Read Jinghpaw Common Language Bible 2009 KASA 11 Bible Online

KASA 11 - Jinghpaw Common Language Bible 2009 bible

KASA 11

¹Maigan amyu masha ni mung, Karai Kasang a mungga hkap la ma ai, nga ai lam hpe kasa ni hte Yuda mung ting hkan na kam sham ai kahpu kanau ni na ma ai.

²Yerusalem mare de Petru du sa wa ai shaloi maigan masha ni hpe matu gadoi ai lam hpe ra sharawng ai ni gaw Petru hte tsun bawng dangrang hkat ma ai.

³Shanhte gaw, “Nang gaw matu gadoi n hkam ai maigan masha ni a nta hta manam nna shanhte hte rau lu rau sha ndai!,” ngu mu ai.

⁴Dai re ai majaw, Petru gaw shanhte hpe byin lai wa sai lam magup hpe npawt ndung hkren hkai dan mu ai gaw,

⁵“Ngai gaw Yopa mare e akyu hpyi nga yang, ngai myit nawng mat wa nna, hpajawng zawn san ai pa kaba langai mi jut mali de jum nna sumsing lamu de na shaya jahkrat dat ai arai lama mi gaw nye makau e wa hkring nga ai hpe shingran hta ngai mu we ai.

⁶Dai hpe atsawm sha galaw yu yang, ga ningtsa na lagaw mali tu ai baw dusat, matse labye, gumrawt hkawm ai baw hte, ntsa malen u ni rawng nga ai, ngai mu nna sumru yu nga nngai.

⁷Dai hpang, ‘Petru e, rawt u, sat sha u!,’ nga ai ga ngai na nngai.

⁸Rai ti mung ngai chyawm gaw, ‘N rai law Madu e! n sha mai ai baw hte n san n seng ai baw ngai galoi mung n sha ga nngai,’ ngu we ai.

⁹Sumsing Lamu de na lang mi bai ngoi pru ai nsen gaw, ‘Karai Kasang e san seng ai ngu tsun sai hpa hpe rai tim n san n seng ai ngu hkum myit sawn la et,’ nga nna tsun ai.

¹⁰Ndai zawn masum lang tup byin ngut ai hpang dai arai yawng hpe sumsing lamu de bai dawm shalun la kau ai hkrum sai.

¹¹Shaloi jang Kesare mare nna ngai hpang de shangun dat ai masha marai masum ngai nga nga ai nta ndaw e du taw nga ma ai.

¹²Dai Chyoi Pra ai Wenyi gaw myit n ganung nga ai sha shanhte kaw hkan sa na ngai hpe tsun ni ai. Yopa mare na kam sham ai hpu nau ni marai kru mung ngai hte rau hkan nang ma ai rai nna anhte yawng Korneli a nta de shang sa ga ai.

¹³Shaloi dai wa gaw, shi a nta e lamu kasa yu sa tsap ai hte Yopa mare de masha shangun nna, ‘Petru ngu ai Simun hpe shaga su!

¹⁴Dai wa gaw, nang hte na nta masha ni hkye hkrang la ai hkrum myit ga, nanhte hpe ga shaga na ra ai,’ nga nna tsun ai lam anhte hpe hkai dan mi ai.

¹⁵Ya, ngai ga hpaw nna tsun nga yang shawng de anhte a ntsa e Chyoi Pra ai Wenyi yu hkrat wa ai zawn shanhte a ntsa e mung yu hkrat wa malu ai.

¹⁶Shaloi she, ‘Yawhan gaw hka hte hkalup jaw wu ai rai ti mung nanhte gaw Chyoi Pra ai Wenyi hta hkalup hkam la na marin dai,’ nga nna shi Madu tsun ai ga hpe ngai dum we ai.

¹⁷Karai Kasang gaw Madu Yesu hpe kam sham ai anhte hpe jaw ai chyeju kumhpa hpe shanhte hpe mung maren sha jaw nga ai lam dan leng nga ai. Dai rai yang gaw ngai hpa wa re ai ngu nna Karai Kasang hpe shingdang lu na rai ta?,” ngu nna tsun wu ai.

¹⁸Shanhte dai lam na ma yang, shanhte a mara tam dinglun ai lam jahkring kau nna myit pyaw ai hte, “Aw rai sa, Karai Kasang gaw maigan masha ni hpe mung myit malai lu nna asak hkrung nga na ahkaw ahkang jaw nga a hka!” nga nna Karai Kasang hpe shagrau sha-a ma ai.

¹⁹Ya Stehpan hpe sat kau ai kaw nna hpang wa ai zingri zingrat lam a majaw bra mat wa ai kam sham ai ni gaw, Hponisha, Kupru hte Antioki mare du hkra len hkawm nna Yuda ni hpe hkrai sha dai mungga hkaw dan ma ai.

²⁰Rai ti mung, shanhte hta na Kupru hte Kureni mung na kam sham ai kaga nkau mi Antioki de du ma ai rai nna, Yuda n re ai maigan Heleni masha ni hpe Madu Yesu a lam Kabu Gara Shiga hpe htawn tsun ma ai.

²¹Madu a n-gun atsam mung shanhte hta nga nga ai rai nna, masha dawwa kaba kam sham ai hte Madu hpang de kayin wa ma ai.

²²Ndai lam shiga Yerusalem na hpung a na hta kajai gumhkawng shang wa ai rai nna shanhte gaw Barnaba hpe Antioki mare de shangun dat mu ai.

²³Shi sa du ai shaloi dai masha ni hpe Karai Kasang gara hku chyeju jaw nga ai lam mu lu yang shi kabu gara nga ai hte dai Madu hta myit masin mahkra hte lashum lanoi kam sham nna sadi dung nga na matu nlang hte hpe shadum shahprang mu ai.

²⁴Barnaba gaw masha kaja langai mi rai nna, Chyoi Pra ai Wenyi hte mung, makam masham hte mung hpring tsup ai wa rai nga ai. Masha law law hpe dai Madu hpang de jat bang wa shangun wu ai.

²⁵Dai hpang Shawlu hpe sa tam na Tarshu de pru sa mat wa ai.

²⁶Shi hpe mu jang Antioki de woi wa wu ai. Ya, shan gaw laning mi tup dai hpung masha ni hte rau hpawng nga ma ai rai nna masha law law hpe sharin shaga lu ma ai, sape ni mung Hkristan ni ngu ai mying hpe Antioki mare hta shawng lu la ma ai.

²⁷Dai aten daram hta Myihtoi nkau mi Yerusalem kaw nna Antioki de sa du ma ai.

²⁸Shanhte hta na Agabu ngu ai wa rawt nna ga ntsa ting hta hku wa kaba wa na ra ai lam, Wenyi a atsam hte tau tsun dan mu ai. (Dai lam gaw Hkawseng Klawdi a prat e byin wa sai;)

²⁹Sape ni gaw, Yuda mung na kahpu kanau ni hpang de langai hte langai rai lu ai made karum dat na nga, myit daw dan da ma ai.

³⁰Dai hte maren shanhte galaw nna Dai gumhpraw hpe Barnaba yan Shawlu a lata hte hpung salang ni hpang de shagun dat ma ai.