Read Jinghpaw Common Language Bible 2009 ROMA 4 Bible Online

ROMA 4 - Jinghpaw Common Language Bible 2009 bible

ROMA 4

¹Dai she rai yang gaw, anhte amyu bawsang a kawa daju Abraham a lam hte seng nna hpa tsun nga na naw nga a ni? Shi a mahkrum madup hpa rai ta?

²Lama wa Abraham gaw tinang galaw ai magam bungli ni a majaw Karai Kasang a man e ding hpring ai lu la a yang gaw shi hta gumrawng gumtawng na lam nga lu ai. Rai ti mung shi gaw Karai Kasang a man e gumrawng gumtawng ai lam n galaw lu wu ai.

³Dai Chyum Laika mung “Abraham gaw Karai Kasang hpe kam sham wu ai rai nna shi a makam masham a majaw, Karai Kasang shi hpe ding hpring ai wa ngu nna hkap la wu ai,” nga ai.

⁴Masha langai ngai gaw bungli galaw nna shabrai lu ai shaloi dai shabrai gaw masha wa e chyeju hku jaw ai n re ai sha tinang hkam la ging ai majaw sha lu ai rai nga ai.

⁵Rai ti mung masha gaw tinang a tara shadik ai magam bungli ni hpe n kam hpa a yang gaw, Karai Kasang dai wa hpe shi a makam masham a marang e mara n lu ai wa re ngu nna daw dan ya na wu ai. Dai gaw shi a makam masham a marang e ding hpring ai ngu nna Karai Kasang a man e sawn ya ai lam rai nga ai.

⁶Tara shadik ai magam bungli a majaw n re sha ding hpring ai wa ngu nna Karai Kasang e sawn ya ai hpe hkam la hkrum ai wa gaw a nga ai nga nna Dawi tsun ai gaw:

⁷“Tara shut hpyit ai hta na raw dat hkrum ai ni hte, yubak mara kaw na shalawt dat hkrum ai ni gaw a lu ma ai!

⁸Yubak mara ni hpe Madu e matsing da n hkrum ai ni gaw a lu ma ai!,” nga ai.

⁹Dawi tsun ai, ndai a lu ai lam gaw matu gadoi hkam ai ni hte sha seng nga a ni? Kaja wa n rai law! Dai gaw matu gadoi n hkam ai ni hte mung seng nga ai. Hpa majaw nga yang, “Abraham gaw Karai Kasang hpe kam sham wu ai majaw Karai Kasang gaw shi hpe ding hpring ai wa ngu nna hkap la wu ai,” nga nna Chyum Laika hta ka da ai ga hpe anhte tsun ga ai.

¹⁰Dai zawn Abraham hpe ding hpring ai wa ngu nna Karai Kasang e sawn ya hkrum ai aten gaw galoi rai ta? Matu gadoi garai n hkam ai shawng e rai ni? Shing n rai hpang e rai ni? Matu kadoi hkam la ai hpang e n rai, garai n hkam yang she rai nga sai.

¹¹Shi gaw Karai Kasang e ding hpring ai ngu nna sawn ya ai hpe hkam la ngut ai hpang e she matu gadoi ai hking hpe hkam la wu ai. Dai matu gadoi ai hking gaw, Abraham a makam masham a majaw matu gadoi hking garai n hkam la ai kaw nna Karai Kasang e ding hpring ai ngu ya hkrum ai hpe madun dan ai masat dazik kumla nan rai nga ai. Dai re ai majaw Abraham gaw matu gadoi ai hking n hkam la ti mung, Karai Kasang hpe kam sham ai a marang e ding hpring ai ngu ya hkrum wu ai.

¹²Abraham gaw matu gadoi ai hking hkam la ai ni a kawa mung rai nga ai. Lam mi hku tsun ga nga yang, shi gaw matu gadoi ai hking hkam la ai hta n-ga, anhte a kaji kawa Abraham matu gadoi hking garai n hkam la ai ten hta Karai Kasang hpe kam sham asak hkrung shamu shamawt lai wa sai kasi ningli hpe hkan dagraw ai ni a kawa mung rai nga ai.

¹³Karai Kasang gaw Abraham hte shi a aru arat ni hpe, mungkan ga a madu tai shangun na nga nna ga sadi tawn da nu ai. Dai zawn shi ga sadi tawn da ai gaw Abraham gaw dai jep ai Tara hpe madat mara hkan sa shatup ai majaw n rai, Karai Kasang hpe kam sham ai a marang e shi hpe ding hpring ai wa ngu nna Karai Kasang hkap la sawn ya ai rai nga ai.

¹⁴Hpa majaw nga yang, lama rai nna jep ai Tara hpe hkan sa shadik ai ni chyu sha dai Karai Kasang ga sadi a sali wunli hpe hkam la lu ai nga yang gaw makam masham gaw kaman lila rai mat wa ai hte ga ndat mung lachyum n rawng hpoi mat sai.

¹⁵Dai jep ai Tara gaw Karai Kasang a pawt sindawng ai hpe shapraw ya nga ai; rai ti mung; Jep ai Tara n nga yang gaw Tara tawt lai ai lam mung nga na n rai.

¹⁶Dai ga sadi gaw jep ai Tara hpe hkan shatup ai ni a matu sha n rai Abraham zawn Karai Kasang hpe kam sham ai ni yawng a matu mung rai nga ai, hpa majaw nga yang Abraham gaw anhte yawng mayawng a wenyi lam hta Kawa rai nga ai.

¹⁷Dai gaw, “Ngai nang hpe masha amyu law law a kawa shatai sade ai,” nga nna Chyum Laika hta tsun da ai hte maren rai nga ai. Dai rai nna Abraham kam sham ai Karai Kasang a man e dai ga sadi gaw mai kaja ai hte grin nga malit dai. Shi gaw Abraham kam sham ai Karai Kasang, si mat ai ni hpe jahkrung ya ai Karai Kasang, shawng de garai n byin yu ai arai ni byin tai paw pru wa hkra hkang da ai Karai Kasang, shi nan rai nga ai.

¹⁸Abraham gaw myit mada shara n nga sai aten hta pyi, Karai Kasang hpe kam sham let myit mada wu ai rai nna shi gaw amyu law law a kawa tai wa sai. Dai gaw Chyum Laika hta, “Na a nshu nsha ni gaw lamu na shagan ni zawn law htam na mara ai,” nga nna ka da ai hte maren rai nga ai.

¹⁹Dai aten hta Abraham gaw asak latsa ning pyi du magang wa nu ai rai nna tinang a hkum gaw jasi zawn rai nga sai hte num mung kasha n mai lu sai hpe mung chye wu ai rai ti mung shi a Karai Kasang hpe kam sham ai myit n yawm mat lu ai.

²⁰Shi gaw galoi mung Karai Kasang a ga sadi hpe kam shut ai hte n di n da n re ai sha, Karai Kasang hpe kam hpa ai lam n kabai kau wu ai hta n ga shi a makam masham gaw shi hpe n-gun atsam jahpring ya nga ai rai nna shi Karai Kasang hpe shakawn kungdawn wu ai.

²¹Karai Kasang gaw shi a ga sadi hte maren shi shabyin na ra ai hpe Abraham awm dawm kam sham da wu ai.

²²Shing rai kam sham wu ai majaw Karai Kasang Abraham hpe ding hpring ai wa ngu nna hkap la wu ai.

²³“Karai Kasang gaw shi hpe ding hpring ai wa ngu nna hkap la wu ai,” ngu ai ga gaw Abraham langai mi hpe chyu sha sha-ang nna ka da nga ai n rai.

²⁴Anhte a Madu Yesu hpe si mat ai ni kaw na hkrung sharawt la ai wa hpe kam sham ga ai majaw, ding hpring ai ngu nna hkap la hkrum sai anhte a matu mung sha-ang nna ka da nga ai.

²⁵Hpa majaw nga yang ding hpring ai ngu nna Karai Kasang e hkap la lu na matu Madu Yesu gaw, anhte a shut hpyit ai yubak mara ni a majaw si hkam na matu ap kau hkrum nna shi hpe bai sharawt la ai hkrum nu ai.