Read Jinghpaw Common Language Bible 2009 KASA 5 Bible Online

KASA 5 - Jinghpaw Common Language Bible 2009 bible

KASA 5

¹Rai ti mung, Anani mying ai la wa hte madu jan Sahpira gaw, shan lu ai ga dachyawk dut nna,

²shan la myit hkrum ai hte, dai jahpu kau mi, shan a matu ip da nhtawm, kau mi sha kasa ni a lata de sa jaw ma ai.

³Petru gaw “Anani e, hpa majaw nang gaw Satan wa hpe na myit masin up madu na ahkang jaw ai hte ga dachyawk dut nna lu ai gumhpraw nkau mi tinang a matu ip la ai hku nna dai Chyoi Pra ai Wenyi hpe masu kau n ta?

⁴Ga dachyawk hpe nang garai n dut yang na a rai nga ai, dut kau ai hpang mung dai gumhpraw gaw na a rai nga ai. Dai rai yang hpa majaw dai hku galaw na myit daw dan n ta? Nang gaw masha hpe masu ai n rai, Karai Kasang hpe masu kau nu ai,” ngu wu ai.

⁵Anani gaw, dai ga hpe na ai shaloi jang kadawng si mat ai. Dai na ai ni yawng mung nachying hkrit kahpra nga ma ai.

⁶Shaloi jang shabrang ma ni shang wa nna sumpan hte ahkyen kayawp nhtawm sa hpai lup kau ma ai.

⁷Dai hpang hkying hkum masum daram na jang madu jan mung shing rai hpa byin ai lam n chye ai sha shang wa ai.

⁸Petru gaw, “Nang hte na a madu wa ga dachyawk dut nna lu ai gumhpraw ndai hte yawng rai sa ni? Ngai hpe tsun dan rit ngu wu yang shi mung rai sa, ndai hte mahkra rai sai,” ngu nna htan wu ai.

⁹Shaloi Petru gaw, “Madu a Wenyi hpe chyam yu na nan hpa majaw ndai hku myit hkrum myit ta? Yu u, na a madu wa hpe lup kau ai ni ya chyinghka lam de du wa mara ai rai nna nang hpe mung shanhte hpai kau na mara ai,” ngu wu ai.

¹⁰Shaloi jang shi mung kasa wa a lagaw nhpang e kadawng si mat ai. Shabrang ni mung shang wa yu yang, dai numsha si taw nga ai hpe mu nna hpai sa nhtawm, madu wa a makau e lup kau mu ai.

¹¹Hpung ting hte dai lam na mana ni yawng nachying hkrit kahpra mat ma ai.

¹²Ya kasa ni gaw lamik kumla ni hte mauhpa amu law law hpe mung masha ni a man e madun dan mu ai. Kam sham ai ni yawng gaw Shawlumon mying ai jarawp hta hpawng de nga ma ai.

¹³Masha ni shan hte hpe grai tsun shakawn ma ai rai tim shinggan masha gale kadai mung shan hte n kanawn wam ma ai.

¹⁴Rai ti mung, Karai Kasang hpe hkap la kam sham ai numsha, lasha hpung kaba grau grau nna dai hpung hta jat bang wa ma ai.

¹⁵Kasa ni galaw dan nga ai magam bungli ni a majaw, Petru lai sa wa yang nkau mi a ntsa e shi a shingnip sha pyi hkra u ga, nga nna machyi makaw hkrum ai ni hpe mare lam makau de hpai shapraw nhtawm yup ku ni hte panep ni hta tawn da shajang ma ai.

¹⁶Dai hta kaga, Yerusalem grup yin mare ni hkan na masha wunawng law law wa machyi ai ni hte nat shang zingri hkrum ai ni hpe woi nna, du shajang ma ai, dai ni mung yawng hte shamai shatsai ai hkrum ma ai.

¹⁷Dai shaloi Hkinjawng Agyi Kaba wa hte, shi a manang ni buga Saduke hpung hta lawm ai masha ni gaw nachying manawn ai myit hkrai chyat rai nga malu ai rai nna kasa ni hpe lama ma di na hku shanhte daw dan ma ai.

¹⁸Shing rai shanhte gaw kasa ni hpe rim la nhtawm mare na htawng hta bang da mu ai.

¹⁹Rai ti mung, dai shana e Madu a lamu kasa langai mi gaw, htawng chyinghka ni hpe hpaw kau ya nna shanhte hpe shapraw dat let,

²⁰“Nanhte pru wa nna Nawku Htingnu e wa tsap let, ndai asak hkrung ai lam ningnan hte seng ai ga yawng mayawng shawa masha ni hpe tsun dan mu,” ngu dat wu ai.

²¹Kasa ni mung ga madat nna jahpawt nhtoi hprim hpram rai wa ai aten hta dai Htingnu de shang wa nna sharin shaga hpang wa nga ma ai. Hkinjawng Agyi Kaba wa hte shi manang ni gaw Yuda agyi salang ni yawng hpe tara rap daw hpawng kaba hpawng na matu shaga tawn ma ai. Dai hpang kasa ni hpe shanhte a man de woi shapraw sa wa na matu hkang da nna tara rap daw hpawng sin ai ni hpe htawng de shangun dat mu ai.

²²Rai ti mung shanhte du ai shaloi htawng hta kasa ni hpe n mu mu ai rai nna tara rap daw hpawng de bai wa nhtawm,

²³“Anhte du yang htawng chyinghka mung chyip chyip la nga ai, sin ai ni mung chyinghka shinggan e sin nga ma la ai, dai wa mi hpaw yu yang me, kata e kadai mung n nga nga la ai,” ngu nna tsun dan mu ai.

²⁴Hkinjawng agyi ni hte htingnu sin ai du wa dai hpe na ma yang, kasa ni hta hpa byin ai rai wa sai kun? nga nna grai mau mat ma ai.

²⁵Dai hpang masha langai mi shang wa nna, “Madat yu mu! Nanhte htawng hta e rawng da ai ni gaw Nawku Htingnu hta e masha ni hpe sharin shaga nga ma ai!” ngu nna shanhte hpe tsun dan mu ai.

²⁶Dai rai nna hpyen du wa gaw shi a hpyen la ni hte sa nna kasa ni hpe bai sa woi la mu ai, rai ti mung aja awa n di wam mu ai, hpa majaw nga yang, shawa masha ni nlung hte kabai wa na hpe hkrit da mu ai.

²⁷Shing di shanhte hpe woi jashawn la nna Kongsi hpawng a man e tsap da shangun nhtawm Hkinjawng Agyi Kaba wa shanhte hpe ga san san mu ai gaw,

²⁸“Nanhte hpe dai amying hte n sharin shaga na matu anhte aja awa hkang da saga ai. Rai ti mung nanhte hpa galaw manit dai lam yu yu mu! Nanhte gaw nanhte a sharin shaga ai lam hpe Yerusalem mare ting shachyam shabra dat manit dai rai nna, dai wa si ai gaw anhte a majaw re ngu nna nanhte shadu mayu nga myit dai,” ngu nna tsun mu ai.

²⁹Petru hte kaga kasa ni gaw, “Anhte gaw masha a ga madat na hta Karai Kasang a ga hpe mahtang madat lu na ga ai.

³⁰Anhte a ji wa ni a Karai Kasang gaw nanhte wudang hta jen sat kau ai Yesu hpe jahkrung sharawt da nu ai.

³¹Israela amyu masha ni hpe myit malai lu shangun nna shanhte a mara raw dat kau ya ai ahkaw ahkang jaw ya na matu Karai Kasang gaw dai Madu hpe shi a hkra maga dung nga shangun nna ningbaw ningla hte Hkye hkrang la ai wa tai na matu shagrau shatsaw da nu ai.

³²Anhte mung ndai lam ni a sakse rai nga ga ai; Shi a mungga madat mara ai ni hpe Karai Kasang jaw ya ai Chyoi Pra ai Wenyi mung, dai hte a sakse rai nga ai,” ngu mu ai.

³³Kongsi hpawng hta lawm ai ni dai ga na jang shanhte ja ja masin pawt bu nna kasa ni hpe shanhte sat kau mayu da mu ai.

³⁴Rai ti mung, mung masha ni yawng e shagrau shatsaw hkungga tawn ai Tara sara kaba Gamale ngu ai Hparishe langai mi kasa ni hpe hkring mi shinggan de shapraw tawn shangun nhtawm

³⁵tsun wu ai gaw, “Israela amyu masha manaw manang ni e, ndai ni hpe nanhte kaning di na ngu ai gaw atsawm sha sadi let naw myit yu mu.

³⁶Lai wa sai shaning gade n na shi ai ten hta, Htuda ngu ai wa, shi hkum hpe reng ai wa rai nngai nga nna paw pru yang marai mali tsa daram shi kaw hkan nang yu sai. Rai ti mung shi sat kau ai hkrum nna shi kaw hkan nang ai ni yawng ayai aya rai bra mat ai hte shi a shamu shamawt ai lam sim mat sai.

³⁷Dai hpang mung, Galile masha Yuda ngu ai wa yuptung jahpan hta ai ten hte yang paw pru nna, mung masha ni hpe shi hpang de lau la mu ai; shi mung sat kau ai hkrum nna shi a hpang hkan nang ai ni yawng bra ayai mat ma sai.

³⁸Dai rai nna ya ndai amu hta ngai nanhte hpe tsun made ga, ndai masha ni hpe hpa hkum di myit, ra mi nga nga mu ga! Shanhte maw mawn ai lam hte galaw ai lam ni shinggyim masha kaw na rai yang, dai gaw mat mat wa na ra ai.

³⁹Karai Kasang kaw na rai yang chyawm gaw nanhte hpya jahten kau lu na n rai; nanhte gaw Karai Kasang hpe ninghkap ai lam sha tai na myit dai,” ngu mu ai. Yuda kongsi hpawng gaw Gamale a hpaji jaw ai hpe hkap la ma ai.

⁴⁰Shanhte gaw kasa ni hpe shaga jashawn la nna kayat nhtawm, Yesu a mying hte n sharin n shaga lu na lam hkang da ngut jang, dat dat mu ai.

⁴¹Kasa ni gaw shanhte hpe Madu Yesu a majaw kaya kahpa hkrum ging ai re ngu nna Karai Kasang e sawn ya hkrum ai majaw kabu gara ai hte Yuda kongsi hpawng kaw na pru mat wa ma ai.

⁴²Shing rai shanhte gaw, shani shagu nawku Htingnu hta mung, nta hkan e mung, Yesu gaw Meshia rai nga ai, nga nna Kabu Gara Shiga hpe matut hkaw tsun sharin nga ma ai.