Read Jinghpaw Common Language Bible 2009 KASA 12 Bible Online

KASA 12 - Jinghpaw Common Language Bible 2009 bible

KASA 12

¹Dai aten hte yang Herod Hkawhkam gaw hpung masha nkau mi hpe zingri zingrat na maw mawn n-gun dat hpang wa nga ai.

²Shing rai shi gaw Yawhan a kahpu Yaku hpe htau kau wu ai.

³Dai lam Yuda ni yu kabu ai mu jang, Petru hpe mung rim la shayan wu ai. (Dai aten gaw Azuma poi ngu ai matsi n rawng ai muk sha ai Shalai wa ai poi rai nga ai.)

⁴Herod gaw Petru hpe rim la nhtawm hpyen la mali mali lawm ai hpyen dap lakying mali a lata de ap ya nna htawng hta bang da mu ai. Herod gaw Shalai wa ai poi ngut ai hpang Yuda shawa ni a man e jeyang ari jaw na myit da wu ai, dai rai nna Petru hpe htawng hta sharen da mu ai.

⁵Rai ti mung hpung masha ni yawng chyawm gaw Petru a matu mara Karai Kasang kaw aja awa akyu hpyi ya nga ma ai.

⁶Ya Herod Petru hpe shapraw la na ngu ai shana a shawng shana e Petru gaw hpyen la lahkawng a lapran e yup pyaw nga ai. Petru gaw hpri sumri lahkawng hte gyit da hkrum nna, sin langa ni mung, htawng chyinghka e sin nga ma ai.

⁷Akajawng sha, Madu a lamu kasa langai mi Petru a makau pru tsap nna dai gawk hta nhtoi htoi nga ai. Shi gaw Petru a lahpa hpe sa gumhpuk ashun ya nna, “Alawan rawt u!,” ngu nna jasu ai. Shaloi jang hpri sumri ni mung shi a lata na malaw hkrat lu ai.

⁸Bai lamu kasa gaw, “Na a shingkyit kyit nna kyepdin din u!,” ngu wu ai. Shi mung shing di wu ai, bai “Na a nba lawai nna ngai kaw hkan rit!,” ngu wu ai.

⁹Shaloi Petru pru nna hkan nang wu ai. Rai ti mung, Lamu kasa shabyin ai amu dai hpe kaja wa re ai, shi n chye nna shingran rai nga ai, ngu nna myit nga ai.

¹⁰Ya shan gaw shawng na hte hpang na sin ai shara lahkawng lai nna hpang jahtum mare pru ai hpri chyinghka de du jang chyinghka dai mung shi chyu hpaw wa ai, shing rai nna shan pru mat wa ma ai. Mare lam langai mi hta hkawm hkrat wa nga yang, akajawng sha lamu kasa gaw Petru hte hka mat wa ai.

¹¹Ya Petru gaw shi hta hpa baw byin wa sai lam myit dum arai la lu jang, “Madu gaw shi a Lamu kasa hpe shangun dat nna Herod a lata na mung Yuda masha ni ngai hpe katut sha shangun na myit mada nga ma ai kaw na mung, ngai hpe shaw mawai la sai teng nga ai gaw ya ngai chye se ai,” nga nna tsun ai.

¹²Dai lam dum chye wa ai shaloi, shi gaw Yawhan Marku a kanu Mari a nta de sa wa ai. Dai nta kaw masha tsawmra wa hpawng nna akyu hpyi nga ma ai.

¹³Shing rai dai nta wang chyinghka akawk wu yang Roda mying ai shangun ma num kasha langai mi gaw shaga ai hpe htan ya na matu chyinghka de sa du ai.

¹⁴Shi gaw Petru a nsen re ai chye jang kabu ai majaw chyinghka n hpaw ya ai sha nhku de gat shang wa nna, “Petru gaw chyinghka lam e tsap nga ai,” ngu nna tsun shana dat wu ai.

¹⁵Shanhte gaw, “Nang mana nit dai!,” ngu mu ai. Rai ti mung, dai numsha gaw shi tsun ai lam teng ai, nga nna atsun nga ai; dai majaw shanhte gaw, “Shi a lamu kasa rai nga lu ai,” nga ma ai.

¹⁶Shing rai nga yang, Petru mung sha a akawk nga ai rai nna hpang jahtum shanhte chyinghka hpaw la mu yang shi hpe mada mu ai shaloi shanhte mau mahka mat ma ai.

¹⁷Petru gaw shanhte atsin sha rai nga na matu lata dingsi nhtawm shi hpe Madu e htawng hta na kaning rai shaw la ai lam, shanhte hpe tsun dan nna, “Ndai lam ni Yaku hte kam sham ai kahpu kanau ni hpe tsun shana dan mu,” ngu mu ai; shaloi shi pru nna shara kaga de sa mat wa ai.

¹⁸Ya jahpawt nhtoi htoi yang, sin ai hpyen la ni gaw Petru hta hpa byin ai n chye ma ai majaw, grai ruk rak shuk shak bu nga ma ai.

¹⁹Herod chyawm gaw Petru hpe tam na hkang da mu ai rai ti mung shanhte shi hpe n mu tam mu ai. Dai rai nna Herod gaw sin langa ni hpe jep san sagawn yu nna, shanhte hpe sat kau na hkang dat wu ai. Dai hpang Herod gaw Yuda mung na pru nhtawm Kesare mare de yu wa nna nga nga ai.

²⁰Herod gaw Turu hte Sidon masha ni hpe grai pawt bu da wu ai. Dai rai nna dai mare masha ni gaw myit hkrum ai masha wuhpung langai mi hku nna shi kaw shang sa ma ai. Shawng nnan Blastu ngu ai Hkawhkam htingnu ting hpe up ai wa hpe chye na shangun nhtawm, shi a karum ai hte Herod kaw simsa na lam hpyi htinglu ma ai; hpa majaw nga yang, shanhte a mung gaw Hkawhkam a mung na malu masha lu la nga ai.

²¹Madat da ai nhtoi hta e Herod gaw Hkawhkam hpun palawng sumli nna tingnyang hta dung let shanhte hpe ga shaga mu ai.

²²Shaloi mung masha ni gaw, “Ndai gaw shinggyim langai mi shaga nga ai nsen n rai, Karai a nsen she rai nga ai!,” nga nna shanhte jahtau ma ai.

²³Dai shaloi jang Herod Hkawhkam gaw Karai Kasang hpe n shagrau n sha-a n kaw n law di wu ai majaw dai Madu a lamu kasa shi hpe kadawng taw mat shangun nna kan shingtai byet manu ni e sha nna si mat wa sai.

²⁴Dai laman hte yang, Karai Kasang a mungga matut nna chyam bra galu kaba maden jat wa sai.

²⁵Barnaba hte Shawlu mung shan galaw ang ai amu hpe gun hpai ngut jang Marku ngu ai Yawhan hpe shaga la nhtawm Yerusalem mare de bai wa ma ai.