Read Jinghpaw Common Language Bible 2009 KASA 1 Bible Online

KASA 1 - Jinghpaw Common Language Bible 2009 bible

KASA 1

¹Tsaw ra ai Htawhpilu e: Madu Yesu magam bungli galaw hpang ai shani kaw nna,

²sumsing lamu de shalun la hkrum ai shani du hkra, galaw dan ai hte sharin shaga wa ai lam yawng mayawng a lam shawng na laika hta ngai ka hpajang da se ai. Yesu gaw sumsing lamu de shalun la ai garai n hkrum yang, shi a lata la ai kasa ni hpe Chyoi Pra ai Wenyi a atsam hte matsun hkang da mu ai.

³Yesu gaw si hkam ngut ai hpang, nhtoi mali shi ya laman kasa ni hpe law law lang shi a hkum shadan dan nna, shi asak hkrung nga ai lam kam ging ai sakse ni hpe madun dan sai. Kasa ni mung shi hpe mu nna, shi shanhte hpe Karai Kasang a Mungdan lam hkaw tsun dan mu ai.

⁴Shing rai shanhte sa du nna hpawng nga ma yang, Yesu gaw, “Yerusalem mare kaw na hkum pru mat wa myit, nanhte hpe ngai tsun da sai nye Wa jaw da sai ga ndat hte seng ai chyeju kumhpa hpe ala nga mu.

⁵Yawhan gaw hka hta hkalup jaw ai, rai ti mung nanhte chyawm gaw nhtoi gade nna yang Chyoi Pra ai Wenyi hta hkalup hkam la lu na marin dai,” ngu nna shanhte hpe hkang da mu ai.

⁶Kasa ni Yesu hte rau hkrum zup nna hpawng nga ma yang, shanhte gaw, “Madu e, ndai aten e, Israela amyu masha ni hpe dai Mungdan bai de ya na rai sani?,” ngu nna shi hpe san mu ai.

⁷Yesu gaw, “Wa gaw shi a ahkaw ahkang hte daw dan masat da ai aten ahkying ladaw hpe nanhte chye lu na ahkang n nga ai,” ngu nna tsun mu ai.

⁸Rai ti mung dai Chyoi Pra ai Wenyi nanhte a ntsa e du jang, nanhte n-gun atsam lu la na marin dai rai nna, nanhte gaw Yerusalem mare hte Yuda mung ting, Samari mung hte lamu ga shingjut shingnaw ni htum hkra nye a sakse ni tai na marin dai,” ngu nna shanhte hpe tsun mu ai.

⁹Ning nga ai ga tsun ngut ai hpang, shanhte shi hpe yu nga yang, shi hpe ntsa de shalun la ai rai nna, sumwi gaw shanhte a man na shi hpe magap la mat wa ai.

¹⁰Shi lung mat wa nna, shanhte lamu de naw azi yu nga ma yang hpraw tu ai hpun palawng bu hpun ai masha marai lahkawng shanhte a makau e akajawng sha sa tsap pru nna,

¹¹“Galile masha ni e, nanhte dai kaw hpa rai tsap nga nna lamu de naw dawng yu nga myit ta? Dai Yesu gaw nanhte a man na sumsing lamu de shalun la ai zawn, dai hku bai du na ra ai,” ngu nna tsun mu ai.

¹²Shaloi kasa ni gaw, Yerusalem mare hte deng mi (Mai mi a ka-ang hkup) sha tsan ai Tsanlun bum kaw nna Yerusalem de bai wa ma ai.

¹³Sape ni gaw mare de shang nna shanhte manam ai nta ntsa gawk de shang nna nga nga ma ai. Dai ni gaw, Petru, Yawhan, Yaku, Andre, Hpilip, Htawma, Barhtolume hte Mahte, Alhpe a kasha Yaku, Zelutu ngu ai Simun hte Yaku a kasha Yuda hte rai ma ai.

¹⁴Shanhte nlang hte gaw, Yesu a kanu Mari hte kaga numsha ni mung shi a kanau ni hte mung, akyu hpyi na matu ya sha ya sha myit mang langai sha hte hpawng nga ma ai.

¹⁵Nhtoi gade n na ai hpang kam sham ai masha ni latsa hkun daram hpawng nga ma yang, Petru gaw ga tsun na matu rawt tsap wu ai.

¹⁶Shi gaw, “Hpu nau ni e, Yesu hpe rim la ai ni a lam woi tai ya ai Yuda hpe lakap nna moi Dawi a n-gup hku nna Chyoi Pra ai Wenyi tau tsun da ai Chyum Laika gaw dik wa lu na sha rai nga ai.

¹⁷Hpa majaw nga yang, Yuda gaw magam gun langai mi hku nna lata la hkrum ai wa rai nna anhte a hpung hta lawm ai wa rai nga ai,” nga nna tsun ai.

¹⁸(Yuda gaw tinang a n hkru n shawp ai amu hte lu la ai gumhpraw hte ga dachyawk langai mi mari la nhtawm, dai ga hta nhtang chyaw di hkrat si mat ai hte shi a kan kapaw ga nna pu kan ni yawng ayai mat salu ai.

¹⁹Yerusalem mare e nga ai masha ni yawng ndai byin ai lam hpe na chye masai. Dai rai nna shanhte a ga hku dai ga dachyawk hpe Akeladama ngu nna shamying mu ai. Dai gaw, “Sai ga” ngu ai rai nga ai.)

²⁰“Dai lam Shakawn Kungdawn Laika hta, ‘Shi a nta gaw hpa n nga ai kaman rai mat u ga, dai hta e kadai mung n nga mu ga.’ Bai nna, ‘Shi a aya hpe masha kaga la kau u ga,’ ngu nna mung ka da nga ai.

²¹“Dai re ai majaw, Madu Yesu hpe Karai Kasang e jahkrung sharawt la nu ai lam anhte hte rau sakse hkam na matu masha langai mi hpe anhte lata la na rai ga ai.

²²Dai wa gaw hkalup sara Yawhan a hkalup hte seng ai mungga hkaw tsun ai ten kaw nna, sumsing lamu de Madu Yesu hpe anhte kaw na shalun la hkrum ai ten du hkra Madu Yesu hte, rau hkawm rau sa ai anhte ni hta lawm ai wa langai mi rai ra ai.”

²³Dai rai nna shanhte gaw, marai lahkawng hta na langai mi hpe san da na matu Yustu mying hkawt mying ai Barsaba ngu ai Yosep hte Mahtia ngu ai yan hpe tang shawn ma ai.

²⁴Dai hpang shanhte gaw, “Madu e, nang gaw yawng mayawng a myit masin hpe chye ya nga ndai. Yuda gaw shi hte seng ai kasa aya hpe kau tawn da nu ai.

²⁵Dai kasa aya hta ndai yan lahkawng hta na kadai hpe mahtang nang lata san da ndai gaw, anhte hpe madun dan mi,” nga nna akyu hpyi ma ai.

²⁶Shaloi shanhte gaw dai yan lahkawng hta na langai mi hpe lata la na matu hpaida da ma yang, Mahtia hta ang wa ai majaw shi hpe lata san da ma ai. Dai kaw nna shi gaw dai kasa shi langai hta jat lawm wu ai.