Read Jinghpaw Common Language Bible 2009 YAWHAN 10 Bible Online

YAWHAN 10 - Jinghpaw Common Language Bible 2009 bible

YAWHAN 10

¹Yesu gaw, “Ngai nanhte hpe teng teng tsun made ai gaw, sagu lawng de chyinghka lam hku n shang ai, kaga lam hku shingtawt shang ai wa gaw, lagut damya rai nga ai.

²Chyinghka lam hku shang ai wa chyawm gaw, sagu ni hpe rem ai wa rai nga ai.

³Chyinghka sin ai wa mung, dai wa hpe gaw hpaw ya nga ai, sagu ni mung shi a nsen madat ma ai rai nna, shi gaw tinang a sagu ni hpe mying hte shaga nna shinggan de woi shapraw praw di wu ai.

⁴Sagu ni hpe shapraw nhtawm sagu ni a shawng e sa wa ai rai nna, sagu ni mung shi a nsen hpe chye chyap ma ai majaw shi kaw hkan nang ma ai.

⁵Tsasam wa a hpang kaw shanhte hkan nang ma ai n rai. Tsasam wa a nsen hpe n chye n chyap ma ai rai nna, shi kaw na she hprawng mat wa ma ai,” ngu nna shanhte hpe tsun mu ai.

⁶Yesu gaw ndai ga shadawn shanhte hpe tsun mu ai; rai ti mung shanhte gaw dai ga shadawn a sung ai lachyum hpe n chye na ma ai.

⁷Dai re ai majaw Yesu shanhte hpe bai tsun mu ai gaw, “Ngai nanhte hpe kaja wa teng teng tsun made ga, ngai gaw sagu ni shang ai chyinghka hku rai nga nngai.

⁸Nye a shawng e du sa ai ni nlang hte gaw, lagut damya ni rai nga ma ai; sagu ni mung shanhte a ga hpe n madat ya ma ai.

⁹Ngai gaw chyinghka hku rai nga nngai; ngai hta shang ai wa gaw, hkye hkrang la ai hkrum na wu ai rai nna, shang wa pru wa rai lu ai hte, wudat shara mu na wu ai.

¹⁰Lagut gaw, lagu na, sat na, hpya sha na, nga nna she sa ai. Ngai chyawm gaw, sagu ni asak hkrung lu na hte dai asak hpe nhpaw n-ya lu la mu ga ngu nna sa ring ngai.

¹¹Ngai gaw sagu rem wa kaja rai nngai. Sagu rem wa kaja gaw sagu ni a matu tinang a asak nawng kau ya lu ai.

¹²Nchyang sha re ai wa gaw, sagu rem mung n rai, sagu madu mung n re ai majaw, chyahkyawn ni sa wa ai mu jang, sagu ni hpe kau da nna hprawng mat wa nga ai, chyahkyawn mung sagu ni hpe hpya sha nna shabra kau nga ai.

¹³Dai nchyang wa gaw, nchyang sha rai nga ai majaw, sagu ni a matu n tsang ai, hprawng mat wa ai.

¹⁴Ngai gaw sagu rem wa kaja rai nngai; nye Wa gaw ngai hpe chye ai rai nna ngai mung Wa hpe chye nngai zawn,

¹⁵nye a sagu ni hpe ngai chye nngai, nye a sagu ni mung ngai hpe chye ma ai; sagu ni a matu mung, nye a asak ngai nawng ya kau nngai.

¹⁶Ndai wulawng hte n seng ai kaga sagu ni mung ngai naw lu nngai, dai sagu ni hpe mung ngai naw woi jashawn la lu na rai nna dai ni mung nye a nsen madat na mara ai. Shaloi sagu hpung langai sha, sagu rem wa langai sha, rai na ra ai.

¹⁷Ngai gaw asak hpe bai lu la n-ga, ngu nna nye a asak hpe nawng ya kau nngai majaw, nye Wa ngai hpe tsaw ra nngai.

¹⁸Gade e mung nye a asak hpe nawng kau shangun ai n rai. Nye a myit hte ngai nawng ya kau nngai. Nawng ya kau na ahkang hte bai la na ahkang ngai lu nngai. Shing rai galaw na matu nye Wa gaw ngai hpe hkang da ni ai,” ngu mu ai.

¹⁹Dai ga ni a majaw, Yuda masha ni hta myit n hkrum nna hka bra na lam bai pru wa malu ai.

²⁰Shanhte hta na law law wa, “Shi nat shang nna mana nga ai! Shi a ga hpe nanhte hpa rai madat myit ta?,” nga ma ai.

²¹Rai ti mung nkau mi gaw, nat shung ai masha langai mi ndai zawn nga nna n tsun shaga lu ai! nat gaw myi n mu ai masha hpe gara hku myi hpaw ya lu a ni?,” nga ma ai.

²²Ya nshung ta rai nna, Yerusalem mare e Nawku Htingnu ap nawng poi galaw nga ma ai.

²³Yesu gaw Nawku Htingnu na Shawlumon a npan pinra e htinglet hkawm nga ai.

²⁴Dai shaloi Yuda masha ni gaw shi kaw sa shinggrup nna, Nang galoi du hkra anhte hpe kam shut shangun nga na n ta? “Nang kaja wa Meshia rai n yang gaw, anhte hpe teng ai lam leng leng tsun dan mi,” ngu ma ai.

²⁵Yesu gaw, “Ngai tsun ni ai nanhte mahtang n kam myit dai. Nye Wa a ahkang hte ngai galaw ai amu ni gaw, nye a lam sakse hkam ya nga ai.

²⁶Rai ti mung nanhte gaw nye a sagu ni n rai myit dai majaw n kam myit dai.

²⁷Nye a sagu ni gaw, nye a nsen madat ma ai rai nna, ngai shanhte hpe chye nngai, shanhte mung nye a hpang hkan nang ma ai.

²⁸Ngai shanhte hpe n htum n wai asak jaw mawe ai rai nna, shanhte galoi mung si ai hkrum na ma ai n rai; nye a lata na shanhte hpe kadai e mung kashun gare kau lu na n rai.

²⁹Shanhte hpe nye a lata hta ap ya ai nye Wa gaw, yawng hta grau kaba nga ai rai nna, kadai mung Wa a lata na shanhte hpe kashun la lu na n rai.

³⁰Ngai hte nye Wa gaw langai sha rai nga ai,” ngu tsun wu ai.

³¹Shaloi Yuda masha ni gaw, shi hpe kabai na nga nna nlung bai hta ma ai.

³²Yesu gaw, “Ngai galaw na matu nye Wa ngai e ap ya da ai kaja ai amu law law nanhte a man e ngai galaw dan ni ai; dai amu ni hta na gara mahtang a majaw ngai hpe nlung hte kabai mayu myit ta?,” ngu nna san mu ai.

³³Shanhte gaw, “Kaja ai amu lama ma nang galaw ai a majaw, anhte nang hpe nlung hte kabai mayu ga ai n rai, rai ti mung nang gaw, Karai Kasang a mying nsang hpe n-gawn n sawn shatan nhkan ga tsun ndai hte, shinggyim masha sha rai da nhtawm me, na a hkum hpe nang Karai hpyi hpun ndai majaw kabai na ga ai,” ngu nna htan mu ai.

³⁴Shaloi Yesu gaw, “Nanhte a Tara laika hta Nanhte karai daw ni rai nga myit dai,” nga nna Karai Kasang tsun ai hpe ka da nga ai.

³⁵Karai Kasang gaw shi a mungga jaw da hkrum sai ni hpe ‘karai daw ni,’ ngu nna shamying mu ai rai nna, Chyum Laika hta tsun ai ga ni gaw galoi mung teng man nga ai hpe anhte chye ga ai.

³⁶Ngai chyawm gaw, nye Wa ngai hpe lata la nna ndai mungkan de shangun dat ni ai. Dai rai yang, Ngai gaw Karai Kasang a Kasha rai nngai,’ nga nna tsun ai shaloi, ngai gaw Karai Kasang hpe shatan nhkan ai wa re, ngu nna nanhte gara hku tsun lu myit ta?

³⁷Ngai hpe nye Wa galaw shangun mayu ai amu ni hpe ngai n galaw nga nngai rai yang gaw ngai hpe hkum kam myit.

³⁸Ngai galaw nngai rai yang gaw, nanhte ngai hpe n kam hkra rai ti mung, ngai hta nye Wa nga nga ai mung, nye Wa hta ngai nga nga ai mung, nanhte kalang ta mu nna chye lu myit ga, n law htum dai ngai galaw ai amu ni hpe nanhte kam sham ang myit dai,” ngu nna shanhte hpe htan mu ai.

³⁹Shaloi shanhte gaw shi hpe rim la na kalang mi bai tam shakut ma ai. Shi chyawm gaw shanhte a lata na koi yen pru mat wa ai.

⁴⁰Yesu gaw Yawdan hka wora hkran na shawng de Yawhan hkalup jaw ai shara de bai rap sa wa nna, dai yang e, sa nga nga ai.

⁴¹Masha law law wa shi kaw sa du nna, “Yawhan gaw hpa mauhpa lamik kumla mung n galaw dan ai, rai ti mung ndai wa a lam Yawhan tsun matsun chyawm gaw teng man nga ai,” nga ma ai.

⁴²Dai rai nna, dai yang e, mung masha ni law law wa shi hpe kam sham ma ai.