Read Jinghpaw Common Language Bible 2009 ROMA 14 Bible Online

ROMA 14 - Jinghpaw Common Language Bible 2009 bible

ROMA 14

¹Kam sham ai hta n-gun n ja ai wa hpe hkap hkalum la mu, rai ti mung shi a myit sawn yu ai lam hte seng nna ndang kalang rai dinglun ai lam hkum galaw myit.

²Langai wa a makam masham gaw lusha amyu myu sha mai ai nga nna ahkang jaw nga ai rai ti mung, makam masham hta n-gun n ja ai wa mahtang gaw namlaw namlap ni hpe sha, sha nga ai.

³Amyu myu sha ai wa gaw, n sha ai wa hpe hkum jahpoi u ga, n sha ai wa mung sha ai wa hpe hkum jeyang u ga, hpa majaw nga yang, Karai Kasang gaw dai wa hpe hkap hkalum la sai.

⁴Masha langai ngai a shangun ma hpe jep san jeyang ai wa e, nang gaw kadai wa rai nga n ta? Dai shangun ma a amu awng dang ai shing n rai n awng dang ai ngu ai hpe gaw dai shangun ma a madu shi nan daw dan na ra ai. Kaja wa shi awng dang na ra ai, hpa majaw nga yang, dai Madu gaw shi hpe awng dang hkra karum lu ai wa rai nga ai.

⁵Masha langai wa gaw, nhtoi langai ngai gaw kaga nhtoi ni hta grau ahkyak ai ngu nna myit la nga ai. Bai langai ngai gaw nhtoi ni yawng hte gaw maren hkrai sha re ngu myit da wu ai. Langai hte langai gaw tinang dai ngang kang ai hku myit shatawng shadik daw dan la u ga.

⁶Nhtoi langai hpe shareng ai wa kadai mung dai Madu a hpung shingkang hpe shakawn shagrau na matu galaw nga ai. Hpa baw sha hpa hpe rai tim sha ai wa mung dai Karai Kasang a hpung shingkang hpe shagrau sha-a na matu sha ai rai nga ai, hpa majaw nga yang shi gaw dai Karai Kasang a chyeju hpe shakawn kungdawn let sha nga ai. Lusha nkau mi hpe koi gam ai wa mung, Madu a hpung shingkang hpe shakawn shagrau na matu koi gam ai rai nga ai. Shi mung shing rai koi gam ai majaw Karai Kasang a chyeju hpe shakawn kungdawn nga ai.

⁷Hpa majaw nga yang anhte kadai rai ti mung tinang hkum a matu mara sha hkrung nga ai n rai; kadai rai ti mung tinang hkum a matu mara sha si wa ai n rai.

⁸Anhte hkrung nga yang mung dai Madu a hpung shingkang dan hkung na matu hkrung nga ga ai; anhte si wa yang mung dai Madu a hpung shingkang dan hkung na matu si wa ga ai re ai. Dai majaw anhte hkrung timung, si timung dai Madu hte anhte seng nga ga ai.

⁹Hpa majaw nga yang, Hkristu gaw hkrung nga ai ni hte si mat ai ni a Madu tai lu na matu si hkam nna bai hkrung rawt wa sai.

¹⁰Dai majaw, nang shat mai shat maw lap sha ai wa hpa rai na a nhpu nnau wa hpe jeyang nga n ta? Nang hpa baw lu sha rai tim sha ai wa mung, na nhpu nnau wa hpe hpa n-gawn n sawn rai nga n ta? Anhte yawng mayawng hte gaw, tara daw dan ai hkrum na matu Karai Kasang a Tara tingnyang man e du tsap na raga ai.

¹¹Hpa majaw nga yang Chyum Laika hta, “Dai Madu gaw, ngai ahkrung nga ai hte maren nye a man e lahput shagu hput di nna masha shagu gaw ngai hpe Karai Kasang rai nga ai nga nna yin la na mara ai,” nga nna ka da nga ai.

¹²Dai rai nna, anhte langai hte langai tinang dai tinang a lam jahpan Karai Kasang kaw dan na raga ai.

¹³Dai re ai majaw, anhte shada da hpa n jeyang saga. Kadai rai ti mung, tinang a hpu nau wa yubak de ahtu kadawng shara hte myit kataw shara hpa n galaw hkra she myit daw dan saga.

¹⁴Hpa baw sha hpa rai ti mung, de a npawt nhpang sagawn yu yang, nawku htung lai hku nna awu asin re ai lusha re, ngu nna tsun na lam mi n nga ai ngu ai hpe Madu Yesu hta ngai asak hkrung nga ai majaw hkrak chye lu nngai. Rai ti mung masha langai ngai gaw lusha lama ma hpe awu asin re ai nga nna myit nga yang gaw dai arai gaw shi a matu awu asin rai nga lu ai.

¹⁵Lama rai nna, nang lu sha ai shahpa a majaw na a nhpu nnau wa a myit n pyaw hpa dingbai dingna byin shangun a yang gaw, nang gaw tsaw ra ai lam hta magam bungli galaw hkawm sa nga ndai n rai. Hkristu gaw shi a matu mara si hkam ya nu ai majaw nang sha ai lu sha lama ma a majaw dai wa hpe hkum sharun jahten et.

¹⁶Nanhte kaja ai ngu nna myit sawn la ai lam gaw masha ni a matu jahpoi asawng shatan nhkan hkum hkrum shangun u ga.

¹⁷Hpa majaw nga yang, Karai Kasang a Mungdan gaw sha sha, lu lu rai nga na hku n re ai sha, Chyoi Pra ai Wenyi e jaw ya ai shaman chyeju ni rai nga ai, ding hpring ai ngwi pyaw ai hte kabu gara ai lam ni hte seng nga ai.

¹⁸Dai hku hkan nna Hkristu a bungli gun hpai ai wa gaw, Karai Kasang a man e sharawng awng nna, masha a man e mung awlaw ai hkrum nga ai.

¹⁹Dai re ai majaw, anhte gaw shada ngwi pyaw sim sa ai hku nga lu na lam shabyin ya nna, shada da Wenyi n-gun atsam lu la shangun ai lam ni hpe galoi mung myit yaw shada let agalaw nga ga.

²⁰Lusha shahpa nhkan e Karai Kasang a bungli hpe hkum sharun shabya kau et. Shahpa yawng mayawng gaw sha na mai nga ai, rai ti mung dai shahpa sha ai a majaw masha kaga wa hpe yubak mara hta kataw bang shangun ai rai yang gaw nang mara lu nga ndai.

²¹Na nhpu nnau wa hpe myit kataw shangun na lam rai yang gaw shan sha ai, sabyi lu ai shing n rai hpa baw sha hpa rai ti mung koi gam na gaw mai kaja ai lam rai nga ai.

²²Ndai lam hte seng nna nang gara hku hkan sa galaw ai ngu ai gaw nang hte Karai Kasang hte sha seng nga ai. Tinang jaw ai ngu nna kam sham daw dan ai hte maren galaw nna myit hta asan sha mara n nga dum ai wa gaw, a nga ai.

²³Rai ti mung mahkoi myit hte shahpa lama ma hpe sha ai wa hpe gaw, Karai Kasang e daw dan ai hkrum na ra ai; hpa majaw nga yang shi galaw ai lam gaw makam masham hta madung dat ai n rai; makam masham hte n seng ai hpa rai ti mung, yubak sha rai nga ai.