Read Jinghpaw Common Language Bible 2009 YAWHAN 4 Bible Online

YAWHAN 4 - Jinghpaw Common Language Bible 2009 bible

YAWHAN 4

¹Yesu gaw Yawhan hta grau law ai masha ni hpe hkalup jaw nna sape shatai la nga ai lam Hparishe ni na ma ai. (

²Kaja wa nga yang, Yesu nan hkalup jaw ai n rai, shi a sape ni she jaw ma ai.)

³Shing rai Yesu gaw Hparishe ni hpa tsun nga ma ai hpe na wu yang, Yuda mung na pru mat wa nna Galile mung de bai wa ai.

⁴Lam e Samari mung hku ga lai sa wa ra wu ai.

⁵Dai majaw shi gaw, Yaku e shi a kasha Yosep hpe jaw ai ga dachyawk makau na Suhka ngu ai Samari mung na mare langai mi de du wa ai.

⁶Dai yang e Yaku a hka htung nga nga ai. Yesu gaw lam hkawm ba ai majaw, dai hka htung makau e dung nga ai. Dai aten gaw shani ka-ang hkying shi lahkawng daram hta rai nga ai.

⁷Shaloi Samari numsha langai mi hka ja na matu sa wa ai, Yesu gaw, “Ngai hpe ntsin jaw lu e,” ngu nna shi kaw hpyi wu ai.

⁸(Shi a sape ni chyawm gaw, sha hpa mari na matu mare de sa mat wa masai.)

⁹Dai Samari numsha gaw, “Nang Yuda masha langai mi rai da nhtawm me, ngai Samari numsha kaw gara hku ntsin hpyi lu lu n ta?,” ngu nna htan wu ai. (Yuda masha ni gaw Samari masha ni hte gawm ni, wan ni, n kayau lang ga ma ai.)

¹⁰Shaloi Yesu gaw, “Karai Kasang jaw ya ai chyeju kumhpa hpe mung, nang kaw lu ntsin hpyi nga ai wa hpe mung, nang chye wu taw gaw, nang shi kaw hpyi nna, shi gaw nang hpe asak jahkrung ya ai ntsin jaw na nit dai,” ngu nna shi hpe htan wu ai.

¹¹Dai numsha mung, “Madu e, nang ntsin ja na rai hpa mung n lu ndai, hka htung mung sung nga ai. Dai majaw, nang kanang na dai asak jahkrung ya ai ntsin lu la na n ta?

¹²Anhte a Jiwa Yaku gaw ndai hka htung anhte hpe jaw da mani ai rai nna, shi hte shi a kashu kasha ni, shi a yam nga hpung ni yawng ndai hta na lu masai. Nang gaw Jiwa Yaku hta grau kaba n ni?,” ngu nna shi hpe tsun wu ai.

¹³Yesu gaw ntsin ndai lu ai wa kadai mung, hpang bai gara na ra ai.

¹⁴Rai ti mung dai ngai jaw na ngu ai ntsin lu ai wa kadai mung galoi mung hpang bai gara na n rai. Ngai shi hpe jaw ai ntsin gaw, dai wa kata hta asak hka hpawk tai na ra ai, dai gaw shi hpe asak jahkrung ya ai ntsin jaw na wu ai rai nna shi hpe htani htana asak lu la shangun wu ai.

¹⁵Shaloi dai numsha gaw, “Madu e, ngai galoi mung hpang bai n gara, ndai kaw hka mung n sa ja ra n ga, ntsin dai ngai hpe jaw rit,” ngu nna hpyi wu ai.

¹⁶Yesu gaw, “Na a madu wa hpe naw wa shaga la nna, nang de sa rit,” ngu wu ai.

¹⁷Dai numsha gaw, “Ngai la n lu nngai,” ngu nna htan wu ai. Yesu gaw, “Ngai la n lu nngai nga nna nang htan ai ga gaw teng nga lit dai.

¹⁸Hpa majaw nga yang, nang la manga lu yu nit dai, ya nang hte rau nga ai la mung, na a madu wa majing n rai nga lit dai,” ngu nna shi hpe tsun wu ai.

¹⁹Shaloi dai numsha gaw, “Madu e nang myihtoi rai nga ndai hpe ngai dum chye se ai.

²⁰Nye a Samari jiwa ni gaw ndai Gerizim bum ntsa e Karai Kasang hpe nawku ga ma ai, rai ti mung nanhte Yuda masha ni gaw, Yerusalem mare kaw chyu sha Karai Kasang hpe nawku mai ai shara re, nga nna tsun ga myit dai,” ngu wu ai.

²¹Yesu gaw, “Numsha e, ngai hpe kam u, ndai bum e mung, Yerusalem mare e mung, masha ni Wa hpe n nawku na aten du wa na ra ai.

²²Nanhte Samari masha ni gaw, tinang kadai hpe nawku nga ai hpe hkrak n chye myit dai; anhte Yuda masha ni chyawm gaw, tinang chye ai wa hpe nawku ga ai, hpa majaw nga yang, hkye hkrang la ai gaw Yuda masha ni kaw nna she du sa ai rai nga ai.

²³Rai ti mung nawku ai ni gaw Wa hpe Karai Kasang a Wenyi n-gun atsam hte teng man ai hku nawku na ahkying gaw du wa na ra ai rai nna, ya e pyi du ra ai. Wa gaw shing rai nawku ai ni hpe ra sharawng nga ai.

²⁴Karai Kasang gaw Wenyi rai nga ai rai nna, shi hpe nawku ai ni mung, Madu a Wenyi n-gun atsam hte teng man ai hku nawku lu na rai ma ai,” ngu nna shi hpe tsun wu ai.

²⁵Dai numsha mung, “Hkristu ngu ai Meshia du na ra ai hpe ngai chye nngai, shi du jang gaw, shi anhte hpe lam magup tsun madun na ra ai,” ngu wu ai.

²⁶Shaloi Yesu gaw, “Nang hte ga tsun nga ai ngai gaw, dai wa nan rai nga nngai,” ngu nna shi hpe tsun wu ai.

²⁷Dai ten hta shi a sape ni du wa nna, shi numsha langai hte ga shaga nga ai hpe wa mu nna grai mau mat ma ai. Rai ti mung dai numsha hpe, “Nang hpa ra n ta?,” ngu nna mung, shing n rai, “Madu nang hpa rai dai numsha hte ga shaga nga n ta?,” ngu nna mung, kadai mung n wam san mu ai.

²⁸Shaloi dai numsha gaw, shi a ntsin di bu tawn kau da nna mare de bai wa nhtawm, mare masha ni hpe,

²⁹“Ngai galaw lai wa sai lam yawng, ngai hpe bai tsun dan ai wa hpe sa yu maru, dai wa gaw Hkristu mi rai na kun?,” ngu nna wa tsun mu ai.

³⁰Dai rai nna masha ni gaw mare kaw na pru sa nna, Yesu kaw sa du ma ai.

³¹Dai laman sape ni gaw, “Rabai e, shat sha u,” ngu nna shi hpe saw lajin mu ai.

³²Rai ti mung shi gaw, “Nanhte n chye ai lusha ngai lu da we ai,” ngu nna shanhte hpe htan mu ai.

³³Dai majaw sape ni gaw, masha langai ngai shi hpe shat sa jaw masai kun! nga nna shada da san ma ai.

³⁴Dai rai nna Yesu gaw, “Ngai hpe shangun dat ai wa a myit ra ai hku hkan galaw na hte shi ap ya da ai magam bungli ngut kre hkra galaw na lam gaw nye a sha hpa rai nga li ai.

³⁵‘Ya shata mali naw ra ai, dai lai jang she mam dan ten du na ra ai, nga nna nanhte tsun ga ai ga malai langai mi nga malit dai n rai ni? Rai ti mung ngai nanhte hpe tsun made ga, Hkauna pa ni de atsawm sha sharawt mada yu mu, mam ni myin htoi nga sai rai nna, shu la ten du nga sai.

³⁶Dan ai wa gaw shabrai lu la nna, htani htana asak hte seng ai nsi naisi shu la lu ai. Dai rai nna gat ai wa hte dan ai wa rau sha kabu lu ma ai.

³⁷‘Langai wa gaw gat, langai wa gaw dan,’ nga nna tsun ai ga gaw teng nga ai.

³⁸Nanhte shawng e n galaw tawn ai kaw na dan la na ngai nanhte hpe shangun dat made ai. Kaga masha ni amu galaw gat hkai nna, nanhte gaw akyu hkam sha myit dai,” ngu nna shanhte hpe tsun mu ai.

³⁹Dai numsha e, “Ngai galaw yu sai lam ni yawng shi ngai hpe bai tsun dan ai,” nga nna sakse hkam ai ga a majaw, dai mare na Samari masha ni Yesu hpe kam sham ma ai.

⁴⁰Dai rai nna, Samari masha ni Yesu hpang de du ma yang shanhte hte rau nga nga na matu hpyi ma ai majaw, dai yang e nhtoi lahkawng ya hkring nga ai.

⁴¹Shi a mungga majaw, kam sham ai ni grau nna law wa ma ai.

⁴²Dai masha ni gaw, dai num sha hpe, “Ya gaw na a ga majaw sha kam sham ai n rai saga ai, shi a mungga hpe anhte nan na la lu nna, ndai wa gaw mungkan ga a hkye hkrang la ai Madu majing rai nga ai hpe anhte chye saga ai,” ngu mu ai.

⁴³Dai yang e lahkawng ya nga nna Yesu gaw, dai yang na pru nna Galile mung de rai mat wa ai.

⁴⁴“Myihtoi gaw tinang a buga e arawng n lu ai,” nga nna Yesu shi nan tsun ga ai hte maren pru mat wa ai rai nga ai.

⁴⁵Shi Galile mung de du ai shaloi, Galile masha ni gaw Madu hpe hkap tau bawp hkalum la ma ai, hpa majaw nga yang, Yerusalem mare e galaw lai wa sai Shalai Wa Ai Poi de shanhte nan sa lawm ma ai rai nna, dai poi aten hta Yesu galaw dan ai amu nlang hte hpe mu yu ma ai majaw rai nga ai.

⁴⁶Dai hpang Yesu gaw, shi ntsin hpe sabyi shatai ai shara, Galile mung na Hkana mare de bai du wa ai. Dai mare e du langai mi nga ai rai nna shi a kasha gaw Kaperna-um mare e machyi nga lu ai.

⁴⁷Dai du wa gaw Yuda mung na Galile mung de Madu Yesu du sa wa ai lam na wu yang, shi hpang de sa nhtawm, machyi nna si wa magang nga ai shi a kasha hpe Kaperna-um mare de sa nna shamai ya na hpyi nem wu ai.

⁴⁸Yesu gaw, “Nanhte gaw lamik kumla hte mauhpa amu ni n mu myit yang gaw, nanhte langai mi mung galoi mung kam na n rai myit dai,” ngu nna shi hpe tsun wu ai.

⁴⁹Dai du wa chyawm gaw, “Madu e, nye a kasha garai n si yang yu wa ga law,” ngu nna hpyi wu ai.

⁵⁰Yesu gaw, “Wa nu, na nsha gaw bran salit dai!,” ngu nna shi hpe tsun dat wu ai. Dai du wa gaw, Yesu tsun ai ga hpe kam let wa mat ai.

⁵¹Shing rai shi wa nga yang, shi a mayam ni sa tau nna, kasha bran sai lam tsun dan mu ai.

⁵²Shi gaw, gara aten hta shi a kasha machyi bran sai lam shanhte hpe san mu yang, shanhte gaw, “Mani shana maga hkying langai hta hkum kahtet ai kawp mat sai,” ngu nna htan mu ai.

⁵³Dai rai nna, dai ahkying gaw, “Na nsha bran salit dai,” ngu nna Yesu shi hpe tsun ai ahkying nan rai nga ai hpe kawa chye wu ai rai nna, shi hkum nan hte shi a nta masha ni nlang hte gaw kam sham mat ma ai.

⁵⁴Ndai lamik kumla gaw, Yuda mung nna Galile mung de Yesu du wa ai hpang lahkawng lang ngu na madun ai lamik kumla rai nga ai.