Read Jinghpaw Common Language Bible 2009 KASA 3 Bible Online

KASA 3 - Jinghpaw Common Language Bible 2009 bible

KASA 3

¹Lani mi na Petru hte Yawhan gaw akyu hpyi ai ten shana de hkying masum hta Nawku Htingnu de lung wa ma ai.

²Nawku Htingnu wang de shang wa ai Tsawm Pra ngu ai Chyinghka lam hta hkritung nna lagaw hten ai masha langai mi hpe Nawku Htingnu de shang wa ai ni kaw gumhpraw hpyi u ga nga nna shani shagu masha ni e hpai sa tawn da da rai mu ai.

³Petru yan Yawhan dai htingnu de shang wa nga ma ai hpe shi mu nna hkap hpyi nga ai.

⁴Shan chyawm gaw shi hpe jawm azi yu nna Petru gaw, “An hpe mada yu mi!,” ngu wu ai.

⁵Dai rai nna shan kaw na lama ma lu la na myit mada let shan hpe galaw yu nga ai.

⁶Petru chyawm gaw shi hpe, “Ja, gumhpraw gaw ngai n lu nngai; rai ti mung ngai lu ai nang hpe jaw de ga, Nazaret wa Yesu Hkristu a mying nsang hte rawt hkawm wa u!,” ngu nna tsun wu ai.

⁷Dai hpang shi a hkra lata hpe jum nna dun sharawt dat wu ai. Dai shaloi jang shi lagaw hte hkarutum hkrihkraw ni n-gun rawng wa lu ai.

⁸Shing rai shi gumlawt rawt nna shi a lagaw hte hkawm sa yu wu ai. Dai hpang shi gaw shan hte rau lam hkawm gumlawt let Karai Kasang hpe shakawn kungdawn nna Htingnu de shang wa ai.

⁹Dai wa ndai zawn Karai Kasang a hpung shingkang hpe shakawn kungdawn let lam hkawm nga ai hpe masha yawng mu lu ma ai.

¹⁰Dai wa gaw Nawku Htingnu a Tsawm Pra Chyinghka makau e dung nga nna hpyi sha ai wa rai nga ai hpe shanhte chye yu da mu ai rai nna, shi hta byin wa ai lam hpe mau mahka mat nga ma ai.

¹¹Dai wa gaw Petru yan Yawhan kaw hkan kanan nang nga yang, shawa masha ni mau mahka let, shannga nga ai Shawlumon ngu ai jarawp de gat ru bang wa ma ai.

¹²Petru dai mu jang shawa masha ni hpe, “Israela amyu masha ni e, ndai wa a lam hpe hpa rai mau nga myit ta? An a dagu atsam, an a tara hkan nna Chyoi Pra ai lam a majaw ndai wa hpe lam hkawm shangun lu ai zawn nawn nga myit ni?

¹³Abraham, Isak hte Yaku a Karai Kasang ngu ai anhte ji wa ni a Karai Kasang gaw, shi a shangun ma Yesu hpe hpung shingkang shadan shapraw ya nu ai. Rai ti mung, nanhte chyawm gaw ahkang aya lu ai ni a lata de shi hpe ap kau myit dai rai nna, Pilat du wa pyi shi hpe dat kau na myit daw dan da sayang nanhte mahtang Pilat a man e shi hpe ndang kau myit dai.

¹⁴Shi gaw Chyoi Pra ai hte Mai Kaja ai Wa rai nga ai rai ti mung nanhte gaw shi hpe ndang kau nna masha sat ai wa langai mi hpe mahtang nanhte ra sharawng ai hku dat dat ya na Pilat kaw hpyi myit dai.

¹⁵Nanhte gaw asak jaw ya lu ai wa hpe gaw sat kau myit dai, rai ti mung Karai Kasang gaw shi hpe si ai kaw na sharawt la nu ai rai nna anhte gaw dai lam a sakse ni rai nga ga ai.

¹⁶Shi a mying nsang a atsam gaw ndai lagaw hten ai wa hpe n-gun lagaw jaw nu ai. Shi a amying nsang hpe kam sham ai a marang e, ya nanhte mu chye ai lam hpe shabyin dat sai. Nanhte yawng mu chye lu ai hte maren Yesu hpe kam sham ai hte chyu sha dai wa hpe shamai shatsai ya sai rai nga ai.

¹⁷Ya rai ti mung hpu nau ni e, nanhte hte nanhte a du agyi ni Yesu hpe nanhte a n chye n chyang ai a majaw galaw kau nga ai lam ngai chye nga nngai.

¹⁸Karai Kasang gaw shi a Meshia nni nkri hkrum na ra ai lam, moi shawng shawng kaw nna myihtoi ni yawng a n-gup hte tau tsun tawn nu ai rai nna, dai lam ni ndai hku nna dik wa shangun nu ai.

¹⁹Dai rai nna Karai Kasang gaw nanhte a yubak mara ni hpe raw dat kau ya myit ga myit malai lu mu, nanhte shing rai myit yang gaw,

²⁰Karai Kasang kaw na Wenyi n-gun atsam du yu wa ai aten ni du na ra ai rai nna Meshia ngu ai nanhte a matu san da ya ai Yesu hpe nanhte hpang de shangun dat na ra ai.

²¹Moi chyaloi n hkoi kaw nna nga ai, shi a chyoi pra ai myihtoi ni a n-gup hku nna Karai Kasang tsun da sai hte maren, nga yawng nga pra hpe nnan bai gram ai prat du hkra Yesu gaw sumsing lamu e nga nga lu na rai nga ai.

²²Hpa majaw nga yang Mawshe gaw, “Dai Madu Karai Kasang ngai hpe shangun dat ai zawn myihtoi langai mi nanhte hpang de shangun dat na ra ai rai nna, shi gaw nanhte a amyu ru sai kaw na rai na ra ai. Nanhte gaw dai wa tsun matsun yawng hte hpe madat mara hkan sa galaw na rai myit dai.

²³Dai myihtoi a ga hpe n madat ai wa kadai hpe mung Karai Kasang a amyu masha ni kaw na sumri dan jahka kau ai hte jahten kau ai hkrum lu na rai nga ai,” nga ai.

²⁴Samuela hte shi a hpang e paw pru nna mungga htawn tsun shajang ai myihtoi ni yawng hte gaw ya ndai shani nhtoi ni hta byin wa na ra ai lam ni hpe tau tsun da masai.

²⁵Shi a myihtoi ni hku nna nanhte hpe Karai Kasang jaw ai ga sadi ni gaw nanhte a matu rai nga ai hta n ga, nanhte a nji nwa ni hte Karai Kasang tawn da ai ga shaka ni hte mung seng nga myit dai. “Karai Kasang gaw Abraham hpe na a amyu matu a marang e ga ntsa na amyu mahkra gumring gumrat chyeju hkam la shajang na mara ai nga nna tsun ai.”

²⁶Dai rai nna nanhte langai hte langai tinang a n hkru n shawp ai lam ni hta na myit malai kayin wa ai hte shaman chyeju hkam la lu mu ga nga Karai Kasang gaw shi a shangun ma hpe paw pru shangun ai hte nanhte hpang de shawng shangun dat ya sai,” ngu nna tsun mu ai.