Read Jinghpaw Common Language Bible 2009 KASA 16 Bible Online

KASA 16 - Jinghpaw Common Language Bible 2009 bible

KASA 16

¹Pawlu gaw Derbe hte Lustra mare de du sa wa ai. Lustra mare hta Timohti mying ai Hkristan langai mi nga ai. Kanu gaw kam sham ai Yuda Hkristan num rai nna, Kawa gaw Grik masha rai nga ai.

²Shi gaw Lustra mare hte Ikoni mare na hpu nau ni a man e sari sadang lu nna shakawn hkrum ai wa rai nga ai.

³Pawlu gaw dai wa hpe shi hte rau hkan nang shangun mayu ai majaw shi hpe Yuda htung rai nga ai matu gadoi ai lam galaw ya wu ai. Shing rai galaw ai gaw, dai shara hkan nga nga ai Yuda masha ni yawng Timohti a kawa gaw Grik masha re ai lam chye ma ai majaw rai nga ai.

⁴Shanhte gaw dai mare ni hpe ga sa wa let, Yerusalem na kasa ni hte salang ni daw dan da ai tara ni hpe tsun sanglang dan ai hte kam sham ai ni madat mara hkan sa na matu matsun da ma ai.

⁵Shing rai hpung ni mung makam masham lam hta grau ngang kang wa ai hte hpung shang ai masha lani hte lani law htam wa ma ai.

⁶Ya Asi mung e mungga lam hkaw tsun dan na Chyoi Pra ai Wenyi shanhte hpe ahkang n jaw mu ai majaw shanhte gaw Hprugi hte Galati mung de ga sa wa ma ai.

⁷Musi mung na ga jarit de du magang yang, Bihtuni mung de shang sa wa na shakut yu ma ai.

⁸Rai ti mung, Yesu a Wenyi shanhte hpe ahkang n jaw mu ai majaw Musi mung hpe ga lai nna, Troa mare de du ma ai.

⁹Dai shana e Pawlu gaw shingran hta, Makedoni masha langai mi sa tsap nga nna, “Makedoni mung de rap sa nna anhte hpe karum la mi,” nga nna shi hpe hpyi ai mu wu ai.

¹⁰Pawlu dai shingran mu ai shaloi jang, Makedoni mung de rap sa wa na matu anhte hkyen lajang shajin ga ai, hpa majaw nga yang, Makedoni mung masha ni hpe dai Kabu Gara Shiga hkaw tsun dan na matu Karai Kasang anhte hpe shaga ai rai sai, ngu nna kam sham ai myit hte daw dan ai majaw rai nga ai.

¹¹Anhte gaw Troa mare nna, Samohtrake zunlawng de ang ang li hta jawn sa wa nna, hpang shani e Neapoli mare de du ga ai.

¹²Dai kaw nna bai lai yang Hpilipi mare de du ga ai. Dai mare gaw Makedoni mung a mare daju rai nna Roma amyu masha ni nga mahta ai mare langai mi mung rai nga ai. Dai mare kaw anhte tawng marang mi nga nga ga ai.

¹³Bansa Nhtoi hta mare shinggan de anhte pru sa nna Yuda ni akyu hpyi ai shara langai ngai nga na zawn nawn nna hka kau de sa du ga ai. Dai yang e dung let zuphpawng nga ai numsha ni hpe hkaw tsun dan ga ai.

¹⁴Shanhte hta na anhte a ga na la ai numsha gaw Htuatira mare na sumpan hkyeng sawm dut ai Ludi ngu ai jan rai nga ai. Shi gaw Karai Kasang hpe nawku kam sham ai numsha rai nna, Pawlu tsun dan nga ai ga hpe na lasha let madat la u ga, Madu e shi a myit hpaw ya wu ai.

¹⁵Shi hte nta masha ni hkalup hkam la ngut jang, shi gaw, “Dai Madu hpe kam sham ai hta teng man kangka ai jan rai ni ai ngu nna nanhte myit hkut da sai rai yang gaw nye a nta kaw sa nga marit,” ngu nna akroi anoi hpyi ai hte nga shangun mi ai.

¹⁶Lani mi hta anhte gaw akyu hpyi ai shara de sa wa nga yang, gumhpan lu ai nat shung nga ai mayam num langai mi hte hkrum ga ai. Shi gaw dai zawn gumhpan hpan ai hte shi a madu ni hpe gumhpraw grai lu shangun ai wa rai nga ai.

¹⁷Dai shangun ma numsha gaw Pawlu hte anhte a hpang hkan nang nna, “Ndai ni gaw law, Tsaw Htum ai Wa a shangun ma ni rai nna nanhte kaning rai hkye hkrang la hkrum na lam tsun shana dan ai ni rai nga ma ai law!” nga nna jahtau htau re ai.

¹⁸Dai numsha gaw dai zawn nhtoi law law ya wa marawn jahtau htau re ai majaw Pawlu myit n pyaw nna, kayin nhtawm, dai nat hpe, “Yesu a mying nsang hte ngai nang hpe hkang da de ga, shi kaw na pru mat u!,” ngu wu yang dai shaloi jang numsha kaw na pru mat wa ai.

¹⁹Ya shi a madu ni gaw shanhte a gumhpraw shang lam pat mat wa ai hpe chye jang, shanhte gaw Pawlu yan Sila hpe rim la nna gat de nga ai agyi salang ni hpang de dun garawt wa mu ai.

²⁰Shing rai shan hpe du ni a man de woi jashawn nhtawm, “Ndai yan gaw Yuda masha rai ma ai; shan gaw anhte a mare hta kasu kabrawng ai lam byin hkra woi galaw nga ma ai.

²¹Shan gaw anhte a tara hte nhtan shai ai htung hking ni hpe sharin ya nga ma ai. Anhte gaw Roma mungchying sha ni rai nga ai majaw dai htung hking ni hpe n hkap la n hkan sa lu ga ai,” ngu nna tsun mu ai.

²²Shawa masha ni mung Pawlu yan Sila hte nhtan shai ai maga de rawt nna jawm kayat ma ai. Mare up ai du ni mung Pawlu yan Sila a hpun palawng hpe gang je kau ya nna ri tawng hte kayat na lam daw dan mu ai.

²³Shing rai shan hpe grai sawng hkra kayat nhtawm, htawng hta bang da mu ai rai nna htawng agyi wa hpe mung shan hpe ashim sha la sharawng da na hkang dat mu ai.

²⁴Dai hkang da ai lam lu ai hte htawng agyi wa mung shan hpe htawng a kata gawk hta shashawn nhtawm shan a lagaw hpe matep sharen da mu ai.

²⁵Ya shana yuptung hpawa e Pawlu yan Sila gaw akyu hpyi ai hte, Karai Kasang hpe mahkawn shakawn nga ma ai rai nna, bawng dung ai ni shan a ga madat nga ma ai.

²⁶Shaloi grai ja ai nnang nawn kaba langai mi wa nna, htawng nta npawt nhpang ni awam wa ai, shaloi jang chyinghka ni mahkra hpaw malang mat shajang nna bawng masha ni yawng a hkang hkyihkyang ni malaw mat wa ai.

²⁷Htawng agyi wa mung yup hprang nna htawng chyinghka ni hpaw malang taw nga ai hpe mu jang bawng masha ni hprawng pru mat ma sai zawn nawn nna nhtu hpe garawt shaw nhtawm, shi dai galun si na hkyen nga ai.

²⁸Rai ti mung Pawlu gaw, “Nang dai, na a hkum hpe hkum shaza et, anhte yawng ahkum, ara rai nga ga ai law!,” ngu nna aja awa jahtau tsun wu ai.

²⁹Shaloi htawng agyi wa pyengdin hpyi lang nna kata de gat bang wa nhtawm hkrit gari let Pawlu yan Sila a lagaw nhpang e dingnyawm nga ai.

³⁰Bai shan hpe woi pru nna, “Madu yan e ngai hkye hkrang la ai kaw du lu hkra kaning rai na rai ta?,” ngu nna san mu ai.

³¹Shaloi shan gaw, “Madu Yesu hpe kam sham u, shaloi nang hte na nta masha ni nlang hkye hkrang la ai kaw du lu na marin dai,” ngu nna htan mu ai.

³²Bai shi hte shi a nta masha ni yawng hte hpe Madu a mungga hkaw tsun dan mu ai.

³³Dai shana ahkying hta nan shi shan hpe woi wa nhtawm shan a nma kashin kau ya nna shi hte nta ting hpawn, shaloi jang hkalup hkam la ma ai.

³⁴Bai shi gaw Pawlu yan Sila hpe shi a nta ntsa de woi shashawn la nna lusha galaw daw let Karai Kasang hpe kam sham lu sai majaw, shi hte nta ting nachying kabu gara nga ma ai.

³⁵Hpang jahpawt nhtoi htoi jang, Roma tara agyi ni gaw, “Dai yan hpe dat dat mu!” nga nna palik du ni hpe sa tsun shangun mu ai.

³⁶Shaloi htawng agyi wa, dai ga Pawlu hpe tsun dan wu ai gaw, “Nan hpe dat dat na, mare tara agyi ni hkang dat ma ai majaw, ya angwi apyaw sha pru wa manu!” ngu mu ai.

³⁷Rai ti mung Pawlu gaw, “An Roma mungchying sha she rai nga ga ai hpe hpa mara hte mung garai n san daw dan yang, masha a man e an hpe kayat nna htawng hta jahkrat da myit htawm me, ya atsin sha lagyim dat dat na maw ma hka i? Dai hku an pru mat wa na n rai law! Shanhte hkum lala she sa shapraw la mi ga,” ngu nna shanhte hpe htan dat mu ai.

³⁸Palik du ni dai ga Roma du ni hpe wa tsun dan mu ai. Pawlu hte Sila Roma mungchying sha re ai lam na jang shanhte hkrit kajawng ma ai.

³⁹Dai re ai majaw, shanhte hkum nan shan kaw sa nhtawm sa nem shapraw la nna dai mare na pru wa na lam hpyi nem mu ai.

⁴⁰Shaloi Pawlu yan Sila gaw dai htawng na pru wa nna, Ludi a nta de shang wa ma ai. Dai kaw kam sham ai hpu nau ni hte hkrum nna shanhte hpe shalan shabran n-gun jaw ai ga ni tsun da nhtawm pru mat wa ma ai.