Read Jinghpaw Common Language Bible 2009 YAWHAN 19 Bible Online

YAWHAN 19 - Jinghpaw Common Language Bible 2009 bible

YAWHAN 19

¹Dai hpang Pilat gaw Yesu hpe shaga mat wa shangun nna, kayat shangun wu ai.

²Hpyen ma ni mung ju hpun lakung hte lagup hkri la nna shi a baw hta shagup ya nhtawm, palawng ahkyeng mung jahpun mu ai.

³Shing di nhtawm, shi hpang de shanhte sit sa nna, “Yuda ni a Hkawhkam e, asak galu n ga law!,” ngu nna tsun let shi hpe kahpret ma ai.

⁴Shaloi Pilat gaw, shinggan de kalang mi bai pru nna shawa masha ni hpe, “Yu mu, ndai wa hpe si ari jaw lu na mara hpa n mu tam nngai hpe nanhte e mu chye shangun na matu shi hpe nanhte hpang de shapraw dan na made ai,” ngu mu ai.

⁵Yesu mung ju lagup gup ai hte palawng ahkyeng hpun let pru wa ai. Shaloi Pilat gaw “Ndai masha wa hpe yu mu!,” ngu nna shanhte hpe tsun mu ai.

⁶Hkinjawng agyi ni hte Nawku Htingnu sin ai hpyen ma ni Yesu hpe mu jang, “Wudang hta jen da u! Jen da u!,” nga nna jahtau ma ai. Shaloi Pilat gaw, “Nanhte nan shi hpe la nna jen da mu, ngai gaw shi hta hpa mara mung n mu nngai,” ngu nna shanhte hpe tsun mu ai.

⁷Shaloi Yuda masha ni gaw, “Dai wa gaw shi hkum hpe Karai Kasang a Kasha rai nngai nga nna hpyi hpun ai ga tsun ai majaw, si ging ai ngu nna anhte a tara hta tsun da nga ai,” ngu nna shi hpe htan mu ai.

⁸Pilat gaw dai ga na jang grau nna pyi hkrit kajawng wa wu ai.

⁹Dai rai nna htingnu nhku de bai shang nhtawm, Yesu hpe, “Nang kanang na sa wa n ta?,” ngu nna san wu ai. Rai ti mung Yesu gaw ga hkaw mi mung n htan wu ai.

¹⁰Dai majaw Pilat gaw, “Ngai hte ga n shaga hkraw nga n ni? Ngai nang hpe dat dat lu na hte wudang hta jen sat kau lu na ahkang lu nngai, nang n chye n ni?,” ngu nna shi hpe tsun wu ai.

¹¹Yesu gaw, “Nang hpe Karai Kasang e ahkaw ahkang jaw ai majaw sha nye a ntsa e ndai zawn re ai ahkang aya nang lu ndai. Dai majaw ngai hpe nang kaw sa ap ai wa gaw yubak grau kaba lu ai,” ngu nna shi hpe htan wu ai.

¹²Dai ga na jang Pilat gaw Yesu hpe shalawt kau dat na lam tam nga ai. Rai ti mung shawa masha ni gaw, “Nang dai wa hpe shalawt dat sayang gaw, nang Hkawseng wa a jinghku n rai nit dai! Kadai rai ti mung tinang hkum hpe hkawhkam rai nngai nga ai wa gaw hkawseng wa hpe gumlau ai wa rai nga ai,” nga nna jahtau ma ai.

¹³Pilat gaw dai ga ni hpe na jang, Yesu hpe woi shapraw nhtawm, Hebre ga hku Gabahta ngu ai nlung nep tawn ai shara na tara tingnyang hta dung nga ai.

¹⁴Ya, Shalai wa ai Poi a matu shachyip ai nhtoi a shani ka-ang hkying shi lahkawng du mahka aten mung rai nga ai. Shaloi Pilat gaw Yuda masha ni hpe, “Nanhte a Hkawhkam wa hpe yu yu mu!,” ngu mu ai.

¹⁵Dai masha ni gaw, “Shi hpe sat kau mu! Sat kau mu! Wudang hta jen sat kau u!,” nga nna jahtau ma ai. Bai Pilat gaw, “Nanhte a hkawhkam wa hpe ngai wudang hta jen nna sat kau shangun mayu myit ni?,” ngu nna shanhte hpe san mu ai. Shaloi Hkinjawng agyi ni gaw, “Kehta Hkawhkam hta kaga anhte Hkawhkam n lu ga ai,” ngu nna htan mu ai.

¹⁶Dai re ai majaw, Yesu hpe wudang hta jen sat kau mu ga nga, shanhte a lata de ap ya kau wu ai.

¹⁷Shanhte gaw Yesu hpe woi dun wa mu ai. Yesu gaw shi a wudang hpe shi nan hpai nna “Pungkum ngu ai Shara de sa wa ai.” Dai shara hpe, (Hebre ga hku “Golgahta,” nga ma ai.)

¹⁸Shanhte gaw dai yang e shi hpe wudang hta jen da ma ai. Shi hte rau masha marai lahkawng hpe mung maga mi de langai ngai di jen da mu ai rai nna, Yesu gaw dai yan a lapran e rai nga ai.

¹⁹Pilat mung masat shamying laika ka la nhtawm, wudang hta shakap tawn da wu ai. Dai ka da ai gaw, “Yuda ni a hkawhkam Nazaret wa Yesu,” ngu ai rai lu ai.

²⁰Yesu hpe jen da ai shara gaw mare hte mung nau n tsan nga ai hte, dai laika hpe Hebre ga, Latin ga, Grik ga hte ka da nga ai majaw, Yuda masha ni law law wa dai masat shamying da ai laika hpe hti ma ai.

²¹Hkinjawng Agyi ni gaw Pilat hpe, “Yuda masha ni a Hkawhkam ngu nna hkum ka, ‘Ngai gaw Yuda masha ni a Hkawhkam rai nngai, nga nna shi tsun ai,’ ngu nna she ka u,” ngu nna sa tsun mu ai.

²²Pilat gaw, “Ngai ka ai hku ngai ka da se ai,” ngu nna htan wu ai.

²³Hpyen masha ni gaw Yesu hpe jen da ngut jang, shi a hpun palawng hpe la nna, mali brang di garan nhtawm, marai langai mi daw mi hpra la ma ai, dai kata palawng hpe mung shing di na maw ma ai; rai ti mung kata palawng gaw shakung n rawng ai lawng du nna htum hkra da ai rai nga ai.

²⁴Dai majaw shanhte gaw, “Palawng ndai hpe anhte n gang je ai sha kadai mahtang la ang na gaw shawun si hpaida da ga,” nga nna shada da tsun ma ai. Ndai hku byin ai gaw, “Shanhte gaw nye a hpun nba hpe shada da garan la nna, nye a kata palawng hpe mung hpaida da ma ai,” nga nna Chyum Laika hta tsun ai ga dik wa na matu rai nga ai. Dai majaw hpyen ma ni shing rai galaw ma ai.

²⁵Yesu a wudang a makau e tsap nga ai ni gaw shi a kanu hte kanu a kanau, Klopa a madu jan Mari hte Magdala Mari ni rai ma ai.

²⁶Yesu gaw shi a kanu hte shi a tsaw ra ai sape dai yang e tsap nga ai hpe mu wu ai. Dai rai nna Yesu gaw shi a kanu hpe, “Nu e, ningsha hpe yu u!,” ngu wu ai.

²⁷Dai hpang sape hpe mung, “Ning nu hpe yu u!,” ngu wu ai. Dai shani kaw nna dai sape gaw, Yesu a kanu hpe shi a nta e woi tawn da wu ai.

²⁸Yesu gaw dai ahkying hta amu mahkra ngut sai hpe chye wu ai rai nna, dai Chyum Laika hta ka da ai hte maren shadik na matu, “Ngai hpang gara nngai,” ngu nna tsun wu ai.

²⁹Dai hpang e, sabyi ntsin hkri [4] hte hpring ai di bu langai mi dung nga ai rai nna shanhte gaw hka kamu hpe ntsin hkri hta tsing la nhtawm husup ningren [5] ndung hta shakap nna shi a n-gup hta gawn jaw mu ai.

³⁰Yesu gaw dai ntsin hkri hkap la lu ngut jang, “Ngut ma sali ai!,” nga nhtawm, baw nga di nna nsa hti mat wa ai.

³¹Yuda masha ni gaw wudang hta jen da nga ai masha ni a lagaw kayat daw nna wudang ntsa na mang ni hpe htawm kau na, Pilat kaw ahkang hpyi ma ai. Shanhte shing rai hpyi ai lam gaw, dai shani gaw shachyip ai Laban manga ya shani rai nga ai hte, hpang shani mung Bansa Nhtoi kaba rai nna Bansa Nhtoi e wudang hta mang n noi nga shangun mayu ma ai majaw mung, Bansa Nhtoi gaw laklai nna chyoi pra ai nhtoi rai nga ai majaw mung, rai nga ai.

³²Dai majaw hpyen la ni sa nna Yesu hte rau jen sat da ai yan a lagaw ni hpe kayat daw ya mu ai.

³³Rai ti mung Yesu kaw du yang, shi si mat boi sai hpe shanhte mu ma ai majaw, shi a lagaw ni hpe n kayat daw ya ma ai.

³⁴Dai re ai pyi hpyen masha langai mi gaw, Yesu a garep hpe ri hte galun waw ya wu ai rai nna, shaloi jang sai hte ntsin pru wa ai.

³⁵(Ndai byin ai lam hpe nanhte mung kam sham lu myit ga, myi hte nan mu lu ai wa langai mi sakse hkam wu ai. Shi a sakse gaw teng nga lu ai, shi nan shi a sakse ga teng man nga ai hpe chye nga ai.)

³⁶Hpa majaw nga yang, dai lam byin ai gaw, “Shi a nra langai mung daw hten na ra ai n rai,” nga nna ka da nga ai ga dik wa na matu rai nga ai.

³⁷Bai kaga laika langai mi hta mung, “Shanhte galun waw ai wa hpe mada yu na maru ai,” nga ai.

³⁸Dai hpang, Yuda agyi salang ni hpe hkrit ai majaw, mayun de nna, (Yesu a sape tai nga ai Aramahti mare na Yosep ngu ai wa gaw, Yesu a hkum tsawp hpe shayu la na Pilat kaw hpyi wu ai.) Pilat mung ahkang jaw wu ai. Dai re ai majaw shi sa nna dai hkum tsawp hpe shayu la wu ai.

³⁹Shawng de shana e Yesu kaw sa chyai yu ai Nikodi mung Mura hte achyaw (Aloes) kayau ai manam pyaw ai baw sau pawng latsa daram la sa nna Yosep hte rau hkan nang sa ai.

⁴⁰Shaloi shan gaw Yesu a hkum tsawp hpe la nhtawm, Yuda masha ni makoi mayang ai htung lai hte maren, manam pyaw ai baw sau chya nna sumpan hte kayawp ahkyen lajang mu ai.

⁴¹Yesu hpe jen sat ai shara e sun langai mi nga ai. Dai sun e masha langai mi hpe mung garai n lup makoi yu ai lup ningnan langai mi nga ai.

⁴²Yuda ni a laban a shawng shani shachyip ai nhtoi rai nga ai hte dai lup mung ni nga ai majaw, shanhte gaw Yesu a moi mang hpe dai krawk da ai lup hta bang da mu ai.