Read Jinghpaw Common Language Bible 2009 YAWHAN 18 Bible Online

YAWHAN 18 - Jinghpaw Common Language Bible 2009 bible

YAWHAN 18

¹Yesu gaw ning ngu nna akyu hpyi ngut ai hpang, shi a sape ni hte rau pru wa nna, Kidron hkaraw wora hkran de rap sa wa ma ai. Dai yang e sun langai mi nga nga ai rai nna, Yesu hte shi a sape ni dai de shang wa ma ai.

²Yesu gaw shi a sape ni hte law law lang dai de e sa ga ma ai majaw, shi hpe ap kau na wa Yuda mung, dai shara hpe chye da wu ai.

³Dai rai nna Yuda gaw Roma hpyen la palatun langai mi hte hkinjawng agyi ni hte Hparishe ni dat dat ai htingnu sin ai hpyen la ni hpe mung shaga woi sa wa ai. Shanhte gaw pyengdin ni, wan shanan ni, ri nhtu laknak hte rai nna sa wa ma ai.

⁴Yesu gaw, shi hta byin wa ra ai lam yawng hpe chye wu ai majaw, shi sit sa nna, “Nanhte kadai hpe tam nga myit ta?,” gu nna shanhte hpe san mu ai.

⁵“Shanhte gaw, “Nazaret na Yesu hpe tam ga ai,” ngu nna shi hpe htan mu ai. Yesu gaw, “Ngai nan dai wa rai nga nngai,” ngu mu ai. Shi hpe ap kau na wa Yuda mung dai ni hte rau tsap nga ai.

⁶“Ngai gaw dai wa nan rai nga nngai,” ngu nna Yesu tsun dat jang dai ni gaw hpang de htingnut wa nna ga hta kadawng taw mat ma ai.

⁷Yesu gaw, “Nanhte kadai hpe tam nga myit ta?,” ngu nna kalang mi bai san mu yang, shanhte gaw, “Nazaret na Yesu hpe tam ga ai,” nga nna bai tsun ma ai.

⁸Yesu gaw, “Ngai nan rai nga nngai,” ngu nna nanhte hpe ngai tsun ma sade ai, “Nanhte ngai hpe tam ai rai myit yang gaw, ndai ni gaw wa manu ga,” ngu nna htan mu ai.

⁹(Ning nga nna tsun ai gaw, “Wa e, nang ngai e jaw ai ni hta na langai mi hpe mung n shamat kau nngai,” nga nna shawng de tsun ga ai ga dik wa na matu rai nga ai.)

¹⁰Simun Petru gaw nhtu hpye nga ai rai nna, dai hpe shaw nhtawm, hkinjawng agyi wa a mayam hpe kahtam nna, dai wa a hkra maga na na di mat lu ai. Dai mayam a mying gaw Malhku ngu ai rai lu ai.

¹¹Yesu gaw, “Na a nhtu dai hpe n ga hta shawn bang kau u! Nye Wa ngai hpe jaw ai nni nkri ngu ai gawm hpe ngai n lu na re ngu nna nang myit da wu ni?,” ngu nna Petru hpe tsun wu ai.

¹²Shaloi Roma hpyen du wa hte shi a hpyen ma ni, Yuda amyu masha sin langa ni gaw Yesu hpe rim la nna gyit mu ai.

¹³Dai hpang Anna hpang de shawng woi wa mu ai. Hpa majaw nga yang, Anna gaw dai shaning e sha Hkinjawng Agyi Kaba tai wa ai Kayahpa a katsa wa rai nga ai.

¹⁴Dai Kayahpa gaw, “Amyu masha ni yawng a matu masha langai mi si yang grau mai ai,” nga nna hpaji daw ya ai wa rai nga ai.

¹⁵Shaloi Simun Petru hte kaga sape langai mi gaw Yesu kaw hkan nang ma ai. Dai kaga sape wa gaw, Hkinjawng Agyi Kaba hte atsawm sha chye chyap ai rai nna, Hkinjawng Agyi Kaba wa a nta npan de Yesu hte rau hkan shang nang ai.

¹⁶Rai ti mung Petru gaw, shinggan maga chyinghka lam makau e hti tsap nga ai. Dai majaw Hkinjawng Agyi Kaba wa hte chye chyap ai sape kaga wa gaw pru nna chyinghka sin ai wa hpe tsun nhtawm, Petru hpe jashawn la wu ai.

¹⁷Shaloi chyinghka sin ai numsha gaw Petru hpe, “Nang mung dai masha wa a sape ni hta langai mi n rai n ni?,” ngu nna san wu ai. Shi gaw, “N rai nngai,” ngu nna htan wu ai.

¹⁸Dai shaloi kashung ai majaw, sin ai hpyen la ni hte shangun ma ni gaw nra hte wan wut nna kra let tsap nga ma ai; Petru mung dai ni hte rau tsap nna wan kra nang nga ai.

¹⁹Shaloi Hkinjawng Agyi Kaba wa gaw Yesu hpe, shi a sape ni a lam hte shi a sharin shaga ai lam, san wu ai.

²⁰Yesu gaw, “Ngai galoi mung masha yawng mayawng a man e, dan dan leng leng hkaw tsun ni ai, Yuda masha ni nlang zuphpawng ai tara jawng ni hta mung, Nawku Htingnu hta mung, ngai sharin shaga ni ai. Makoi magap nna ngai hpa mung n hkaw n tsun nngai.

²¹Dai rai yang, nang ngai e hpa rai san n ta? Ngai kaning ngu hkaw tsun ai gaw, na la ai ni hpe san yu u; ngai tsun ai ga hpe shanhte chye ma ai,” ngu nna htan wu ai.

²²Yesu shing ngu wu yang, makau e tsap nga ai sin nga ai ni hta na langai mi gaw, Yesu hpe kahpret nna, “Hkinjawng Agyi Kaba wa mi ting hpe nang shing nga htan gwi nga n ni!,” ngu wu ai.

²³Yesu gaw, “Ngai tsun ai ga shut yang gaw hpa baw shut ai lam ndai kaw nga ai ni yawng hpe tsun dan u. Rai ti mung ngai tsun ai ga teng yang gaw, nang hpa rai ngai hpe kahpret n ta?,” ngu nna htan wu ai.

²⁴Dai hpang Anna gaw Yesu hpe naw gyit da nga chyalu Kayahpa hpang de sa dat wu ai.

²⁵Petru gaw wan kra let dai yang e naw tsap nga ai. Dai rai nna kaga ni mung Petru hpe, “Nang mung shi a sape ni hta na langai mi n rai nga n ni?,” ngu nna san mu ai. Shi gaw, “N rai nngai,” ngu nna nyet kau wu ai.

²⁶Petru e kahtam nna na di ai wa hte hpu nau daw ai, Hkinjawng Agyi Kaba a mayam langai mi mung, “Nang sun e dai wa hte rau nga ndai hpe ngai mu nngai n rai ni?,” ngu wu ai.

²⁷Petru gaw, “Ngai n rai nngai,” ngu nna bai nyet kau wu ai. Dai shaloi jang u goi ra ai.

²⁸Bai shanhte gaw jahpawt jau jau e, Yesu hpe Kayahpa kaw nna Pilat a htingnu na tara jeyang ai pretori ngu ai gawk kaba de woi shang wa mu ai. Yuda masha ni gaw tinang a hkum awu asin n hkrum ai sha dai Shalai wa ai Poi sha lu na matu nawku htung a tara hte maren jasan jaseng mayu ai majaw htingnu wang de n shang ma ai.

²⁹Dai re ai majaw Pilat gaw shanhte nga ai de pru nna, “Ndai wa hta nanhte hpa mara shagun mu ta?,” ngu nna san mu ai.

³⁰Shanhte gaw, “Ndai wa tara lama ma tawt lai ai wa n rai yang gaw, shi hpe nang hpang de anhte woi sa wa na n rai,” ngu nna htan mu ai.

³¹Pilat gaw, “Nanhte nan shi hpe woi la nna nanhte a tara hte maren jeyang mu,” ngu nna shanhte hpe htan wu ai. Yuda masha ni gaw, “Anhte gaw marai langai ngai hpe sat na ahkang n lu ga ai,” ngu nna bai htan mu ai.

³²(Shanhte shing nga nna tsun ai gaw, Yesu shi kaning rai gara hku si hkam lu na lam kumla ga hte tsun da ai ga dik wa na matu rai nga ai.)

³³Dai majaw Pilat gaw htingnu kata de bai shang nna Yesu hpe shaga la nhtawm, “Nang Yuda ni a hkawhkam rai nga n ni?,” ngu nna shi hpe san wu ai.

³⁴Yesu gaw, “Dai ga san gaw na a myit hte nang san ai rai ni? Shing n rai, masha kaga ni nye a lam nang hpe tsun dan ma ni?,” ngu nna htan wu ai.

³⁵Pilat gaw, “Ngai Yuda masha re ai ngu nna nang myit n ni? Na a amyu masha ni hte hkinjawng agyi ni gaw, nang hpe ngai kaw sa ap ya ma ai. Nang hpa galaw shut nit ta?,” ngu nna htan wu ai.

³⁶Yesu gaw, “Nye a mungdan ndai mungkan ga hte n seng li ai; nye a mungdan ndai mungkan ga hte seng ai rai yang gaw, ngai Yuda masha ni a lata de n shang hkra, nye a ali ama ni gasat na masai. Kaja wa nye a mungdan gaw ndai mungkan hte n seng li ai,” ngu nna htan wu ai.

³⁷Dai re ai majaw Pilat gaw, “Rai taw, nang hkawhkam langai mi rai nga n ni?,” ngu nna san wu ai. Yesu gaw, “Ngai hkawhkam langai mi re ai nga nna nang tsun nga ndai. Ngai gaw dai teng man ai lam hkaw tsun na yaw shada ai lam langai mi a matu ngai shangai chyinghkai wa ni ai hte mungkan ga de du sa ring ngai. Dai teng man ai hte seng ai ni nlang hte gaw, nye a ga nsen madat ma ai,” ngu nna htan wu ai.

³⁸Pilat gaw, “Teng man ai ngu ai gaw hpa rai ta?,” ngu nna shi hpe san wu ai. Dai hpang Pilat gaw shinggan de Yuda masha ni kaw bai pru nna “Ndai wa hpe daw dan na matu hpa mara mung n mu tam lu nngai.

³⁹Rai ti mung Shalai wa ai Poi aten hta bawng masha langai mi ngai nanhte hpe dat ya ga ai htung, nanhte hta nga ai hte maren, Yuda masha ni a hkawhkam wa hpe nanhte a matu dat ya na, nanhte ra myit ni?,” ngu nna san mu ai.

⁴⁰Shaloi shanhte gaw, “Dai wa hpe n rai Baraba hpe dat ya mi,” nga nna bai jahtau tsun ma ai. (Baraba chyawm gaw damya rai nga ai.)