Read Jinghpaw Common Language Bible 2009 TARA JAHPRANG 5 Bible Online

TARA JAHPRANG 5 - Jinghpaw Common Language Bible 2009 bible

TARA JAHPRANG 5

¹Mawshe gaw Israela masha ni yawng hpe shaga jahpawng nna shanhte hpe, “Israela amyu masha ni e, dai ni, ngai nanhte hpe jaw ya nga ai hkang da ai tara ni hpe madat mu; dai ni hpe sharin la nna nanhte hkan galaw na rai myit dai.

²Dai MADU anhte a Karai Kasang gaw Sina Bum e, anhte a kawa ni hte sha n rai;

³dai ni du hkra asak hkrung nga ai anhte yawng hte mung ga shaka tawn da wu ai.

⁴Dai MADU gaw dai bum e wan kaw na nanhte hte myi man chyaw ga tsun shaga manit dai.

⁵Nanhte gaw dai wan hkrit nna bum de n lung gwi myit dai shaloi dai MADU tsun ai ga nanhte hpe htawn tsun ya na matu shi hte nanhte a lapran e ngai tsap nga nngai. Shaloi dai MADU gaw,

⁶‘Ngai gaw nanhte mayam tai nga ai Egutu kaw na hkrang shaw la ai nanhte a MADU Karai Kasang rai nga nngai.

⁷“ ‘Ngai hta lai karai shaje hpe hkum nawku myit.

⁸“ ‘Sumsing lamu, ginding aga hte ga a npu na hka hta rawng ai baw a hkrang hpa hte mung bung ai sumla ni hpe nanhte a matu hkum galaw hkum shachyaw myit.

⁹Kaning san ai hpara sumla hpe mung hkum kadawng hkum naw myit; Ngai gaw dai MADU nanhte a Karai Kasang rai nga nngai majaw shingjawng kashun ai hpe hkam sharang lu na nngai n rai. Dai rai nna ngai hpe n dawng n yawt ai ni hte shanhte a matu mara ni hpe prat ban masum mali du hkra ari jaw na mawe ai.

¹⁰Ngai hpe tsaw ra nna nye a hkang da ai tara ni hpe hkan sa madat mara ai ni hpe chyawm gaw prat ban hkying mun du hkra nye a tsaw ra myit amadun nga na nngai.

¹¹“ ‘Nye a mying ningsang hpe n hkru n shawp ai amu a shatawng shada ai lam hta hkum lang nga myit; hpa majaw nga yang nye a mying ningsang hpe n gawn n sawn di ai wa kadai hpe mung ngai MADU nanhte a Karai Kasang nan ari jaw na we ai.

¹²“ ‘Dai MADU nanhte a Karai Kasang rai nga ai ngai nan nanhte hpe hkang da made ai hte maren Bansa Nhtoi hpe shachyoi shapra na dai hpe hkan galaw nga mu.

¹³Nanhte gaw nhtoi kru ya tup magam bungli galaw lu na rai myit dai;

¹⁴rai ti mung sanit ya nhtoi gaw nye a matu ap nawng da ai bansa ai shani rai nga ai; dai shani e, nang hte na a shayi shadang sha ni mung, nanhte a mayam ni mung, yam nga ni mung, nanhte a mung hta shanu nga ai maigan masha kadai mung magam bungli shachyen lu na n rai. Nanhte bansa la lu myit dai hte maren mayam ni mung ban sa la na ra nga ma ai.

¹⁵Nanhte gaw Egutu mung e mayam tai nga myit dai shaloi, nanhte a Karai Kasang ngai MADU nan nye a galu kaba ai daru magam n-gun hte nanhte hpe hkrang shaw la sai hpe adum nga mu. Dai lam a majaw Bansa Nhtoi hpe hkan shatup nga na ngai nanhte hpe hkang da ni ai.

¹⁶“ ‘Ngai MADU nanhte a Karai Kasang nan nanhte hpe jaw ya nga ai mungdan hta asak galu nna ngamu ngamai lu myit ga, ngai nanhte hpe hkang da ni ai hte maren tinang a kanu kawa ni hpe hkungga lara rai nga mu.

¹⁷“ ‘Masha sat ai amu hkum shut myit.

¹⁸“ ‘La shaw num shaw amu hkum shut myit.

¹⁹“ ‘Masha a arai hkum lagu myit.

²⁰“ ‘Kadai hpe mung n teng n man ai hku mara hkum shagun myit.

²¹“ ‘Kaga masha wa a madu jan hpe mung ra katsit ai myit hkum rawng myit; dai wa a dum nta hte lamu ga hpe mung, mayam ni hpe mung, shi a dumsu hte lawze ni hpe mung shi hte seng ai hpa hpe mung hkum ra marit nga myit,’ ngu nna tsun wu ai.

²²Ndai ni gaw bum e nanhte hpawng nga myit dai shaloi, wan hte htat ai sumwi ni a kata kaw nna nsen kaba hte tsun nhtawm nanhte yawng hpe jaw ya ai hkang da ai ga ni rai nga ai. Dai rai nna lungpa lahkawng hta Jep ai Tara ni hpe ka nna ngai hpe ap ya ai hta lai nna shi hpa mung jaw ya nga ai n rai.

²³Dai bum ting hta wan grung nna, nsin kata na nsen nanhte na myit dai shaloi, nanhte a ningbaw ni hte nanhte a amyu bawsang ni hta na du salang ni ngai kaw sit sa nhtawm,

²⁴‘Wan kata kaw nna shi tsun ai ga hpe anhte na ga yang, dai MADU anhte a Karai Kasang gaw shi a galu kaba ai daru magam n-gun hte hpring ai hpung shingkang madun dan mi hka! Karai Kasang shi nan masha hte ga shaga kau wu tim, masha gaw naw hkrung lu nga ai hpe dai ni, anhte mu lu saga ai.

²⁵Rai ti mung anhte hpa majaw bai si na matu asak dan shara nga ang ga ta? Dai hkrit hpa wan gaw anhte hpe shamyit kau na ra ai. Dai MADU anhte a Karai Kasang tsun ai ga hpe anhte bai na ga yang gaw anhte teng teng si lu na ga ai.

²⁶Wan kata kaw na shaga ai dai ahkrung nga ai Karai Kasang a nsen hpe na ai shinggyim masha kadai wa hkrung nga lu a ta?

²⁷Mawshe e, nhtang sa wa su, dai MADU anhte a Karai Kasang tsun matsun ai hpe madat la nhtawm shi nang hpe kaning nga tsun ai lam anhte hpe bai tsun dan mi. Shi a ga hpe anhte madat nna hkan galaw na ga ai,’ ngu nna tsun ma ai.

²⁸“Shing ngu tsun ai ga hpe dai MADU na wu ai rai nna shi gaw ngai hpe, ‘Ndai amyu masha ni tsun ai ga hpe ngai na ni ai, shanhte tsun ai ga teng nga malu ai.

²⁹Shanhte dai zawn tut nawng hkam sha nga ma hka! Ngai hpe tut nawng shagrau sha-a nna nye a hkang da ai ga yawng hpe hkan galaw mu ai rai yang chyawm gaw, shanhte hte shanhte a matu mara ni a lam magup hta htani htana ngamu ngamai wa na rai ma ai.

³⁰Shanhte a sum ni de nhtang mat wa na matu shanhte hpe sa tsun su.

³¹Rai ti mung, Mawshe e, nang chyawm gaw ndai yang e ngai hte rau nga nga na rai ndai. Ngai nang hpe nye a hkang da ai ga ni hte tara ni yawng jaw ya na de ai. Ngai shanhte hpe jaw ya nga ai mungdan hta shanhte hkan nga na matu, dai hkang da ai tara, amyu masha ni hpe sharin achyin ya na rai ndai,’ ngu nna tsun wu ai.

³²“Israela amyu masha ni e, dai MADU nanhte a Karai Kasang nanhte hpe hkang da manit dai hte maren, lam magup hpe hkrak hkrak hkan galaw lu na rai myit dai. Shi a hkang da ai tara hpa hpe mung n madat n mara hkum rai myit.

³³Nanhte madu la na mungdan hta tut nawng ashanu nga nna lam magup hta ngamu ngamai wa malit ga; hkang da ai lam yawng mayawng hpe hkan sa madat mara nga myit law.