Read Jinghpaw Common Language Bible 2009 ROMA 15 Bible Online

ROMA 15 - Jinghpaw Common Language Bible 2009 bible

ROMA 15

¹Dai rai nna makam masham hta n-gun ja ai anhte ni gaw, makam masham n-gun kya ai ni a makam masham n hten mat hkra shanhte a lit hpe madi shadaw na mai kaja nga ai. Anhte gaw tinang a ra ai lam hpe n mai hkan tam ai.

²Anhte langai hte langai gaw, makam masham garai n ngang ai hpu nau ni a makam masham ngang kang wa hkra shanhte a mai kaja lam hpe tam let shangwi shapyaw nga ga.

³Hkristu mung shi hkum dai n shapyaw la ai sha Chyum Laika hta, “Nang hpe shatan nhkan tsun ai ga ni nye a ntsa e du ra ai,” nga nna ka da nga ai hte maren masha ni a shatan nhkan ai hpe hkam wu ai.

⁴Chyum Laika hta ka da mada hte gaw anhte hpe sharin achyin na matu rai nga ai. Shing rai anhte gaw Chyum Laika hta na lu la ai hkam sharang ai lam hte myit n-gun lu la shangun ai lam a majaw myit mada shara lu la na lam rai nga ai.

⁵Nanhte nga manga hte gaw Hkristu Yesu a kasi ningli hpe hkan nna nanhte shada da myit mang langai sha rai nga lu u ga, hkam sharang ai atsam hte myit shatsam ya ai lam jaw ya nga ai Karai Kasang gaw nanhte hpe woi awn nga u ga law.

⁶Shing rai yang she, nanhte yawng rau sha nsen langai sha hte anhte a Madu Yesu Hkristu a Kawa Karai Kasang a hpung shingkang hpe shakawn kungdawn lu na myit dai.

⁷Dai rai nna Karai Kasang a hpung shingkang dan hkung wa na matu, Hkristu gaw nanhte hpe hkap hkalum la manit dai hte maren nanhte shada da hkalum la mu.

⁸Hpa majaw nga yang Karai Kasang gaw ga sadi dung ai wa re ai lam hpe shadan dan na matu, lam mi hku tsun ga nga yang, ji wa ni hpe jaw da ai ga ndat hpe shadik shatup na matu Madu Yesu gaw matu gadoi hkam ai Yuda amyu masha ni a mai kaja ai lam a matu mara du sa ra ai ngu nna ngai tsun nngai.

⁹Maigan amyu masha ni pyi Karai Kasang a matsan dum lama ai lam hpe shakawn kungdawn lu mu ga, ngu nna mung du sa ra ai. Chyum laika hta, “Dai re ai majaw maigan amyu ni a kata hta ngai nang hpe shakawn na nngai, Na a mying nsang hpe mahkawn mangoi na nngai,” nga nna ka da ai hte maren rai nga ai.

¹⁰Bai Chyum Laika hta, “Maigan amyu ni e, Karai Kasang a amyu masha ni hte rau kabu gara nga mu!,” nga nna mung,

¹¹Bai nna, “Maigan amyu masha nlang hte e, dai Madu hpe shakawn mu; amyu baw nlang hte e, shi hpe kungdawn mu!,” nga nna mung ka da nga ai.

¹²Bai Esaia gaw, “Yese a aru arat langai mi paw pru na ra ai, maigan amyu ni hpe up na matu Karai Kasang gaw shi hpe paw pru shangun na rai nna, Maigan amyu ni dai wa hta myit mada kam hpa nga na mara ai,” nga ai.

¹³Ya Chyoi Pra ai Wenyi a n-gun atsam hte nanhte a myit mada ai lam matut nna gumring gumrat galu kaba wa myit ga, myit mada ai lam a npawt rai nga ai Karai Kasang gaw, nanhte a kam sham ai lam hta e chyeju hte ngwi pyaw ai amyu myu nanhte hpe jahpring shatsup ya myit ga law.

¹⁴Nye a hpu nau ni e, nanhte gaw mai kaja ai lam hte hpring tsup nga nna machye machyang htak rai nga ai hte, nanhte shada da sharin jep lu nga myit dai hpe ngai hkum nan kam da made ai.

¹⁵Rai ti mung, ndai laika hta ginlam nkau mi hte seng nna nanhte hpe sadi jaw ai hta ngai gaw Karai Kasang jaw ai chyalai ahkaw ahkang a majaw nden ja ai hte ka dat nngai.

¹⁶Dai chyalai ahkaw ahkang gaw, maigan amyu ni a matu magam gun na Hkristu Yesu a shangun ma tai lu ai lam rai nga ai. Maigan amyu ni gaw Karai Kasang e hkap la ging ai shagu hkungga ngu ai Karai Kasang kaw dai Chyoi Pra ai Wenyi e shachyoi shapra nna sak nawng tawn ai ni tai wa na matu, ngai gaw hkinjawng langai mi zawn magam gun let Karai Kasang kaw na Kabu Gara Shiga hpe hkaw dan nngai.

¹⁷Dai re ai majaw Hkristu Yesu hte langai sha re ai hku asak hkrung let Karai Kasang a magam amu gun hpai lu ai majaw kabu gumrawng lu nngai.

¹⁸Maigan amyu ni Karai Kasang a ga madat mara wa hkra Hkristu gaw ngai hpe jai lang ai lam hpe chyu sha ngai nden ja ai hte tsun na nngai. Maigan amyu ni madat mara lu hkra Hkristu gaw ngai tsun shaga ai mung sumtu ga hte galaw ai sat lawat hku nna mung ngai galaw ai laklai ai lamik kumla ni hte mauhpa magam amu ni hku nna mung, Chyoi Pra ai Wenyi a atsam madun ai hku nna mung ngai hpe jai lang nu ai.

¹⁹Dai re ai majaw ngai gaw Yerusalem mare kaw nna Iluri ginwang grup hkra Hkristu a Kabu Gara Shiga hkaw jahproi dan ni ai.

²⁰Rai ti mung masha wa langai ngai e gaw da ai npawt ntsa hta n kahtap u ga, Hkristu a mying n na yu ai shara hkan e dai Kabu Gara Shiga hkaw dan na ngai galoi mung myit sharawng makun nga nngai.

²¹Dai Chyum Laika hta, “Shi a lam kadai mung garai n tsun dan yu ti mung shanhte mu lu na mara ai; garai n na yu ai mung, chye lu na mara ai,” nga nna ka da ai hte maren rai nga ai.

²²Dai rai nna ngai nanhte kaw sa du lu na lam hpe hkum shadang kau ai law law lang hkrum nngai.

²³Ya chyawm gaw dai ginwang ni hta galaw ra ai nye a amu ni hpe gun hpai ngut ni ai. Nanhte hpang de sa na matu lai wa sai shaning tsawmra kaw nna myit katu nga nngai hte maren,

²⁴ya nanhte kaw sa du lu na re ngu nna myit mada nga nngai. Ngai Spain mung de sa wa ai let e, nanhte kaw shang du chyai nna mu hkrum kau da mayu nngai. Nanhte kaw jahkring mi nanhte hte kabu gara hkrum chyai kau da nhtawm, dai mung de nanhte a karum madi shadaw ai hte bai matut sa wa lu na ngai myit mada nga nngai.

²⁵Ya hkyak hkyak e chyawm gaw, Karai Kasang a amyu masha ni hpe karum madi shadaw ai amu gun hpai na matu Yerusalem mare de sa wa nga nngai.

²⁶Hpa majaw nga yang, Makedoni hte Ahkaia mung na hpung ni gaw Yerusalem na Karai Kasang a masha ni hta na matsan mayan ni hpe karum madi shadaw alu jaw na lam langai mi galaw na matu daw dan da masai.

²⁷Shing rai shanhte daw dan ai lam gaw, masha e shadut ai majaw n rai, rai ti mung, teng sha tsun ga nga yang dai matsan mayan ni hpe karum madi shadaw na shanhte hta lit nga nga ai. Hpa majaw nga yang, Yuda amyu masha ni hkam la ai Wenyi shaman chyeju sali wunli ni hpe maigan masha ni hpe mung jawm hpawm hkam la shangun masai rai nna maigan masha ni mung shanhte hkam la ai shaman chyeju ni ngu ai mungkan arung arai ni hte Yuda masha ni hpe chyeju htang ai hku bai karum la ang ma ai.

²⁸Dai re ai majaw ndai amu hpe galaw ngut nna ngai shanhte a matu lahkawn la ai alu gumhpraw yawng hte hpe shanhte a lata de ap ya ngut jang Spain mung de sa wa ai hkrun lam let e nanhte kaw shang du chyai kau da na nngai.

²⁹Ngai nanhte kaw du yang Hkristu kaw na ra n rawng nna gumring gumrat ai shaman chyeju ni nanhte hpe garan kachyan hkam la shangun lu na ngai chye nga nngai.

³⁰Ya hpu nau ni e, Yesu Hkristu hpe anhte kam sham ai a marang e mung, dai Wenyi e jaw ai tsaw ra myit a marang e mung, nye a matu mara ngai hte rau Karai Kasang kaw myit sharawng awng ai hte akyu hpyi nga na nanhte hpe ngai shadut jahkat made ai.

³¹Ngai gaw Yuda mung na n kam n sham ai ni a hpyen ai kaw na lawt lu u ga hte Yerusalem mare e ngai galaw ai karum madi shadaw ai amu hpe dai kaw nga ai Karai Kasang a masha ni hkap la lu mu ga, akyu hpyi nga mu.

³²Dai rai nna Karai Kasang a myit ra ai lam rai yang gaw ngai kabu gara ai hte nanhte hpang de du nna nanhte hte rau ngwi pyaw ai hku n-gun awai hkring sa la na ahkang lu na re.

³³Ya ngwi pyaw ai npawt Karai Kasang gaw nanhte yawng mayawng hte rau a nga nga u ga law. Amen.