Read Jinghpaw Common Language Bible 2009 KASA 22 Bible Online

KASA 22 - Jinghpaw Common Language Bible 2009 bible

KASA 22

¹“Hpu nau ni hte ji wa ni e, nanhte a man e ngai mara n lu ai lam ga htan ai hpe madat mara ya mi.”

²Hebre ga hte shanhte hpe tsun ai na jang grau nna sim nga ma ai. Shaloi shi gaw,

³“Ngai gaw Kiliki mung na Tarshu mare e shangai ai Yuda masha rai nga nngai. Rai ti mung ndai Yerusalem hta Gamale a jawngma langai mi hku nna kaba wa nna, anhte a ji wa ni a ja la ai jep ai Tara htung hking hte maren azin ayang sharin achyin la nna dai ni nang e nga nga ai nanhte ni zawn Karai Kasang a magam bungli gun hpai na matu myit rawt ai hte ap nawng da nngai.

⁴Ngai gaw Yesu a lam hta hkan nang ai numsha lasha ni hpe gyit hkang sharen nna htawng hta bang da let, sat kau ai du hkra zingri zingrat yu ni ai.

⁵Ngai tsun nga ai lam teng nga ai gaw Hkinjawng Agyi Kaba wa hte salang hpawng ting sakse hkam lu ma ai; ngai gaw shanhte kaw na, Damasku mare e nga ai Yuda hpu nau ni hpang de ka dat ai laika ni hpe la gun let dai mare e nga ai Yesu a lam hkan ai masha ni hpe rim la nna Yerusalem mare de gyit dun wa nhtawm zingri na matu dai de lung wa nngai.

⁶“Shing rai ngai sa wa nga yang Damasku mare makau de du ai shaloi shani jan pungding madi ai hpawa e lamu de na nhtoi kaba langai mi nye a grup yin e akajawng sha nhtoi tu pru wa ai.

⁷Ga de ngai kadawng taw nna, Shawlu, Shawlu! Nang hpa rai ngai hpe zingri nga n ta? nga ai nsen langai mi hpe ngai na lu nngai.

⁸Ngai mung, ‘Madu e, nang kadai rai nga n ta?,’ ngu nna san we yang, shi gaw, ‘Nang zingri zingrat ai Nazaret na Yesu rai nga nngai,’ nga ai.

⁹Ngai hte rau sa ai ni chyawm gaw dai nhtoi hpe mu shajang ma ai rai ti mung, ngai e shaga nga ai wa a nsen hpe n na lu ma ai.

¹⁰Bai ngai gaw, ‘Madu e, ngai hpa galaw na rai ta?,’ ngu we ai. Shaloi Madu gaw, ‘Rawt u, Damasku mare de sa wa su; nang galaw na matu Karai Kasang lajang masat da ai lam shagu dai mare e nang hpe tsun dan na ra ai,’ nga nna ngai e bai tsun ai.

¹¹Dai htoi kabrim ai shingkang a majaw, ngai myi n mu mat ai rai nna, ngai kaw hkan nang ai ni nye a lata dun let, Damasku mare de woi shang wa mi ai.

¹²“Dai mare hta tara hkungga nna anhte a jep ai Tara hpe madat mara hkan sa ai hte dai yang e nga ai Yuda masha ni yawng a man e myi man pa nna hkungga tawn ai Anani ngu ai masha langai mi nga ai.

¹³Shi ngai kaw sa nna, nye a makau e tsap let, ‘Ngai nau wa Shawlu e, na a myi bai mu lit ga law!,’ nga nna sa tsun ai, shaloi jang ngai myi bai mu lu nna shi hpe mada yu nngai.

¹⁴Bai shi gaw, ‘Anhte a ji wa ni a Karai Kasang gaw, nang hpe shi myit ra ai lam chye shangun na matu mung, shi a ding hpring ai Madu hpe mu lu na matu hte shi a nsen hte nan shaga ai hpe na lu n ga, nang hpe lata san nit dai.

¹⁵Hpa majaw nga yang, nang gaw nang mu lu, na lu ai lam ni hpe masha yawng a man e tsun shana ya na matu dai Madu a sakse hkam ya ai wa nang tai na rin dai.

¹⁶Dai majaw, ya nang hpa rai nna naw ganung nga n ta? Rawt u, Madu a mying nsang gang nna hkalup hkam la u, Na a yubak kashin kau ya u ga, shi kaw akyu hpyi nem nga u,’ nga nna ngai hpe tsun ni ai.

¹⁷“Dai hpang Yerusalem mare de ngai bai du wa nna, Nawku Htingnu e akyu hpyi nga yang ngai shingran langai mi mu nngai.

¹⁸Dai shingran hta Madu dan pru nna, ‘Nang n hkring nga ai sha Yerusalem mare na alawan pru wa u, hpa majaw nga yang ndai mare masha ni gaw, nye a lam nang sakse hkam ai ga ni hpe hkap la na ma ai n rai,’ nga nna ngai hpe tsun ai ngai mu nngai.

¹⁹Shaloi ngai gaw, ‘Madu e ngai tara jawng ni langai hte langai hta shang nna nang hpe kam sham ai ni hpe rim la nhtawm anu kayat nna htawng hta bang da ai wa ngai rai nga nngai gaw shanhte nan chye nga ma ai.

²⁰Madu a lam sakse hkam ya ai wa Stehpan hpe sat kau ma ai shaloi mung ngai nan makau e tsap nna, shi hpe sat kau ai lam myit hkrum let, shi hpe sat kau ai ni a hpun palawng ni hpe sin ya nngai,’ ngu we ai.

²¹Karai Kasang chyawm gaw, ‘Pru sa wa su, ngai nang hpe tsun ai tara maigan masha ni hpang de ngai nang hpe shangun dat na de ai,’” nga nna tsun ai ngu mu ai.

²²Masha ni gaw ndai daram na hkra Pawlu tsun ai hpe madat nga ma ai, rai ti mung Pawlu ning nga tsun ai hpe na dat ai hte rau, “Dai zawn re ai wa hpe ga ntsa na tsan kau mu! Shi hpe sat kau mu! Shi hkrung nga na n ging nu ai!,” ngu nna nsen htum hkra marawn ma ai.

²³Shanhte gaw, tinang a hpun palawng ni hpe raw galang let, lamu ntsa de ga nhpu magra kabai shamawng nna kyek marawn nga ma ai.

²⁴Roma hpyen du kaba wa gaw, Pawlu hpe hpyen wang de shashawn la nhtawm, shi a lam Yuda ni ning nga nna kyek marawn bu nga ma ai lam, chye lu hkra naw sharim nna san akrawk yu na matu, shi a hpyen ma ni hpe hkang dat mu ai.

²⁵Rai ti mung kayat sharim na matu shanhte shi hpe gyit hkang mu yang, Pawlu gaw dai makau e tsap nga ai hpyen du wa hpe, “Taw, Roma mungchying sha langai mi hpe, mara lama ma a majaw garai n jep san, n jeyang ngut, kayat sharim ai gaw tara upadi hte bung pre nga a ni?,” ngu nna tsun wu ai.

²⁶Hpyen du wa dai na jang, hpyen du kaba kaw wa nna, “Nang hpa galaw maw nga n ta? Dai wa gaw Roma mungchying sha rai nga ai!,” ngu nna shana ya wu ai.

²⁷Hpyen du kaba wa mung Pawlu hpang de sa nna, “Nang Roma masha langai mi rai ndai da aw? Ngai hpe tsun dan rit,” ngu wu ai. Shi gaw, “Rai nga nngai,” ngu nna htan wu ai.

²⁸Bai hpyen du kaba wa gaw, “Ngai Roma masha tai lu na ahkang, manu kaba hte she lu la nngai,” ngu nna htan wu yang, Pawlu gaw, “Ngai chyawm gaw, Roma masha tai chyalu shangai ai wa rai nngai,” ngu wu ai.

²⁹Shaloi jang, Pawlu hpe san akrawk yu na nga ai ni, shi kaw na htingnut pru mat wa ma ai; Hpyen du kaba wa mung, Pawlu Roma masha re ai hpe chye jang, shi hpe gyit shut wu ai majaw hkrit kau wu ai.

³⁰Hpang jahpawt e Yuda masha ni Pawlu hpe shagun ai mara hpa re ai teng teng chye lu hkra shi hpe raw dat nna hkinjawng agyi ni hte salang hpawng ting hpe shaga jahpawng tawn nhtawm Pawlu hpe shanhte a man e shatsap tawn ya mu ai.