Read Jinghpaw Common Language Bible 2009 YAWHAN 16 Bible Online

YAWHAN 16 - Jinghpaw Common Language Bible 2009 bible

YAWHAN 16

¹Yesu gaw, “Nanhte a makam masham n hten mat u ga ngu nna, ndai lam ngai nanhte hpe tsun da made ai.

²Shanhte gaw Tara Jawng ni hta na nanhte hpe gawt shapraw kau na mara ai. Nanhte hpe sat kau lu ai wa kadai mung, Karai Kasang a magam gun hpai nga nngai, nga nna myit la ai aten kaja wa du wa na ra ai.

³Shanhte gaw nye Wa hpe mung, ngai hpe mung, n chye ma ai majaw, ndai lam ni nanhte hpe di na mara ai.

⁴Rai ti mung shanhte a matu ndai lam ni galaw na nhtoi du wa ai shaloi nanhte bai dum lu myit ga ngu nna ga ndai ngai nanhte hpe tsun tawn da ni ai. “Shawng de gaw ngai nanhte hte rau naw nga nga nngai majaw, ngai nanhte hpe dai lam ni n tsun yu nngai.

⁵Rai ti mung ya chyawm gaw, ngai hpe shangun dat ai wa hpang de wa na ni ai; dai rai yang, ngai gade wa na lam, nanhte hta na kadai mung ngai hpe n san yu myit dai.

⁶Rai ti mung ndai lam ni ngai nanhte hpe tsun made ai majaw nanhte a myit masin hta yawn hkyen ai lam hpring mat manit dai.

⁷Rai ti mung ngai nanhte hpe teng man ai lam tsun made ga, ngai wa ai gaw nanhte a matu grau nna kaja nga ai; hpa majaw nga yang, ngai n wa yang gaw, dai Shalan Shabran ai hte Karum Ai Wa nanhte kaw du sa na n rai; ngai wa jang gaw, ngai shi hpe nanhte hpang de shangun dat na we ai.

⁸Dai wa du jang, shi gaw mungkan masha ni hpe yubak mara hte seng nna mung, teng man ai lam hte seng nna mung, Karai Kasang a tara dawdan ai lam hte seng nna mung, shanhte kaning rai shut nga ai hpe dum hprang hkra madi shadan dan na ra ai.

⁹Shanhte gaw ngai hpe n kam n sham ma ai majaw, yubak mara hte seng nna shut nga ma ai.

¹⁰Ngai gaw nye Wa hpang de wa nna, nanhte ngai hpe htawm hpang de n mu lu na myit dai majaw, shanhte gaw dai teng man ai lam hte seng nna shut nga ma ai.

¹¹Mungkan ga hpe up ai wa gaw tara dawdan ai hkrum sai majaw, shanhte gaw tara dawdan ai lam hte seng nna shut nga ma ai.

¹²Ngai nanhte hpe tsun dan na lam law law naw lu nngai, rai ti mung ya nanhte a matu law hpyau nga ai majaw nanhte hkam la lu na myit dai n rai.

¹³Rai ti mung Karai Kasang hte seng ai teng man ai lam hpe shadan dan ai Wenyi du sa jang, nanhte hpe dai teng man ai lam yawng mayawng hpe hpaw madun dan na ra ai. Dai Wenyi gaw shi a myit hte maren tsun na ra ai n rai, shi na la lu ai made tsun dan na ra ai; htawm hpang de byin na ra ai lam ni hpe mung, shi nanhte hpe tsun dan na ra ai.

¹⁴Dai wa gaw ngai tsun ai ga hpe la nna nanhte hpe bai htawn tsun dan na ra ai rai nna, nye a hpung shingkang shapraw ya na ra ai.

¹⁵Nye Wa lu malu gaw ngai lu ai rai nga ai; dai majaw, dai Wenyi gaw ngai kaw na lu la nna nanhte hpe tsun shana ya na mara ai, ngu nna ngai tsun ni ai.

¹⁶“Hkring mi rai jang nanhte ngai hpe n mu lu na manit dai; dai hpang hkring mi bai rai jang nanhte ngai hpe bai mu lu na myit dai,” ngu mu ai.

¹⁷Shing nga ai majaw shi a sape ni hta na nkau mi gaw, “Hkring mi rai jang nanhte ngai hpe n mu na myit dai, hkring mi rai jang bai mu lu na myit dai, nga nna mung, ‘nye Wa hpang de ngai wa na nngai,’ nga nna mung, shi anhte hpe tsun mi ai ga gaw, hpa nga ai re ai i?

¹⁸Bai nna ‘Hkring mi rai jang,’ nga nna tsun ai mung, hpa nga ai ga re ai i? Shi tsun ai ga hpe anhte n chye na ga ai!,” nga ma ai.

¹⁹Shanhte shi e san mayu nga ma ai hpe Yesu chye da wu ai majaw, shi gaw, “Hkring mi rai jang nanhte ngai hpe n mu na myit dai, Hkring mi bai rai jang, bai mu na myit dai, ngu nna ngai tsun ai ga hpe nanhte shada da jawm san hkat nga myit ni?

²⁰Ngai nanhte hpe kaja wa teng teng tsun made ga, nanhte gaw hkrap ngu hkrap ngoi ai hte sharung shayawt ai hkrum na marin dai. Mungkan masha ni chyawm gaw kabu gara lu na mara ai; nanhte gaw yawn hkyen ai hkrum na marin dai; rai ti mung nanhte a yawn hkyen ai gaw kabu gara ai bai tai na ra ai.

²¹Numsha langai mi gaw kasha shangai na rai yang, shi a machyi hkam sha na ahkying aten du ra ai majaw, yawn hkyen nga ai, rai ti mung kasha shangai ngut jang, ndai mungkan ga e ma langai mi shaprat tawn nu ai majaw shi kabu gara nga ai rai nna shawng na ru tsang ai hpe n dum nu ai.

²²Dai hte maren nanhte ya yawn hkyen nga myit dai; rai ti mung nanhte hte ngai bai hkrum lu nna, nanhte a kraw lawang ni hta kabu gara ai hte hpring na ra ai; dai nanhte a kabu gara ai hpe nanhte kaw na kadai mung kashun la ya lu sana n rai.

²³“Dai shani nhtoi du jang, nanhte ngai hpe hpa mung n san na myit dai; ngai nanhte hpe kaja wa teng teng tsun made ga, nye a mying nsang hte nanhte hpyi mahpyi Wa gaw nanhte hpe jaw na ra ai.

²⁴Ya du hkra nanhte nye a mying gang nna hpa mung n hpyi yu myit dai; nanhte a kabu gara ai lam hpring tup hkra lu la na matu hpyi nga mu; hpyi ai hte maren nanhte lu la na marin dai.

²⁵“Ndai lam ni hpe ga shadawn ni hte ngai nanhte hpe tsun dan ma sade ai; rai ti mung ga shadawn hku n re ai sha Wa a lam nanhte hpe dan dan leng leng tsun dan na ahkying gaw du na ra ai.

²⁶Dai nhtoi du jang, nanhte gaw nye a mying gang nna shi kaw hpyi na marin dai; nanhte a matu mara nye Wa kaw ngai hpyi ya na n ngu nngai.

²⁷Hpa majaw nga yang, Wa shi nan nanhte hpe tsaw ra nga ai. Nanhte ngai hpe tsaw ra nna, ngai gaw Wa kaw na du sa ai hpe kam sham myit dai majaw, Wa gaw nanhte hpe tsaw ra nga ai.

²⁸Ngai gaw Wa kaw nna nan pru sa nna mungkan ga de du sa ni ai; bai ya ngai mungkan ga hpe kau da nna, Wa hpang de wa na nngai,” ngu mu ai.

²⁹Shaloi shi a sape ni gaw, “Yu u, ya gaw ga shadawn n lang ai sha dan dan leng leng nang tsun nga nit dai.

³⁰Nang gaw lam yawng mayawng hpe chye nga ndai mung, gade e mi nang hpe n san ra sai hpe mung, ya anhte chye saga ai; dai re ai majaw, nang Karai Kasang kaw na du sa ai wa re ai hpe anhte kam saga ai,” ngu nna tsun mu ai.

³¹Yesu gaw, “Nanhte ya kam manit ni?

³²Yu mu, nanhte yawng bra mat nna, langai hte langai tinang a nta de wa mat nhtawm, ngai hpe hkrai sha kau da na ahkying gaw du wa ra ai rai nna, ya pyi du ra ai. Rai ti mung ngai gaw kaja wa ngai hkrai sha rai nga nngai n rai, hpa majaw nga yang Wa gaw ngai hte rau rai nga ai.

³³Nanhte gaw ngai hte langai sha tai nna ngwi pyaw ai lam lu la myit ga, ngu nna ndai ga ngai nanhte hpe tsun ni ai. Mungkan ga gaw nanhte hpe nni nkri jahkrum na ra ai; rai ti mung gwi gwi dakring dakan rai nga mu! Ngai gaw mungkan ga hpe dang kau se ai!,” ngu mu ai.