Read Jinghpaw Common Language Bible 2009 TARA JAHPRANG 4 Bible Online

TARA JAHPRANG 4 - Jinghpaw Common Language Bible 2009 bible

TARA JAHPRANG 4

¹Dai hpang Mawshe gaw amyu masha ni hpe, “Ngai nanhte hpe sharin ya nga ai tara ni yawng hpe madat mara nga mu; shaloi dai MADU nanhte a kaji kawa ni a Karai Kasang nanhte hpe jaw ya nga ai lamu ga hpe nanhte madu la nna nga nga lu na marin dai.

²Ngai nanhte hpe hkang da ai lam hta hpa mung jat bang lu na n rai; dai hta na hpa mung shaw kau lu na n rai. Ngai nanhte hpe jaw da sai dai MADU nanhte a Karai Kasang a hkang da ai ga matsun ni hpe madat mara na rai myit dai.

³Nanhte hkum nan mung Peora Bum e, dai MADU galaw dan sai amu hpe mu manit dai. Dai yang e Bala hpara nawku ai masha shagu hte hpe shi shamyit kau nu ai,

⁴rai ti mung dai MADU nanhte a Karai Kasang hta kam sham manoi nga sai nanhte chyawm gaw dai ni du hkra naw hkrung nga lu manit dai.

⁵“Dai MADU nye a Karai Kasang ngai hpe tsun ai tara ni yawng ngai nanhte hpe sharin achyin ya mani ai. Nanhte shang madu la hkyen nga ai mungdan hta dai matsun maroi ga hte hkang da ai tara ni hpe madat mara nga mu.

⁶Dai tara ni hpe sadi sahka hte hkan shatup nga mu; shing rai jang, nanhte gaw hpaji byeng-ya hta kade wa kunghpan nga myit dai lam masha amyu baw ni hpe madun dan lu na rai myit dai. Shanhte mung dai matsun maroi tara ni hpe na yang, ‘Ndai amyu baw ni gaw hpaji byeng-ya hte chye na hkawn hkrang ai nyan marai lu la nga manu hka!,’ ngu nna tsun na rai ma ai.

⁷“Dai MADU anhte a Karai Kasang gaw anhte hte ni nga ai zawn kaning re ai amyu kaba hta mung shi hpe ra kadawn yang, ani sha nga lu ai hpara n nga nga ai. Karum la na matu anhte shaga shagu shi htan ya mi ai.

⁸Dai ni ngai nanhte hpe sharin achyin ya ni ai matsun maroi ga ni gaw kaning re ai amyu kaba gale ni hta mung, dai zawn re ai mi n lu nga ma ai.

⁹Nanhte hkum nan sadi maja nga mu! Nanhte a myi hte chyaw mu lu sai lam hpe n malap kau ai sha ahkrung nga dingsa shangang shakang da myit; nanhte a myit masin hta a matsing nga mu. Shi gaw ngai hpe, ‘Amyu masha ni hpe jahpawng tawn u; shanhte hkrung nga dingsa nye a ga hpe madat mara hkan sa nhtawm dai hte maren shanhte a kashu kasha ni hpe sharin achyin ya lu hkra ngai tsun ai ga shanhte hpe na la shangun mayu nga nngai,’ ngu nna Sina Bum [3] hta dai MADU nanhte a Karai Kasang a man e tsap nga ai shani na matsun maroi ga, nanhte a kashu kasha ni hpe tsun dan mu.

¹⁰

¹¹“Nanhte gaw sin mang ai hte htat ai wan hkut sumwi ni ka-up nga nna lamu du hkra wan grung nga ai bum lagaw de kaning rai sit sa nna tsap nga myit dai lam mung nanhte a kashu kasha ni hpe tsun dan mu.

¹²Dai MADU gaw wan kata kaw na nanhte hpe kaning rai ga shaga myit dai hpe mung, shi a hkum hkrang hpe n mu lu ti mung shi shaga ai ga hpe nanhte kaning rai na lu myit dai lam hpe mung, shanhte hpe tsun mu.

¹³Shi nanhte hte tawn da ai ga shaka hpe shatup nna hkan galaw nga na matu mung, nlung lungpa lahkawng hta shi ka da nu ai Tara Kanu Shi hpe nanhte madat mara hkan sa lu na lam mung, shi shanhte hpe tsun nu ai.

¹⁴Nanhte hpe sharin achyin ya na matu dai MADU ngai hpe hkang da ai tara ga ni yawng hpe nanhte shang madu la hkyen ai mungdan hta nanhte hkan sa madat mara lu na rai myit dai.

¹⁵“Dai MADU gaw Sina Bum e, wan kata kaw nna nanhte hpe ga shaga myit dai shaloi, kaning re ai hkrang hpe mung n mu nga myit dai. Shinggyim lasha hte mung,

¹⁶numsha hte mung bung ai hkrang sumla nanhte a matu galaw let yubak n galaw hkrup myit ga, tinang nang a mai kaja ai lam hta shangang shakang nga mu.

¹⁷Bai yam nga hkrang, shing n rai ntsa malen u a hkrang,

¹⁸ga ntsa gumrawt hkawm ai dusat amyu a hkrang, hka kata e rawng ai nga amyu baw a hkrang ni hte bung ai tawk la ai sumla ni galaw lu na n rai.

¹⁹Nanhte mu lu ai lamu na ajan, shata hte shagan ni hpe nawku daw jau ai agung alau mung n hkrum nga myit ga; dai gaw kaga masha yawng a matu dai MADU nanhte a Karai Kasang san da ya ai ni rai nga ai.

²⁰Rai ti mung nanhte gaw dai ni rai nga ai hte maren, shi a amyu masha jet tai nga myit ga nga, Egutu mung a grung nga ai wan htung kaw na mawai da ai amyu masha ni rai nga myit dai.

²¹Nanhte a majaw dai MADU nanhte a Karai Kasang mung ngai hpe masin pawt nna Yawdan hka n rap sa lu na hte nanhte hpe shi jaw ya ai dai ga sau hte hpring nna ningru ningja ai mungdan de n shang lu na lam dagam kau nu ai.

²²Ngai gaw ndai ga e si na ni ai; hka hpe galoi mung rap lu sana ni ai n rai; rai ti mung nanhte chyawm gaw rap lu nna dai ga sau hte hpring nna ningru ningja ai mungdan hpe madu la lu na rai myit dai.

²³Dai MADU nanhte a Karai Kasang nanhte hte tawn da ai ga shaka hpe n malap kau myit ga, sadi nga mu; shi hkang da sai ga hpe hkan sa madat mara nhtawm nanhte a matu kaning re ai hpara sumla ni hpe mung hkum tawk myit;

²⁴hpa majaw nga yang, dai MADU nanhte a Karai Kasang gaw grung nga ai wan shinglet zawn rai nna shingjawng kashun ai ni hpe yu matsan dum nga ai n rai.

²⁵“Nanhte gaw kashu kasha shaprat nna dai mungdan e aten na na nga wa myit dai shaloi mung, nanhte a matu ngu nna lama ma a hkrang hte bung ai hpara sumla hpe tawk let yubak mara hkum galaw shapraw myit. Dai zawn re ai amu gaw dai MADU a man e n hkru ai amu rai nga ai hte dai gaw shi hpe masin pawt shangun na rai myit dai.

²⁶Ngai gaw sumsing lamu hte ginding aga a mying gang let, nanhte hpe sakse hkam da made ga, nye a ga hpe nanhte n madat n hkan sa ai rai yang, kade n na yang, dai mungdan hta htum mat na rai myit dai. Yawdan hka rap nna nanhte shang madu la hkyen ai mungdan hta grai na hkra hkrung nga lu na myit dai n rai. Nanhte gaw tsep kawp shamyit kau ai hkrum na rai myit dai.

²⁷Dai MADU mung nanhte hta kachyi mi sha ngam mat hkra, nanhte hpe kaga masha amyu baw ni a kata de shabra kau na marin dai.

²⁸Dai shara hkan e, myi n mu, na n na, n lu n sha chye ai hte manam n chye ai hpara ni ngu ai shinggyim masha a lata hte tawk da ai hpun hpara, nlung hpara ni hpe nanhte daw jau na marin dai.

²⁹“Nanhte gaw dai hkan e dai MADU nanhte a Karai Kasang hpe marit let myit mada nna, nanhte a myit masin kraw lawang mahkra hte shi hpe hkan tam myit yang chyawm gaw mu lu na marin dai.

³⁰Nanhte hta ndai lam ni yawng byin wa nna ru yak kyin dut hkrum sha myit dai shaloi, kaning n di, dai MADU hpang de kayin wa nhtawm shi a ga madat lu na marin dai.

³¹Shi gaw matsan dum chye ai Karai Kasang rai nga ai majaw nanhte hpe kau da na n rai; shamyit jahtum kau na wu ai n rai. Shi hkum nan nanhte a kaji kawa ni hte tawn da ai ga shaka hpe mung malap kau na wu ai n rai.

³²“Karai Kasang gaw ginding aga ntsa e shinggyim masha hpe hpan da nna nanhte garai n shangai yang lai mat wa sai aten kaw nna ndai aten du hkra na lam ni yawng hpe nhtang gawn yu mu. Ginding aga ting hta gawn yu mu. Shawng de ndai daram kaba ai amu byin yu sani? Ndai zawn re ai shiga kadai wa na yu myit ni?

³³Nanhte hkrung nga lu myit dai zawn hpara shaje gaw masha gale ni hpe wan kata kaw na ga tsun ai nsen hpe na lu ai hpang, naw hkrung nga lu ai masha ni nga nga yu sani?

³⁴Dai MADU nanhte a Karai Kasang gaw nanhte a matu Egutu mung hta e galaw dan manit dai zawn kaga amyu baw hta na amyu masha ni hpe woi la nhtawm shi a amyu masha shatai la gwi ai hpara shaje nga nga yu sani? Shi gaw nanhte a man e shi a daru magam n-gun hte atsam marai hpe lang nhtawm ana zinli hte hpyen majan, mauhpa lamik kumla hte hkrit hpa amu ni hpe shapraw dan nu ai.

³⁵Dai MADU chyu sha Karai Kasang rai nga ai hte shi hta kaga karai shaje n nga nga ai hpe sakse hkam na matu, dai MADU gaw ndai lam madun dan nu ai.

³⁶Shi gaw nanhte hpe sharin achyin lu u ga nga, sumsing lamu de nna shi a nsen nanhte hpe na shangun manit dai; ndai ginding aga ntsa e mung shi a chyoi pra ai wan nanhte hpe mu shangun nna dai kata kaw na nanhte hpe ga shaga nu ai.

³⁷Nanhte a nji nwa ni hpe shi tsaw ra wu ai majaw nanhte hpe lata la nu ai rai nna shi a galu kaba ai daru magam n-gun hte shi nan nanhte hpe Egutu mung kaw na woi shapraw wa nu ai.

³⁸Nanhte rawt lung wa myit dai shaloi, shanhte a lamu ga hpe nanhte matut madu lu na matu, nanhte hta grau kaba nna n-gun rawng ai amyu baw ni hpe shi shaden kau ya manit dai. Shi gaw nanhte hpe shang sha shangun nna nanhte madu la na rai nga ai shanhte a lamu ga nanhte hpe jaw ya na ru ai.

³⁹Dai rai nna dai MADU gaw sumsing lamu hte ginding aga ntsa na Karai Kasang rai nga ai hpe myit dum ai hte galoi mung hkum malap kau nga myit. Karai shaje n nga nga ai.

⁴⁰Nanhte hte nanhte a amyu matu ni yawng ngamu ngamai wa lu myit ga, dai ni, ngai nanhte hpe jaw da sai shi a tara ni yawng hpe madat mara hkan sa nga mu; shaloi dai MADU nanhte a Karai Kasang nanhte hpe htani htana a matu jaw ya nga ai mungdan hta prat tup jaw lup matut nna nga lu na rai myit dai,” ngu nna tsun wu ai.

⁴¹Dai hpang gumlau hpyen mung n tai yu ai masha langai hpe ndum shami sat kau hkrup ai wa sa hprawng shingbyi lu na mare masum hpe Yawdan hka a sinpraw maga e Mawshe lata san da wu ai. Shi gaw dai mare langai ngai hta hprawng shingbyi lu nhtawm sat kau ai n hkrum na wu ai.

⁴²

⁴³Dai mare ni gaw Rubin amyu bawsang a matu nam mali pa hta nga ai Bezera; Gad amyu bawsang a matu Gilead mung na Ramot hte Manashe amyu bawsang a matu Bashan mung na Golan rai nga ai.

⁴⁴Mawshe gaw Israela amyu masha ni hpe Karai Kasang a tara ni hte sharin shaga ga ni jaw ya nga ai.

⁴⁵Ndai gaw Shanhte Egutu mung na pru mat wa ai hpang, Heshbon mare e hkaw dung ai Amori Hkawhkam Sihon a lamu ga, Yawdan hka a sinpraw hkran Betpeora hte tawtap na kadit e shanhte hpe jaw ya ai tara ni rai nga ai. Shanhte gaw Egutu mung na pru wa ai shaloi Mawshe hte Israela amyu masha ni shi hpe dang kau ma ai.

⁴⁶

⁴⁷Shanhte gaw shi a lamu ga hpe mung, Yawdan hka a sinpraw maga hkaw dung ai kaga Amori hkawhkam langai rai nga ai Bashan Hkawhkam Oga a lamu ga hpe mung madu la kau ya ma ai.

⁴⁸Dai lamu ga gaw Arnon hka hkin-gau ntsa e de ai Aroera mare kaw nna dingdung maga Hermon ngu ai Sirion bum dingyang maden nga ai.

⁴⁹Yawdan hka a sinpraw maga de nga ai ginwang yawng hte hpawn dingda maga Jum Nawng htep de a sinpraw maga na Pisga bum lagaw du hkra dam nga ai.