Read Jinghpaw Common Language Bible 2009 KASA 18 Bible Online

KASA 18 - Jinghpaw Common Language Bible 2009 bible

KASA 18

¹Dai hpang Pawlu gaw Ahten mare na pru nna Korinhtu mare de du ai.

²Dai mare hta Pontu mung e shangai ai Akula mying ai Yuda la langai mi hte hkrum wu ai; Dai wa gaw, Yuda masha nlang Roma mare na pru wa lu na nga nna Hkawseng Klawdi mungga shapraw dat ai majaw, madu jan Priskila hte rau Itali mung na htawt wa ai gade garai n na yang,

³shan gaw Pawlu zawn janghpang chywi sha ai ni rai nga ma ai. Dai rai nna, Pawlu gaw shan kaw sa nna shan hte rau amu jawm galaw let nga nga ai.

⁴Bansa Nhtoi shagu tara jawng hta Yuda masha ni hpe mung, Grik masha ni hpe mung kam sham wa hkra dai mungga lam ni woi bawng ban tsun sang lang dan nga ai.

⁵Ya Sila yan Timohti Makedoni mung nna hkan dep du wa ma yang Pawlu gaw mungga hkaw tsun ai amu hkrai san aten jaw nna, Yesu gaw Meshia nan rai nga ai lam Yuda masha ni hpe sakse hkam dan nga ai.

⁶Yuda masha ni Pawlu hpe ninghkap nna shi a lam n kaja ai hku amyu myu roi n ra nga tsun jahpoi asawng ma yang, Pawlu gaw shi a hpun palawng kaw na nhpu ni hpe ahpu jahkrat dan let, “Nanhte hten byak mat ai rai yang nanhte a mara nanhte a ntsa she rai nu ga, ngai hta lit n nga sai. Ya kaw nna gaw, maigan amyu ni hpang de ngai kayin mat wa na ni ai,” ngu nna shanhte hpe tsun mu ai.

⁷Dai hpang shanhte kaw na shi pru mat wa nhtawm Karai Kasang hpe kam sham nawku ai Yuda masha n re ai Titu Yustu mying ai wa a nta de shang manam nga ai. Dai wa a nta gaw tara jawng hte htep rai nga ai.

⁸Krispu mying ai tara jawng agyi wa mung shi a nta masha nlang hte hpawn Madu hpe kam sham ma ai; kaga Korinhtu masha ni law law mung, dai mungga na la nna kam sham ai hte hkalup hkam la ma ai.

⁹Lana mi hta Pawlu shingran langai mi mu wu ai. Dai shingran hta Madu gaw Pawlu hpe, “Hkum hkrit et, sha tsun dingyang di u, asum hkum hkam et!

¹⁰Hpa majaw nga yang, ngai nang hte rau rai nga nngai, nang hpe kadai mung hkra lu na n rai, ndai mare hta nye a masha ni law law nga ma ai,” ngu nna tsun wu ai.

¹¹Shing rai dai yang e Karai Kasang a mungga sharin achyin ya let, laning mi shata kru nga nga ai.

¹²Galio gaw Ahkaia mung e munggyi rai nga yang Yuda masha ni masha jahpawng la nhtawm Pawlu hpe rim la nna tara tingnyang a man de woi wa mu ai.

¹³Shanhte gaw, “Ndai wa jep ai tara hpe nhtan shai ai hku Karai Kasang hpe nawku na matu, masha ni hpe woi gunglau nga ai,” nga nna mara shagun mu ai.

¹⁴Shaloi Pawlu ga htan na nga n-gup ap sha naw rai yang, Galio mahtang, “Yuda masha ni e, amu ndai tara tawt lai ai amu, n hkru n hkra re ai amu, rai yang gaw, nanhte mara shagun ai lam hpe myit galu ai hte hkan madat ya na lam nga ai.”

¹⁵Rai ti mung dai amu gaw tsun shaga ai hta lang ai ga hkum ni a lam, mying shingteng ni hte nanhte a tara ni hte seng nna tsun dangrang mara shagun hkat ai amu she rai nga malit dai majaw, nanhte hkrai jeyang daw dan la mu. Dai zawn re ai amu ni a matu ngai tara agyi tai ya nngai n rai!,” ngu nna Yuda masha ni hpe daru kau wu ai.

¹⁶Shing nga nna tara tingnyang a man na shi shanhte hpe gawt shale shaden kau mu ai.

¹⁷Shaloi shanhte nlang tara jawng agyi wa Sosteni hpe rim la nna tara tingnyang a man e anu kayat kau mu ai. Galio chyawm gaw, dai lam hpe hpa mung n nawn ya mu ai.

¹⁸Pawlu gaw Korinhtu mare hta nhtoi tsawmra wa na hkra nga nga ai. Dai hpang kam sham ai ni hpe shakram da nna Priskila yan Akula hte rau li jawn let Suri mung de sa wa ma ai. Karai Kasang kaw ga shaka tawn da ai lam nga ai majaw, Kanhkeria mare kaw na hkali hte garai n pru yang shi a baw doi kau wu ai.

¹⁹Shanhte Ehpesu mare de du ma yang, Pawlu gaw Priskila yan Akula hpe dai mare hta shangam kau da wu ai. Shi gaw tara jawng de shang nna, Yuda masha ni hte tsun bawng hkat nga ai.

²⁰Dai yang na masha ni shi hpe shanhte hte tawng marang mi naw nga nga na hpyi ma ti mung shi n hkraw wu ai.

²¹“Karai Kasang hkraw yang gaw, ngai nanhte hpang de bai du na ring ngai,” ngu nna shanhte hpe shakram da nhtawm, Ehpesu mare kaw na li hte pru mat wa ai.

²²Ya Kesare mare de du jang, Yerusalem mare de lung wa nna, dai hpung hpe wa jahkrum nhtawm Antioki mare de bai yu wa wu ai.

²³Dai kaw tawng marang mi nga nhtawm, shi bai pru nna Galati mung hte Hprugi mung hpe ga lai sa wa let, kam sham ai ni nlang hpe shadaw shangang nga ai.

²⁴Dai ten hte yang, Alexandru mare na Yuda masha Apolo ngu ai wa langai mi Ehpesu mare de du sa wa ai. Shi gaw ga shaga ram nna Chyum Laika grai chye chyang ai wa rai nga ai.

²⁵Dai wa gaw Madu a lam sharin hkam la nna nachying myit lawm sharawng let, Yesu a lam ni hpe jaw ai hku atsawm sha hkaw tsun sharin achyin ya nga ai. Rai ti mung shi gaw Yawhan a hkalup lam sha naw chye nga ai.

²⁶Shi gaw tara jawng hta nden ja ai myit hte hkaw tsun hpang ai. Ya Priskila yan Akula gaw shi hkaw tsun ai ga na jang, shi hpe nta de saw shaga la nna, Karai Kasang a mungga lam hpe grau nna jaw ai hku tsun sanglang sharin ya wu ai.

²⁷Bai shi gaw Ahkaia mung de rap sa wa na myit daw dan ai rai nna, Ehpesu mare na kam sham ai ni gaw shi a matu Ahkaia mung na kam sham ni hpang de, Apolo hpe hkap hkalum la na matu shachyen ya ai hte lajin ai laika jaw dat ya mu ai. Ya shi Ahkaia mung de du ai shaloi Karai Kasang a chyeju hte shi gaw kam sham ai ni hpe grai wa shadaw shangang karum mu ai.

²⁸Hpa majaw nga yang shi gaw shawa hte ga shaga ai hpawng ni hta Chyum Laika hta na sakse ni madun let, Yesu gaw Meshia rai nga ai lam Yuda masha ni hpe aja awa tsun dangrang kapat kau nga ai.