Read Jinghpaw Common Language Bible 2009 KASA 8 Bible Online

KASA 8 - Jinghpaw Common Language Bible 2009 bible

KASA 8

¹Shawlu mung dai masha sat ai amu hta awlaw lawm nga ai. Dai shani kaw nna Yerusalem mare na hpung gaw zingri zingrat kaba laja lana hkrum hpang wa sai. Kasa ni hta lai nna kam sham ai ni yawng gaw, Yuda mung, Samari mung, shara magup hkan e bra ayai mat wa ma ai.

²Tara hkungga ai masha nkau mi Stehpan a moi mang hpe makoi mayang nna, shi a majaw hkrap ngu hkrap ngoi kaba hte yawn hkyen ma ai.

³Rai ti mung Shawlu gaw hpung hpe hpya jahtum kau na matu shakut nga ai. Shi gaw nta langai hte langai shang nna kam sham ai numsha lasha ni hpe garawt ahkyik la nhtawm htawng hta sharen da mu ai.

⁴Shara shagu bra hkawm mat ai dai kam sham ai ni gaw dai Kabu Gara Shiga hpe hkaw tsun nga ma ai.

⁵Hpilip gaw Samari mung de sa wa nna Meshia a lam dai mare hta nga ai masha ni hpe hkaw tsun dan mu ai.

⁶Shawa masha ni mung Hpilip tsun ai ga hpe atsawm sha na lasha nna madat nga ma ai. Shanhte madat nga yang, shi galaw dan ai lamik kumla ni hpe mung mu lu ma ai.

⁷N seng ai nat shung nga ai masha ni law law kaw nna nat ni gaw nsen kaba hte jahtau marawn let pru mat shajang ma ai. Lagaw hten ai ni hte katsing si ai ni law law mung mai mat shajang ma ai.

⁸Dai rai nna, dai mare hta kabu gara lam kaba rai nga ai.

⁹Dai mare hta Simun mying ai masha langai mi nga ai. Dai wa gaw dai mare hta tawng marang mi lakle madun dan rai nna masha ni hpe shamau mu ai. Shi gaw shi hkum hpe shi ningbaw ningla kaba langai mi rai nngai nga ai.

¹⁰Dai mare hta nga ai masha pang amyu myu kaw na masha ni mung, “Ndai wa gaw galu kaba ai n-gun atsam ngu ai Karai Kasang a n-gun atsam nsam dagraw nna du sa ai wa rai nga ai,” nga nna dai Simun ngu ai wa a ga hpe atsawm sha madat ma ai.

¹¹Shi gaw shanhte hpe mandan lakle hpaji hte shamau dan ai ram ram wa na wa sai majaw, shi hpe ndai zawn madat mara nga ma ai.

¹²Rai ti mung, Karai Kasang a Mungdan hte seng ai, Madu Yesu Hkristu hte seng ai Kabu Gara Shiga a lam, Hpilip hkaw dan ai hpe kam sham ma yang numsha lasha hkalup hkam la ma ai.

¹³Simun shi nan mung kam sham wa nna hkalup hkam la ngut jang Hpilip kaw hkan nang nga ai. Lamik kumla hte mauhpa amu kaba ni galaw dan ai hpe shi mu yang mau mahka mat nga ai.

¹⁴Samari masha ni, Karai Kasang a mungga hta la ma ai lam Yerusalem e nga ai Kasa ni na ma yang, shanhte gaw Petru hte Yawhan hpe shangun dat mu ai.

¹⁵Shan du jang kam sham ai ni Chyoi Pra ai Wenyi lu la na matu akyu hpyi ya mu ai.

¹⁶Hpa majaw nga yang dai aten du hkra dai Chyoi Pra ai Wenyi gaw shanhte hta na gade a ntsa e mung garai n yu wa yu ai. Shanhte gaw Madu Yesu a mying nsang hta hkalup hkam la ai sha naw rai nga ma ai.

¹⁷Dai rai nna Petru yan Yawhan shanhte a ntsa e lata mara ya jang, shanhte dai Chyoi Pra ai Wenyi hkam la lu ma ai.

¹⁸Kasa yan a lata mara ai hte kam sham ai ni Wenyi hkam la lu ai hpe Simun mu jang shi gumhpraw sak jaw nna,

¹⁹“Gade a ntsa e rai ti mung ngai lata mara jang dai wa Chyoi Pra ai Wenyi lu la na matu dai baw ahkang ngai hpe mung jaw mi,” ngu nna hpyi wu ai.

²⁰Rai ti mung Petru gaw, “Karai Kasang a kumhpaw kumhpa hpe gumhpraw hte mari la lu na re ai ngu nna nang myit nga ndai majaw nang hte na a gumhpraw gaw ngarai mung hta hten bya mat u ga.

²¹Karai Kasang a man e na a myit masin n ding n hpring nga lit dai majaw, anhte galaw ai amu hta na a matu kamhtaw hpa mung lawm lu na ndai n rai.

²²Dai majaw na a n hkru n kaja maw mawn ai lam hta na myit malai lu u. Dai Madu kaw hpyi nem nga u, shing rai yang na a kraw lawang hta dai n hkru n kaja ai hku myit mang kau ai lam hpe mara raw dat ya na rin dai.

²³Hpa majaw nga yang nang hta ladu lai hkra n ju n dawng ai myit rawng nga ai hte yubak e gyit hkang sharen da hkrum ai wa langai mi rai nga ndai hpe ngai mu nngai,” ngu nna shi hpe htan wu ai.

²⁴Shaloi Simun gaw, “Ngai hta nan tsun ai lam hpa mung n du u ga, nye a matu chyeju hte Madu kaw akyu hpyi ya mi,” ngu nna Petru yan Yawhan hpe tsun mu ai.

²⁵Shan chyawm gaw, dai Madu a mungga lam sakse hkam nna hkai dan ngut jang Yerusalem mare de bai wa mat ma ai. Shan a wa maga hkrun lam e Samari kahtawng law law hkan dai Kabu Gara Shiga hkaw dan ma ai.

²⁶Ya dai Madu a lamu kasa langai mi Hpilip hpe tsun wu ai gaw, “Rawt u, Yerusalem kaw nna Gaza de sa wa ai lam pru hkra dingda de tawk sa wa su,” ngu wu ai. (Dai lam gaw dai ni n lang mat sai nam mali lam rai nga ai.)

²⁷Shaloi Hpilip hkyen la nna rawt sa wa ai. Ya yu mu, Ehtiopi mung up ai Hkawhkam num Kandake a man e ahkang kaba lu nna sutgan yawng up sin ya ai Ehtiopi unuk langai mi gaw shi a nta de wa nga ai. Shi gaw Karai Kasang hpe nawku daw jau na matu Yerusalem de sa du nga ai.

²⁸Ya dai kaw na shi a gumra leng jawn nna nta de bai wa nga ai. Shi a gumra leng hta jawn wa nga yang, shi gaw Chyum Laika hta na myihtoi Esaia laika hpe hti nga ai.

²⁹Dai Chyoi Pra ai Wenyi gaw Hpilip hpe, “Htawra gumra leng de sa nna rau htep hkan nang u,” ngu wu ai.

³⁰Hpilip mung gat sa wa nna, Myihtoi Esaia a Laika hti nga ai hpe na wu yang, “Nang hti ai lam hpe chye na da wu ni?,” ngu nna san wu ai.

³¹Dai du wa gaw, ngai hpe marai langai ngai htai dan ai n nga yang, ngai kaning rai chye na na rai ta?, nga nna htan nhtawm shi kaw rau leng hta lung dung na Hpilip hpe saw wu ai.

³²Shi hti ai laika a ga gaw ndai rai nga ai: “Sat na sagu hpe zawn shi hpe dun sa wa nu ai, Sagu kasha gaw shi a mun rep ai shaloi atsin sha nga ai zawn, shi mung n shaga ai sha nga nga ai.

³³Shagrit kau ai shi hkrum nna tara ai lam byin hkra shi a matu galaw ya ai wa n nga ai. Ndai mungkan na shi a asak hpe dawm kau ya wu ai majaw, shi a shu mashi shu masha ni a lam kadai gawn dan lu na rai ta?,” nga ai.

³⁴Shaloi dai du wa gaw Hpilip hpe, “Myihtoi wa gaw kadai hpe sha-ang nna tsun nga a ta? Shi hkum hpe tsun ai rai kun? Shing n rai kaga wa a lam tsun ai rai kun?,” ngu nna san wu ai.

³⁵Shaloi ga tsun hpaw ai hte dai chyum ga hta npawt hpang nhtawm, Yesu hte seng ai Kabu Gara Shiga shi hpe hkai dan wu ai.

³⁶Shing rai shan hkawm sa wa ma yang hka nga ai shara langai mi kaw du jang dai du wa gaw, “Yu u, nang e hka nga nga ai; ngai hkalup hkam na hpa hkum shara nga a ta?,” ngu wu ai.

³⁷Hpilip gaw, “Na a myit masin mahkra hte nang kam sham nit yang gaw hkam la mai ai,” ngu wu ai. Shi mung, “Yesu Hkristu Karai Kasang a Kasha rai nga ai hpe ngai kam sham ni ai,” ngu nna htan wu ai.

³⁸Shaloi shi a leng jahkring na tsun nna shan lahkawng hka de yu wa nhtawm Hpilip gaw du wa hpe hkalup jaw wu ai.

³⁹Shan hka na lung wa ma yang dai Madu a Wenyi Hpilip hpe woi mat wa wu ai. Du wa mung Hpilip hpe bai n mu nu ai rai tim shi sa wa ai lam de kabu gara let wa mat nu ai.

⁴⁰Hpilip chyawm gaw, Azutu mare e shi du nga ai hpe chye wu ai. Dai hpang shi gaw Kesare mare de sa wa ai lam e mare langai hte langai hta shang nna Yesu Hkristu a lam Kabu Gara Shiga hkai dan wu ai.