Read Jinghpaw Common Language Bible 2009 TARA JAHPRANG 9 Bible Online

TARA JAHPRANG 9 - Jinghpaw Common Language Bible 2009 bible

TARA JAHPRANG 9

¹“Israela amyu masha ni e, madat mu! Nanhte hta grau kaba nna n-gun grau ja ai masha amyu baw ni madu da ai mungdan hpe dai ni, nanhte Yawdan hka rap nhtawm sa madu la na sha rai manit dai. Shanhte a mare ni hpe lamu dep bunghku ni hte kum shinggrup da nga ai.

²Dai mung na masha ni gaw galu kaba nna n-gun ja ai masha ni rai nga ma ai majaw kadai mung shanhte a man e n tsap lu nga ai ngu nna tsun gara ai lam hpe nanhte na yu na manit dai.

³Rai ti mung dai MADU nanhte a Karai Kasang gaw grung ai wan zawn nanhte a shawng e sa wa na rai nga ai hpe dai ni, nanhte nan mu lu na marin dai. Shi a ga sadi hte maren nanhte rawt lung wa myit yang, shi shanhte hpe dang kau na rai wu ai rai nna nanhte mung shanhte hpe gawt shapraw kau lu ai hte shanhte hpe alawan shamyit kau lu na rai myit dai.

⁴“Dai MADU nanhte a Karai Kasang gaw nanhte a matu shanhte hpe shaden kau ya ai hpang, nanhte dai hpe lu la ging saga ai majaw sha shi anhte hpe woi shawn nna dai mungdan hpe madu la shangun mani ai, ngu nna nanhte nan n tsun hkrup myit ga. Dai hku n rai law, shanhte nan n hkru n shawp ai ni rai nga ma ai majaw sha, MADU gaw dai masha ni hpe nanhte a matu shaden kau ya na rai nga ai.

⁵Nanhte gaw mai kaja nga nna teng man ai amu hpe galaw nga myit dai majaw dai MADU nanhte hpe shanhte a mungdan hpe madu la shangun myit dai n rai; shanhte nan n hkru n shawp ai a majaw mung, nanhte a nji nwa Abraham, Isak hte Yaku ni hte tawn da ai ga sadi hpe shadik shatup na shatawng shada da ai lam a majaw mung, shi shanhte hpe shaden kau na rai wu ai.

⁶Dai MADU gaw nanhte lu la ging ai majaw dai ga sau hte hpring nna ningru ningja ai lamu ga hpe jaw ya nga ai n rai nga ai hpe nanhte hkrak matsing da lu na rai myit dai. Dai hku n rai, nanhte gaw du ja ai amyu masha ni rai nga myit dai.

⁷“Nam mali kata e dai MADU nanhte a Karai Kasang hpe nanhte kaning rai masin shapawt nga myit dai hpe galoi mung hkum malap kau myit. Nanhte Egutu mung kaw na pru wa ai shani kaw nna ndai yang du wa ai aten du hkra nanhte shi hpe gumlau nga myit dai.

⁸Nanhte gaw dai MADU hpe Sina Bum e pyi pawt shangun myit dai rai nna nanhte hpe shamyit kau na daram pawt kau nu ai.

⁹Dai MADU nanhte hte tawn da ai ga shaka ka da ai lungpa wa la na matu bum de ngai lung wa ai shaloi dai yang e nhtoi mali shi ya, mali shi na, shat n sha, hka n lu ai sha wa nga nga nngai.

¹⁰Dai hpang nanhte bum e hpawng nga myit dai shani e, nanhte hpe wan kata kaw na shi tsun ai ga, shi a lata hte ka ai lungpa lahkawng dai MADU ngai hpe ap ya ni ai.

¹¹Rai sa, dai nhtoi mali shi ya, mali shi na hpring ai hpang, dai MADU gaw shi ka ai ga shaka lungpa lahkawng ngai hpe ap ya ni ai.

¹²“Dai hpang dai MADU gaw ngai hpe, ‘Egutu mung kaw na nang woi wa ai na a amyu masha ni gaw hten za ai hte n hkru ai amu ni galaw shapraw manu ai; dai sha n-ga, shanhte hkan sa galaw na matu ngai hkang da ai kaw na mung shanhte kayin mat wa manu ai hte shanhte a matu hpara sumla hpe mung galaw shachyaw manu ai majaw bum kaw na alawan yu wa su,’ ngu nna tsun wu ai.

¹³“Dai MADU gaw ngai hpe mung, ‘Ndai amyu masha ni kade wa du ja nga ma ai hpe ngai chye ni ai.

¹⁴Shanhte hpe galoi mung n dum mat hkra ngai shanhte hpe shamyit kau na myit shatawng nga nngai majaw ngai hpe hkap jahkring na hkum shakut et. Dai rai nna shanhte hta grau n-gun ja nna grau law htam ai amyu ngai nang hpe shatai na we ai,’ ngu nna tsun wu ai.

¹⁵“Dai rai nna ngai gaw ka da ai ga shaka lungpa lahkawng hpai let bum na kayin yu wa nngai; Wan shinglet mung bum kaw nna pru nga ai.

¹⁶Nanhte gaw dai MADU nanhte a Karai Kasang nanhte hpe jaw ya manit dai shi a hkang da ai ga hpe n madat ai sha, nanhte nan dumsu kasha hkrang hpe nhprang arai hte jaw nna hpara sumla galaw nhtawm shi hpe shut kau nga manit dai gaw ngai mu ni ai.

¹⁷Shing re ai majaw nanhte a man e lungpa yan hpe adaw achyen rai ga kamang mat hkra ngai kabai ga kau ni ai.

¹⁸Dai hpang dai MADU a man e lang mi bai nhtoi mali shi ya mali shi na tup hpa mung n lu, n sha ai sha gum dagup let nga nga nngai. Nanhte gaw dai MADU hpe shut kau nna shi hpe masin pawt shangun manit dai majaw ndai amu hpe ngai galaw ni ai.

¹⁹Dai MADU gaw nanhte hpe shamyit kau lu na daram masin kahtet nga wu ai majaw shi ja ja pawt sindawng ai hpe ngai hkrit nga nngai; rai ti mung dai MADU gaw ndai lang hta mung nye a ga madat ya ni ai.

²⁰Arun hpe mung sat kau na nga, dai MADU shi hpe grai pawt wu ai; dai aten hta nan Arun a matu ngai hpyi nem ya we ai.

²¹Ngai gaw yubak amu ngu na nanhte galaw manit dai dai dumsu kasha sumla hpe la nna dai hpe wan kata de kabai bang kau we ai. Dai hpang dai hpe adaw achyen di abyen agrawp kau nhtawm ayun ayaw rai hkra adup mani kau ngut jang bum na lwi hkrat wa ai hka hta kabai bang kau we ai.

²²“Dai hta kaga, Tabera, Masa hte Kibrot Hatawa shara hkan e nanhte but nga myit dai shaloi dai MADU nanhte a Karai Kasang hpe masin pawt shangun manit dai.

²³Shi gaw Kadesha Barnea kaw nna nanhte hpe shangun dat nhtawm shi nanhte hpe jaw ai mungdan hpe madu la na matu lung wa na, hkang dat myit dai shaloi, nanhte shi hpe gumlau myit dai; shi hpe mung n kam n sham ai hte shi a ga hpe mung n madat kau myit dai.

²⁴Nanhte hpe ngai chye ai aten kaw nna pyi dai MADU hpe gumlau nga manit dai.

²⁵“Dai rai nna nanhte hpe shamyit kau na nga, shi daw dan da nu ai hpe ngai chye we ai majaw dai MADU a man e nhtoi mali shi ya, mali shi na tup ngai gum dagup da we ai.

²⁶Ngai mung, ‘Tsaw Htum ai MADU e, na a galu kaba ai daru magam n-gun atsam hte Egutu mung kaw na hkrang shaw wa ai na a amyu masha ni hpe hkum shamyit kau et.

²⁷Na a shangun ma kaja ni rai nga ai Abraham, Isak hte Yaku ni hpe naw dum nga u; dai amyu masha ni a du ja nna n hkru n shawp ai hte yubak galaw ai lam hpe hkum dum ya et.

²⁸Dai n rai yang, nang shanhte hpe ga sadi jaw da sai mungdan de na a amyu masha ni hpe n lu woi wa nu hka, nga nna Egutu masha ni tsun na rai ma ai. Nang shanhte hpe n dawng ai majaw shanhte hpe sat kau na nga, na a amyu masha ni hpe nam mali kata de woi bang mat wa nu hka, nga nna shanhte a tsun shara tai na ra ai.

²⁹Kaja wa tsun ga nga yang, na a galu kaba ai daru magam n-gun atsam hte Egutu mung kaw na nang woi shapraw wa nhtawm na a amyu masha ni majing tai na matu nang lata san da ai amyu masha ni she rai nga ma ai,’ ngu nna hpyi nem wu ai.