Read Jinghpaw Common Language Bible 2009 YAWHAN 17 Bible Online

YAWHAN 17 - Jinghpaw Common Language Bible 2009 bible

YAWHAN 17

¹Dai lam hpe Yesu tsun ngut jang, shi gaw lamu de mada yu nna, “Wa e, nye a ahkying du sali ai. Ngai nsha wa gaw na a hpung shingkang shapraw ya lu n ga, ngai nsha wa a hpung shingkang hpe mung shapraw ya e law.

²Hpa majaw nga yang, ngai nsha wa a lata de nang ap ya ai yawng mayawng hpe htani htana asak jaw n ga, nang gaw nsha wa hpe masha yawng mayawng a ntsa e up ai ahkang aya jaw ya nit dai.

³Htani htana asak ngu ai chyawm gaw, langai sha rai nga ai, teng man ai Karai Kasang hpe mung, nang shangun dat ai Yesu Hkristu hpe mung, chye chyang lu ai hpe ngu ai rai nga ai.

⁴Ga ntsa e ngai gaw na a hpung shingkang shapraw ya ni ai; ngai gun hpai na matu nang ngai hpe ap ya ai amu hpe gun hpai ngut se ai.

⁵Wa e! Ginding aga garai n lat kaw nna nang hte rau ngai lu nga ai hpung shingkang hpe ya aten hta na a man e ngai hpe jaw rit law.

⁶Ndai mungkan ga na nang ngai hpe ap ya da ai masha ni hpe ngai chye na shangun sai. Nang shanhte hpe madu da nga ndai rai nna shanhte hpe ngai e jaw nit dai, shing rai shanhte mung na mungga hpe madat mara hkan shatup masai.

⁷Nang ngai hpe jaw majaw yawng hte gaw, nang kaw na rai nga ai hpe ya shanhte chye masai.

⁸Nang ngai e jaw dat ai mungga hpe, ngai shanhte hpe jaw mawe ai rai nna shanhte mung dai hpe hkap la masai. Nang kaw na ngai du sa ai gaw teng nga ai hpe shanhte chye ma ai hte nang ngai hpe shangun dat ndai hpe mung, kam sham ma ai.

⁹“Shanhte a matu mara ngai hpyi nngai, mungkan masha ni a matu ngai hpyi nngai n rai; nang ngai hpe jaw ai ni a matu she hpyi nngai; hpa majaw nga yang, shanhte gaw nang madu da ai ni rai nga ma ai.

¹⁰Ngai lu malu gaw, na a rai nga ai; nang lu malu mung nye a rai nga ai rai nna, nye a hpung shingkang shanhte hta dan hkung li ai.

¹¹Ngai gaw nang hpang de wa na rai nna, ndai mungkan ga e nga sana n rai; rai ti mung ndai ni chyawm gaw mungkan ga e nga nga na rai ma ai. Chyoi Pra ai Wa e an gaw langai sha rai nga ai zawn, ndai ni mung rai nga mu ga; nang ngai hpe ap ya ai mying nsang a hpung shingkang n-gun atsam hte shanhte hpe shim hkra bau sin nga u.

¹²Ngai shanhte hte rau nga nga ai hte yang, nang ap ya da ai mying nsang a hpung shingkang atsam hte shanhte shim nga hkra bau sin makawp maga mase ai. Dai Chyum Laika hta rawng ai ga hte maren dik wa u ga she, kaja wa hten bya sum hkrum na rai nga ai masha langai mi hta lai nna kaga kadai langai mi pyi hten bya sum hkrum ma ai n rai.

¹³Ya gaw nang hpang de ngai wa na rai nna, nye a kabu gara ai gaw shanhte a kraw lawang ni hta hpring tup wa malu ga, ngu nna mungkan ga e ndai lam ni ngai tsun da nga nngai.

¹⁴Na a mungga ngai shanhte hpe jaw da mase ai; ngai gaw mungkan ga na n rai nngai hte maren, ndai ni mung mungkan ga hte n seng ma ai majaw, mungkan masha ni shanhte hpe n ju n dawng ma ai.

¹⁵Ndai ni hpe mungkan ga na htawt la na nang kaw ngai hpyi nngai n rai, shanhte hpe Satan a lata na lawt hkra makawp maga na she ngai hpyi nngai.

¹⁶Ngai gaw mungkan ga na n rai nngai hte maren, ndai ni mung mungkan ga na n rai ma ai.

¹⁷Dai teng man ai lam hta na a matu shanhte hpe shachyoi shapra nna san da u; na a mungga gaw teng man ai lam rai nga lit dai.

¹⁸Nang ngai hpe mungkan ga de shangun dat ndai zawn, ngai mung shanhte hpe mungkan ga de shangun dat mawe ai.

¹⁹Shanhte gaw magam gun na matu tinang hkum hpe kaja wa shachyoi shapra ap nawng da ai ni byin wa mu ga, ngu nna ngai shanhte a matu mara nye hkum dai shachyoi shapra ap nawng tawn da se ai.

²⁰“Ndai ni a matu sha ngai hpyi nngai n rai, shanhte hkaw tsun dan ai mungga a majaw ngai hpe kam sham wa ai ni a matu mung, ngai hpyi nga nngai.

²¹Shanhte nlang hte gaw langai sha tai nga mu ga, ngu nna ngai hpyi nngai. Wa e! Nang gaw ngai hta nga nga nna ngai mung nang hta nga nga nngai zawn, dai ni mung an hta nga nga mu ga, ngu nna ngai hpyi nga nngai. Ngai hpe nang shangun dat ndai gaw, mungkan ga na ni kam sham lu mu ga, shanhte hpe langai sha byin tai shangun u law.

²²An gaw langai sha rai nga ga ai zawn, shanhte mung langai sha tai wa lu na matu, ngai gaw nang ngai hpe jaw ya ai hpung shingkang hpe nan shanhte hpe jaw mase ai.

²³Nang ngai hpe shangun dat nna, nang ngai hpe tsaw ra nga ai zawn, shanhte hpe mung tsaw ra nga ai lam, mungkan masha ni chye lu na matu ngai gaw shanhte hta nga nga nna, nang mung ngai hta nga nga ai hte shanhte langai sha tai wa mu ga.

²⁴Wa e! Ginding aga garai n lat kaw nna nang ngai hpe tsaw ra nga ndai majaw, ngai e jaw ai nye a hpung shingkang hpe ngai e ap ya da ai masha ni mu lu mu ga, ngai nga ai shara hta shanhte hpe mung nga shangun mayu nngai.

²⁵Ding hpring ai Wa e! Mungkan ga na ni nang hpe n chye ma ti mung, ngai nang hpe chye nga nngai; nang ngai hpe shangun dat ndai gaw ndai masha ni chye ma ai.

²⁶Nang ngai hpe tsaw ra ai tsaw ra n-gaw nwai myit gaw, shanhte hta e mung rawng nga nna ngai mung shanhte hta anga nga na matu, na a lam shanhte hpe shachye shachyang mase ai, matut nna mung shachye shachyang na mawe ai,” nga ai.