Read Jinghpaw Common Language Bible 2009 ROMA 11 Bible Online

ROMA 11 - Jinghpaw Common Language Bible 2009 bible

ROMA 11

¹Dai rai nna ngai san yu n ga, Karai Kasang gaw shi a amyu masha ni hpe kabai kau nu ni? Shing n rai law! Ngai hkum nan Israela masha rai nga nna, Abraham a aru arat hte Benyamin a bawsang rai nga nngai.

²Karai Kasang gaw shawng npawt kaw nna lata la sai shi a amyu masha ni hpe kabai kau nu ai n rai. Chyum Laika hta Elia gaw Israela amyu masha ni hpe mara shagun let Karai Kasang kaw kaning nga hpyi nem ai hpe nanhte chye nga myit dai.

³Dai hpyi nem ai ga gaw, “Madu e na a myihtoi ni hpe shanhte sat kau manu ai, na a tawn hkungri ni hpe shanhte run hpya kau manu ai, ngai chyu sha ngam nga ni ai rai nna shanhte ngai hpe mung sat kau na tam shakut nga ma ai,” nga ai.

⁴Rai ti mung Karai Kasang kaning nga nna htan a ta? Shi gaw, “Bala hpara a man e lahput garai n hput di ai lasha hkying sanit hte hpe nye a matu ngai shangam da se ai,” ngu wu ai.

⁵Dai hte maren, ndai prat e mung, Karai Kasang a chyeju majaw lata la hkrum ai masha kau chyen mi naw ngam nga ai.

⁶Shi lata la ai lam gaw, shanhte galaw ai magam bungli hta madung n dat ai sha, shi a chyeju lam hku nna she rai nga ai. Hpa majaw nga yang, Karai Kasang lata la ai lam gaw masha ni galaw ai magam bungli hta lama madung dat ai rai yang gaw, shi a chyeju gaw teng man ai chyeju n rai nga sai.

⁷Dai rai yang gaw kaning ngu tsun na rai ta? Israela amyu masha ni gaw tinang tam ai hpe n mu ma ai lam dan leng nga ai. Karai Kasang e lata la hkrum ai ni nkau mi sha mu lu ma ai, ngam ai ni gaw Karai Kasang a saw shaga ai nsen hpe n na ma ai.

⁸Chyum laika hta mung, “Karai Kasang gaw shanhte a myit masin ni hte kraw lawang ni hpe jahpam kau ya mu ai rai nna dai ni du hkra shanhte gaw mu lu ai arai hpe n mu ma ai, na lu ai arai hpe mung n chye na ma ai,” nga nna ka da nga ai.

⁹Dawi mung, “Shanhte a lusha poi ni gaw shanhte a matu mahkam dawnggawng zawn tai nna, hkrat sum ai hte ari jaw ai hkrum mu ga.

¹⁰Shanhte myi n mu lu hkra shanhte a myi ni sin mak malu ga, shanhte a marung ni gaw gun hpai ra ai lit a majaw tut nawng htingkung nga shangun u,” nga ai.

¹¹Yuda amyu masha ni gaw shanhte hten za hkrat sum mat hkra ahtu kataw wa ma sani? ngu nna san mayu nngai. Gara hku mung n hkrat sum ma ai! Shanhte yubak galaw ai majaw hkye hkrang la ai lam gaw maigan masha ni kaw du wa sai. Dai gaw Yuda masha ni manawn shara tai na matu rai nga ai.

¹²Yuda masha ni a tawt lai ai yubak mara gaw, mungkan masha ni a matu law la ai chyeju kumhpa shabyin ya ai hte, shanhte a wenyi hta matsan chyaren hkrum ai gaw maigan masha ni a matu law la ai chyeju kumhpa shabyin ya nga yang gaw Yuda masha ni hkum hkum tsup tsup dai hkye hkrang la ai chyeju hta shalawm la ai hkrum yang gaw gade wa grau kaba la ai chyeju kumhpa byin tai na rai nga a hka!

¹³Nanhte maigan masha ni hpe ngai tsun made ai gaw maigan amyu masha ni a kasa ngai tai nga dingsa nye a amu hta arawng lu nna gumrawng nga na nngai.

¹⁴Ngai gaw nye a amyu masha ni a myit hta manawn ai myit lama rawng shangun ai rai yang shanhte nkau mi sha hkye hkrang la ai hkrum lu na rai nga ai.

¹⁵Hpa majaw nga yang nye a amyu masha ni hpe Karai Kasang kabai kau ai shaloi masha amyu ni hpe Karai Kasang a hpyen ni tai nga ai kaw na shi a jinghku ni tai wa hkra, htinglu htinglai ya ai lam byin wa sai. Dai rai nna shanhte hkap la ai bai hkrum yang, hpa byin wa na rai ta? Dai gaw si ai ni kaw na bai hkrung rawt ai asak rai na ra ai.

¹⁶Dai hta kaga muk tawng langai mi hta na hkyep mi hpe la nna Karai Kasang kaw shawng nawng jau ai rai yang ngam ai muk tawng ting mung nawng jau ai tai sai rai nga ai. Bai nna hpun langai mi a aru ni hpe nawng jau ai rai yang lakung lakying ni hpe mung nawng jau ai tai sai rai nga ai.

¹⁷Hkai tawn ai tsanlun hpun a lakung lakying nkau mi hpe gyi kau nhtawm, ngam nga ai de a ndu hta tsanlun chyalam lakung hpe matut nna hkai chye ma ai. Dai tsanlun chyalam lakung gaw tsanlun chyanyi a aru kaw na nam hpun lusha bawk jaw lawm ai zawn, nanhte maigan masha ni mung Yuda masha ni kaw na n-gun rawng ai Wenyi a chyeju akyu ara hkam la lu manit dai.

¹⁸Dai rai nna, nanhte gaw gyi kau sai lakung lakying hte bung ai shanhte hpe yu kaji nna gumrawng gumtawng hkum rai myit, nanhte gara hku nna gumrawng gumtawng rai lu na myit ta? Dai rai nna nanhte gaw aru hpe madi shadaw ai ni n rai, aru mahtang nanhte hpe madi shadaw ya nga ai.

¹⁹Rai ti mung nanhte gaw, “Rai sa nye a matu shachyaw na shara jaw lu hkra lakung lakying ni hpe gyi kau ai hkrum ma ai,” ngu nna tsun na marin dai.

²⁰Dai nanhte tsun ai hte maren teng nga ai. Shanhte n kam n sham ai majaw gyi kau ai hkrum ma ai; nanhte chyawm gaw Madu hpe kam sham ai majaw tsanlun hpun hta shara la lu myit dai. Rai ti mung, nanhte gaw dai lam a majaw gumrawng gumtawng rai na malai hkrit kang nga mu.

²¹Hpa majaw nga yang, Karai Kasang gaw mi na lakung lakying madung ngu ai Yuda masha ni hpe pyi n lahpawt dum a yang gaw, nanhte hpe lahpawt dum na ra ai ngu nna myit nawn nga myit ni?

²²Ndai kaw Karai Kasang gaw gade daram matsan dum lama chye ai hte gade daram laja lana ari jaw chye ai wa re ai hpe anhte mu lu ga ai. Shi gaw yubak mara galaw ai ni hpe laja lana ari jaw nga ai rai ti mung nanhte gaw shi a matsan dum lama ai lam hpe hkam la ai lam hta matut nna ging dan hkra hkawm sa ai rai yang, shi gaw nanhte hpe matsan dum lama nga na ra ai. Rai ti mung nanhte mung shi a matsan dum lama ai hpe hkam la ging ai ni n tai myit yang gaw nanhte mung, gyi kau ai hkrum na marin dai.

²³Yuda masha ni shanhte a n kam n sham ai myit hpe kau da ma ai rai yang gaw, shanhte hpe mi na ndu hta bai shachyaw matut da ai hkrum lu na mara ai. Hpa majaw nga yang, Karai Kasang gaw shing rai galaw lu ai wa rai nga ai.

²⁴Nanhte maigan masha ni gaw dai tsanlun chyalam lakung hpe gyi la nhtawm htung n nga ti mung mi na tsanlun hpun chyanyi majing hta shachyaw matut hkai ai hte bung nga myit dai. Yuda masha ni gaw dai tsanlun chyanyi hpun hte bung nga ai rai nna tsanlun hpun chyanyi lakung ni hpe mi na tsanlun hpun majing hta matut shachyaw hkai na gaw Karai Kasang a matu grau loi na n rai ni?

²⁵Hpu nau ni e, nanhte gaw tinang dai chye chyang la ni ai ngu nna n myit la na matu Karai Kasang a sung htum ai hte makoi magap da ai teng man ai lam langai mi nanhte hpe chye na shangun mayu nngai. Dai gaw Israela amyu masha ni tut nawng myit shaja kau nna nga na ma ai n rai, rai ti mung dai gaw hkye hkrang la hkrum nna Karai Kasang kaw du wa na kaga amyu masha ni a jahpan wa hkum ai ten du hkra sha rai na rai nga ai.

²⁶Shing rai Israela masha ni yawng hte gaw hkye hkrang la ai hkrum na mara ai. Dai hte maren Chyum Laika hta, “Ziun kaw na hkye hkrang la ai wa paw pru na ra ai rai nna Yaku a aru arat ni kaw na n hkru n shawp ai lam mahkra hte hpe yeng seng kau na ra ai.

²⁷Shanhte a yubak mara ni hpe ngai raw dat yeng seng kau ya ai shaloi e, ngai shanhte hte ndai ga shaka tawn da na nngai.” nga nna ka da nga ai.

²⁸Dai Kabu Gara Shiga hpe shanhte kabai kau ma ai majaw, Yuda amyu masha ni gaw Karai Kasang a hpyen tai wa masai. Shing rai byin wa ai gaw maigan amyu masha ni ngu ai nanhte akyu hkam la na matu rai nga ai. Rai ti mung, Karai Kasang gaw shanhte hpe lata la ai amyu shatai sai majaw shanhte a kaji kawa ni hpe tawn da sai ga sadi a gawp e shanhte gaw shi a tsaw ra hkrum ai ni rai nga ma ai.

²⁹Hpa majaw nga yang Karai Kasang gaw kadai hpe rai ti mung shaga la nna shaman chyeju jaw na matu daw dan sai hpang myit n galai chye ai wa rai nga ai.

³⁰Nanhte maigan amyu masha ni chyawm gaw moi shawng de Karai Kasang hpe n madat n mara myit dai; rai ti mung ya Karai Kasang matsan dum lama ai lam hkam la lu ai gaw Yuda amyu masha ni Karai Kasang a ga hpe n madat n mara ai majaw rai nga ai.

³¹Karai Kasang a matsan dum lama ai hpe nanhte hkam la lu ai hte maren Yuda amyu masha ni shanhte mung hkam la lu na matu Karai Kasang a ga hpe ya n madat n mara nga ma ai.

³²Hpa majaw nga yang masha nlang hte gaw shi a ga n madat n mara ma ai majaw Karai Kasang gaw shanhte hpe n madat n mara ai bawng masha ni tai shangun kau mu ai. Shing rai shi galaw ai gaw masha nlang hte hpe shi a matsan dum lama ai lam madun dan mayu ai majaw rai nga ai.

³³Karai Kasang a chyeju gaw gade wa n taw n tsang law htam nga a hka! Karai Kasang a hpaji byeng-ya hte chye chyang ai lam gaw gade wa sung nga a hka! Shi a daw dan hparan ai lam ni hpe kadai wa sanglang htai dan lu a ta? Shi a lam ni hpe kadai wa chye na lu na a ta?

³⁴Chyum laika hta, “Dai Madu a myit hpe kadai dang chye a ta? Shi hpe kadai hpaji jaw lu a ta?

³⁵Madu kaw nna chyeju bai htang ai hkrum u ga, kadai wa shi hpe hpa baw shawng sak jaw yu sata?,” nga nna rawng nga ai.

³⁶Hpa majaw nga yang arai yawng mayawng hte hpe shi hpan da nu ai rai nna yawng mayawng hte gaw shi a matu mara pra nga ai a majaw shi kaw e htani htana hpung shingkang anga nga u ga law! Amen.