Read Jinghpaw Common Language Bible 2009 KASA 14 Bible Online

KASA 14 - Jinghpaw Common Language Bible 2009 bible

KASA 14

¹Dai hte maren Ikoni mare kaw mung Pawlu yan Barnaba gaw tara jawng hta shang nna, Yuda masha ni hte maigan masha ni wunawng kaba kam sham mat hkra hkaw tsun dan ma ai.

²Rai ti mung, n kam n sham ai Yuda masha ni gaw maigan masha ni hpe woi kasu kabrawng nna kam sham ai ni hpe n ju n dawng na hku nhtang gumlau mu ai.

³Kasa ni mung tsawmra na hkra dai yang e nga nna Madu a lam nden ja ai myit hte hkaw dan mu ai. Madu mung shanhte hkaw tsun ai Karai Kasang a chyeju hte seng ai mungga teng man nga ai lam sakse madun na matu shan hpe dai mauhpa amu hte lamik kumla ni madun lu ai atsam jaw mu ai.

⁴Mare masha ni chyawm gaw myit bra wa ma ai rai nna, nkau mi Yuda ni hpang de, nkau mi kasa ni hpang de, rai mat ma ai.

⁵Shaloi, maigan masha nkau mi hte Yuda masha ni gaw shanhte a agyi salang ni hte hpawn, kasa ni hpe aroi arip di nna nlung hte kabai sat na myit hkrum daw dan ma ai.

⁶Kasa ni dai hpe chye jang Lukaoni mung na Lustra, Derbe mare ni hte dai yan a grup yin ginwang de hprawng mat wa ma ai.

⁷Dai hkan e mung dai Kabu Gara Shiga hkaw dan ma ai.

⁸Ya Lustra mare hta e, kanu a hkritung nna lagaw jahten labye rai nna, galoi mung n hkawm yu ai wa langai mi nga nga ai.

⁹Shi mung dai kaw dung nga let, Pawlu tsun ai ga ni hpe madat nga ai, Pawlu gaw dai wa hta mai wa lu hkra kam sham ai myit rawng nga ai hpe shi mu wu yang, shi hpe azi yu let,

¹⁰“Ai jan rai rawt tsap u!” nga nna nsen shaja let, tsun wu ai. Dai masha wa mung gumlawt rawt nna hkawm yu nga ai.

¹¹Shing rai Pawlu galaw ai amu hpe shawa masha ni mu jang, shanhte gaw Lukaoni ga hte, “Hpara ni, masha hkum hkrang dagraw nna, anhte hpang de yu hkrat wa mara ai,” nga nna jahtau ma ai.

¹²Shanhte gaw Barnaba hpe Zeu, Pawlu hpe ga shaga ai lam hta ningbaw tai nna woi awn ai wa re majaw Herme ngu nna shamying mu ai.

¹³Dai mare shinggan e nga ai Zeu hpara jawng na hkinjawng wa mung, mare chyinghka de usu hte nampan shanghkawng ni la sa nna, shawa masha ni hte rau kasa ni hpe hkungga jaw mayu ma ai.

¹⁴Ya dai masha ni hpa galaw maw nga ai hpe Barnaba yan Pawlu na jang tinang a hpun palawng gang je kau let, shawa hpawng ka-ang de gat shang nhtawm,

¹⁵Hkau hte e, “Hpa rai dai galaw wa myit ta? An mung nanhte hte maren shinggyim masha yan sha arai ga ai! Ndai kaman lila amu ni hpe kau da nna, sumsing lamu hte ginding aga nammukdara hte dai hta rawng ai nga manga hpe hpan tawn da ai ahkrung nga ai Karai Kasang hpang de kayin wa myit ga, ngu nna she nanhte hpe dai Kabu Gara Shiga hkaw dan ai rai ga ai.

¹⁶Shi gaw lai wa sai ban prat e masha amyu baw shagu hpe, tinang ra ai hku hkan mu ga nga, dat tawn da mu ai.

¹⁷Rai ti mung, shi gaw shi nga nga ai lam sakse hte hkrak galoi mung a madun nga ai, Dai sakse ni gaw mai kaja ai amu ngu ai, Sumsing lamu na marang jahtu ya nna du hkra ladaw du ai shaloi nsi naisi ngai shangun ai hte nanhte hpe lusha hte jahkru shakat nna nanhte a myit masin hpe kabu gara ai hte jahpring ya nga ai,” ngu nna jahtau tsun mu ai.

¹⁸Shing nga tsun ai ga hte pyi shawa masha ni shan hpe hkungga jaw na lam, n hkum dang na daram she rai wa ai.

¹⁹Dai hpang Pesidi mung na Antioki hte Ikoni mare hkan na Yuda masha nkau mi sa du nna shawa hpawng hpe shanhte maga lawm hkra woi awn nhtawm, Pawlu hpe n lung hte kabai nna shi hpe si mat sai zawn nawn ai majaw, mare shinggan de garawt shapraw kau mu ai.

²⁰Rai ti mung, kam sham ai sape ni grup rai tsap nga yang, shi rawt nna mare de shang wa ai, hpang shani e shi gaw Barnaba hte rau Derbe mare de sa mat wa ma ai.

²¹Pawlu hte Barnaba yan gaw Derbe mare hta e Kabu Gara Shiga hkaw dan nna sape law law shatai la lu ma ai. Dai hpang shan gaw Lustra Ikoni mare lam hku Pesidi mung na Antioki mare de bai wa ma ai.

²²Shan gaw, “Anhte gaw Karai Kasang a mungdan hta shang na matu ru yak jam jau law law hpe hkrum hkra lai di kau ra ga ai,” nga nna kam sham ai sape ni myit shangang ya let dai makam masham hta ngang kang grin nga na matu n-gun jaw shadum jahprang ma ai.

²³Hpung shagu hta, hpung salang ni hpe lata san da nna lusha gam let akyu hpyi ngut jang shanhte kam sham nga ai Madu a lata hta ap ya da mu ai.

²⁴Dai hpang shan gaw Pesidi mung hku ga sa wa nna Pamhpuli mung de du ma ai.

²⁵Dai yang Perga mare hta mungga tsun dan nhtawm Atali mare de yu wa ma ai.

²⁶Dai kaw nna li jawn nhtawm, ya shan gunhpai lai wa sai amu a matu, Karai Kasang a chyeju hta ap nna shangun dat ai lam hpe hkam la ai Antioki mare de bai du wa ma ai.

²⁷Ya shan Antioki de du wa ma yang hpung masha ni hpe jahpawng tawn nhtawm Karai Kasang shan hta galaw ai lam yawng mayawng mung, maigan amyu ni kam sham wa na matu shi chyinghka gara hku hpaw ya sai lam hkai dan mu ai.

²⁸Shing rai shan gaw, dai yang e kam sham ai sape ni hte rau tsawmra wa na hkra hkring nga ma ai.