Read Jinghpaw Common Language Bible 2009 ROMA 16 Bible Online

ROMA 16 - Jinghpaw Common Language Bible 2009 bible

ROMA 16

¹Kenhkrea hpung hta daw jau amu galaw nga ai anhte a kajan kana Hpobe hpe nanhte hpang de tau madi shadaw dat nngai.

²Nanhte gaw Karai Kasang a masha ni shada hkap hkalum la ai hku nna shi hpe Madu a mying hta hkap hkalum bawp la nhtawm nanhte kaw nna karum la ra ai hpa hpe rai ti mung shi hta ra kadawn nga ai hte maren, karum madi shadaw la mu; hpa majaw nga yang shi gaw shi hkum nan masha law law hpe mung ngai hpe mung karum madi shadaw lai wa sai jinghku kaja langai mi rai nga ai.

³Hkristu Yesu a magam bungli gunhpai ai hta nye a shingdep shingtau rai nga ai Priska yan Akula hpe shakram ya mi;

⁴Shan gaw nye a asak a matu tinang a du baw shatawng kau nna magam gun hpai ai yan rai nna ngai hkrai sha n rai, Yuda amyu masha n re ai ni a hpung ni yawng mung, shan hpe chyeju dum shakawn ga ai.

⁵Shan a nta e shanu nga ai hpung hpe mung shakram ya mi. Dai hte maren Asi mung e Hkristu a matu shawng kam sham ai wa rai nga ai ngai tsaw ra ai Eponetu hpe shakram ya mi.

⁶Nanhte a matu amu bungli grai galaw shakut shaja sai Mari hpe shakram ya mi.

⁷Nye a Yuda amyu masha hpu nau rai nga ai, ngai hte rau htawng rawng yu ai Androniku yan Yuni hpe shakram ya mi; Dai yan gaw kasa ni hta masha yawng e chye ai; mying dan hkung nna nye a shawng e Hkristan tai wa ai yan rai ma ai.

⁸Dai Madu hta langai sha rai nga ai ngai tsaw ra ai Ampliatu hpe shakram ya mi.

⁹Anhte hte rau Hkristu a amu shingtau ai Orban hte, ngai tsaw ra ai Staku yan hpe mung shakram ya mi.

¹⁰Hkristu hta sadi dung ai lam hta ra n rawng ai Apele hte Aristobulu a nta na ni hpe shakram ya mi.

¹¹Nye a Yuda bawsang wa Herodion hpe shakram ya mi, bai Hkristan hpu nau ni rai nga ai Naskiso a nta masha ni hpe shakram ya mi.

¹²Dai Madu a bungli gun hpai ai Truhpena hte Truhpawsa yan hpe shakram ya mi. Dai Madu a matu amu grai galaw shakut shaja ai tsaw ra ai Persi hpe shakram ya mi.

¹³Dai Madu a magam bungli galaw ai hta laklai ningtawn ai Ruhpu hte ngai hpe mung shi a kasha zawn lanu lahku ai shi hte an a kanu hpe mung shakram ya mi.

¹⁴Asunkritu, Hpelegu, Herme, Patroba, Herme hte shanhte hte rau nga ai Hkristan hpu nau ni yawng hpe mung, shakram ya mi.

¹⁵Hpilogu hte Yulia, Nerea hte shi a kajan Olumpa hte shan hte rau nga ai Karai Kasang a masha ni yawng hte hpe shakram ya mi.

¹⁶Nanhte shada da chyoi pra ai pup hte n ja n hpra shakram ya mi. Hkristu hta de da ai hpung ni yawng hte gaw nanhte hpe shakram dat ma ai.

¹⁷Bai hpu nau ni e, nanhte hkam la sai sharin shaga ai lam hpe nhtan shai je hpre let, shabra sharun ai hte masha ni a makam masham hpe myit kataw shara shabyin ai ni hpe joi yu nna shanhte hpe koi yen nga myit ga, ngai nanhte hpe shadum dat made ai.

¹⁸Hpa majaw nga yang shing rai galaw ai ni gaw anhte a Madu Hkristu a amu hpe n gun n hpai ai ni, tinang a kan a matu shatsang ai ni rai ma ai. Shanhte gaw si si rai nga ai, hpa mara n kap ai masha ni a myit hpe shanhte a ga sau ga pyaw awlaw ai ga hte ahpyawp sha kau ma ai.

¹⁹Nanhte gaw dai Kabu Gara Shiga hta gade daram myit jung kam sham sadi dung nga myit dai lam masha shagu na chye nga masai. Dai majaw nanhte a matu ngai kabu gara nga nngai. Rai ti mung, nanhte gaw mai kaja ai lam gara re ai hpe chye chyang ai hpaji rawng ai ni tai nhtawm n hkru n kaja ai lam hte tsan gang nna mara n kap ai ni nanhte hpe naw tai shangun mayu nngai.

²⁰Ngwi pyaw ai a npawt Karai Kasang gaw gade n na yang Satan wa hpe nanhte a lagaw npu e kabye agrawp kau na ra ai. Anhte a Madu Yesu a chyeju gaw nanhte hte rau anga nga u ga law.

²¹Nye a shingdep shingtau rai nga ai Timohti hte nye a bawsang, Yuda masha ni rai nga ai, Luki, Yasun hte Sosipata hte gaw nanhte hpe shakram dat ma ai.

²²Ndai laika ka ya ai wa, ngai Tertiu mung, dai Madu hta e nanhte hpe shakram dat nngai.

²³Ngai hpe galaw daw ai hta n ga, shi nta hta Hkristan hpung masha yawng nawku zuphpawng galaw ai nta madu wa Geu mung nanhte hpe shakram dat ai. Mare na gumhpraw dum up ai sutsin wa Erastu hte Hpu nau Kuarta yan mung nanhte hpe shakram dat ma ai.

²⁴Anhte a Madu Yesu Hkristu kaw na chyeju gaw nanhte yawng hte rau anga nga u galaw.

²⁵Karai Kasang hpe anhte shakawn shagrau nga ga! Ngai nanhte hpe hkaw tsun dan sai Yesu Hkristu a lam Kabu gara shiga hte moi chyaloi nhkoi prat kaw nna makoi magap da ai dai teng man ai lam e shadan shadawng dat ai hte maren shi gaw nanhte hpe nanhte a makam masham hta ngang ngang kang kang tsap shangun lu nga ai.

²⁶Rai ti mung ya aten hta dai makoi magap da ai teng man ai lam gaw, myihtoi laika ni hku nna dan dawng wa ra ai. Masha amyu nlang hte Karai Kasang hpe kam sham nna madat mara mu ga, htani htana Karai Kasang a hkang da ai hte maren dai teng man ai lam hpe hkaw tsun shadum dan nga sai.

²⁷Langai sha rai nga ai, shi chyu sha hpaji rawng htum ai Karai Kasang hta, Yesu Hkristu a marang e htani htana hpung shingkang anga nga u ga law. Amen.