Read Jinghpaw Common Language Bible 2009 YAWHAN 21 Bible Online

YAWHAN 21 - Jinghpaw Common Language Bible 2009 bible

YAWHAN 21

¹Dai hpang Yesu gaw Tiberi nawng makau e sape ni hpe shi hkum kalang mi bai madun dan mu ai. Dai shaloi na madun dan ai lam gaw ning rai nga ai.

²Simun Petru hte (Marun mying ai) Htawma, Galile mung Hkana kahtawng na Nahtanela, Zebedi a kasha yan, kaga Yesu a sape lahkawng, yawng hte rau rai nga ma ai.

³Shaloi Simun Petru gaw, “Ngai nga naw sa hkan ni ga,” ngu nna kaga ni hpe tsun mu ai. Shanhte gaw, “Anhte mung hkan sa na ga ai,” nga ma ai. Shing rai shanhte pru sa nna li hta shang ma ai. Rai ti mung dai shana tup nga langai mi mung n lu ma ai.

⁴Nhtoi htoi wa yang, Yesu gaw nawng hkin-gau ntsa e tsap nga ai; rai ti mung sape ni gaw Yesu re ai n chye ma ai.

⁵Shaloi Yesu gaw shanhte hpe, “Shabrang ni e, nga i lu rim myit ni?,” ngu nna san wu ai. Shanhte gaw, “Langai mi pyi n lu ga ai,” ngu nna shi hpe htan mu ai.

⁶Yesu gaw, “Nanhte a sumgawn hpe li a hkra maga de jahkrat mu, shaloi lu na myit dai,” ngu nna shanhte hpe tsun mu ai. Dai hte maren shanhte sumgawn jahkrat nna nga law law wa magawn la lu ma ai majaw, sumgawn pyi n gang la lu ma ai.

⁷Shaloi Yesu tsaw ra ai sape gaw, “Madu she rai nga ai!,” ngu nna Petru hpe tsun wu ai. Madu she rai nga ai, nga ai ga hpe Petru na jang, (shi singgu krin rai nga ai majaw) ntsa palawng hta lawai nna, hka de gumhtawn bang wu ai.

⁸Kaga sape ni gaw hkin-gau hte pe 300' daram sha gang nga ai majaw, nga hte hpring chyat nga ai sumgawn garawt let, li hte rau hkin-gau de hkan nang wa ma ai.

⁹Shanhte li na yu nna hkarang ntsa de du wa ma yang, nra wan mang hta nga kakang da ai hte muk nkau mi hpe mu ma ai.

¹⁰Shaloi Yesu gaw, “Nanhte ya lu rim la ai nga nkau mi la wa marit,” ngu mu ai.

¹¹Dai majaw Simun Petru gaw, li ntsa de lung nna nga kaba latsa e manga shi masum ting rawng ai sumgawn hpe hkarang de du hkra garawt shalun wu ai; nga dai hte wa law ti mung sumgawn gaw n je wa ai.

¹²Shaloi Yesu gaw, “Wa marit, jahpawt shat wa sha maru,” ngu nna shanhte hpe tsun mu ai. Shi Madu Yesu rai nga ai hpe sape ni chye ma ai majaw, shanhte hta na kadai mung, “Nang kadai rai n ta?,” ngu nna n san wam mu ai.

¹³Dai rai nna Yesu gaw shanhte nga ai de sit sa nhtawm, muk la nna shanhte hpe jaw mu ai, nga hpe mung dai hte maren sa jaw mu ai.

¹⁴Yesu shi si ai kaw na bai hkrung rawt ai hpang, sape ni hpe shi hkum madun dan ai hta na, ndai gaw masum lang na rai nga ai.

¹⁵Ya sape ni sha ngut jang, Yesu gaw Simun Petru hpe, “Yawhan a kasha Simun e, ndai kaga ni ngai hpe tsaw ra ai hta nang ngai hpe tsaw ra n ni?,” ngu nna san wu ai. Shi gaw, “Rai sa, Madu e ngai nang hpe tsaw ra nga nngai gaw, nang chye nga ndai,” ngu nna htan wu ai. Shaloi Yesu gaw, “Nye a sagu kasha ni hpe bau rem nga u,” ngu nna shi hpe tsun wu ai.

¹⁶Bai lahkawng lang ngu na, “Yawhan a kasha Simun e, Nang ngai hpe tsaw ra nga n ni?,” ngu nna shi hpe san wu ai. Shi gaw, rai sa, Madu e ngai nang hpe tsaw ra nga nngai gaw nang chye nga ndai,” ngu nna bai htan wu ai. Yesu gaw, “Nye a sagu ni hpe bau rem nga u,” ngu wu ai.

¹⁷Bai masum lang ngu na Yesu gaw, “Yawhan a kasha Simun e, nang ngai hpe tsaw ra nga n ni?,” ngu nna shi hpe san wu ai majaw, Petru myit yawn nna, “Madu e, nang gaw yawng mayawng hpe chye nga ndai ngai nang hpe tsaw ra nga nngai gaw, nang chye nga ndai!,” ngu nna htan wu ai. Yesu gaw, “Nye a sagu ni hpe bau rem nga u.

¹⁸Nang hpe ngai kaja wa teng teng tsun de ga, nang shabrang nga ai hte yang, nang hkyen lajang shajin la nna sa mayu ai shara shagu de sa chye ndai; rai ti mung nang dingla wa jang chyawm gaw, na a lata yan hpe nang lalam nna, masha kaga langai ngai nang hpe hkyen lajang shajin ya nhtawm, nang n sa mayu ai shara de woi sa na rin dai,” ngu nna shi hpe tsun wu ai.

¹⁹(Shing nga tsun ai gaw, Petru gaw kaning re ai si lam hte Karai Kasang a hpung shingkang shapraw lu na ra ai lam hpe tau hkrau nna tsun ai rai nga ai.) Shing nga tsun ngut jang, Yesu gaw Petru hpe “Ngai kaw hkan nang rit!,” ngu wu ai.

²⁰Shaloi Petru kayin yu u yang, Yesu tsaw ra ai sape ngu ai shawng de shana shat sha nga ai shaloi, Yesu a sinda hta shamyet nna, “Madu e nang hpe ap kau na wa gaw kadai mahtang rai ta?,” nga nna san ai sape hkan nang nga ai hpe, mu wu ai.

²¹Petru gaw dai wa hpe mu jang, Yesu hpe, “Madu e, rai taw, ndai wa gaw gara hku rai na rai ta?,” ngu nna san wu ai.

²²Yesu gaw, “Ngai du sa ai nhtoi du hkra ngai shi hpe asak hkrung nga shangun mayu yang, hkrung nga shangun na nngai, dai nang hte hpa seng a ta? Nang gaw nye a hpang hkan nang rit!,” ngu nna htan wu ai.

²³Dai majaw dai sape gaw si na n rai, nga ai ga gaw, Yesu a hpang hkan nang ai hpu nau ni hta chyam bra mat wa ai. Rai ti mung dai sape hpe n si na re ngu nna Yesu tsun ai n rai, “Ngai du sa ai nhtoi du hkra, shi hpe ngai asak hkrung nga shangun mayu yang mung, nang hte hpa seng a ta?,” nga nna tsun ai sha rai nga ai.

²⁴Dai sape wa gaw, ndai lam ni hpe sakse hkam tsun dan nna, ndai lam ni ka da ai wa rai nga ai. Shi tsun dan ai ga teng man nga ai mung, anhte chye ga ai.

²⁵Yesu galaw ai amu kaga law law naw nga ai; dai amu ni a lam langai a hpang langai ka da na nga yang, dai ka da ai laika ni gaw mungkan ga hta pyi n shang na re, ngu nna ngai myit nawn nngai.