Read Jinghpaw Common Language Bible 2009 KASA 10 Bible Online

KASA 10 - Jinghpaw Common Language Bible 2009 bible

KASA 10

¹Kesare mare e, Korneli ngu ai wa langai mi nga ai. Shi gaw Itali dap ngu ai Roma lagaw dap hta hpyen latsa rawng ai dap kung langai mi a du wa rai nga ai.

²Shi gaw tara hkungga ai wa rai nna shi hte shi a nta dinghku masha ni yawng Karai Kasang hpe hkrit hkungga nawku daw jau ma ai. Shi gaw matsan mayan re ai Yuda masha ni hpe mung alu law law jaw ai hte karum madi shadaw let Karai Kasang kaw tut tut akyu hpyi nga ai.

³Lani mi na shana de daw hkying masum daram e, Lamu kasa langai mi shi kaw du sa wa nna, “Korneli e!” nga nna shi hpe shaga ai hpe shingran langai mi hta leng leng mu wu ai.

⁴Shi gaw hkrit let dai lamu kasa hpe azi yu nna, “Madu e hpa lam rai ta?,” ngu nna san wu ai. Shaloi lamu kasa gaw, “Na a akyu hpyi ai hte alu jaw ai lam hpe Karai Kasang sharawng awng ya nga ai rai nna nang hpe htan ya na jin nga chyalu rai nga ai.

⁵Ya jang Yopa mare de masha dat nna Simun Petru mying ai masha langai hpe sa shaga la su!

⁶Shi gaw Simun ngu ai shan hpyi sama a nta na manam langai mi rai nga ai. Dai nta gaw nammukdara makau e rai nga ai,” ngu wu ai.

⁷Dai lamu kasa wa mat ai hpang Korneli gaw shangun ma lahkawng hte shi kaw tut hkan nga ai ni hta na tara hkungga ai hpyen la langai mi shaga la nna,

⁸shi hta gara hku byin ai lam yawng hkai dan nhtawm, shanhte hpe Yopa mare de dat dat mu ai.

⁹Hpang shani, shanhte lam e sa wa nna Yopa mare de ni wa magang yang, Petru gaw shani ka-ang daram hta akyu hpyi na nga, nta ntsa de lung wa ai.

¹⁰Shaloi shi kawsi nna lama ma sha mayu nga ai, rai ti mung lusha naw lajang shachyip nga yang, shi shingran langai mu wu ai.

¹¹Shi gaw sumsing lamu hpaw malang wa nna hpajawng kaba zawn re ai jut de jum nna ga de shayu dat ai arai lama mi hpe mu wu ai.

¹²Dai hta e lagaw mali tu ai baw dusat hte gumrawt hkawm ai baw amyu myu; ntsa malen na u chyazai amyu myu rawng nga ai.

¹³Nsen langai mi ngoi pru ai gaw, “Petru e rawt u, sat sha u,” nga ai.

¹⁴Petru chyawm gaw, “Madu e, gara hku mung n mai byin na re, n sha mai ai hte n san ai arai hpe, ngai galoi mung n sha yu nngai,” ngu nna htan wu ai.

¹⁵Dai nsen kalang mi bai ngoi pru ai gaw, “Karai Kasang e san seng ai ngu ai arai hpe n san n seng ai ngu nna hpa mung hkum myit la et,” nga nna tsun ai.

¹⁶Ndai zawn masum lang byin ai hpang dai arai hpe sumsing lamu de bai dawm la kau wu ai.

¹⁷Ya Petru gaw, dai shingran a lachyum a lam naw myit sumru yu nga yang, Korneli shangun dat ai ni gaw Simun a nta hkan tam san nna mu chye manu ai rai nna, ya nta ndaw e sa tsap nga ma ai.

¹⁸Shanhte gaw, “Simun Petru mying ai manam langai ndai nta hta n nga a ni?,” ngu nna jahtau san yu ma ai.

¹⁹Petru mung, shingran de a lam naw myit sumru nga yang, dai Wenyi gaw, “Yu u, nang e masha masum nang hpe tam nga ma ai, rawt u, yu wa sit.

²⁰Ngai nan shanhte hpe shangun dat mawe ai rai nna, myit hpa n ganung chyai nga ai sha, shanhte hte rau sa wa su!,” ngu dat wu ai.

²¹Dai rai nna Petru gaw dai ni hpang de yu sa wa nna, “Nanhte tam ai wa ngai rai nga nngai hpa hku hpa lam a majaw sa wa myit ta?,” ngu nna san mu ai.

²²Shanhte gaw, “Anhte hpe hpyen latsa up ai du wa Korneli shangun dat mi ai. Shi gaw kaja ai masha langai mi rai nna Karai Kasang hpe hkrit hkungga ai hte Yuda amyu ting a man e grai myi man pa ai, hkungga lara hkrum ai wa rai nga ai. Karai Kasang a Lamu Kasa langai mi gaw, nang hpe Korneli shi a nta de shaga bang nna nang tsun ai ga madat la na lam hkang da nu ai,” ngu nna tsun mu ai.

²³Petru gaw, shanhte hpe nta nhku de saw shaga jashawn nhtawm shana shayup nna manam daw mu ai. Ya hpang shani shi hkyen la nna shanhte hte rau sa wa ai. Yopa mare na kam sham ai ni nkau mi mung shi hte rau hkan nang sa ma ai.

²⁴Hpang shani shi gaw Kesare mare de du ai. Korneli chyawm gaw, shi a hpu nau ni hte makyin jinghku ni hpe shaga jahpawng tawn nna Petru hpe la nga ai.

²⁵Ya Petru shang wa na hkyen yang, Korneli hkap tau la let shi a lagaw nhpang e dingnyawm nawku wu ai.

²⁶Rai ti mung Petru chyawm gaw, “Rawt u, ngai mung masha she rai nngai,” nga nna tsun let shi hpe dun sharawt wu ai.

²⁷Shing rai Petru gaw Korneli hte ga shaga let nta nhku de shang wa wu yang, dai kaw masha law law hpawng nga ma ai hpe, mu wu ai.

²⁸Shaloi Petru gaw shanhte hpe, “Yuda masha langai mi gaw maigan masha ni hte htinglup htingshang n rai mai ai nga nna shi a nawku htung hta jep da nga ai lam nanhte nan mung chye nga myit dai. Dai rai tim kadai wa hpe mung nawku htung hku nna n ging n dan ai, n san n seng ai ngu nna ngai n mai myit ai lam gaw Karai Kasang ngai hpe madun dan ni ai.

²⁹Dai majaw nang ngai hpe shaga dat yang ngai hpa n ningdang ai sha hkan nang sa ring ngai; dai rai nna hpa lam a majaw ngai hpe shaga myit ta? ngu nna ngai nang hpe san nga nngai,” ngu nna tsun mu ai.

³⁰Korneli gaw, “Lai wa sai masum ya ngu na nhtoi hta, nye a nta e shana de daw hkying masum daram hta ngai akyu hpyi nga nngai. Dai shaloi akajawng sha tu kabrim ai hpun palawng bu hpun ai wa langai mi nye a man e tsap pru nna,

³¹‘Korneli e, na a akyu hpyi ai ga Karai Kasang na ya sai, na a alu jaw ai lam hpe mung Karai Kasang matsing da nu ai.

³²Dai re majaw Yopa mare de marai langai ngai hpe shangun nna Simun Petru ngu ai wa hpe shaga su, dai wa gaw, Nammukdara makau e nga ai shanhpyi Sama Simun a nta e shingbyi ai manam langai mi rai nga ai,’ nga nna tsun ai.

³³Dai majaw, shaloi jang ngai nang hpang de shangun dat nna, ya nang du ai gaw mai kaja nga ai dai rai nna, dai Madu nang hpe hkang da mada hte hpe madat mara la na matu ya anhte yawng ndai kaw Karai Kasang a man e rai nga saga ai,” ngu nna tsun wu ai.

³⁴Shaloi Petru ga tsun hpang nna, “Karai Kasang gaw, masha myi man n tau nga ai gaw ya ngai kaja wa chye se ai.

³⁵Karai Kasang gaw shi hpe hkrit hkungga nawku daw jau nna ding hpring ai amu galaw ai wa kadai hpe mung amyu n lata ai sha sharawng awng hkap la nga ai.

³⁶Nga yawng nga pra a Madu rai nga ai Yesu Hkristu hku nna Israela amyu masha ni hpang de Karai Kasang ndau shana shagun jaw dat ai ngwi pyaw sim sa ai hte seng ai Kabu Gara Shiga hpe nanhte chye nga myit dai.

³⁷Yawhan shi a hkalup hkam ai tara hpe hkaw tsun dan ai hpang kaw nna Galile mung kaw npawt hpang nhtawm Israela mungdan ting hta kajai gara byin lai wa sai lam kaba hpe mung nanhte chye nga myit dai.

³⁸Nazaret wa Yesu gaw Karai Kasang kaw na Chyoi Pra ai Wenyi hte n-gun atsam gara hku hkam la lu ai hpe mung nanhte chye nga myit dai. Karai Kasang gaw Yesu hte rau rai nga ai majaw shi gaw shara shagu kawan katsan hkawm nna masha ni hpe mai kaja ai amu galaw ya let, nat gumlau e zingri zingrat hkrum ai ni yawng mayawng hpe shamai shatsai ya nga ai.

³⁹Israela mungdan hta mung, Yerusalem mare hta mung, Madu shi galaw hkawm sa ai amu ni yawng mayawng a sakse ni, anhte rai nga ga ai. Dai wa hpe nan shanhte hpun hta hpri hte dit nna jen sat kau nu ai.

⁴⁰Rai ti mung Karai Kasang gaw masum ya ngu na nhtoi hta dai wa hpe si ai kaw na sharawt dat nna shi hkum hpe shadan dan shangun sai.

⁴¹Shing rai shadan dan ai gaw masha shagu hpe n rai, sakse a matu nga nna Karai Kasang e tau hkrau nna lata san da ai anhte ni a man e sha shadan dan mi ai. Anhte gaw shi si ai kaw na bai hkrung rawt wa ai hpang shi hte rau lu rau sha ai ni rai ga ai.

⁴²Shi nan mung, hkrung ai ni hte si ai ni a tara agyi tai na Karai Kasang e san da ai wa rai nga sai lam Kabu Gara Shiga hpe, mung masha ni hpe hkaw tsun dan na matu shi anhte hpe hkang da mani ai.

⁴³Shi hpe kam sham ai ni nlang, shi a mying nsang a n-gun atsam marang e, yubak raw dat kau ya ai hkrum na mara ai, nga nna shi a lam hpe myihtoi ni yawng htawn tsun sakse hkam ma ai,” ngu mu ai.

⁴⁴Petru dai lam naw tsun nga yang dai mungga madat la nga ai ni mahkra a ntsa e Chyoi Pra ai Wenyi yu hkrat wa ai.

⁴⁵Maigan masha ni mung Chyoi Pra ai Wenyi chyeju kumhpaw kumhpa hpe hkam la ma ai majaw Yopa mare de na Petru hte rau sa du ai matu gadoi hkam la sai Yuda masha ni gaw mau mahka nga ma ai.

⁴⁶Hpa majaw nga yang, maigan masha ni mauhpa ga baw amyu myu shaga nna Karai Kasang a grau htum ai hpe shakawn kungdawn nga ma ai hpe na lu ma ai majaw rai nga ai.

⁴⁷Dai rai nna Petru gaw, “Ndai masha ni mung anhte zawn Chyoi Pra ai Wenyi hkam la ai ni rai ma ai. Dai re ai majaw kadai wa mi shanhte hka hte hkalup hkam la na hpe ban hkum shingdang lu a ta?”

⁴⁸Shing rai, Yesu Hkristu a mying nsang hta hkalup hkam la na matu Petru shanhte hpe hkang da mu ai. Shaloi, shanhte hte rau nhtoi tsawmra ya naw hkring nga na shi hpe hpyi ma ai.