Read Jinghpaw Common Language Bible 2009 KASA 19 Bible Online

KASA 19 - Jinghpaw Common Language Bible 2009 bible

KASA 19

¹Ya Apolo Korinhtu mare e nga nga yang, Pawlu gaw dai mungdaw a hkin-gau mayan lahta daw kaw nna kata maga hku ga sa wa ai hpang Ehpesu mare de du ai. Dai mare kaw shi sape nkau mi hpe hkrum ai rai nna,

²Shanhte hpe, “Nanhte kam sham ai ni tai wa sai rai yang, Chyoi pra ai Wenyi gaw lu la manit ni?,” ngu nna san mu ai; “Shanhte gaw, Chyoi pra ai Wenyi nga ai pyi anhte n na yu ga ai,” ngu nna htan ma ai.

³Bai Pawlu gaw, “Rai sa dai rai yang gaw hpa baw hkalup ngu ai hkam la myit ta?,” ngu nna san mu ai. “Yawhan a hkalup,” ngu shanhte htan ma ai.

⁴Shaloi Pawlu gaw, “Yawhan a hkalup lam gaw yubak mara kaw na myit malai lu ai ni a matu jaw ai she rai nna, shi a hpang e sa ai Yesu ngu ai wa hpe mahtang kam sham ra ai,” ngu nna Israela masha ni hpe tsun mu ai.

⁵Shanhte dai ga na jang Madu Yesu a mying hta hkalup hkam la ma ai.

⁶Ya Pawlu shanhte a ntsa e lata mara ya jang Chyoi pra ai Wenyi shanhte a ntsa e du nna shanhte laklai ai ga, myu kaga shaga nna Karai Kasang a mungga hpe mung tsun shana ma ai.

⁷Shanhte yawng lasha marai shi lahkawng rai nga ma ai.

⁸Dai hpang Pawlu gaw tara jawng de shang nna, shata masum tup nden ja ai hte Karai Kasang a Mungdan lam chye na hkap la mu ga, shanhte hte tsun hkai hkat nga nna, woi awn da wu ai.

⁹Rai ti mung nkau mi gaw myit ja nna n kam n sham ma ai rai nna, shawa masha ni a man e dai Madu a lam hpe n kaja ai ga ni hte tsun jahpoi asawng ma ai. Dai rai nna Pawlu gaw shanhte kaw na pru nna, sape ni hpe kaga jahka la nhtawm Turanu ngu ai wa a hpaji jawng gawk kaba hta shani shagu tsun bawng sharin shaga hkat nga ai.

¹⁰Shing rai ni ning tup tsun bawng sharin shaga nga ai rai nna, Asi mung ting hta nga ai Yuda masha ni hte Grik amyu masha ni nlang Madu a mungga na la lu ma ai.

¹¹Karai Kasang mung Pawlu hku nna shawoi n byin yu ai laklai ai lamik kumla ni hpe madun dan nga ai.

¹²Masha ni gaw, Pawlu lang ai hpajet hte lawng sap zawn re ai ni hpe pyi machyi ai ni hpang de la wa jang, shanhte a ana ahkya ni hpe shamai ya mu ai hte, shung ai n hkru ai nat ni mung pru mat wa ma ai.

¹³Dai shaloi nat hkyawt shaden kau let kawan hkawm nga ai Yuda masha nkau mi mung Madu Yesu a mying nsang hte n hkru ai nat ni hpe shaden kau lu na matu shakut nga ma ai. Shanhte gaw n hkru ai nat ni hpe, “Pawlu hkaw tsun ai Yesu a mying nsang hte ngai nanhte hpe shapraw made ai,” nga nna n hkru ai nat ni hpe tsun mu ai.

¹⁴Skewa ngu ai Yuda Hkinjawng Agyi Kaba langai mi a shadang sha sanit hte mung shing rai galaw nga ma ai.

¹⁵Rai ti mung dai n hkru ai nat gaw shanhte hpe, “Yesu hpe ngai chye nngai, Pawlu a lam hpe mung ngai chye da we ai, nanhte mahtang kadai ni rai nga myit ta?,” ngu nna tsun mu ai.

¹⁶Dai n hkru ai nat shung ai wa mung shanhte a ntsa e gumjawt gamyet nna, aja awa kamu anut ai hte dang manga kau mu ai. Dai rai nna shanhte gaw ahpye alam rai bu hpun palawng ni ashep ashin rai nna nta kaw na hprawng pru mat wa ma ai.

¹⁷Dai lam hpe Ehpesu mare na Yuda masha ni hte tara maigan masha ni nlang chye ma yang, shanhte yawng hkrit mat shajang nna, Madu Yesu a mying nsang hpe shagrau sha-a shajang ma ai.

¹⁸Kam sham sai ni hta na law law mung sa nna tinang galaw shut ai lam ni hpe tawngban tsun dan ma ai.

¹⁹Lakle mandan bau sha ai ni law law mung, shanhte a laika ni hpe la sa nna masha yawng a man e nat kau mu ai. Dai laika ni a manu sawn yu yang gumhpraw dengga mun manga ging malu ai.

²⁰Shing rai Karai Kasang a hpung shingkang hte dai Madu a mungga gaw chyam bra wa nna n-gun atsam rawng galu kaba maden jat wa nga ai.

²¹Ndai lam ni byin ngut ai hpang Pawlu gaw, Makedoni mung hte Ahkaia mung kaw nna Yerusalem mare de sa wa na matu myit daw dan wu ai. Shi gaw, “Dai mare de ngai sa nhtawm, Roma mare de mung ngai du yu na nngai,” nga nna tsun ai.

²²Dai rai nna shi gaw shi a nrum ntau tai ai Timohti yan Erastu hpe, Makedoni mung de shawng shangun dat ai laman shi hkum nan gaw Asi mung e tawng marang mi naw hkring nga ai.

²³Ya dai hte yang, Madu a Lam a majaw Ehpesu mare e kabring kabrawng re ai lam grai sawng ai hku byin wa ai.

²⁴Hpa rai nga yang Demetri ngu ai gumhpraw janghkam langai mi gaw Artemi hpara num sumla kaji ni hpe galaw shachyaw dut ai hte amu galaw manang ni hpe grai woi shalu jasu da mu ai.

²⁵Dai rai nna shi gaw janghkam manang ni hte dai baw amu galaw sha ai kaga ni yawng hpe shaga jahpawng la nna, “Ndai baw amu hte sha anhte nga mai nga ga ai gaw nanhte nan chye nga myit dai.

²⁶Rai ti mung ya ndai Pawlu ngu ai wa gaw Ehpesu mare e sha n rai sa, ganoi Asi mung ting ngu na wa masha lata hte galaw ai karai ni gaw Karai Kasang n re nga nna masha law law hpe gunglau ai hte myit shayit kau ya manu ai gaw, nanhte nan mu lu na lu nga myit dai.

²⁷Anhte a bungli mying hten mat na hpe tsang ra ai hta n ga, galu kaba ai Hpara shayi Artemi a nawku htingnu gaw hpa lachyum n pru mat nna Asi mung ting hte mungkan ting hpara shayi Artemi a galu kaba ai hpung shingkang hpoi mat na hpe mung myit tsang shara rai nga ai,” ngu nna tsun mu ai.

²⁸Shawa masha ni dai ga na jang, shanhte masin pawt bu shajang nna “Ehpesu masha ni a Artemi she galu kaba ai law!” nga nna marawn nga ma ai.

²⁹Dai marawn garu kasu kabrawng re ai lam mare ting chyam bra wa ai hte shawa masha ni mung Pawlu a manang Makedoni masha Geu yan Aristarku hpe rim dun la nna mare ting a shawa poi wang nta de htim bang wa ma ai.

³⁰Pawlu gaw shi nan dai shawa hpawng de shang sa nna shanhte hte hkrum katut mayu da nu ai, rai ti mung kam sham ai ni shi hpe hkum shadang mu ai.

³¹Pawlu a jinghku rai nga ai dai ginwang du nkau mi mung, shi hpe poi wang de n shang na matu masha shangun nna tsun htet dat mu ai.

³²Dai laman, dai shawa hpawng ting gaw kashuk kashak rai nna nkau mi myu mi kaga ni baw mi nga nna marawn jahtau nga ma ai. Hpa majaw nga yang, shanhte law malawng gaw, shanhte hpa a majaw sa hpawng nga ai ngu ai pyi n chye ma ai.

³³Ya Yuda masha ni Alexandru hpe shawng de pru sa shangun mu ai rai nna, masha nkau mi gaw ndai byin ai lam hte seng ai wa rai sam ai ngu myit la ma ai, Alexandru mung shawa hpawng hpe asim sha nga na matu shi a lata galang dingsi nna ga tsun hparan ningdang kau na shakut wu ai.

³⁴Rai ti mung shi Yuda masha langai mi rai nga ai hpe shanhte chye jang, yawng hte ting, “Ehpesu masha ni a Artemi she galu kaba ai law,” nga nna lang lata hkying hkum lahkawng daram na hkra marawn bu ma ai.

³⁵Jahtum e mare chyare wa mare masha ni hpe jasim kau ngut jang, “Ehpesu masha ni e, Ehpesu mare gaw galu kaba ai hpara shayi Artemi a nawku htingnu hte sumsing lamu de na hkrat wa ai nlung sumla e bau sin ai mare rai nga ai hpe masha shagu chye nga ai.

³⁶Dai lam ni hpe kadai mung n ningdang lu nga ai majaw, nanhte atsin sha nga mai ai hte hpa lam hta mung myit shadang nna n mai galaw myit dai.

³⁷Nanhte gaw ndai ni hpe nang de woi wa ai gaw, shanhte nawku htingnu hpe hpya sha ai mung n rai, anhte a hpara shayi hpe jahpoi ya ai mung n rai ma ai.

³⁸Demetri hte shi janghkam manang ni marai langai ngai hte mungga lama ma rawng yang gaw, tara rung hpaw ai nhtoi ni nga ai hte mungdu ni mung nga ma ai; dai kaw mara shagun nna tara dara hkat lu nga ai.

³⁹Rai ti mung nanhte hta kaga tang madun na ra sharawng ai lam lawm nga ai rai yang mung, mungchying sha ni a tara shang ai zuphpawng hta hparan na rai nga ai.

⁴⁰Hpa majaw nga yang, dai ni kabring kabrawng re ai lam gaw anhte a majaw byin ai re ngu nna mara shagun na tsang shara nga ai. Ndai zawn kabring kabrawng rai na lam hpa n nga ai. Kabring kabrawng byin shangun ai lam a npawt hte seng nna ngang kang ai mara hpa n madun lu na ga ai,” ngu tsun mu ai.

⁴¹Shing ngu nna, dai shawa hpawng hpe shabra kau wu ai.