Read Jinghpaw Common Language Bible 2009 KASA 21 Bible Online

KASA 21 - Jinghpaw Common Language Bible 2009 bible

KASA 21

¹Ya anhte gaw shanhte hpe shakram kau da nna ading sha li jawn nna rap sa wa yang, Kusa zunlawng de du ga ai; hpang shani Rodo zunlawng de du ga ai. Dai zunlawng kaw nna Patara mare de du ga ai.

²Dai kaw Hponisha mung de rap sa wa ai li langai mi hpe mu hkrup nna dai hta jawn sa wa ga ai.

³Ya Kupru zunlawng mu mada jang, de a hkra maga hku lai mat wa nhtawm Suri mung de anhte jawn sa wa nna hpaga rai jahkrat na matu Turu mare hta hkring ga ai.

⁴Dai kaw kam sham ai nkau mi hpe tam mu nna, dai mare hta sanit ya hkring nga ga ai. Shanhte mung Chyoi Pra ai Wenyi e shadut ai hte maren, Pawlu hpe Yerusalem mare de n sa na lam tsun mu ai.

⁵Nhtoi sanit ya lai jang, anhte bai pru wa ga ai. Shanhte mung madu jan kasha ni hte rau mare shinggan du hkra hkan sa dat ma ai rai nna, hka kau e hput di let, akyu hpyi ga ai.

⁶Dai hpang shada da shakram ngut jang anhte li hta shang nna shanhte mung nta de bai wa ma ai.

⁷Turu mare kaw nna bai matut sa wa ga yang, anhte gaw Toleme mare de du ga ai. Dai yang na kam sham ai ni hte hkrum shachyen shaga nna shanhte hte lani mi rau nga ga ai.

⁸Hpang shani e anhte bai pru nna Kesare mare de du ga ai. Anhte gaw Kabu Gara Shiga hkaw tsun ai Hpilip a nta hta manam ga ai. Hpilip gaw Yerusalem mare kaw karum na matu hpung kaw nna lata san da ai marai sanit hta na langai mi rai nga ai.

⁹Dai wa gaw dinghku garai n shang ai hkawn jet mali lu ai. Dai shayi sha ni gaw Karai Kasang a mungga hkaw tsun shabra ai ni rai nga ma ai.

¹⁰Shi a nta hta nhtoi tawng marang mi nga nga yang Agabu ngu ai myihtoi langai mi Yuda mung na sa du ai.

¹¹Shi anhte kaw shang nna Pawlu a shingkyit la nhtawm, shi dai shi a lagaw lata gyit nna, “Chyoi pra ai Wenyi ning nga tsun nga ai, ndai shingkyit madu hpe Yuda masha Yerusalem mare e ning di gyit nna, maigan amyu ni a lata de ap kau na mara ai da,” nga nna tsun ai.

¹²Ga dai na jang, anhte hte dai yang na ni gaw Yerusalem de n sa na lam Pawlu hpe hpyi hkum gaw ai.

¹³Pawlu chyawm gaw, “Nanhte hpa rai hkrap ngu hkrap ngoi nga nna nye myit hpe gawng run shangun ya nga myit ta? Yerusalem mare e gyit hkang da ai hkrum na sha n ga, Madu Yesu a mying nsang a majaw dai yang sa si hkam na pyi ngai jin jin rai nga nngai,” ngu nna htan shangap mu ai.

¹⁴Shingrai anhte Pawlu hkraw hkra n lu tsun ai majaw, “Madu a myit rai nu ga,” ngu nna anhte mung atsin sha nga mat ga ai.

¹⁵Dai kaw aten loi mi na hkra nga ai hpang, anhte arung arai ni hpe shachyip la nhtawm, Yerusalem de lung wa ga ai.

¹⁶Kesare na sape nkau mi mung, anhte hte rau sa ma ai rai nna, anhte sa manam na rai nga ai, Kupru zunlawng masha Manason ngu ai shawng shawng kaw nna kam sham nga sai sape langai mi a nta kaw sa sa bang da mi ai.

¹⁷Ya Yerusalem de anhte du jang, kam sham ai hpu nau ni kabu gara ai myit hte hkap la mi ai.

¹⁸Hpang shani Pawlu gaw anhte hte rau Yaku kaw shang jahkrum ga ai, hpung salang ni yawng mung shi kaw sa hpawng nga ai ten rai nga ai.

¹⁹Pawlu shanhte hpe shachyen ngut jang, shi gun hpai ai amu majaw kaga maigan masha ni hta Karai Kasang shabyin wa ai amu lam langai hte langai hkai dan mu ai.

²⁰Shing nga tsun dan ai hpe na jang shanhte yawng Karai Kasang hpe shagrau sha-a ma ai. Dai hpang shanhte gaw Pawlu hpe, “Hpu wa e Yuda masha ni hta na kam sham ai ni gade hkying mun law nga ma ai lam, shanhte yawng dai jep ai Tara hta myit jung ai hkrai rai nga ma ai lam nang chye nga ndai.

²¹Rai ti mung nang gaw, maigan mungdan ni hta nga jahkran nga ai Yuda masha ni yawng hpe tinang a kasha ni hpe matu n gadoi ra ai Yuda htung hking n hkan ra ai ngu nna Mawshe a jep ai Tara hpe kabai kau na hku sharin achyin ya ndai nga ai ga dai ni nlang na ma masai.

²²Ya kaning rai na rai ta? Nang du ai lam shanhte kaja wa na lu na masai.

²³Dai rai nna anhte tsun ai hte maren hkan galaw u: anhte kaw ga shaka tawn da ai marai mali nga ma ai.

²⁴Dai ni hpe shaga la nna shanhte hte rau nang hkum jasan jaseng u, shanhte a matu hkrat ang ai baw doi jahpu nang jaw ya u, ndai hku galaw ai rai yang, masha ni na ai na a lam tsun kajai nga ai shiga ni hpa n teng nga ai hte nang nan dai Mawshe a Tara htunghking hkan shatsup ai wa rai nga ai gaw, masha nlang chye na na ra ai.

²⁵Kam sham ai maigan masha ni a matu chyawm gaw sumla ni hpe nawng jau ai hpa lusha rai rai asai du manat sat ai shan, ndaw liknga n se n sa lam koi gam na matu anhte daw dan nna laika ka nna shana ngut saga ai,” ngu nna tsun mu ai.

²⁶Dai re ai majaw Pawlu gaw dai la ni hpe shaga la nna hpang shani e shanhte hte rau shi hkum jasan jaseng ai lam galaw wu ai. Dai hpang shi gaw Nawku Htingnu de shang nna shanhte jasan jaseng ai nhtoi gu na shani galoi rai na hte shanhte langai hte langai a matu hkungga galoi nawng ya na lam, sa tsun shana dan mu ai.

²⁷Rai ti mung dai sanit ya nhtoi ni htum wa magang ai ten hta sha, Asi mung na Yuda masha nkau mi Nawku Htingnu hta Pawlu hpe mu hkrup ma ai. Shanhte gaw shawa ting hpe myit woi sharawt nna Pawlu hpe rim la ma ai.

²⁸Shanhte gaw, “Israela masha ni e, karum la marit! Ndai wa gaw shara shagu hkan hkawm nna yawng mayawng hpe anhte Israela amyu hpe mung, Mawshe a Tara hpe mung ndai Nawku Htingnu hpe mung nhtan shai mara shagun ai hku hkaw tsun sharin shaga ai wa rai nga ai law. Dai hta n-ga ya shi gaw tara maigan masha ni hpe Nawku Htingnu kata de shaga shashawn nna ndai Chyoi pra ai shara hpe awu asin di kau nu ai law!” nga nna jahtau ma ai.

²⁹“Hpa majaw nga yang, shanhte gaw Pawlu hte Trohpimu ngu ai Ehpesu mare masha langai mi hte rau mare e mu manu ai rai nna dai wa hpe Nawku Htingnu de shashawn nu ai, nga nna myit ma ai.”

³⁰Mare ting kabring kabrawng rai wa nna, shawa ni gat gumbawm bang wa ma ai hte Pawlu hpe rim ahkyik garawt la nhtawm htingnu shinggan de dun shapraw mat wa ma ai. Dai shaloi jang Nawku Htingnu chyinghka ni hpe la kau ma ai.

³¹Shing rai shawa masha ni Pawlu hpe sat kau na maw nga ma yang Yerusalem mare ting kabrawng nga ai nga, shiga Roma hpyen hpung ni hpe up ai du kaba kaw hkawn pru ai.

³²Shaloi jang hpyen du kaba wa gaw hpyen du nkau mi hte hpyen la ni hpe shaga woi nna shawa hpawng kaba de gat bang wa ma ai. Shanhte gaw dap up du kaba hte hpyen ma ni hpe mu jang Pawlu hpe kayat ai jahkring kau ma ai.

³³Dai shaloi dap up du kaba wa sit sa nna Pawlu hpe rim la nhtawm Hpri sumri lahkawng hte gyit na hkang da mu ai. Dai hpang shi gaw, “Ndai masha kadai rai ta? Shi hpa galaw shut sata?,” nga nna san jep wu ai.

³⁴Shawa masha ni chyawm gaw nkau mi myu mi, kaga ni myu mi nga nna jahtau bu ma ai hte nau garu ai majaw hpa byin sai lam hkrak n chye lu wu ai rai nna Pawlu hpe hpyen dap wang kata de shashawn da na hkang da wu ai.

³⁵Lakang nhpang du jang, shawa masha ni nau nan ru matse ai hte anin shang wa ai majaw, hpyen ma ni Pawlu hpe pawn lung mat wa mu ai.

³⁶Shawa masha ni mung, shi hpe sat kau mu!” nga nna hkan marawn jahtau nang nga ma ai.

³⁷Ya hpyen ma ni Pawlu hpe hpyen dap wang kata de shashawn na maw nga yang Pawlu gaw hpyen du kaba wa hpe, “Nang hpe ngai ga hkaw mi tsun lu na a ni?,” ngu wu ai. Shaloi hpyen du wa gaw, “Nang Grik ga chye shaga n ni?

³⁸Dai rai yang shawng de lang mi gumlau rawt nna nam mali hkan e laknak lang ai kasu kabrawng hpyen ma hkying mali hpe woi ginrawn hkawm ai Egutu masha nang n rai n ni?,” ngu nna san wu ai.

³⁹Pawlu gaw, “Ngai Kiliki mung na Tarshu mare hta shangai ai, grai ahkyak ai mare kaba na Yuda masha langai mi rai nngai. Chyeju hte ndai masha ni hpe ga shaga na ahkang jaw e,” ngu nna hpyi nem wu ai.

⁴⁰Hpyen du kaba wa shi hpe ahkang jaw wu ai rai nna, Pawlu gaw, lakang baw e tsap let, asim sha nga na matu lata dingsi mu ai, shanhte akatsi sha rai jang Hebre ga hte shanhte hpe tsun mu ai gaw: