Read Jinghpaw Common Language Bible 2009 KASA 7 Bible Online

KASA 7 - Jinghpaw Common Language Bible 2009 bible

KASA 7

¹Shaloi Hkinjawng Agyi Kaba wa gaw Stehpan hpe, “Ndai ni tsun ai ga teng nga a ni?,” ngu nna san wu ai.

²Stehpan gaw, “Hpu nau ni hte wa ni e, ngai tsun ai hpe madat mara yu mu! Anhte a kaji daju Abraham, Haran mare de garai n wa nga, Mesopotamia mung e naw rai nga yang, hpung shingkang rawng ai Karai Kasang gaw shi kaw dan pru nna,

³‘Na amyu hte na a mung na pru nhtawm ngai nang hpe madun na de ai mung de sa wa su,’ ngu shi hpe tsun dan wu ai.

⁴Shaloi Hkalde mung na shi pru nna Haran mare e wa shingbyi nga ai. Abraham a kawa si mat ai hpang, ya nanhte nga nga ai ndai mung de Karai Kasang shi hpe woi htawt wa wu ai.

⁵Dai mung e Karai Kasang gaw Abraham hpe sali wunli ngu na lamu ga lagaw kabye na shara daram pyi n jaw wu ai, rai ti mung, Karai Kasang gaw dai mungdan shi hpe jaw na nga nna ga sadi jaw nu ai rai nna dai gaw shi hte shi kashu kasha ni hte mung seng nga ai. Dai zawn ga ndat jaw ai ten Abraham hta kashu kasha garai n lu ai.

⁶Abraham hpe Karai Kasang tsun wu ai gaw, “Na a amyu matu ni, masha tsasam ni a mung hta sa shingbyi nga nna dai mung e shaning mali tsa ning mayam tai nna, zingri zingrat hkrum na mara ai.

⁷Rai ti mung, shanhte hpe yam sha nga ai amyu masha ni hpe mung ngai jeyang na mawe ai. Dai hpang shanhte dai mung na pru wa nna, ndai yang e ngai hpe jaw jau lu na mara ai,” nga nna tsun ai.

⁸Dai hpang Karai Kasang gaw shi tawn da sai ga shaka a kumla langai mi hku nna Abraham hpe matu gadoi ai lam jaw da wu ai. Shing rai Abraham gaw kasha Isak hpe shangai ai hpang matsat ya nhtoi hta matu gadoi ai lam galaw ya wu ai. Dai hte maren Isak gaw Yaku hpe matu gadoi ya wu ai. Yaku mung anhte a kaji daju ni ngu ai shi a kasha marai shi lahkawng hpe matu gadoi ya wu ai.

⁹“Yaku a kasha ni gaw shanhte a kanau Yosep hpe manawn nna, Egutu mung de mayam hku dut kau dat mu ai. Rai ti mung Karai Kasang gaw shi hte rau rai nga ai rai nna,

¹⁰ru yak tsin-yam tsindam yawng na shi hpe shaw la wu ai. Karai Kasang gaw Yosep hpe Egutu Hkawhkam a man e dan pru shangun nna, man pa ai arawn asam hte hpaji byeng-ya jaw wu ai majaw dai Hkawhkam wa gaw Yosep hpe Egutu mung ting a mung gyi hku nna mung, Hkawhkam htingnu up ai du hku nna mung san da wu ai.

¹¹Dai ten hta Egutu mung hte Hkanan mung ting hta hku wa kaba wa nna kyin dut kaba byin wa sai. Anhte a aji daju ni mung lusha htum mat malu ai.

¹²Egutu mung e mam nga ai lam Yaku na wu yang anhte a aji daju ni rai nga ai shi a kasha ni hpe shawng na lang shangun dat wu ai.

¹³Lahkawng ngu na bai sa ai shaloi Yosep gaw shi kahpu kanau ni hpe shi a lam tsun hpaw dan wu ai rai nna, Egutu hkawhkam mung Yosep a bawsang ni a lam chye ya wu ai.

¹⁴Dai rai nna Yosep gaw kawa Yaku hte hpawn nta masha yawng marai sanit shi manga hte Egutu mung de yu wa na matu Kawa Yaku hpang de shiga htet shana dat wu ai.

¹⁵Yaku mung Egutu mung de yu wa nna dai yang e shi hte shi kasha ni yawng si mat wa masai.

¹⁶Shanhte a moi mang hpe Shehkem de la wa nna, Shehkem e nga ai Hamon a kashu kasha ni kaw na Abraham gumhpraw manu hte mari da ai lup hta wa lup ma ai.

¹⁷Ya Karai Kasang gaw Abraham hpe jaw da ai ga ndat hpe shadik shatup na aten ni wa magang yang, Egutu mung e Israela amyu masha ni law htam kaba wa ma ai.

¹⁸Dai shaloi Egutu mung e Yosep hpe n chye ai Hkawhkam paw pru wa ai.

¹⁹Dai Hkawhkam wa gaw, anhte a bawsang ni hpe hpaji hte manai nna zingri zingrat di ma ai, shanhte a ma chyangai ni si mat mu ga, nta shinggan e adip arip tawn da shangun ma ai.

²⁰Dai aten hte yang Mawshe shangai wa ai rai nna shi gaw ahpraw nsam grai tsawm ai ma rai nga ai. Shata masum tup nta e bau maka da ai hkrum wu ai,

²¹Shi hpe nta shinggan de kabai tawn da ai shaloi hkawhkam a shayi sha e hta la nhtawm shi a kasha majing hku yin la nna shapan da wu ai.

²²Mawshe mung Egutu hpaji yawng sharin la nna, mungga hte marai grai rawng ai masha kaba langai mi tai wa sai.

²³“Ya Mawshe asak mali shi ning du ai shaloi shi a kahpu kanau Israela kashu kasha ni hpe gara hku di nga ma ai lam mu chye na matu sa kawan katsan yu na myit daw dan ai hte sa wa ai.

²⁴Shingrai sa yu hkawm nga ai ten hta Israela masha ni hta na marai langai mi hpe Egutu masha langai mi e kayat adup nga la ai hpe mu jang, Israela masha wa hpe maga nna zingri nga ai Egutu masha hpe matai htang let sat kau wu ai.

²⁵(Mawshe gaw, Israela amyu masha ni lawt wa lu na matu shi hpe Karai Kasang asung jashawn hkyen nga ai lam shanhte chye na ma dawng, ngu nna myit wu ti mung, shanhte gaw n chye na ma ai.)

²⁶Hpang shani e Israela la lahkawng shada da gasat hkat nga ai hpe sa mu hkrup nna shi gaw shan a lapran e shangwi shapyaw htingram na matu, ‘hkau yan e, nan gaw hpu nau Israela shada she rai yang me, hpa rai gasat hkat nga myit ta?,’ ngu nna nem mu ai.

²⁷‘Rai ti mung, htingbu manang wa hpe zingri ai wa mahtang, “anhte a ntsa e du hte tara agyi tai na, nang hpe kadai san da a ta?

²⁸Mani e Egutu masha hpe sat kau ai zawn ngai hpe mung sat kau mayu nga nni?,” ngu nna htan let Mawshe hpe kanawng kau wu ai.

²⁹Mawshe dai ga na jang, Egutu mung na hprawng mat wa nna Median mung e sa nga mat ai. Dai kaw shi gaw shadang sha lahkawng lu wu ai.

³⁰Shaning mali shi ning lai ai hpang, “Sina bum makau na nam mali e, wan grung nga ai singwum hta lamu kasa langai mi Mawshe kaw dan pru ai.

³¹Mawshe gaw shi mu lu ai hpe mau nna dai hpe atsawm sha yu yu na nga makau de sit sa wa yang, dai Madu a nsen ngoi pru ai gaw:

³²“Ngai gaw na a nji nwa ni a Karai Kasang, Abraham, Isak, Yaku a Karai Kasang rai nga nngai,” nga ai. Mawshe chyawm gaw hkrit gari nna n mada wam wu ai.

³³Bai dai Madu gaw, “Na a kyepdin raw kau u, hpa majaw nga yang nang tsap ai shara chyoi pra ai ga rai nga ai.

³⁴Egutu mung na nye a amyu masha ni a zingri zingrat nni nkri hkrum sha nga ai hpe ngai mu se ai. Shanhte a madai ai nsen hpe ngai na ni ai; Shanhte hpe hkye shalawt la na ngai yu wa ring ngai. Ya sa rit, ngai nang hpe Egutu mung de shangun dat de ga,” ngu nna shi hpe tsun wu ai.

³⁵Mawshe gaw, Israela masha ni e n hkap la ai ndang kau hkrum ai wa rai nga ai. Shanhte gaw, “Nang hpe anhte a ntsa e du hte tara gyi tai na kadai san da a ta?,” nga nna san ma ai. Dai wa nan dai singwum hkru ai shara e dan pru ai lamu kasa a karum ai hte amyu masha ni hpe up hkang ai hte shalawt dat na matu Karai Kasang dat dat ai wa rai nga ai.

³⁶Shi gaw Egutu mung hte Nawng Hkyeng hta mung, shaning mali shi ning tup nam mali hta mung, mauhpa hte lamik kumla ni madun nna Israela amyu masha ni hpe Egutu mung na woi shapraw wa ai wa rai nga ai.

³⁷“Nan hpu nan nau ni hta na, ngai zawn re ai myihtoi langai mi, nanhte a matu Karai Kasang paw pru shangun na ra ai,” nga nna Israela amyu masha ni hpe tsun da ai wa gaw Mawshe shi nan rai nga ai.

³⁸Nam mali e hpawng nga ai Israela amyu masha ni hte mung, anhte a ji wa ni hte mung, Sina bum e shingran jaw ai lamu kasa hte mung rau rai nga ai wa gaw shi nan rai nga ai. Anhte hpe bai htawn tsun na ap ya ai Karai Kasang kaw na asak hkrung ai mungga hkap la ai wa mung shi rai nga ai.

³⁹“Rai ti mung, anhte a ji wa ni chyawm gaw, shi a ga hpe n madat ma ai. Shi hpe ndang kau nna Egutu mung de bai yu wa mayu ma ai.

⁴⁰Shanhte gaw, “Anhte a shawng e sa wa na hpara ni galaw ya mi. Anhte hpe Egutu mung na shaw woi wa ai ndai Mawshe ngu ai masha hta hpa byin sai kun? Anhte n chye saga ai,” ngu nna Arun hpe tsun ma ai.

⁴¹Dai hpang shanhte gaw dumsu kasha sumla galaw nna dai sumla hpe hkungga jaw let shanhte galaw ai amu hpe shagrau sha-a ai kabu gara poi kaba galaw ma ai.

⁴²Dai rai nna myihtoi laika hta, “Israela amyu masha ni mali shi ning tup nam mali e nanhte a dusat hkungga ni hpe sat nna nawng jau ai gaw ngai hpe jaw ai n rai myit dai!

⁴³Nanhte hpai hkawm ai gaw Molek hpara a sum hte nanhte a shagan hpara Rehpan a sumla rai malit dai. Dai ni gaw nanhte nawku na matu galaw la ai sumla ni rai malit dai. Dai majaw Babelon mung a shinggan de lai hkra ngai nanhte hpe gau kau na made ai,” nga nna ka da nga ai hte maren Karai Kasang gaw shanhte kaw na myi man kayin kau nna shanhte hpe sumsing lamu na gintawng shagan ni hpe nawku na matu ap kau mu ai.

⁴⁴“Anhte a ji wa ni gaw, Karai Kasang shanhte hte rau rai nga ai sakse madun ai sum hpe nam mali e lu la ma ai. Karai Kasang gaw dai sakse sum galaw na matu Mawshe hpe hkang da nu ai. Dai hpe Karai Kasang madun dan ai kasi hte maren galaw nu ai.

⁴⁵Dai hpang anhte a kaji kawa ni gaw shanhte a kawa ni kaw na hkam la ai sakse sum hpe Karai Kasang shachyut kau ya ai masha amyu ni a mung hta Yawshu hte rau shanhte shang madu sha wa ai shaloi, dai sum hpe la shawn shang wa ma ai. Dai sum gaw Dawi a ban prat du hkra dai mung e nga nga ai.

⁴⁶Dawi chyawm gaw Karai Kasang a man e myi man pa ai rai nna Yaku a Karai Kasang shanu nga na shara langai mi galaw na ahkang jaw ya na matu Karai Kasang kaw hpyi wu ai.

⁴⁷Rai ti mung Shawlumon she Karai Kasang a nta gap wu ai.

⁴⁸“Rai ti mung Tsaw Htum ai Karai Kasang gaw masha a lata hte sha gap da ai nta kaw rawng ai n rai, dai lam myihtoi wa htawn tsun ai gaw,

⁴⁹“Sumsing lamu gaw nye a tingnyang ginding aga gaw nye a lagaw kabye lahkum rai nga ai. Kaning re ai nta nye a matu nang gap na n ta? Ngai shanu nga na shara gaw gara kaw rai ta?

⁵⁰Ngai nan dai arai ni yawng mayawng hpe galaw da sai n rai ni?,” nga nna myihtoi tsun ai.

⁵¹“Dai daram wa nanhte du ja nga myit hka! Nanhte a myit masin ni gaw Karai Kasang hpe dai daram wa n kam n sham nga malit hka! Karai Kasang a shingran mungga hpe na la na dai daram wa na lahpang nga myit hka! Nanhte gaw, nanhte a nji nwa ni galaw ai zawn Chyoi Pra ai Wenyi hpe nanhte galoi mung ninghkap nga myit hka!

⁵²Nanhte a nji nwa ni n zingri yu ai myihtoi kadai wa nga a ta? Shanhte gaw Karai Kasang a ding hpring nga ai shangun ma du sa na ra ai lam tau hkrau nna htawn tsun ai myihtoi ni hpe sat kau ma ai; ya nanhte mung dai wa hpe ap kau sat kau ai ni rai nga myit dai.

⁵³Nanhte gaw lamu kasa ni a lata hku nna shalai jaw ya ai tara lu ai ni rai nga myit ti mung, dai hpe madat mara hkan sa myit dai n rai,” ngu nna Stehpan tsun wu ai.

⁵⁴Yuda tara kongsi hpung hta lawm ai ni gaw Stehpan a ga hpe na jang masin nachying pawt nna wa wudik let yu da mu ai.

⁵⁵Rai ti mung Stehpan chyawm gaw Chyoi Pra ai Wenyi hpring nna lamu de azi yu wu yang Karai Kasang a hpung shingkang hte Karai Kasang a hkra maga de tsap nga ai Yesu hpe mu wu ai.

⁵⁶Dai shaloi Stehpan gaw “Yu mu! Ngai gaw sumsing lamu hpaw malang nga ai hpe mung, Karai Kasang a hkra maga dai Masha Kasha tsap nga ai hpe mung, ngai mu se ai,” ngu nna tsun mu ai.

⁵⁷Shaloi shanhte gaw aja awa jahtau let tinang a na ni hpe pat kau nhtawm lang lata rau shi hpang de htim nna,

⁵⁸Mare shinggan de dun shapraw nhtawm, nlung hte jawm kabai mu ai. Sakse ni mung Shawlu mying ai shabrang wa a lagaw nhpang e shanhte a hpun palawng ni hpe yu ya na matu raw tawn ma ai.

⁵⁹Shing rai kabai nga mayang Stehpan gaw akyu hpyi let, “Madu Yesu e Nye a Wenyi hpe hkap la ya rit law!,” nga ai.

⁶⁰Bai hput di let, “Madu e ndai mara shanhte hpe hkum shagun ya et,” nga nna nsen kaba hte jahtau wu ai, dai tsun ngut jang shi nsa hti mat ai.