Read Jinghpaw Common Language Bible 2009 KASA 13 Bible Online

KASA 13 - Jinghpaw Common Language Bible 2009 bible

KASA 13

¹Ya Antioki mare na hpung hta e myihtoi ni, sara ni nkau mi lawm nang nga ma ai; Dai ni gaw, Barnaba, shan chyang masha ngu ai Simun, Kureni masha Luki, Herod munggyi a kaji kaw nna rau ram kanawn manang rai nga ai Manaen, hte Shawlu ni rai ma ai.

²Ya shanhte Madu hpe nawku daw jau let lusha gam nga ma yang, dai Chyoi Pra ai Wenyi gaw, “Shawlu Yan Barnaba hpe ngai shaga da ai amu gun hpai na matu san da mu,” ngu nna shanhte hpe tsun mu ai.

³Dai hte maren shanhte gaw lusha gam let, akyu hpyi nna shan a ntsa e lata mara jaw ngut jang, shan hpe dat dat mu ai.

⁴Shing rai, Chyoi Pra ai Wenyi e shan hpe shangun dat mu ai hte maren shan gaw Seluki de du yu wa nna dai yang na li jawn nhtawm Kupru de du ma ai.

⁵Shanhte Salami mare de du ai shaloi, Yuda ni a tara jawng ni hta, Karai Kasang a mungga hkai dan ma ai. Yawhan Marku mung shan a nrum ntau tai nna karum nga ai.

⁶Ya shanhte gaw dai zunlawng ting ga hkawm sa wa nna Pahpu mare du ma yang Bara-Yesu mying ai Yuda masha rai nga ai lakle sara mung rai, masu ai myihtoi mung rai, re ai wa hpe mu hkrup ma ai.

⁷Dai wa gaw Sergiu Pawlu ngu ai myit kunghpan ai munggyi wa a jinghku langai mi rai nga ai. Dai munggyi wa gaw Karai Kasang a mungga madat la mayu nna Barnaba yan Pawlu hpe shi a man de shaga jashawn mu ai.

⁸Rai ti mung (Grik ga hku Eluma) mying ai Lakle sara wa gaw munggyi wa Hkristan makam masham hpe n kam n sham n hkap la hkra Pawlu yan Barnaba hpe ninghkap shingdang ma ai.

⁹Dai shaloi Pawlu ngu ai Shawlu gaw, Chyoi Pra ai Wenyi hpring let, lakle sara wa hpe yu azi da nna,

¹⁰“Nat a kasha e! Nang gaw mai kaja ai lam shagu a hpyen wa rai nga ndai. Nang hta myit magaw hkalem hkalau ai lam yawng hpring nga ai rai nna nang gaw galoi mung Madu a teng man ai lam hpe masu ndum shatai kau ai wa rai nga n hka!

¹¹Ya jang Madu kaw na ari nang kaw du hkrat wa nna nang gaw tawng marang mi shani a nhtoi n mu lu ai, myi kyaw nga na rin dai,” ngu wu ai. Shaloi jang Eluma a myi shinggang mat nna nsin chyip rai mat salu ai. Shingrai marai langai ngai e lata hte woi dun la na matu tam kayin abram hkawm nga ai.

¹²Munggyi wa dai byin ai lam hpe mu jang Madu a sharin shaga ai lam hpe grai mau ai hte kam sham nga ai.

¹³Pawlu hte shi a manang ni gaw Pahpu mare kaw nna li jawn nhtawm Pamhpuli mung na Perga mare de du wa ma ai. Yawhan Marku chyawm gaw shanhte hte hka nna Yerusalem mare de nhtang mat wa wu ai.

¹⁴Bai shanhte gaw Perga kaw nna rawt sa wa yang Pesidi mung na Antioki mare de du ma ai rai nna, Bansa Nhtoi hta e shanhte tara jawng hta shang dung nga ma ai.

¹⁵Mawshe a Tara laika hte myihtoi ni a laika ni hpe hti ngut jang tara jawng agyi ni gaw shanhte hpang de masha shangun dat nna, “Hpu nau ni e, shawa hpawng hpe shadum jahprang n-gun jaw na mungga lu myit yang gaw, nanhte hpe ga shaga shangun mayu ga ai,” ngu wu ai.

¹⁶Shaloi Pawlu rawt nna lata dingsi let, “Israela amyu sha ni hte nang e Karai Kasang hpe nawku daw jau nga ai tara maigan ni yawng hte e madat la mu!

¹⁷Israela amyu masha ni a Karai Kasang gaw anhte a ji wa ni hpe shanhte Egutu mung e maigan masha hku nna sa nga nga ai ten hta lata la nna amyu kaba shatai manu ai. Karai Kasang gaw shi a n-gun atsam kaba hte shanhte hpe Egutu mung na shapraw woi wa nna,

¹⁸shaning mali shi ning tup nam mali hkan e shanhte a akyang hpe hkam sharang ya mu ai.

¹⁹Shi gaw Hkanan mung na masha amyu sanit hpe shaza kau nna shi a amyu masha ni hpe garan ya nhtawm dai mungdan a madu shatai nu ai.

²⁰Shing rai byin ai gaw shaning mali tsa manga shi ning na hkra rai nga ai, De a hpang myihtoi Samuela paw pru ai ten du hkra shanhte a matu tara agyi ni hpe shi tawn da ya mu ai.

²¹Dai hpang shanhte hkawhkam langai mi hpyi ma yang, Karai Kasang gaw Benyamin amyu Kisha a kasha Shawlu hpe shanhte a matu mali shi ning hkawhkam tai ya na matu jaw mu ai.

²²Dai hpang Shawlu hpe jahkrat kau nhtawm, Karai Kasang gaw Dawi hpe shanhte a hkawhkam sharawt ya mu ai. Dai wa a lam Karai Kasang tsun ai gaw, ‘Yese a kasha Dawi gaw nye a myit hte tup hkrak ra sharawng ai masha, ngai galaw shangun mayu ai nga manga hpe galaw shadik ya na wa re ai hpe ngai mu se ai,’ nga ai.

²³Karai Kasang gaw, shi a ga sadi nga ai hte maren, Israela amyu masha ni a matu hkye hkrang la ai Yesu hpe Dawi wa a amyu matu kaw na paw pru shangun wu ai.

²⁴Yesu magam bungli garai n hpang yang, Yawhan gaw Israela amyu masha ni yawng hpe yubak mara kaw na myit malai lu nhtang wa nna hkalup hkam la ra ai lam hkaw dan manu ai.

²⁵Yawhan gaw shi galaw gunhpai ra ai magam amu ngut kre na aten ni wa ai shaloi Yawhan gaw shawa masha ni hpe, ‘Ngai kadai re ai nawn nga myit ta? Ngai gaw nanhte myit mada ala nga ai wa n rai nngai. Rai ti mung, madat mu! Shi gaw nye a hpang e du sa wa ra ai, dai wa a kyepdin sumri raw na pyi ngai n ging nngai.’

²⁶“Abraham a kashu kasha rai nga ai nye hpu nau Israela amyu masha ni hte nang e Karai Kasang hpe hkrit hkungga nawku daw jau ai kaga maigan amyu sha ni yawng hte e, ndai hkye hkrang la ai mungga gaw anhte hpang de jaw dat ra ai.

²⁷Kaning rai nme law Yerusalem mare e nga ai masha ni hte shanhte a ningbaw ningla ni gaw, shi hkye hkrang la ai Madu re ai hpe mung shanhte Bansa Nhtoi shagu hti ai myihtoi ni a ga ni hpe mung n chye na ma ai. Rai ti mung shanhte gaw Yesu hpe sat kau na daw dan ai hte dai myihtoi ga ni hpe shatup manu ai.

²⁸Shanhte gaw shi a ntsa e si ari daw dan na ging dan ai mara hpe n mu tam ma ti mung shi hpe sat kau na Pilat kaw hpyi ma ai.

²⁹Shing rai shanhte gaw shi hte seng nna Chyum Laika hta ka da mada galaw shatup ngut jang shi hpe wudang ntsa na jahkrat la nna lup hta bang da mu ai.

³⁰Rai ti mung Karai Kasang gaw shi hpe si ai kaw na jahkrung sharawt la wu ai.

³¹Bai shi gaw Galile mung kaw nna Yerusalem de shi hte rau lung wa ai ni hpe, nhtoi tsawmra wa na hkra shi hkum shadan dan mu ai. Shanhte gaw ya shi a Israela amyu masha ni a man e shi a matu sakse ni tai nga ma ai.

³²Lahkawng ngu na Shakawn Kungdawn laika hta, ‘Nang gaw ngai Sha rai nga ndai; Dai ni nan nang hpe kasha aya ngai jaw sade ai,’ nga nna ka da nga ai hte maren,

³³Karai Kasang gaw Yesu hpe si ai kaw na hkrung sharawt ya ai hte ji wa ni hpe jaw da ai ga ndat hpe shanhte a kashu kasha rai nga ai anhte a matu galaw shabyin nu ai. Anhte gaw dai Kabu Gara Shiga hpe ndai kaw gun sa na matu ya du sa wa ai rai nga ai.

³⁴Bai shi lup hta hten bya mat ai galoi n hkrum hkra si ai kaw na hkrung sharawt la na lam hte seng nna, Karai Kasang tsun ai gaw, ‘Dawi hpe shaman ya na ga sadi jaw da ai hte maren chyoi pra ai hte grin nga ai chyeju ngai nanhte hpe jaw na made ai,’ ngu ai.

³⁵Kaja wa kaga Shakawn Kungdawn Laika hta mung ‘Madu gaw shi a sadi dung ai shangun ma hpe lup hta majoi mi hten bya yat mat shangun na ra ai n rai,’ nga nna shi tsun ai.

³⁶Dawi gaw shi asak hkrung nga ai laman hte hta, Karai Kasang a yaw shada ai lam nga ai hte maren hkan sa gun hpai ngut jang shi si nna, shi a kaji kawa ni a lup ding lup ra hta lup makoi ai hte shi a hkum hkrang gaw dai lup hta hten yat mat salu ai.

³⁷Rai ti mung Karai Kasang e hkrung sharawt la hkrum ai wa a hkum hkrang chyawm gaw dai zawn hten yat mat lu ai n rai.

³⁸Dai re ai majaw, hpu nau Israela amyu masha ni e, dai Yesu a marang e yubak raw dat kau lu na mungga a lam nanhte hpe ngai hkaw dan nga nngai hpe mung, Yesu hpe kam sham ai ni nlang hte gaw Mawshe a jep ai Tara hte n raw dat kau ya lu ai yubak mara yawng hta na nanhte hpe raw dat kau ya ai lam hpe mung,

³⁹nanhte hpe anhte chye shangun mayu nga ga ai.

⁴⁰Dai rai yang gaw myihtoi ni tsun ai lam nanhte hta n byin u ga sadi nga mu!

⁴¹Myihtoi ga hta, ‘Yu mu, ngai tsun ai lam hpe jahpoi asawng ai ni e, mau nna si mu! Dai ni ngai galaw nga ai lam hpe marai langai ngai nanhte hpe hkai dan ti mung, nanhte n kam na marin dai!,’” nga nna hkaw tsun nga ai.

⁴²Ya Pawlu hte Barnaba dai tara jawng na pru wa yang masha ni gaw hpang na bat Bansa Nhtoi bai nhtang sa nna ndai lam ni hpe grau nna hkaw tsun dan na saw shaga ma ai.

⁴³Ya tara jawng na shawa masha ni zuphpawng bra mat wa ai hpang Yuda masha ni law law Proselutu ni ngu ai Yuda nawku hkan ai maigan masha ni law law wa Pawlu yan Barnaba kaw hkan nang ma ai. Kasa ni mung dai masha ni hpe Karai Kasang a chyeju hta asak hkrung grin nga na matu n-gun jaw shadum jahprang mu ai.

⁴⁴Hpang na Bansa Nhtoi hta Karai Kasang a mungga na la na matu, mare ting ganoi mahkra wa du sa hpawng nga ma ai.

⁴⁵Yuda masha ni chyawm gaw, dai shawa hpawng hpe mu jang, manawn ai myit hte hpring chyat nga ma ai rai nna, Pawlu tsun ai lam hpe ndang hkat ai hte aroi ara ngu da mu ai.

⁴⁶Pawlu yan Barnaba mung grau nna nden ja ai myit hte, “Dai Karai Kasang a mungga nanhte hpe shawng tsun dan na ra nga ai, rai ti mung nanhte mahtang dai hpe n hkap la nna nhtum nwai asak hte n ging dan ai ni rai ga ai ngu nna tinang dai myit nawn daw dan la myit dai majaw anhte gaw, nanhte kaw na pru mat wa nna kaga maigan amyu ni hpang de sa wa na saga ai.

⁴⁷Kaning rai nme law, ‘Mungkan ting hpe hkye hkrang la ai lam lu la mu ga, ngai nang hpe maigan amyu ni a matu nhtoi shatai sade ai,’ nga ai gaw dai Madu anhte hpe hkang da ai ga rai nga ai,” ngu mu ai.

⁴⁸Maigan amyu ni dai na jang, shanhte kabu gara nga ma ai hte, Madu a mungga hpe shagrau sha-a ma ai, nhtum nwai asak lu la na san da ai ni nlang mung kam sham mat ma ai.

⁴⁹Madu a mungga gaw dai mung ting pri chyam bra wa sai.

⁵⁰Rai ti mung Yuda masha ni gaw mare na du agyi salang ni hte Karai Kasang hpe nawku kam sham ai lahta tsang maigan amyu num sha ni hpe myit sharawt jashut nhtawm Pawlu Yan Barnaba hpe zingri zingrat di shangun ai hte, shanhte a lamu ga kaw na gawt shapraw kau ma ai.

⁵¹Kasa yan gaw, shanhte galaw ai lam hpe n ra ai kumla hku nna tinang a lagaw kaw na ga nhpu hpe ahpu jahkrat kau da nna Ikoni mare de pru mat wa ma ai.

⁵²Antioki mare na sape ni chyawm gaw, kabu gara ai hte Chyoi Pra ai Wenyi hpring nga ma ai.