Read Jinghpaw Common Language Bible 2009 YAWHAN 13 Bible Online

YAWHAN 13 - Jinghpaw Common Language Bible 2009 bible

YAWHAN 13

¹Ya, aten gaw Shalai wa ai Poi nhtoi a shawng shani e rai nga ai. Yesu gaw ndai mungkan ga na pru nna, shi a Kawa hpang de wa na matu ahkying du wa sai hpe chye wu ai. Shi gaw ndai mungkan ga e nga ai shi a masha ni hpe galoi mung a tsaw ra nga mu ai rai nna, jahtum nhtoi du hkra shanhte hpe tsaw ra mu ai.

²Yesu hte shi a sape ni gaw, shana shat sha nga ma yang, nat gaw Simun a kasha Yuda Iskarut a kraw kata e, Yesu hpe ap kau na hpaji daw bang ya boi nu ai.

³Yesu gaw Kawa e shi a lata de nga yawng nga pra a ntsa e ahkang aya yawng ap ya sai hpe mung, bai shi gaw Karai Kasang kaw na shi pru sa nna Karai Kasang hpang de bai wa na rai nga ai mung, chye wu ai.

⁴Dai rai nna shi gaw, shat ku kaw na shi rawt nna, shi a palawng kaba raw kau nhtawm hpajet langai mi la nna shi a nshang e kyit da wu ai.

⁵Dai hpang angdung hta ntsin bang la nna, sape ni a lagaw hpe kashin ya nhtawm, shi kyit ai hpajet hte katsut kau ya ya di mu ai.

⁶Shing rai Simun Petru kaw du yang, dai wa gaw, “Madu e, nang wa mi ting nye a lagaw kashin na n ni?,” hkap ngu wu ai.

⁷Yesu gaw, “Ngai galaw ai lam nang ya n chye na ti mung, hpang de she chye na na rin dai,” ngu nna shi hpe htan wu ai.

⁸Petru gaw, “Nye a lagaw hpe nang galoi mung n kashin lu na ndai,” bai ngu wu ai. Bai Yesu gaw, “Ngai na lagaw hpe n kashin lu yang gaw, nang ngai hte n seng ndai,” ngu nna shi hpe tsun wu ai.

⁹Shaloi Simun Petru gaw, “Shaloi rai yang gaw, Madu e, nye a lagaw sha n rai, nye a lata ni hte baw hpe mung kashin ya rit,” ngu wu ai.

¹⁰Yesu gaw, “Hka shin ngut sai wa gaw, hkum ting san seng nga sai majaw lagaw hta lai nna kaga hkum shin shara n nga sai. Nanhte mung langai wa mi hta lai nna yawng gaw san seng nga myit dai,” ngu wu ai.

¹¹(Yesu gaw, shi hpe ap kau na wa kadai re ai gaw, shi chye da wu ai, dai re ai majaw, langai wa mi hta lai nna nanhte yawng san seng myit dai,” ngu nna tsun ai re.)

¹²Yesu gaw shanhte a lagaw ni hpe kashin ya ngut ai hpang, shi a palawng kaba hpe bai la hpun nhtawm, bai wa dung nga ai. Shi gaw, “Ya sha ngai nanhte hpe galaw ai lam, nanhte chye na da mu ni?

¹³Nanhte gaw ngai hpe, ‘Sara, nga nna mung, Madu nga nna mung,’ tsun hkungga chye myit dai. Dai hte maren ngai rai nga nngai majaw, nanhte a ga mung rai la sai.

¹⁴Ngai nanhte a Madu mung, Sara mung rai da ninglen, ngai pyi nanhte a lagaw ni hpe kashin ya ni ai rai yang gaw, nanhte mung nanhte shada da a lagaw mai kashin ya myit dai.

¹⁵Nanhte hpe ngai galaw sai zawn, nanhte mung hkan galaw myit ga, ngu nna ngai nanhte a matu kasi kamang tawn da ni ai.

¹⁶Ngai nanhte hpe kaja wa teng teng tsun made ga, mayam gaw shi a madu hta grau kaba ai n rai, kasa mung shi e shangun dat ai wa hta grau kaba ai n rai.

¹⁷Ya nanhte ndai teng man ai lam hpe chye na manit dai rai nna, dai hpe hkan shatup myit yang gaw, nanhte a lu myit dai!

¹⁸Nanhte yawng hpe sha-ang nna ngai tsun nga nngai n rai; ngai lata la tawn sai ni hpe gaw ngai chye da we ai. Rai ti mung, Chyum Laika hta, nye a shat sha ai wa gaw, shi a lahtin hte ngai hpe hkindit nngai, nga nna ka da ai ga dik wa lu na matu rai nga ai.

¹⁹Dai lam byin pru wa ai shaloi, ‘Ngai gaw ngai wa rai nga nngai,’ hpe nanhte kam sham wa lu myit ga ngu nna dai lam hpa garai n byin yang, ya ngai nanhte hpe tau tsun magang da made ai.

²⁰Ngai nanhte hpe kaja wa teng teng tsun made ga, ngai shangun dat ai wa kadai hpe rai ti mung, hkap la ai wa gaw, ngai hpe hkap la ai rai nga ai; ngai hpe hkap la ai wa kadai mung, ngai hpe shangun dat ai wa hpe hkap la ai rai nga ai,” ngu nna shanhte hpe tsun mu ai.

²¹Yesu gaw shing nga tsun ngut jang, shi a myit hta nachying yawn la ai hte, “Ngai nanhte hpe kaja wa teng teng tsun made ai gaw, nanhte hta na marai langai mi ngai hpe ap kau na myit dai,” ngu nna dan dan leng leng shanhte hpe tsun mu ai.

²²Sape ni gaw, kadai hpe sha-ang nna tsun ai mung n chye mu ai majaw, kaja wa myit ung ang ai hte shada da yu mada hkat ma ai.

²³Shaloi Yesu tsaw ra ai sape langai mi gaw, Yesu a hkra maga de yep rai dung nga ai.

²⁴Simun Petru gaw, “Shi kadai hpe sha-ang nna tsun nga ai kun? san yu u,” ngu nna dai sape hpe dingsi let shangun wu ai.

²⁵Shaloi dai sape gaw, Yesu a makau de sit shani nna, “Madu e, kadai mahtang rai ta?,” ngu nna san wu ai.

²⁶Yesu gaw, “Ngai muk n-gup mi tsing la nna jaw ai wa rai na ra ai,” ngu nhtawm dai muk n-gup mi tsing la nna Simun Iskarut a kasha Yuda hpe jaw wu ai.

²⁷Yuda gaw dai muk n-gup mi la sha ngut ai shaloi jang, Satan gaw shi hta shang nu ai. Dai re ai majaw, Yesu gaw, “Nang galaw ra ai amu lau lau galaw u!,” ngu nna shi hpe tsun wu ai.

²⁸Yuda hpe hpa majaw shing nga tsun ai gaw, sha ku makau e dung nga ai ni hta kadai mung n chye ma ai.

²⁹Yuda gaw gumhpraw jan jum ai wa rai nga ai majaw, Yesu gaw shi hpe, poi a matu ra ai arai ni sa mari u, nga sam ai nga nna mung, matsan mayan ni hpe lama ma sa jaw u, nga sam ai ngu nna mung, shanhte hta na nkau mi myit ma ai.

³⁰Yuda gaw dai muk n-gup mi la sha nhtawm, shaloi jang pru mat wa ai. Dai aten gaw shana nsin rai nga ai.

³¹Yuda pru mat wa ai hpang Yesu gaw, “Masha Kasha gaw ya hpung shingkang dan hkung nga ai rai nna, Karai Kasang mung Masha Kasha a hkum hta hpung shingkang dan hkung nga ai.

³²Karai Kasang gaw dai Masha Kasha hku nna hpung shingkang dan hkung ai rai yang gaw, Karai Kasang shi hkum nan, Masha Kasha hpe hpung shingkang dan hkung shangun na wu ai, shaloi jang dan hkung shangun na wu ai.

³³Ngai sha ni e, ngai nanhte hte jahkring mi sha she rau nga lu na ni ai. Nanhte ngai hpe tam na marin dai. Ngai wa ai shara de mung nanhte n hkan nang lu na myit dai, ngu nna ahkaw ahkang lu ai Yuda masha ni hpe ngai tsun ai hte maren, nanhte hpe mung ngai tsun made ai.

³⁴‘Shada da tsaw ra nga mu,’ ngu nna Tara Ningnan ngai nanhte hpe jaw made ai. Ngai nanhte hpe tsaw ra made ai zawn, nanhte mung shada da tsaw ra nga lu na rai myit dai.

³⁵Shing rai nanhte shada tsaw ra myit rawng nga myit yang gaw, nanhte nye a sape ni rai nga myit dai gaw masha yawng mayawng chye lu na mara ai,” ngu mu ai.

³⁶Simun Petru gaw, “Madu e, nang gade sa mat wa na n ta?,” ngu nna Yesu hpe san wu ai. Yesu gaw, “Ngai sa wa ai shara de, nang ya n hkan lu na ndai, hpang de she hkan nang lu na rin dai,” ngu nna htan wu ai.

³⁷Petru gaw, “Madu e, ngai nang hte rau hpa rai n hkan lu na rai ta? Na a matu si hkam na ngai jin chyalu rai nga nngai,” ngu wu ai.

³⁸Yesu gaw, “Nang kaja wa nye a matu si hkam na jin chyalu rai nit ni? Kaja wa teng teng ngai nang hpe tsun de ga, U garai n goi yang, nang ngai hpe masum lang nyet kau na rin dai,” ngu nna shi hpe htan wu ai.