Read Jinghpaw Common Language Bible 2009 YAWHAN 11 Bible Online

YAWHAN 11 - Jinghpaw Common Language Bible 2009 bible

YAWHAN 11

¹Behtani mare hta nga ai Lazaru mying ai masha langai mi machyi nga ai. Behtani mare gaw Marhta, Mari, Lazaru shan nau ni nga ai mare rai nga ai.

²(Ndai Mari gaw, Madu a lagaw hta mura sau ru bun nna shi kara hte katsut kau ya ai numsha rai nga ai.)

³Dai yan nau gaw, “Madu e nang tsaw ra ai wa gaw, machyi nga ai,” ngu nna shi ga shana dat mu ai.

⁴Yesu gaw dai ga na jang “Dai machyi ai gaw si machyi n rai, Karai Kasang a hpung shingkang dan hkung shangun na matu hte de a majaw Karai Kasang a Kasha gaw hpung shingkang dan hkung wa na ra ai,” ngu nna tsun wu ai.

⁵Yesu chyawm gaw Marhta yan Mari hte shan a kayung Lazaru hte hpe tsaw ra wu ai.

⁶Rai ti mung Lazaru machyi nga ai lam na lu ai ten hta, shi gaw shi du nga ai shara hta lahkawng ya tup naw hkring nga ai.

⁷Dai hpang shi gaw, “Anhte Yuda mung de bai sa saga,” nga nna sape ni hpe tsun mu ai.

⁸Sape ni gaw, “Sara e, lai wa sai gade garai n na yang sha dai yang na masha ni nang hpe nlung hte kabai sat na tam nga ma yang me, dai de bai naw wa na hkyen nga n ni?,” ngu mu ai.

⁹Yesu gaw, “Lani mi hta ahkying shi lahkawng re ai n rai i? Shani chyingtung e hkawm sa ai wa gaw, ndai mungkan ga a nhtoi hpe mu lu ai rai nna, ahtu kataw n rai nga ai.

¹⁰Rai ti mung shana nsin e hkawm sa ai wa chyawm gaw, shi nhtoi n lu ai majaw, ahtu kataw nga ai,” ngu mu ai.

¹¹Yesu gaw ning nga nna tsun ngut ai hpang “Anhte a jinghku wa Lazaru yup pyaw nga ai, rai ti mung shi hpe jasu sharawt na matu ngai sa na nngai,” nga nna bai tsun jat ai.

¹²Sape ni gaw, “Madu e, shi yup pyaw nga ai she rai yang gaw, bran wa na ra ai,” ngu nna htan mu ai.

¹³Lazaru si sai ngu nna Yesu tsun ai hpe sape ni gaw, majoi mi yup pyaw ai hpe tsun ai hku zawn myit la ma ai.

¹⁴Dai rai nna Yesu gaw, “Lazaru si sai.

¹⁵Rai ti mung dai yang e, Lazaru hte rau ngai n nga hkrup ai gaw nanhte kam sham wa na matu rai nna, nanhte a matu ngai kabu nngai. Shi hpang de sa wa saga,” ngu nna leng leng tsun dan mu ai.

¹⁶Dai rai nna (Marun ngu ai) Htawma gaw, “Anhte yawng mung Sara hte rau si hkam na matu hkan nang saga,” ngu nna shi a sape manang ni hpe tsun mu ai.

¹⁷Ya Yesu du yang Lazaru hpe lup kau ai mali ya pyi rai sai hpe sa mu chye ma ai.

¹⁸Behtani kahtawng gaw Yerusalem mare hte mai lahkawng daram sha gang nga ai rai nna,

¹⁹Yuda masha ni law law wa Marhta yan Mari a kayung wa Lazaru si mat ai majaw sa shalan na matu sa du ma ai.

²⁰Marhta gaw Yesu sa wa ra ai hpe chye jang, shi hpe sa tau la na nga sa wa ai. Mari chyawm gaw nta e naw nga nga ta ai.

²¹Shaloi Marhta gaw, “Madu e, nang nga ndai rai taw gaw, ngai yung wa n si na re!

²²Ya rai ti mung Karai Kasang kaw nang hpyi mahpyi hte gaw, shi nang hpe jaw na ra ai, ngai chye nngai,” ngu nna Yesu hpe hkap tsun wu ai.

²³Shaloi Yesu gaw, “Na kanau gaw asak bai hkrung na ra ai,” ngu wu ai.

²⁴Marhta gaw, “Hpang jahtum na bai hkrung rawt ai nhtoi hta shi mung bai hkrung rawt na ra ai gaw, ngai chye nngai,” ngu wu ai.

²⁵Yesu gaw, “Ngai gaw bai hkrung rawt ai lam hte asak hkrung ai lam rai nga nngai. Ngai hpe kam sham ai wa kadai mung, shi si mat ti mung, ahkrung nga na ra ai.

²⁶Asak hkrung nna ngai hpe kam sham ai wa kadai mung, si ai galoi n hkrum na ra ai. Ga ndai hpe nang kam n ni?,” ngu nna shi hpe san wu ai.

²⁷Shaloi Marhta gaw, “Rai sa, Madu e, nang gaw ndai mungkan ga de du sa na ra ai Meshia ngu ai Karai Kasang a Kasha rai nga ndai hpe ngai kam nga nngai,” ngu nna htan wu ai.

²⁸Marhta gaw shing nga tsun ngut jang shi a kanau Mari hpe wa lagyim shaga la nna, “Sara nang de sa wa ra ai, nang hpe san nga ai,” ngu wu ai.

²⁹Mari dai ga na jang, alawan rawt nna Yesu hpang de sa wa ai.

³⁰(Yesu chyawm gaw kahtawng de garai n shang ai Marhta sa tau ai shara e naw rai nga ai.)

³¹Dai majaw shalan shabran ga tsun let Mari hte rau nta e nga nga ai Yuda masha ni gaw, Mari alawan rawt nna pru wa ai hpe mu ma yang, lup de sa hkrap na rai sam ai nga, myit nna shi kaw hkan nang ma ai.

³²Mari gaw Yesu nga ai shara de du nna shi hpe mu ai shaloi jang, shi a lagaw nhpang e dingnyawm dagup let, “Madu e nang lama nang e nga ndai rai taw gaw ngai yung n si na re!,” ngu wu ai.

³³Mari gaw hkrap ngu hkrap ngoi rai nga ai hpe mung, shi kaw hkan nang ai Yuda masha ni hkrap ngu hkrap ngoi nga ma ai mung, Yesu mu wu yang, shi a myit masin hta nachying hkra ai hte myit n pyaw nga ai.

³⁴Yesu gaw, “Shi hpe kanang e lup da mu ta?,” ngu nna san mu ai. Shanhte gaw, “Madu e, sa yu rit,” ngu nna htan mu ai.

³⁵Yesu hkrap ai.

³⁶Yuda masha ni gaw, “Yu yu mu, shi gaw Lazaru hpe grai wa tsaw ra nga a hka!,” nga ma ai.

³⁷Rai ti mung shanhte hta na nkau mi gaw, “Myi n mu ai wa hpe myi hpaw ya lu ai, ndai wa gaw Lazaru n si hkra n di lu na a ni?,” nga ma ai.

³⁸Dai majaw Yesu gaw, shi a kraw kata e bai yawn madai ai hte lup de sa du ai. Dai lup gaw lungpu hku rai nga ai rai nna, nlung tawng langai mi hte pat da ma ai.

³⁹Yesu gaw, “Nlung dai hpe galau kau mu,” ngu nna hkang da mu ai. Shaloi si ai wa a kana Marhta gaw, “Madu e, ya gaw manam na sai, shi si ai mung mali ya rai sai,” ngu nna tsun mu ai.

⁴⁰Yesu gaw, “Nang kam n yang gaw, Karai Kasang a hpung shingkang nang mu lu na rin dai, ngu nna ngai tsun sade ai n rai ni?,” ngu nna shi hpe tsun wu ai.

⁴¹Dai rai nna shanhte gaw dai nlung hpe galau kau mu ai. shaloi Yesu gaw lamu de mada yu nna, “Wa e, nang nye a ga madat ya ndai majaw, ngai nang hpe shakawn nngai law.

⁴²Nang galoi mung nye a ga madat ya ndai hpe, ngai chye nngai. Rai ti mung nang ngai hpe shangun dat ndai hpe ndai grup yin e nga ai masha ni kam sham lu mu ga, shanhte a matu ngai ning ngu tsun nngai,” nga ai.

⁴³Shing nga shi tsun ngut jang shi gaw, “Lazaru e, pru wa rit!,” ngu nna nsen kaba hte jahtau dat wu ai.

⁴⁴Shaloi si mat sai wa gaw shi a lagaw lata ni hta sumpan yan ahkyen nna, myi man e mung hpajet kayawp ai hte pru wa ai. Yesu gaw, “Shi hpe kayawp da ai sumpan hpe raw nna dat dat mu,” ngu nna shanhte hpe tsun mu ai.

⁴⁵Dai shaloi Mari kaw sa hpu ai Yuda masha ni law law wa, Yesu galaw ai amu hpe mu jang, shi hpe kam sham ma ai.

⁴⁶Rai ti mung shanhte hta na nkau mi gaw Hparishe ni hpang de wa nna Yesu galaw ai lam wa tsun dan mu ai.

⁴⁷Dai rai nna Hparishe ni hte hkinjawng agyi ni gaw, Yuda Tara hte seng ai kongsi hpawng shaga jahpawng nhtawm, “Ndai wa madun dan nga ai mauhpa lamik kumla nlang hte hpe mada yu mu! Anhte gaw hpa majaw hpa mung n di ai nga nga na rai ta?

⁴⁸Anhte shi hpe ndai hku sha dat da nga yang gaw masha yawng mayawng shi hpe kam sham wa na mara ai rai nna, Roma ahkang aya lu ai ni sa nna, anhte a Nawku Htingnu hpe mung, anhte a amyu mungdan ting hpe mung jahten kau na mara ai,” nga ma ai.

⁴⁹Rai ti mung shanhte hta na, dai shaning a matu hkinjawng Agyi Kaba rai nga ai Kayahpa ngu ai wa langai mi gaw, “Nanhte gaw angawk angak ni she rai nga myit hka!

⁵⁰Amyu ting jahten kau ai n hkrum hkra, ndai amyu a matu masha langai mi si hkam yang gaw, anhte a matu grau mai nga ai hpe nanhte n myit yu myit ni?,” ngu nna tsun mu ai.

⁵¹Ya dai hpe kaja wa shi a myit hte shi tsun wu ai n rai, dai shaning e shi Hkinjawng Agyi Kaba rai nga ai majaw Yesu gaw, Yuda masha ni a matu si hkam na ra ai lam myihtoi ga tsun nga ai.

⁵²Shing rai si hkam ai lam gaw dai amyu a matu sha n rai, shara shagu hkan bra nga ai Karai Kasang a amyu masha ni hpe langai sha di nna, shinggyin jahpawng da na matu si hkam lu na re ai, ngu nna mung myihtoi ga hte tsun ai, rai nga ai.

⁵³Dai shani kaw nna ahkang aya lu ai Yuda masha ni, shi hpe sat kau na lam bawng ban maw mawn nga ma ai.

⁵⁴Dai majaw Yesu gaw, Yuda mung e adan aleng n hkawm sa ai sha, dai yang na pru nhtawm, nam mali hte ni ai Ehprim ngu ai mare de sa wa nna shi a sape ni hte rau dai yang e nga nga ai.

⁵⁵Ya Yuda ni a Shalai wa ai Poi du magang ra ai rai nna, mare kahtawng hkan na masha law law wa, poi garai n du yang, tinang hkum jasan jaseng ai htung lai galaw na matu Yerusalem mare de du lung wa ma ai.

⁵⁶Dai majaw shanhte gaw Yesu hpe tam nna, Nawku Htingnu e jawm hpawng tsap let, “Nanhte kaning ngu myit nga myit ta? Shi gaw ndai poi de kaja wa n sa sai kun?,” nga nna shada da san ma ai.

⁵⁷Dai shaloi e Hkinjawng Agyi ni hte Hparishe ni gaw Yesu hpe rim la lu hkra, “Kadai rai ti mung shi nga ai shara chye yang gaw tsun shana madun lu na,” nga nna hkang da ma ai.