw Common Language Bible 2009 TARA JAHPRANG 33 Bible Online

TARA JAHPRANG 33 - Jinghpaw Common Language Bible 2009 bible

TARA JAHPRANG 33

¹Ndai gaw Karai Kasang a masha Mawshe, shi garai n si wa yang, Israela amyu masha ni hpe shaman ya ai ga ni rai nga ai.

²Dai MADU gaw Sina Bum kaw na yu wa nga ai; shi gaw Edom mung a ntsa e ate nga ai jan zawn rawt lung wa nna Paran Bum ntsa kaw na shi a amyu masha ni hpe shadan jahkung nga ai. Lamu kasa mun mi mung shi hte rau nga nga ai rai nna, shi a hkra lata hta grung ai wan tu nga wu ai.

³Dai MADU gaw shi a amyu masha ni hpe tsaw ra nga ai rai nna, shi hte seng ai ni hpe makawp maga ya nga ai. Dai rai nna, shi a lagaw nhpang e anhte gum dagup nna shi a hkang da ai ga ni hpe hkan sa ga ai.

⁴Anhte amyu baw ni a matu grau reng htum ai sali wunli ngu ai, Mawshe anhte jaw ya ai Tara hpe anhte madat mara hkan sa ga ai.

⁵Shanhte a amyu bawsang ni hte ningbaw ni rau hpawng nga ma yang, dai MADU gaw Israela amyu masha ni a hkawhkam tai nga sai.

⁶Mawshe chyawm gaw Rubin a amyu bawsang ni hpe, “Rubin amyu ni n law n htam nga ma ti mung, Galoi mung n si n htum mat mu ga,” ngu nna tsun wu ai.

⁷Shi gaw Yuda amyu bawsang hpe, “MADU e, Karum la na matu hpyi jahtau ai shanhte a nsen hpe madat mara ya nna Shanhte hpe kaga amyu bawsang ni hte rau shinggyin tawn u. MADU e, shanhte a matu gasat ya u; Shanhte a gumlau hpyen ni hpe ninghkap ai hta karum ya na rai ndai,” ngu nna tsun wu ai.

⁸Shi gaw Lewi amyu bawsang hte seng nna, ning nga nna tsun wu ai: “MADU e, nang gaw Urim hte Htumim lang nna na a myit ra ai hku madun dan nga ndai. Nang hta sadi dung ai Lewi shangun ma ni hte hpawn, Masa shara e shanhte hpe nang dinglik yu nit dai. Meriba hka kau e, shanhte hpe teng man ai sakse madun dan nit dai.

⁹Shanhte gaw tinang a kanu kawa, kahpu kanau hte kashu kasha ni hta grau nna, Nang hta sadi dung ai lam madun dan nga ma ai. Na a hkang da ai ga ni hpe shanhte madat mara nna, na a ga shaka hta sadi dung nga masai.

¹⁰Shanhte gaw na a Tara madat mara na matu na a amyu masha ni hpe sharin ya na mara ai; Na a tawn hkungri ntsa hta shagu hkungga ni hpe shanhte nawng jau na mara ai.

¹¹O MADU e, shanhte a amyu bawsang hta n-gun atsam rawng wa hkra karum ya mi; Shanhte galaw ai amu hta awng sharawng nga u law. Shanhte a gumlau hpyen ni galoi mung bai n rawt kabrawng lu mu ga, dai ni yawng hpe agrawp kau u.”

¹²Shi gaw Benyamin amyu bawsang hte seng nna ning ngu tsun wu ai: “Ndai amyu bawsang hpe dai MADU tsaw ra nna makawp maga da nga ai; Shi shanhte hpe shani tup makawp maga ya nna, shanhte a ka-ang e shi nga nga ai.”

¹³Shi gaw Yosep amyu bawsang hte lakap nna ning ngu tsun wu ai: “Dai MADU gaw shanhte a lamu ga hta lamu Marang hte mung, ginding aga lawu tsang na hka hte mung, shaman ya nga u ga law.

¹⁴Jan a shingkang hte myin ai namsi namsaw hte mung, Du hkra ladaw shagu hta pru ai dai dwi sau nna kaja htum ai namsi namsaw ni hte mung shanhte a lamu ga hta shaman ya ai hkrum mu ga.

¹⁵Moi moi na shanhte madu da ai kawng ni hta reng ai namsi hte hpring nga mu ga.

¹⁶Shanhte a lamu ga hta mai kaja ai ngamu ngamai lam yawng hte hpring nga u ga; Wan hkru nga ai singwum kata kaw na ga shaga ai dai MADU a mai kaja lam a majaw shaman chyeju hkam la lu mu ga. Yosep gaw kahpu kanau ni hta ningbaw tai nga ai majaw; Shi a amyu bawsang hta dai shaman chyeju ni anga nga nu ga law.

¹⁷Usu n-gun mung, hpawlam nrung mung Yosep hta rawng nga ai; Shi a nrung gaw Manashe a matu hkying hkying rai nna, Ehprim a matu mun mun rai nga ai. Dai ni hte masha amyu ni hpe daru nna, lamu ga htum hkra dai ni hpe kanawng sit kau na mu ai.”

¹⁸Zebulun hte Yisahka amyu bawsang ni hte lakap nna ning ngu tsun wu ai: “Zebulun gaw panglai ntsa e hkawm sa nna, hpaga ga ai amu hta ngamu ngamai wa nu ga; Yisahka a sut gan mung shi a nta hta law jat wa nu ga.

¹⁹Shan gaw maigan masha ni hpe bum de shaga la nhtawm; Dai yang e, jaw ai hkungga nawng jau na mara ai. Panglai na sut hpungnung hte hkin-gau mayan e Taw ai zaibru kata na sut nhprang ni hpe shaw la lu na ma ai.”

²⁰Gad amyu bawsang hte lakap nna ning ngu tsun wu ai: “Gad a lamu ga hpe maden jat ya ai Karai Kasang hpe shakawn mu; Gad gaw hkanghkyi zawn ala nga nna, lata sha n-ga, baw hpe pyi amya je kau na ra ai.

²¹Shanhte a matu kaja htum ai lamu ga hpe lata la nna; Ningbaw wa a gambum shanhte hta san da nga ai. Israela a ningbaw ni rau hpawng nga ma yang, Dai MADU a hkang da ai ga ni hte tara ni hpe shanhte madat mara hkan sa nga ma ai.”

²²Dan amyu bawsang hte lakap nna, ning ngu tsun wu ai: “Dan gaw hkanghkyi uram rai nga ai; shi gaw Bashan mung na gumlawt pru na ra ai.

²³Naphtali amyu bawsang hte lakap nna ning ngu tsun wu ai: “Naphtali gaw dai MADU a shagrau sha-a ai myi man a majaw; Hkru kat ai shaman chyeju hkam la nga ai; Shanhte a lamu ga gaw Galile Nawng kaw nna dingda de du hkra maden nga ai.”

²⁴Ashe amyu bawsang hte lakap nna ning ngu tsun wu ai: “Ashe gaw kaga amyu bawsang ni hta grau nna Shaman chyeju hkam la nga ai; Shi a kahpu kanau ni hte myit hkrum nga u ga, shi a Lamu ga gaw tsanlun hpun ni hte sut su nga u ga.

²⁵Shi a mare ni hpri chyinghka hte makawp maga da na rai wu ai; Shi gaw prat dingsa shim lum ai hte nga lu na rai wu ai.”

²⁶Israela amyu masha ni e, nanhte a Karai Kasang hte bung ai karai mi n nga; shi a hpung shingkang hta jawn, Sumsing lamu de yawn; nang hpe karum la na nga, sumwi hta jawn nna du sa nga.

²⁷Karai Kasang gaw chyi nma, pri npra kaw na na a Dahpran shara rai nga ai; shi a htani htana na lata lahpum gaw nang hpe shadaw ya nga ai. Nanhte a shawng e shi lung wa nna, gumlau hpyen ni yawng hpe jahten shabyak kau mu nga, tsun let nanhte a hpyen ni hpe shi gawt shapraw kau wu ai.

²⁸Shing rai, lamu de na numri hkrat ai hte ga kata na hka hpawk ni pru nhtawm, nai mam hte sabyi ntsin ing ai lamu ga hta, Yaku amyu matu ni ngwi pyaw sim sa ai hte shim ai hku nga lu na rai ma ai.

²⁹Israela e, nang gaw kade sha a nga n hka! Dai MADU hkye hkrang la sai amyu baw ngu ai nanhte hte bung ai wa mi kadai n nga nga ai. Dai MADU shi nan nanhte hpe makawp maga ya nna awng padang jaw jaw ya ai nanhte a makawp ninggang hte nhtu rai nga ai. Nanhte a gumlau hpyen ni matsan dum la na matu hpyi nem wa nna, nanhte mung shanhte hpe kabye dip lu na marin dai law.