Read Jinghpaw Common Language Bible 2009 KASA 15 Bible Online

KASA 15 - Jinghpaw Common Language Bible 2009 bible

KASA 15

¹Ya Yuda mung na ni nkau mi Antioki mare de sa du nna, kam sham ai hpu nau ni hpe, “Nanhte Mawshe a jep ai Tara hte maren matu gadoi lam n hkan myit yang gaw, hkye hkrang la ai kaw n du lu na myit dai,” ngu nna sa sharin mu ai.

²De a majaw bra na lam pru nna Pawlu yan Barnaba gaw dai masha ni hte dai lam hte seng nna aja awa ndang kalang hkat ma ai. Dai majaw hpung gaw ndai ndang kalang hkat ai lam hte seng nna bawng ban jahkrup na matu Pawlu yan Barnaba hte Antioki hpung na myit su nkau mi hpe Yerusalem de nga ai kasa ni hte salang ni hpang de shangun dat na myit hkrum daw dan ma ai.

³Shing rai hpung masha ni gaw, shanhte hpe mare shinggan de du hkra sa sa dat ma ai. Dai shangun dat hkrum ai kasa ni gaw Hponisha mung hte Samari mung hku ga lai sa wa let, maigan masha ni gara hku myit malai lu nna Karai Kasang hpang de kayin wa ma ai lam hkai dan ma ai. Dai shiga hpe na ai shaloi kam sham ai ni yawng hpe grai kabu shangun mu ai.

⁴Yerusalem mare de du ai shaloi hpung masha ni kasa ni hte salang ni, shanhte hpe hkap hkalum la ma ai rai nna, Pawlu hte manang ni mung Karai Kasang shanhte hta galaw dan ai lam magup hpe hkai dan ma ai.

⁵Rai ti mung Hparishe hpung hta lawm ai kam sham ai masha nkau mi rawt nna, “Maigan masha ni mung matu gadoi hkam la ra ai hte Mawshe a Tara hkan shadik ra ai,” nga nna tsun ma ai.

⁶Dai rai nna kasa ni hte salang ni, ndai lam bawng yu na matu zuphpawng nga ma ai.

⁷Dai lam hpe galu galang san htai lai hkat ai hpang, Petru rawt nna shanhte hpe, “Hpu nau ni e, maigan masha ni dai Kabu Gara Shiga na la nna kam sham wa na matu Karai Kasang gaw lai wa sai tsawmra na sai aten kaw nna dai Kabu Gara Shiga hpe tsun shana dan na nanhte a kata kaw na Karai Kasang ngai hpe lata san da sai gaw nanhte chye nga myit dai.

⁸Masha shagu a kraw lawang na myit ai lam ni hpe chye ya lu ai Karai Kasang gaw anhte hpe Chyoi Pra ai Wenyi jaw mi ai hte maren maigan masha ni hpe mung jaw ai hte shanhte hpe sharawng awng hkap la ai lam madun mu ai.

⁹Madu gaw shanhte hte anhte a lapran e hpa jashai ginhka ai lam n galaw ai sha, shanhte kam sham ai a marang e, shanhte a yubak mara ni hpe raw dat kau ya mu ai,

¹⁰Dai rai yang, ji wa ni e mung n hpai dang anhte mung n dang ai lit hpe sape ni a lahpa hta shagun ga nga nna ya nanhte hpa rai Karai Kasang hpe chyam yu mayu nga myit ta?

¹¹Anhte mung shanhte zawn Madu Yesu a chyeju hte kam sham nga ga ai,” nga nna tsun mu ai.

¹²Barnaba yan Pawlu gaw shan a lata hte maigan amyu ni hta Karai Kasang galaw dan ai lamik kumla ni hte mauhpa amu ni yawng a lam hkai dan nga ma yang, shawa hpung ting atsin sha madat nga ma ai.

¹³Shan ga shaga htum jang, Yaku mung “Hpu nau ni e, Nye ga madat ya yu mi!

¹⁴Karai Kasang gaw shawng nna maigan amyu ni hta na nkau mi hpe shi hte seng ai amyu masha shatai na matu lata shaw la nna shanhte hpe lanu lahku ai lam madun dan manu ai lam Simun tsun shaleng dan sai.

¹⁵Myihtoi ni a hkaw tsun ai ga ni mung dai lam hte hkrak sha bung nga ai; Dai gaw ning nga nna ka da nga ai,

¹⁶‘Dai aten ladaw a hpang e ngai bai wa nna, Dawi a mungdan hpe ngai bai sharawt na we ai. Hten run mat ai Dawi a nawku nta hpe ngai bai gaw gap na we ai, ngu nna Madu tsun ai, dai hpe n-gun bai shaja na we ai.

¹⁷Shaloi she, ngam nga ai masha amyu ni yawng hte, nye a amyu masha ni tai na matu, ngai shaga la ai maigan masha ni nlang hte gaw ngai hpang de sa wa na mara ai.

¹⁸Ndai gaw moi chyaloi nhkoi kaw nna Karai Kasang e chye shangun ai lam rai nga ai, nga nna Madu tsun nga ai.’

¹⁹Shaloi kasa Yaku matut nna, “Dai re ai majaw Karai Kasang hpang de kayin wa sai maigan masha ni hpe anhte hpa mi sharu shatsang n di ai sha,

²⁰Hpara sumla ni hpe nawng jau tawn ai n san n seng ai lusha ni sha ai lam, n se n sa ndaw liknga lam, du manat sat ai shan hte asai re ai ni hpe koi gam na lam shanhte hpe laika langai mi ka nna tsun shana mai ai ngu nna ngai myit da we ai,

²¹Hpa majaw nga yang Mawshe a Tara gaw Bansa Nhtoi shagu tara jawng ni hta ahti dan nga ma ai hte moi prat kaw nna mare shagu hta dai tara hkaw dan ai ni nga nga ma ai,” ngu nna tsun wu ai.

²²Dai hpang kasa ni hte salang ni gaw hpung masha yawng hte bawng ban nna shanhte hta na masha nkau mi hpe lata la nhtawm, Pawlu yan Barnaba hte rau Antioki de shangun dat na lam myit hkrum daw dan ma ai. Shanhte gaw kam sham ai ni grai hkungga ai hte kam mai ai Barsaba ngu ai Yuda hte Sila yan hpe lata la nna,

²³shan a lata hku laika langai mi ka ya dat mu ai. Dai laika hta: “Nanhte a hpu nau ni rai nga ai anhte kasa ni hte salang ni gaw, Antioki mare hte Suri mung, Kiliki mung hkan e nga ai maigan amyu Hkristan hpu nau ni hpang de ngwi pyaw ai ga shana shakram dat ga ai.

²⁴Anhte kaw na masha nkau mi gaw, anhte a hkang matsun dat ai lam n lu la ai sha nanhte hpang de sa nna ga hte nanhte a myit hpe sharu shatsang ga li ga law di ya nga ma ai lam anhte na lu sagaw ai.

²⁵Dai re ai majaw anhte yawng jawm bawng yu nna masha nkau mi hpe nanhte hpang de kasa shangun dat na myit hkrum saga ai. Shanhte gaw anhte tsaw ra ai Barnaba yan Pawlu hte rau sa wa na mara ai.

²⁶Anhte a tsaw ra ai manang Barnaba hte Pawlu yan gaw anhte a Madu Yesu Hkristu a magam bungli hpe tinang a asak hpe pyi n lahpawt hkra hkra gun hpai ai ni rai ma ai.

²⁷Dai re ai majaw anhte gaw, Yuda yan Sila hpe nanhte hpang de shangun dat ga ai rai nna, shan a n-gup hte nan laika hta rawng ai lam hte maren tsun dan na mara ai.

²⁸Nanhte a matu gaw ra ahkyak ai hkang da ai tara rai nga ai, hpara sumla ni hpe nawng jau ai malu masha ni hpe n sha na, sai hpe n sha na, du manat sat ai shan hpe n sha na hte ndaw liknga n se n sa koi gam lu na lam hta kaga, lit shaje nanhte hta shagun shara n nga ai ngu nna Chyoi pra ai Wenyi hte anhte myit hkrum ga ai.

²⁹Ndai lam ni hpe nanhte koi gam nga myit yang nanhte a matu mai kaja ram ging na malit dai. Hkam kaja nga myit ga law,” nga ai.

³⁰Ning rai kasa ni hpe shangun dat yang Antioki mare de sa wa nna dai hpung masha ni yawng hpe jahpawng tawn da nhtawm dai shagun dat ai laika hpe ap ya mu ai.

³¹Dai laika hpe hti dan ma yang, dai n-gun jaw ai mungga a majaw shanhte hta kabu gara ai hte hpring nga ma ai.

³²Yuda yan Sila gaw myihtoi mung rai nga ma ai majaw, shanhte hte aten galu galang ga shaga nna nden marai hte Wenyi n-gun atsam, lu la shangun mu ai.

³³Dai yang e tawng marang mi nga nga ai hpang kam sham ai ni gaw shan hpe ngwi pyaw ai hte bai shabawn dat mu ai rai nna, shan hpe shangun dat ai ni hpang de bai wa mat ma ai.

³⁴Rai ti mung Sila gaw hti nan nga na myit daw dan wu ai.

³⁵Pawlu yan Barnaba chyawm gaw Antioki mare e matut hkring nga nna manang law law hte, Madu a mungga sharin achyin ya nna, hkaw dan ma ai.

³⁶Dai hpang nhtoi ram ram na wa jang Pawlu gaw Barnaba hpe, “Madu a mungga hkaw dan da sai mare shagu hkan na kahpu kanau ni kaning rai nga ma ai hpe bai sa kawan yu saga,” nga nna tsun wu ai.

³⁷Dai shaloi Barnaba gaw Marku mying ai Yawhan hpe shanhte hte rau woi hkawm shalawm la mayu wu ai.

³⁸Rai ti mung Pawlu mahtang gaw, “Shi Sasana hkrun lam htum hkra shan hte rau n hkan hkraw ai, Pamhpuli mung e shan kaw na pru mat wa ai wa re ai majaw woi hkawm na matu n hkrak ai nga nna n shalawm mayu wu ai.

³⁹Dai nhkan e ga lai nna, langai hte langai hka mat ma ai. Barnaba gaw Marku hpe woi nna Kupru zunlawng de li hte sa wa ai.

⁴⁰Pawlu chyawm gaw Sila hpe lata la nna, hpu nau ni mung shi hpe Madu a chyeju hta rai nga u ga ap ya dat ngut jang, pru sa wa ma ai.

⁴¹Shing rai Pawlu gaw, Suri mung Kiliki mung hku ga sa wa nna hpung ni hpe shadaw shangang wu ai.