Read Jinghpaw Common Language Bible 2009 ROMA 10 Bible Online

ROMA 10 - Jinghpaw Common Language Bible 2009 bible

ROMA 10

¹Hpu nau ni e, ngai gaw nye a amyu masha ni hkye hkrang la hkrum lu na matu nye a kraw lawang mahkra hte ra sharawng ndawt let shanhte a matu Karai Kasang kaw ngai akyu hpyi nga nngai.

²Hpa majaw nga yang, shanhte gaw Karai Kasang hta grai myit maju jung ai ni rai nga ma ai hpe ngai sakse hkam nga lu nngai. Rai ti mung shanhte a myit maju jung ai lam gaw teng man ai machye machyang hte n rai nga ma lu ai.

³Shanhte gaw masha hpe Karai Kasang a man e ding hpring wa shangun ai Karai Kasang a lai masa n chye ma ai rai nna dai hpe hkan na malai tinang dai gyin shapraw la ma ai majaw Karai Kasang a lai masa hku ding hpring wa lu na lam n hkan sa ma ai.

⁴Hpa majaw nga yang, Hkristu hpe kam sham ai masha shagu Karai Kasang a man e ding hpring wa lu na matu Hkristu gaw dai jep ai Tara a prat ladaw hpe jahtum kau nu ai.

⁵Jep ai Tara hkan shatup ai hte Karai Kasang a man e ding hpring ai masha tai lu ai lam hte seng nna Mawshe gaw, “Jep ai Tara hkan shatup ai wa gaw hkrung nga na ra ai,” nga nna ka da nu ai.

⁶Rai ti mung, Karai Kasang hpe kam sham ai hte Karai Kasang a man e ding hpring wa lu ai lam hte seng nna Chyum Laika hta, “Sumsing lamu de kadai wa lung wa lu na kun?”

⁷Sung htum ai katsan ga de kadai wa yu wa lu na kun? Shing nga ai lachyum gaw, “Hkristu hpe sumsing lamu kaw nna anhte hpang de yu sa na matu kadai wa lung saw shaga na rai ta? (Hkristu hpe si ai kaw na bai hkrung rawt wa na matu kadai wa katsan ga de yu nna saw shaga na rai ta?,” nga ai rai nga ai.)

⁸Dai Chyum Laika hta ning nga tsun ai: “Dai Karai Kasang a mungga gaw nanhte hte htep rai nga ai. Dai hpe nanhte a n-gup hte yin la nna nanhte a kraw lawang hta mazing da manu ai.” Dai mungga gaw nanhte hpe anhte hkaw tsun sakse hkam dan ai Karai Kasang hpe kam sham ai lam hte seng ai mungga rai nga ai.

⁹Shing rai Yesu gaw Madu rai nga ai nga nna na a n-gup ga hte tsun gara yin la nna Karai Kasang gaw si mat ai ni kaw na shi hpe hkrung sharawt la ai hpe na a myit masin hta kam sham n yang gaw nang hkye hkrang la ai hkrum na rin dai.

¹⁰Hpa majaw nga yang, anhte gaw ding hpring ai lu la hkra myit masin hta kam sham nna, hkye hkrang la ai lu la hkra, myit masin hta yin la na ga ai.

¹¹Dai Chyum Laika hta mung, “Shi hpe kam sham ai ni yawng mayawng hte gaw myit daw myit hten hkrum na n rai,” nga ai.

¹²Hpa majaw nga yang, dai hta yawng lawm nga ai rai nna, Yuda ni hte tara maigan masha ni a lapran e lachyen lahka n nga ai sha dai Madu gaw yawng mayawng a ntsa na Madu rai nga ai hte shi hpe shaga ai ni yawng mayawng hte hpe shaman chyeju nhpaw n-ya jaw ya mu ai.

¹³Chyum laika hta mung, “Dai Madu a mying nsang hpe shaga ai masha kadai mung, hkye hkrang la ai hkrum na mara ai,” nga nna tsun nga ai.

¹⁴Rai ti mung, shanhte gaw Madu hpe n kam n sham ai rai yang kaning rai shi kaw hpyi jahtau lu na ma ta? Dai mungga hpe n na yu ai mi kaning rai kam sham lu na ma ta? Dai mungga hpe hkaw tsun dan ai wa n nga yang gaw kaning rai na lu na ma ta?

¹⁵Hkaw tsun na ni hpe n shangun dat yang gaw, shanhte kaning rai hkaw dan lu na ma ta? Dai Chyum Laika hta tsun ai hte maren, “Mai kaja ai lam Kabu Gara Shiga hpe la sa ai ni gaw gade wa mauhpa rai nga malu hka!,”

¹⁶Rai ti mung dai Kabu Shiga hpe masha yawng hte wa hkap la kam sham ma ai n rai. Esaia shi nan, “Madu e anhte shana ya ai shiga hpe kadai wa kam sham nga a ta?,” nga nna tsun ai.

¹⁷Dai rai nna masha ni gaw dai mungga hpe na la ai hte kam sham wa ma ai. Hkristu a lam hkaw tsun dan ai hte dai mungga hpe na la lu ma ai.

¹⁸Rai ti mung, masha ni gaw dai mungga hpe nna lu ai gaw teng a ni? ngu n na ngai san mayu nngai. “Kaja wa shanhte na lu ma ai, hpa majaw nga yang dai Chyum Laika hta mungga hkaw tsun ai ni a nsen gaw mungkan ga ting chyam bra wa nna, shanhte a ga ni lamu ga jut shagu de du mat wa sai,” nga nna tsun ai hte maren rai nga ai.

¹⁹Bai ngai naw san yu made ga, Israela amyu masha ni gaw dai lam n chye na ma ai kun? Mawshe shi nan, “Ngai gaw hpa n re ai amyu hpe jai lang nna, nye a amyu masha ni hpe manawn shangun na nngai. N gring ai amyu a majaw nye a amyu masha ni hpe pawt bu shangun na nngai,” nga nna Mawshe shi nan shawng htan ai.

²⁰Bai Esaia gaw grau nna nden ja ai myit hte, “Ngai hpe n tam ai ni gaw ngai hpe mu manu ai. Nye a lam n san yu ai ni kaw ngai dan pru nngai, nga ai.” ngu nna tsun mu ai.

²¹Rai ti mung Israela amyu masha ni hte seng nna shi bai tsun ai gaw, “N madat n mara nna gumlau ai amyu hpe hkap la na matu, nye a lata shani tup ngai ladawn wak nga nngai,” nga ai.