Read Jinghpaw Common Language Bible 2009 YAWHAN 12 Bible Online

YAWHAN 12 - Jinghpaw Common Language Bible 2009 bible

YAWHAN 12

¹Dai re ai majaw Yesu gaw, si ai kaw na shi sharawt la ai Lazaru nga ai Behtani kahtawng de Shalai wa ai Poi du na kru ya naw ra yang sa du ai.

²Shaloi shanhte gaw shi hpe shana shat daw jaw mu ai rai nna, Marhta gaw shat lu sha jau nga ai; Lazaru gaw Yesu hte rau dung nga nna lu sha ai ni hta lawm ai wa langai mi rai nga ai.

³Shaloi Mari gaw grai hpu la ai Mura Nardu sau ajet hkan masum daram la nna, Yesu a lagaw hta chya nhtawm, shi a kara hte katsut kau ya wu ai.

⁴Dai sau a manam pyaw ai sama gaw nhku ting hpring chyat rai nga ai.

⁵Shaloi sape ni hta na langai mi rai nga ai shi hpe ap kau na wa Yuda Iskarut ngu ai wa gaw, “Ndai Mura sau hpe lap masum tsa hte dut nna matsan mayan ni hpe hpa di n garan jaw a ta?,” ngu wu ai.

⁶Shi shing nga nna tsun ai gaw, matsan mayan ni hpe matsan dum ya nna tsun ai n rai, shi gaw gumhpraw jan jum ai wa rai nga ai rai nna, bang da ai gumhpraw hta na sen di sha ai lagut rai nga ai majaw tsun ai sha rai nga ai.

⁷Rai ti mung Yesu gaw, “Dai numsha hpe dingbai dingna hkum di mu, ngai hpe lajang lup ai shani a matu shi dai hpe kyem da u ga.

⁸Matsan mayan ni gaw nanhte hte rau tut e anga nga ma ai, ngai chyawm gaw nanhte hte rau tut e anga nga na n rai,” ngu wu ai.

⁹Behtani kahtawng de Yesu sa du nga ai hpe shawa masha ni law law wa na lu ma ai. Dai rai nna shanhte dai shara de Madu Yesu a majaw sha n rai, si ai kaw na Yesu bai sharawt la ai Lazaru hpe mung, mu hkrum mayu ma ai majaw du sa shajang ma ai.

¹⁰Dai majaw hkinjawng agyi ni gaw Lazaru hpe mung sat kau na nga nna maw mawn nga ma ai.

¹¹Hpa majaw nga yang, shi a majaw Yuda masha ni law law wa Yesu hpe kam sham nna hkinjawng agyi ni hpe n hkap la ma ai.

¹²Hpang shani e, Shalai wa ai Poi de sa ai shawa masha ni law law wa, Yesu Yerusalem mare de sa wa ra ai hpe na ma yang,

¹³shanhte gaw namhtan lakung ni daw lang nna shi hpe sa tau la nna, “Karai Kasang hpe shakawn mu! Dai Madu a amying hte du sa ai wa ngu ai Israela a hkawhkam gaw a nga u ga law!,” nga nna garu ma ai.

¹⁴Shaloi Yesu gaw, Lawze kasha langai mi mu nna jawn wu ai, dai gaw,

¹⁵“Ziun mare e hkum hkrit et! Yu u na a hkawhkam gaw, lawze kasha jawn nna du sa ra ai,” nga nna Chyum Laika hta ka da ai hte maren rai nga ai.

¹⁶Dai lam hpe shawng daw hkan e gaw shi a sape ni n chye na ma ai; rai ti mung Yesu hpung shingkang lu la ai hpang e she, shi hpe sha-ang nna ka da ai mung, dai hku raw shanhte shi hpe di mu ai mung, dum chye ma ai.

¹⁷Lazaru hpe lup kata na shaga shapraw nna, si ai kaw na sharawt la ai shaloi e, shi hte rau nga ai shawa masha ni gaw, dai byin ai lam hpe sakse hkam tsun shana ya ma ai.

¹⁸Dai lam a majaw shawa masha ni shi hpe sa tau la ma ai, hpa majaw nga yang, shanhte gaw shi galaw dan ai lamik kumla ni a lam na lu masai.

¹⁹Dai re ai majaw Hparishe ni gaw, “Yu mu, anhte hta awng dang ai lam hpa mung n nga sai. Kaja wa mungkan ting gaw shi a hpang hkan mat wa masai,” nga nna shada da tsun shajang ma ai.

²⁰Dai poi laman hta nawku na matu Yerusalem mare de lung wa ai ni hta Grik masha nkau mi lawm ma ai.

²¹Dai ni gaw Galile mung Betsaida mare na Hpilip kaw sa nna, “Hkau e, anhte gaw Yesu hpe mu mayu ga ai,” ngu nna tsun ma ai.

²²Shaloi Hpilip gaw Andre hpe sa tsun nna, Andre yan Hpilip shan lahkawng gaw Yesu hpe sa tsun dan ma ai.

²³Yesu gaw, “Masha Kasha a hpung shingkang dan hkung na ahkying du wa ra ai.

²⁴Nanhte hpe ngai kaja wa teng teng tsun made ai gaw, mam nhkyep gaw ga hta hkrat nna, n hten mat yang gaw langai sha arai nga ai; hten mat yang she asi law law si wa lu ai.

²⁵Tinang a asak hpe tsaw ra nna lahpawt dum ai wa gaw asak sum na ra ai; ndai mungkan ga e, tinang a asak hpe n dawng ai wa chyawm gaw htani htana asak hpe makawp maga kyem da ai wa tai na ra ai.

²⁶Nye a amu hpe gun hpai mayu ai kadai mung, ngai kaw hkan nang lu na rai nna, ngai nga ai shara e nye a shangun ma mung nga na ra ai, nye Wa gaw nye a amu gun hpai ai wa kadai hpe mung shagrau na ra ai,” ngu tsun wu ai.

²⁷“Ya ngai myit ru nga nngai-ngai kaning ngu tsun na rai ta? Wa e, ndai nni nkri hkrum na ahkying kaw na hkye hkrang la rit ngu nna tsun na rai ni?

²⁸Rai ti mung ngai gaw dai nni nkri hkam na matu she du sa nngai; Wa e, na a mying nsang hpe sha shagrau u law!,” ngu nna tsun wu ai. Shaloi sumsing lamu de na nsen langai mi gaw, “Nye a mying hpe hpung shingkang shagrau se ai, bai naw shagrau na we ai,” nga nna ngoi pru ai.

²⁹Dai yang e tsap hpawng nga ai shawa masha ni dai nsen na ma yang, nkau mi gaw, mu ngoi nga ai, nga ma ai. Bai nkau mi gaw, “Lamu kasa shi hpe ga shaga nga ai!,” nga ma ai.

³⁰Yesu gaw, “Nsen ndai ngoi pru ai gaw, nye a matu n rai, nanhte a matu mara rai nga ai.

³¹Ndai mungkan ga gaw, ya jang pyi tara jeyang ai hkrum, nga sai. Ya ndai mungkan up ai Duwa gaw shinggan de kabai kau ai hkrum na rai sai.

³²Ngai chyawm gaw ga nna sharawt da ai hkrum jang, ngai masha yawng mayawng hpe ngai hpang de gang la na mawe ai,” ngu tsun wu ai.

³³(Ning nga nna tsun ai gaw, shi gara hku si hkam na ra ai lam hpe kumla hku madun nna tsun ai rai nga ai.)

³⁴Shing nga ai majaw shawa masha ni gaw, “Meshia gaw htani htana asak hkrung nga na ra ai, nga nna she anhte a Tara laika hta anhte hpe tsun da mi ai. Dai rai yang, Meshia gaw sharawt da ai hkrum lu na ra ai, ngu nna nang kaning ngu tsun lu n ta? Masha Kasha dai gaw kadai wa mi rai ta?,” ngu nna shi hpe htan mu ai.

³⁵Yesu gaw, “Dai nhtoi gaw nanhte hta loi hkring mi sha nga nga na sai; dai nsin gaw nanhte hpe garai n ka-up lep myit ga, nanhte hta nhtoi naw nga nga yang, matut nna hkawm sa mu, hpa majaw nga yang, nsin hta hkawm sa ai wa gaw, tinang gade sa wa nga ai mung, n chye wu ai.

³⁶Nanhte hta nhtoi naw nga nga yang, nhtoi hpe kam sham nga mu, shaloi she nanhte gaw, nhtoi a kashu kasha ni tai lu na myit dai,” ngu nna tsun mu ai. Dai lam Yesu tsun ngut jang, shi pru mat wa nna shi hkum hpe shanhte kaw na makoi mat wa wu ai.

³⁷Shanhte a man e lamik kumla ndai hte wa shi madun dan mu ti mung, shanhte shi hpe n kam n sham ma ai.

³⁸Ning rai byin ai gaw, “Madu e, anhte tsun ai ga hpe kadai kam ya a ta? Kadai wa kaw dai Madu a n-gun atsam shadan dan a ta?,” nga nna myihtoi Esaia tsun ai ga dik u ga, she byin wa sai.

³⁹Bai Esaia tsun ai hta, “Shanhte a myi hte n mu lu mu ga, shanhte a myit masin hte n chye na mu ga, shanhte a ana ahkya mai tsai lu na matu, ngai hpang de n kayin wa mu ga nga

⁴⁰Karai Kasang gaw, shanhte a myi hpe magap kau ya nna, myit masin ni hpe mung shaja kau ya wu ai, nga ai ga hte maren shanhte n kam n sham lu ma ai.

⁴¹Esaia gaw Yesu a hpung shingkang hpe mu lu ai rai nna, shi a lam shing nga tsun ai rai nga ai.

⁴²Rai ti mung Yuda du agyi salang ni law law wa Yesu hpe kam sham shajang ma ai; dai re ai she Hparishe ni a majaw, tara jawng na shapraw kau na hpe hkrit tsang nna tinang kam sham ai hpe dan leng ai hku n yin la hkraw ma ai.

⁴³Hpa majaw nga yang, shanhte gaw Karai Kasang e masat masa galaw ai arawng sadang lu na hta masha e masat masa galaw ai arawng sadang lu na hpe grau ra ma ai.

⁴⁴Yesu gaw, “Ngai hpe kam sham ai wa gaw, ngai hpe sha kam sham ai n rai, ngai hpe shangun dat ai wa hpe mung kam sham nga ai,” nga nna nsen kaba hte tsun mu ai.

⁴⁵“Ngai hpe mada mu ai wa gaw, ngai e shangun dat ai wa hpe mung mada mu ai rai nga ai.

⁴⁶Ngai hpe kam sham ai masha shagu gaw nsin hta n rawng nga u ga ngu nna nhtoi tai let, ngai mungkan ga de du sa ring ngai.

⁴⁷Nye a mungga na la nhtawm dai hpe n hkan nang ai wa kadai hpe mung, ngai jeyang na n rai; hpa majaw nga yang, mungkan ga hpe jeyang na matu ngai du sa nngai n rai, dai hpe hkye la na matu she sa nngai.

⁴⁸Ngai hpe n hkap la ai hte nye a ga n hta la ai wa hpe jeyang na wa kaga mi nga ai; ngai tsun ai mungga e nan hpang jahtum na nhtoi hta dai wa hpe jeyang na ru ai.

⁴⁹Ndai lam teng man nga ai; hpa majaw nga yang, ngai gaw ngai nan nye a ahkang aya hte tsun nngai n rai; ngai hpa baw tsun na kaning ngu sharin shaga na gaw, ngai hpe shangun dat ai nye Wa e hkang dat ni ai.

⁵⁰Shi a hkang da ai ga gaw htani htana asak jaw lu ai hpe ngai chye nngai, dai re ai majaw ngai tsun matsun gaw, nye Wa a hkang dat ai hte maren she, ngai tsun nngai law,” ngu nna jahtau tsun wu ai.