Read Jinghpaw Common Language Bible 2009 YAWHAN 9 Bible Online

YAWHAN 9 - Jinghpaw Common Language Bible 2009 bible

YAWHAN 9

¹Ya, Yesu lai sa wa nga yang, hkritung nna myi kyaw ai masha langai mi hpe mu wu ai.

²Shaloi shi sape ni gaw, “Sara e, ndai wa myi n mu ai shangai wa ai gaw, gade a mara majaw rai ta? Shi nan a mara rai ni? Shing n rai, shi a kanu kawa ni a mara rai ni?,” ngu nna san mu ai.

³Yesu gaw, “Ndai wa a myi n mu ai lam gaw, shi a mara hte mung, kanu kawa ni a mara hte mung, hpa n seng nga ai. Shi myi n mu ai gaw Karai Kasang a n-gun atsam shi hta magam bungli galaw nga ai lam mu lu na matu rai nga ai.

⁴Shani ninghtoi naw rai nga dingsa gaw, ngai hpe shangun dat ai wa a magam amu hpe anhte gun hpai nga lu na rai nga ai. Kadai mung amu n gun n hpai lu ai shana ahkying du na ra ai.

⁵Ngai gaw mungkan ga e naw nga ai hte yang, mungkan ga a nhtoi rai nga nngai,” ngu nna htan mu ai.

⁶Shing nga tsun ngut jang Yesu gaw, ga hta mayen prat bang nna hkumpup galaw nawk la nhtawm, dai wa a myi hta chya ya nna

⁷“Silum hka lawng de sa kashin su,” ngu nna shi hpe tsun dat wu ai. Dai hte maren sa kashin nna myi mu ai hte bai wa ai. (Silum ngu ai a lachyum gaw “shangun dat ai,” rai nga ai.)

⁸Dai rai nna htingbu ni hte, shawng de shi hpyi sha hkawm ai hpe mu ga ai ni gaw, “Ndai wa gaw dung nga nna hpyi sha ai wa n rai ni,” nga nna san ma ai.

⁹Nkau mi gaw, “Dai wa nan rai nga ai,” nga ma ai. Bai nkau mi gaw, “Dai wa n rai, dai wa hte gaw bung nga ai,” nga ma ai. Dai myi bai mu ai wa chyawm gaw, “Ngai nan dai wa rai nga nngai,” ngu nna tsun mu ai.

¹⁰Shaloi dai ni gaw, “Rai taw, na a myi kaning rai mu lu lit ta?,” ngu nna shi hpe san mu ai.

¹¹Shi gaw, “Yesu ngu ai wa, hkumpup ga galaw la nna nye a myi hta chya nhtawm, Silum hka lawng de sa kashin u, nga nna ngai hpe tsun ai hte maren, ngai sa kashin yang, myi mu lu li ai,” ngu nna htan wu ai.

¹²Shaloi shanhte gaw, “Dai wa kanang nga nga a ta?,” ngu nna san mu yang, “Ngai n chye nngai,” ngu nna htan wu ai.

¹³Dai hpang shanhte gaw, shawng de myi n mu ai wa hpe Hparishe ni hpang de woi sa mu ai.

¹⁴Yesu hkumpup galaw la nna dai wa hpe myi hpaw ya ai shani gaw Bansa Nhtoi rai nga ai.

¹⁵Hparishe ni mung, dai wa hpe shi a myi kaning rai mu lu ai lam san mu yang, dai wa gaw, “Nye a myi ni hta hkumpup chya ya nna, ngai kashin kau dat we yang mu wa li ai,” ngu nna shanhte hpe htan mu ai.

¹⁶Shaloi Hparishe ni nkau mi gaw, “Dai wa gaw Bansa Nhtoi a Tara hpe n hkan n sa ai majaw, Karai Kasang kaw na du sa ai wa n rai,” nga ma ai. Bai nkau mi gaw, “Yubak lu ai wa langai gaw ning re ai lamik kumla ni hpe kaning rai galaw lu na a ta?,” nga ma ai. Shing nga nna shanhte a kata hta myit hkrum ai lam n nga ai, shai wa bra wa ma ai.

¹⁷Dai rai nna Hparishe ni gaw, myi n mu ai kaw na myi bai mu lu ai masha wa hpe na a myi bai mu shangun ai wa gaw, kaning re ai wa re ai ngu da wu ta?,” ngu nna kalang mi bai san mu ai. Dai wa gaw, “Myihtoi langai mi rai nga ai,” ngu nna bai htan mu ai.

¹⁸Rai ti mung Yuda masha ni gaw, shawng de dai wa myi n mu ai wa re ai mung ya myi bai mu lu sai mung, n kam ma ai majaw kanu kawa ni hpe shaga la nna san yu ma ai.

¹⁹Shanhte gaw, “Ndai wa gaw nanhte a kasha rai ni? Nanhte tsun ai hte maren hkritung nna myi kyaw ai wa rai ni? Dai teng yang gaw ya kaning rai bai mu lu a ta?,” ngu nna san mu ai.

²⁰Dai wa a kanu kawa yan gaw, “Ndai wa an a kasha rai nga ai mung, hkritung nna myi n mu ai mung, an chye nga ga ai.

²¹Rai ti mung, ya kaning rai mu lu ai mung, gade e shi a myi kyaw nga ai hpe shamai ya ai mung n chye ga ai. Shi hpe san yu mu, shi asak mung kaba sai rai nna, shi a lam shi hkrai tsun dan lu ai,” ngu nna htan mu ai.

²²Shi a kanu yan kawa gaw Yuda masha ni hpe hkrit ma ai majaw shing ngu tsun mu ai. Hpa majaw nga yang, Yesu gaw Meshia re, nga nna kam sham yin la ai wa kadai hpe rai ti mung, tara jawng na shapraw kau na nga nna Yuda masha ni myit hkrum da masai.

²³Dai majaw dai wa a kanu yan kawa gaw, “Shi asak kaba sai, shi hpe san yu mu,” nga ai rai nga ai.

²⁴Dai re ai majaw, dai hkritung nna myi n mu ai wa hpe lahkawng lang ngu na bai shaga la nhtawm, “Karai Kasang a man e teng man ai ga tsun na nngai ngu nna ga sadi jaw u, dai wa gaw yubak mara lu ai wa rai nga ai hpe anhte chye ga ai,” ngu nna shi hpe tsun mu ai.

²⁵Shaloi dai wa gaw, “Shi yubak mara lu ai re ai, n re ai gaw ngai n chye nngai, ngai shawng de myi n mu ai, ya chyawm gaw mu lu ni ai, dai lam langai sha ngai chye nngai,” ngu nna shanhte hpe htan mu ai.

²⁶Bai shanhte gaw, “Shi nang hpe kaning di ta? Na a myi n mu ai hpe kaning di jahpaw ya a ta?,” ngu nna san mu ai.

²⁷Dai wa gaw, “Ngai nanhte hpe tsun dan ngut chyalu rai sai, nanhte she n madat la myit dai, hpa rai bai na mayu myit ta? Nanhte mung shi a sape ni tai mayu myit ni?,” ngu nna shanhte hpe bai htan mu ai.

²⁸Shaloi shanhte gaw, shi hpe matsa let, “Nang chyawm dai wa a sape rai nga ndai, anhte gaw Mawshe a sape ni rai ga ai.

²⁹Karai Kasang gaw Mawshe hpe mungga jaw ai anhte chye ga ai; dai wa kanang na du sa ai hpe chyawm gaw anhte n chye ga ai,” ngu mu ai.

³⁰Shaloi dai wa gaw, “Shi gaw nye a myi mu shangun ai wa rai nga ai, shi kanang nna du sa ai wa re ai hpe n chye ai ngu ai gaw mau hpa lam rai nga ai.

³¹Yubak kap ai ni a ga hpe Karai Kasang n madat nga ai gaw anhte chye ga ai, Karai Kasang hpe nawku hkungga nna shi a myit ra ai hku hte maren hkan sa galaw ai ni a ga hpe gaw madat nga ai.

³²Hkritung nna myi n mu ai wa langai mi hpe, marai langai ngai e myi bai mu lu shangun ai ngu ai gaw, mungkan ga nnan lat kaw nna galoi mung kadai nna yu ai.

³³Dai wa Karai Kasang kaw na du sa ai wa n rai yang gaw, hpa mung shi galaw lu na n rai,” ngu nna shanhte hpe htan mu ai.

³⁴Shanhte gaw, “Nang gaw hkritung nna pyi mara kap ai hte kaba wa ai wa rai nga nhtawm me anhte hpe sharin nga n ni?,” ngu nna jawm htan nhtawm, dai wa hpe kanawng shapraw kau mu ai.

³⁵Dai wa hpe shapraw kau ai lam Yesu na wu ai rai nna, dai wa hpe mu hkrum jang; “Masha Kasha hpe nang kam nga n ni?,” ngu nna san mu ai.

³⁶Dai masha wa gaw, “Myit su wa e, ngai shi hpe kam sham lu n ga, Dai Masha Kasha gaw kadai wa rai nga a ta? Ngai hpe tsun dan rit!,” ngu nna htan wu ai.

³⁷Yesu gaw, “Dai wa hpe nang mu yu nit dai hta n ga, ya nang hte shaga ai wa gaw dai wa nan rai nga ai,” ngu nna shi hpe tsun wu ai.

³⁸Shaloi dai wa gaw, “Madu e, ngai kam sham nga nngai,” ngu nna hput di let shi hpe nawku wu ai.

³⁹Bai Yesu gaw, “Myi n mu ai ni myi mu lu na matu mung, myi mu nga ai ni n mu lu na matu mung, tara dara na matu ndai mungkan ga de sa du nngai,” ngu wu ai.

⁴⁰Madu Yesu a makau e nga nga ai Hparishe ni dai ga na ma yang, “Anhte mung myi n mu ai ni re ai ngu nna nang tsun mayu n ni?,” ngu nna san mu ai.

⁴¹Yesu gaw, “Nanhte myi n mu ai ni rai myit taw gaw, yubak lu ai ni tai na myit dai n rai; rai ti mung ya gaw, ‘Anhte myi mu ga ai,’ nga nga myit dai, de a majaw nanhte yubak mara lu myit dai,” ngu nna tsun mu ai.