Read Jinghpaw Common Language Bible 2009 KASA 23 Bible Online

KASA 23 - Jinghpaw Common Language Bible 2009 bible

KASA 23

¹Shaloi Pawlu gaw dai salang hpawng hpe azi yu da let, “Nye a Yuda hpu nau ni e! ngai gaw dai ni du hkra prat tup Karai Kasang a man e htauli htaula myit asan sha hte hkum tsup ai hku asak hkrung hkan sa ni ai,” ngu mu ai.

²Hkinjawng agyi Anani gaw, “Shi a n-gup bye ya mu,” nga nna makau e tsap nga ai ni hpe tsun mu ai.

³Shaloi Pawlu gaw, “Htun hpraw chya ai shakum e, Karai Kasang mahtang kaja wa nang hpe bye na rin dai! Tara hku hte maren ngai hpe jeyang na she nang nang e dung nhtawm me tara hte nhtan shai ai hku ngai hpe bye na hkang dat n ni?,” ngu wu ai.

⁴Makau e tsap nga ai ni mung, “Nang Karai Kasang a Hkinjawng Agyi Kaba wa hpe roi lu n ni?,” ngu nna kajet ma ai.

⁵Pawlu gaw, “Hpu nau ni e, shi Hkinjawng Agyi Kaba wa re ai ngai n chye nna rai sai, Na amyu ntsa e up ai wa hpe roi lu na n rai nga nna ka da nga ai,” ngu nna yin la wu ai.

⁶Dai hpawng nga ai ni hta nkau mi Saduke ni nkau mi Hparishe ni rai nga ma ai hpe Pawlu mu chye jang shi gaw dai salang hpawng hpe, “Hpu nau ni e, ngai gaw Hparishe rai nga nngai; Hparishe kasha mung rai nga nngai, si ai ni bai hkrung rawt na myit mada ai lam a majaw ngai jeyang hkrum nga nngai,” ngu nna jahtau dat wu ai.

⁷Shi shing nga tsun dat ai shaloi jang Hparishe ni hte Saduke ni shada da n dang ruk rak hkat ma ai rai nna, shawa hpawng gaw hpung lahkawng tai mat ma ai.

⁸Hpa majaw nga yang, Saduke ni mahtang masha ni gaw si ai kaw na bai n hkrung rawt wa ai, lamu kasa mung, Wenyi mung n nga ai, nga nna tsun ma ai, rai ti mung Hparishe ni gaw dai masum hte nga ai lam kam ma ai.

⁹Shanhte marawn jahtau tsun shaga ai gaw grau nna ja wa ai, shaloi Hparishe hpung hta lawm ai tara sara nkau mi rawt nna, “Ndai wa hta anhte hpa mara mung n mu ga ai! Kaja wa Wenyi shing n rai lamu kasa langai mi shi hte ga tsun yang tsun shaga sana re!,” nga nna tsun hkat bu ma ai.

¹⁰Shing rai dangrang hkat ai lam grai laja lana rai wa jang shanhte Pawlu hpe ashep ashin di kau na, hpyen du kaba wa myit tsang da wu ai; dai majaw, shanhte kaw yu wa nna Pawlu hpe dai ni a ka-ang na gare la nhtawm hpyen wang de shawn la na hpyen ma ni hpe hkang da mu ai.

¹¹Dai shana Madu gaw shi a makau e tsap pru nna, “Hkum hkrit et, nang nye a lam Yerusalem mare hta sakse hkam nit dai hte maren Roma mare hta mung naw hkam lu na ndai,” ngu tsun wu ai.

¹²Hpang jahpawt Yuda masha ni jawm hpawng nna, Pawlu hpe garai n sat lu dingsa gaw hpa mung n lu n sha na ga ai, ngu nna dagam shaka ma ai.

¹³Shing nga bawng nna maw mawn ai ni masha mali shi jan rai nga ma ai.

¹⁴Shanhte gaw, hkinjawng agyi ni hte salang ni hpang de sa nna, “Pawlu hpe garai n sat kau lu dingsa gaw, hpa mung n lu n sha na ngu nna, anhte grai ngu dagam shaka tawn saga ai.

¹⁵Dai re ai majaw, nanhte hte salang hpawng hta lawm ai ni gaw, Pawlu a lam grau nna teng man ai shiga chye lu hkra atsawm sha naw san jep yu na ngu tsun jahpai nhtawm nanhte hpang de shi hpe shaga la na matu hpyen du kaba wa hpe hpyi dat mu. Shaloi anhte gaw shi nang de garai n du ai lam lapran e naw rai nga yang sat na jin jin rai nga na ga ai,” ngu mu ai.

¹⁶Rai ti mung, dai maw mawn ai lam hpe Pawlu a kahkri wa na kau nna dai hpyen wang de shang nhtawm Pawlu hpe sa tsun dan wu ai.

¹⁷Pawlu mung hpyen dap kung langai mi up ai hpyen du wa hpe shaga la nna, “Ndai ma hpe dap up du kaba wa hpang de woi wa ya e; shi lama mi tsun mayu ai da,” ngu dat dat wu ai.

¹⁸Hpyen du wa mung, shi hpe woi sa wa nna, hpyen du kaba wa kaw woi shang nhtawm, “Ndai ma nang hpe tsun na lam lama mi lu ai majaw, bawng dung ai wa Pawlu gaw ngai hpe shaga la nna ndai ma hpe nang kaw woi sa shangun nngai,” ngu wu ai.

¹⁹Shaloi hpyen du kaba gaw shi hpe lata dun nna, shim ai shara de she woi bang nhtawm, “Nang ngai hpe hpa tsun mayu n ta?,” ngu nna lagyim san yu wu ai.

²⁰Shaloi shi gaw, “Yuda du salang ni Pawlu a amu hpe salang hpawng hta atsawm sha naw jep san mayu ai zawn di jahpai nhtawm salang hpawng de hpawt ni woi la na matu, nang kaw hpyi na nga nna myit hkrum da masai.

²¹Rai ti mung shanhte ra ai hku hkum hkraw ya et, hpa majaw nga yang lam e masha mali shi jan shi hpe hkap rim na makoi nga na ma ai. Shanhte gaw Pawlu hpe garai n sat lu lu gaw hpa mung n lu n sha na, nga nna dagam shaka da ma ai. Ya pyi na a ahkang hpe ala let, ndai amu galaw na jin jin rai nga masai,” ngu wu ai.

²²Shaloi hpyen du kaba wa gaw, dai ma hpe, “Nang gaw ndai zawn ngai hpe sa tsun shana dan ai lam kadai wa hpe mung hkum tsun et,” ngu nna ginhtim ngut jang dat dat wu ai.

²³Bai hpyen du kaba wa gaw hpyen du lahkawng shaga la nna, “Kesare mare de sa wa na matu hpyen ma ni tsa, gumra jawn ai sanit shi, ri lang ai ni tsa hte hpe dai na hkying jahku hta rawt sa wa lu hkra shajin tawn mu,” ngu wu ai.

²⁴Dai hta kaga Pawlu jawn na gumra byau ya nna munggyi Hpilik hpang de du hkra ashim sha sa sa dat mu, ngu nna hkang dat wu ai.

²⁵Dap up du kaba gaw laika langai mi mung ning ngu ka dat wu ai.

²⁶“Klawdi Lusi gaw, grau htum ai munggyi Hpilik hpe ngwi pyaw ga shana dat nngai.

²⁷Yuda masha ni gaw ndai wa hpe rim la nna shi hpe sat na maw nga ma yang, shi Roma masha re ai lam ngai chye lu ai majaw, hpyen ma ni hte ngai sa nna shi hpe gare hkye la we ai.

²⁸Ngai gaw shi hpe Yuda masha ni hpa baw mara shagun nga ma ai lam chye mayu ai majaw, ngai shi hpe shanhte a salang hpawng de woi yu wa ya mawe ai.

²⁹Yuda amyu masha ni shi hpe mara shagun nga ai lam gaw shanhte a jep ai tara hte seng ai lam ni sha rai nga malu ai. Dai rai nna shi hta si ging ai mara shing n rai htawng hta sharen da ging ai mara hpa mung n nga ai lam ngai mu lu se ai.

³⁰Yuda masha ni shi hpe sat kau na hpaji daw nga ma ai lam ngai hpe shana ma ai majaw shaloi jang ngai shi hpe nang hpang de shangun dat we ai. Shi hpe mara shagun mayu ai ni hpe mung, na a man e sa shagun hkat na hku, hkang dat mawe ai,” nga nna rawng nga ai.

³¹Hpyen ma ni mung, dap up du wa hkang dat ai hte maren galaw ma ai. Shanhte gaw Pawlu hpe woi nna Antipatri mare du hkra dai shana e sa dat mu ai.

³²Hpang jahpawt e, lagaw hpyen ma ni gaw hpyen dap de bai wa ma ai. Gumra hpyen ma ni Pawlu hte rau bai matut sa wa ma ai.

³³Gumra hpyen ma ni gaw Kesare mare de du ai shaloi dap up wa a laika hpe munggyi wa a lata hta ap ya nhtawm Pawlu hpe mung shi a man e shashawn mu ai.

³⁴Munggyi gaw dai laika hti ngut jang, Pawlu hpe, “Nang gara mung na rai n ta?,” ngu nna san wu ai; Kiliki mung na re ai chye jang,

³⁵munggyi wa gaw, “Nang hpe mara shagun ai ni du jang she, na a amu ngai sagawn yu na nngai,” nga nna tsun nhtawm Pawlu hpe Herod galaw da ai htingnu hta rawng shangun nna zawng da na hkang dat wu ai.