Read Jinghpaw Common Language Bible 2009 ROMA 1 Bible Online

ROMA 1 - Jinghpaw Common Language Bible 2009 bible

ROMA 1

¹Karai Kasang a Kabu Gara Shiga hkaw tsun na matu kasa hku nna Karai Kasang e lata san da hkrum ai Hkristu Yesu a shangun ma wa ngai Pawlu gaw Laika ka dat nngai.

²Moi shawng de Karai Kasang gaw shi a myihtoi ni a n-gup hte dai Kabu Gara Shiga jaw ya na nga nna ga ndat jaw da sai lam dai Chyoi Pra ai Chyum Laika ni hta ka da nga ai.

³Dai Kabu Gara Shiga gaw Karai Kasang shi a Kasha anhte a Madu Yesu Hkristu a lam rai nga ai. Dai Madu gaw shinggyim masha labau hku gawn yang, Dawi a aru arat kaw na rai nga ai.

⁴Chyoi Pra ai Karai hkum hku nna Karai Kasang a Kasha nan rai nga ai hpe shadan dan na matu Karai Kasang gaw hpung shingkang kaba hte dai Madu hpe si ai kaw na bai jahkrung sharawt dat nu ai.

⁵Masha amyu baw shagu gaw Yesu Hkristu hpe kam sham nna madat mara mu ga she Karai Kasang gaw shi a mying nsang a marang e Hkristu a matu mara Kasa langai mi tai na ahkang chyeju ngai hpe jaw ni ai.

⁶Roma mare e nga ai ni nanhte mung, Hkristu hte seng ai ni tai na matu Karai Kasang shaga la ai ni rai nga myit dai majaw, dai ni hta lawm nga myit dai.

⁷Karai Kasang e tsaw ra nna shi a amyu masha tai na matu shaga la hkrum sai Roma hpung masha ni yawng hpang de ndai laika ka dat nngai. Anhte a Wa Karai Kasang hte Madu Yesu Hkristu kaw na chyeju hte ngwi pyaw ai gaw, nanhte hta e anga nga u ga law.

⁸Nanhte a kam sham ai gaw mungkan ting chyam hkra kajai gumhkawng wa sai majaw Yesu Hkristu a jaw e nanhte mahkra a matu mara, nye a Karai Kasang hpe ngai shawng chyeju dum shakawn kungdawn nngai.

⁹Ngai tsun ai ga teng man nga ai gaw nye a myit kraw lawang mahkra hte shi a Kasha a Kabu Gara Shiga a lam hkaw tsun ai hte ngai daw jau nga ai Karai Kasang nan nye a sakse rai nga ai.

¹⁰Ngai akyu hpyi ai ten shagu ngai nanhte hpe amyit dum nga nngai gaw Karai Kasang chye ya nga ai. Karai Kasang a myit ra ai hku rai yang gaw ya gade n na yang nanhte hpang de du lu na byin mai ai ahkang lu la n ga, tut nawng e ngai akyu hpyi nga nngai.

¹¹Nanhte myit masin ngang kang nga myit ga, Wenyi shaman chyeju kumhpa langai ngai nanhte hpe karan jaw mayu ai majaw ngai nanhte hte grai hkrum mayu nga nngai.

¹²Ngai ngu mayu ai gaw, nanhte hte ngai hkrum zup lu ai shaloi anhte langai hte langai a Hkristan makam masham mahkrum madup hku nna langai hte langai shada da n-gun jaw shangwi shapyaw ai lam hkam la lu na ra ai, ngu ai rai nga ai.

¹³Nye a hpu nau ni e, Yuda amyu masha n re ai maigan amyu masha ni hpe ngai myit malai kayin wa shangun mawe ai zawn, nanhte hta mung myit malai kayin wa ai masha ni nga wa na matu ngai nanhte hpang de sa du na, law law lang hkyen lajang yu ni ai, rai ti mung lam lama ma e ayan hkum shadang ai a majaw n du sa lu ai re ai lam nanhte hpe chye shangun mayu nngai.

¹⁴Hpa majaw nga yang karing karang masha ni, myit su ai ni, hpaji rawng ai ni hte hpaji n rawng ai ni yawng hte hta lit hka kap ai wa ngai rai nga nngai.

¹⁵Dai rai nna Roma e nga ai nanhte hpe mung dai Kabu Gara Shiga hkaw tsun dan na ngai grai myit hkut nga nngai.

¹⁶Hpa majaw nga yang, dai Kabu Gara Shiga hta awm dawm kam sham myit hkut nga nngai, Dai gaw shawng nnan e Yuda ni dai hpang e maigan[1] masha ni hta kam sham ai ni kadai hpe mung hkye hkrang la hkrum shangun lu ai Karai Kasang a atsam rai nga ai.

¹⁷Dai hta kaga, “Karai Kasang hta ding hpring ai wa gaw kam sham ai hte hkrung nga lu na ra ai,” nga nna Chyum ga hta ka da nga ai hte maren Karai Kasang gaw masha ni hpe gara lai hku nna sharawng awng hkap la nga ai lam dai Kabu Gara Shiga hta shadan dan nga ai. Dai gaw shawng ningpawt kaw nna jahtum du hkra kam sham ai lam rai nga ai.

¹⁸Shinggyim masha a shut hpyit mara gaw dai teng man ai lam hpe masha ni n chye hkra pat shingdang nhtawm n hkru n kaja ai amu hpe galaw shangun nga ai karai kata ai masha ni yawng a ntsa de, Karai Kasang a masin pawt ai myit gaw sumsing lamu de nna dan pru ra ai.

¹⁹Dai masha ni hpe Karai Kasang shi nan asan sha shadan dan sai majaw Karai Kasang hte seng nna chye na mai ai lam ni hpe asan sha chye na lu masai. Ndai lam a majaw Karai Kasang shanhte hpe ari jaw mu ai.

²⁰Mungkan ga hpe Karai Kasang hpan da ai ahkying aten kaw nna masha ni gaw, myi hte n mu lu ai shi a htani htana re ai n-gun atsam hpe mung shi gaw kaja wa Karai Kasang rai nga ai Karai shingyan hpe mung, dan dan leng leng mu chye lu masai. Shing rai chye lu ai lam gaw Karai Kasang hpan tawn da ai arai ni hpe shanhte mu lu ai majaw rai nga ai; dai rai nna dai masha ni gaw tinang tawt lai ai mara a matu tsun jahpai na lam n nga mat malu ai.

²¹Shanhte gaw Karai Kasang hpe chye chyang ninglen Karai Kasang hpe shagrau sha-a ang ai hte maren, n shagrau sha-a ma ai, chyeju jawm shakawn kung dawn ai lam n galaw ma ai, shanhte a myit mang ai lam gaw, lachyum n pru kaman li la sha rai mat malu ai majaw, shanhte a htauli htaula myit kaja ai myit masin ni gaw sin mak ai hte hpring chyat nga malu ai.

²²Shanhte gaw shanhte a hkum hpe hpaji chye ai ni rai ga ai ngu nna tsun ma ai rai ti mung shanhte gaw angawk angak re ai ni rai nga ma ai.

²³N si n mat chye ai Karai Kasang hpe nawku na malai si mat chye ai baw shinggyim masha, u ni, lagaw mali tu ai baw dusat ni shing n rai gumrawt hkawm ai baw dusat ni a hkrang sumla ni hpe nawku nga ma ai.

²⁴Dai rai nna Karai Kasang gaw shinggyim masha ni hpe tinang ni a kayut ai myit hku hkan let awu asin re ai lam hkan galaw na matu mung, tinang a hkum hkrang a arawng hpe shada da shayuk kau na matu mung, nawng kau mu ai.

²⁵Shanhte gaw Karai Kasang a teng man ai lam hpe masu ai hte galai kau mu ai rai nna, Hpan da ai Wa a malai Karai Kasang e hpan da ai arai ni hpe nawku daw jau ma ai. Hpan da ai Wa a hpung shingkang hpe htani htana shagrau sha-a shakawn kungdawn nga mu ga law! Amen.

²⁶Shing rai ma ai majaw Karai Kasang gaw kaya kahpa re ai ngang kayut ai myit e woi ai de lawm nang mat wa na matu nawng kau mu ai. Numsha ni mung shingra tara hte maren num la kanawn mazum ai hking madung hpe kau da nna num shada nhtan shai ai hku galaw hkat nga ma ai.

²⁷Dai hte maren lasha ni mung numsha hte kanawn ai hking madung hpe kau da nna tinang a ngang kahtet ai hta shada da kayut katu let lasha shada masai marai re ai amu maw hkat ma ai majaw shanhte a shut hpyit ai hte ging dan ai ari hpe tinang dai hkam la ma ai.

²⁸Dai masha ni gaw Karai Kasang hte seng ai teng man ai machye machyang shanhte a myit hta bang da na ningdang kau ma ai majaw shanhte n galaw ang ai n hpru n mai re ai amu galaw mu ga, Karai Kasang gaw shanhte hpe n san n seng ai myit mang lam ni hta nawng kau mu ai.

²⁹Shanhte hta n hkru n kaja ai lam amyu myu, awu asin re ai lam, nam mak lawhpa ai lam, arawn alai hten ai lam, n dawng n yawt ai lam, masha sat ai, ga li ga law ai lam, hkalem hkalau ai, mara matsing da ai lam ni hpring chyat rai nga malu ai.

³⁰Shanhte gaw ga shaga baw law ai ni, kaga wa a sari jahpoi ai ga, kadum kahte ai ni, Karai Kasang hpe n dawng ai ni, manang wa hpe n kaw n law rai aroi ara re ai ni, gumrawng gumtawng ai ni, shakawng shakat rai grang dakat ai ni, n hkru n kaja ai amu amyu myu hpe myit shapraw nna galaw ai ni, kanu kawa ni a ga n madat ai ni,

³¹chye na ai htauli htaula myit n rawng ai ni, ga sadi ga shaka n hkan shatup ai ni, nja nhpra myit n rawng ai hte matsan dum n chye ai ni, shanhte rai nga ma ai.

³²Shing rai galaw ai ni gaw si ging nga ma ai nga nna Karai Kasang a tara hta hkang da nga sai hpe shanhte chye chyalu rai ma ai rai ti mung, shanhte hkum nan dai lam ni hpe galaw dingyang rai nga ma ai hta n ga, dai hku hkan galaw ai ni hpe mung n-gun jaw awlaw ma ai.