Read Jinghpaw Common Language Bible 2009 KASA 24 Bible Online

KASA 24 - Jinghpaw Common Language Bible 2009 bible

KASA 24

¹Dai hpang manga ya rai jang, Hkinjawng Agyi Kaba Anani gaw, salang nkau mi hte rau Tertulu ngu ai tara sara langai mi hpe woi nna Kesare, mare de sa ma ai. Shanhte munggyi Hpilik kaw shang nna Pawlu hte seng nna mara shagun ai lam tang madun ma ai.

²Shaloi Pawlu hpe shaga tawn ya jang, Tertulu gaw lawu de na hte maren mara shagun ai ga tsun hpaw wu ai gaw: “Grau htum ai Hpilik e, na a Hpaji rawng ai woi awn ningbaw ningla ai lam a majaw shaning law law wa ngwi pyaw sim sa mungding mungchying lam lu la saga ai hta n ga, anhte mungdan a mai kaja ai lam a matu ra ahkyak nga ai gram lajang ai amu ni law law galaw ya nit dai!

³Dai hpe anhte shara shagu, aten shagu hta nang hpe chyeju dum let hkap hkalum bawp la ga ai.

⁴Ngai gaw nang madu a aten hpe law law n la kau ya mayu nngai, dai rai nna, kadun ai hku anhte tang madun ai hpe matsan dum ai hte madat ya na ngai hpyi nem nngai.

⁵Ndai wa gaw, grai hkrit tsang ra ai dingbai dingna jaw ai wa, mungkan ting na Yuda masha ni kabring kabrawng woi galaw ai wa re ai hta n ga, Nazaret wa a hpung hta lawm ai ningbaw ningla langai mi mung rai nga ai.

⁶Dai hta kaga shi gaw Nawku Htingnu hpe awu asin di na mung maw nga ai: dai majaw anhte shi hpe rim la gaw ai. Anhte gaw shi hpe anhte a tara hte maren jeyang na ra sharawng ga ai.

⁷Rai ti mung dap up du wa Lisia sa nna anhte lata na maja e Pawlu hpe shaga woi mat wa sai.[4]

⁸Shi hpe nang san yu jang, anhte shi hpe shagun ai mara lam yawng teng nga ai gaw nang chye lu na ndai,” ngu wu ai.

⁹Yuda masha ni mung, dai ga ni gaw teng nga ai, nga nna jawm mara shagun lawm ma ai.

¹⁰Munggyi wa lata dingsi nna, ga tsun na ahkang jaw wu yang, Pawlu gaw, “Nang gaw shaning law law na hkra ndai amyu a ntsa e tara agyi tai ya ai wa langai mi rai nga ai hpe ngai chye nngai. Dai majaw ngai hta mara n nga ai lam na a man e tsun dan lu ai majaw ngai kabu gara nga nngai.

¹¹Ngai Yerusalem mare de nawku na matu lung wa ai gaw nhtoi shi lahkawng ya hta garai n jan ai. Dai hpe nang nan sagawn yu nna mu chye lu ndai.

¹²Nawku htingnu hkan kadai ni hte dangrang hkat nga ai mung tara jawng hkan mare kata gara shara hta mung masha ni hpe ngai woi kasu kabrawng nga ai mung Yuda masha ni n mu ma ai.

¹³Ya shanhte ngai e mara shangun ai lam ni hte seng nna nang hpe shanhte sakse n madun lu ma ai.

¹⁴Rai ti mung shanhte shut ai ngu ai lam masa hte maren ngai gaw anhte a ji wa ni a Karai Kasang hpe nawku nngai hpe chyawm gaw na man e yin la nngai. Shing rai ti mung Mawshe a jep ai Tara laika hte myihtoi ni a laika hta ka da ai hku yawng mayawng hpe mung ngai kam sham nngai.

¹⁵Shanhte myit mada ai hte maren ngai mung kaja ai ni mi da, n kaja ai ni mi da, si ai kaw na bai hkrung rawt wa na mara ai ngu nna Karai Kasang hta myit mada nga nngai.

¹⁶Dai rai nna ngai gaw Karai Kasang a man e mung, masha a man e mung, ra n rawng ai sha tut nawng htauli htaula myit san pra nga lu hkra atsam htum hkra a shaja nga nngai.

¹⁷“Shing rai Yerusalem mare kaw na pru mat wa ai tsawmra ning lai ai hpang, nye a amyu masha ni a matu alu gumhpraw la wa ya na matu dai mare de ngai wa nngai.

¹⁸Nawku htingnu kata e nye a hkum jasan jaseng ai lam galaw ngut ai ten shanhte ngai hpe mu ma ai. Dai ten hta shawa hpawng mung ngai hte rau n nga ai, hpa kabring kabrawng mung n rai ma ai.

¹⁹Rai ti mung, Asi mung na Yuda masha nkau mi dai shara kaw nga nga ma ai. Ngai hpe mara shagun tsun shara lama ma nga ai rai yang gaw shanhte nan na a man de sa tsun ang ma ai.

²⁰Shing n rai yang mung, mung bawng hpawng a man e ngai tsun dara tang madun nga yang, ‘Ngai gaw si ai ni bai hkrung rawt wa na lam hpe kam ai wa re majaw, dai ni nanhte ngai hpe jeyang myit dai,’

²¹ngu nna jahtau tsun ai ga hta kaga ngai hta hpa mara nga yang ndai masha ni shanhte hkum nan tsun dan mu ga,” ngu nna tsun wu ai.

²²Ya Hpilik gaw dai Lam ngu ai hpung a lam hpe atsawm sha chye da ai wa rai nna, “Hpyen du kaba Lusi du jang she, ngai nanhte a amu daw dan na nngai,” ngu nna shanhte hpe jahkring kau mu ai.

²³Bai Hpilik gaw Pawlu hpe sin langa hte di nna sin da na hte shi a jinghku jingyu ni hku nna Pawlu a ra kadawn ai lam ni hpe sa galaw daw ya lu na shanglawt ahkang loi li jaw da na lam hpyen latsa up ai du wa hpe hkang da wu ai.

²⁴Dai hpang nhtoi gade nna yang Hpilik gaw shi a madu jan Yuda num Drusila hte rau du sa ai. Hpilik gaw Pawlu hpe shaga la shangun nhtawm, Hkristu Yesu a makam masham lam hte seng nna Pawlu hkaw tsun dan ai hpe madat la wu ai.

²⁵Rai ti mung Pawlu gaw ding hpring ai lam, tinang hkum hkang ai lam hte du magang ra ai tara daw dan ai nhtoi a lam hkaw tsun dan ai shaloi Hpilik hkrit kajawng nna, “Ya nang naw wa su, ngai rau jang she ngai nang hpe bai shaga na de ai,” ngu wu ai.

²⁶Dai ten hta Hpilik gaw Pawlu gumhpraw loi li jaw na ra ai nhten ngu nna myit mada nga ai majaw, shi hpe ya sha ya sha shaga nna shi hte ga shaga chyai wu ai.

²⁷Shing rai ni ning lai ai hpang, Porku Hpestu gaw Hpilik a aya hte munggyi tai wa nna Hpilik gaw Yuda masha ni kaw na myi man ra ai majaw Pawlu hpe naw sharen tawn da wu ai.