Read Jinghpaw Common Language Bible 2009 ROMA 7 Bible Online

ROMA 7 - Jinghpaw Common Language Bible 2009 bible

ROMA 7

¹Hpu nau ni e, nanhte gaw jep ai Tara a lam ni hpe chye nga myit dai rai nna, ya ngai nanhte hpe tsun na lam hpe atsawm sha chye na na myit dai. Jep ai Tara gaw masha ni hpe shanhte naw hkrung nga ai aten laman e up madu nga ai.

²Ga shadawn tsun ga nga yang, Hkungran sai numsha langai mi gaw shi a madu wa asak naw hkrung nga dingsa, hkungran ai tara hte gyit hkang da nu ai. Rai ti mung, madu wa si mat a yang gaw, madu wa hte gyit hkang da ai tara hta na shi lawt nu ai.

³Dai re ai majaw madu wa garai n si yang la kaga kaw wa a yang gaw, la shaw ai num langai mi re ngu na rai nga ai; rai ti mung madu wa si mat sayang chyawm gaw, tara hta na lawt sai rai nna la kaga hte hkungran ti mung la shaw ai amu tawt lai nu ai n rai.

⁴Hpu nau ni e, nanhte dai ga shadawn hte bung nga myit dai. Nanhte gaw Hkristu a hkum hkrang daw shan ni rai nna jep ai Tara hta e nanhte si wa manit dai, ya gaw Karai Kasang a magam amu hta akyu rawng asi si lu u ga, si ai kaw na hkrung sharawt la hkrum ai Hkristu hte seng ai ni rai wa manit dai.

⁵Hpa majaw nga yang anhte ni hkum shan myit hkan nna asak hkrung nga ai shaloi yubak a marin marit ai myit hpe dai jep ai Tara e myit sharawt ya ai majaw anhte a hkum hkrang hta yubak galaw mayu ai myit katu nga ai hte anhte yawng dai hpe galaw nna jahtum e si wa saga ai.

⁶Ya chyawm gaw, anhte hpe sharen da ai jep ai Tara hte si hka mat saga ai majaw dai jep ai Tara hta na anhte lawt lu saga ai. Dai rai nna ka da ai tara dingsa hku n hkan ai sha, Wenyi lam ningnan hku sha Karai Kasang hpe daw jau nga ga ai.

⁷Dai rai yang gaw, anhte kaning ngu tsun na rai ta? Dai jep ai Tara shi nan yubak rai nga ai ngu na rai ni? Shing n rai law! rai ti mung dai jep ai Tara gaw yubak ngu ai hpa re ai lam ngai hpe chye shangun ni ai. Lama wa dai Jep ai Tara gaw, “Masha kaga wa a arai hpe myit hkum marin e,” nga nna n tsun yang gaw myit marin ai gaw hpa re ai hpe ngai chye na n rai.

⁸Dai hkang da ai ga a majaw yubak gaw marin marit ai baw sumhpa ngai hta byin pru wa hkra myit jasu sharawt ya na ginshan [3] mu tam wa ai. Dai tara n nga a yang gaw yubak gaw jasi rai nga ai.

⁹Ngai hkum nan dai jep ai Tara hpe hpa n chye ai sha asak hkrung ai aten lang mi nga lai wa yu sai; rai ti mung dai jep ai Tara hpe ngai chye wa ai hte rau yubak gaw rawt prawn wa sai.

¹⁰Dai hpang ngai si wa nngai; ngai hpe asak hkrung na matu jaw ya ai dai jep ai Tara nan nye a asak hpe si shangun sai.

¹¹Yubak gaw shi a ginshan mu tam nna, dai Jep ai Tara hte ngai hpe hkalem kau nhtawm, dai hte ngai hpe sat kau ni ai.

¹²Dai rai nna Jep ai Tara shi nan chyoi pra nga ai, dai hkang da ai ga mung chyoi pra nga ai, ding hpring ai hte mai kaja nga ai.

¹³Dai rai yang gaw mai kaja ai baw hta nye a matu si lam tai wa sani? Shing n rai u ga, ngai hpe si shangun ai gaw yubak rai nga ai. Yubak gaw shi a marai nsam dan leng wa u ga mai kaja ai hpe jai lang let ngai hpe si shangun ni ai. Dai rai nna yubak gaw gade wa hkrithpa rai nga ai lam jep ai Tara hku nna madun dan nga ai.

¹⁴Dai hta kaga jep ai Tara gaw Wenyi lam hte seng nga ai hpe anhte chye ga ai; ngai mahtang si chye ai masha langai mi zawn rai nna yubak de dut kau hkrum ai mayam zawn rai nga nngai.

¹⁵Ngai shachyen ai amu hpe ngai n chye nngai, hpa majaw nga yang ngai galaw mayu ai lam hpe n galaw nga n ngai. Ngai n dawng n yawt ai bungli hpe sha agalaw nga nngai.

¹⁶Ngai n galaw mayu ai hpe ngai galaw yang gaw dai jep ai Tara teng man nga ai lam ngai myit hkrum nngai.

¹⁷Dai rai nna ngai galaw ai amu hpe galaw ai wa gaw kaja wa ngai hta rawng ai yubak she dai hpe galaw nga ai.

¹⁸Nye a kraw e rai sa nye a shinggyim hkum shan myit hta kaja ai baw hpa n rawng li ai ngai chye nngai; hpa majaw nga yang mai kaja ai baw galaw mayu ai myit ngai hta rawng nga timung ngai dai hpe n galaw lu nngai.

¹⁹Galaw mayu ai mai kaja lam hpe ngai n galaw ai wa, n galaw mayu ai dai n hkru n hkra ai hpe ngai galaw nga nngai.

²⁰Ngai n galaw mayu ai hpe ngai a galaw nga ai rai yang gaw dai hpe galaw ai wa a yubak she dai hpe galaw nga ai.

²¹Dai re ai majaw ngai mai kaja ai galaw mayu ai shaloi, n hkru n hkra ai hpe she ngai lata galaw nga ai rai nna, tara lahkawng ngai hta ginrun rawng nga ai ngu ai hpe ngai mu hkrup nngai.

²²Nye a kraw lawang myit gaw Karai Kasang a Tara hta kabu gara sharawng awng nga ai.

²³Rai ti mung nye a hkum kata hta nye a myit hkrum ra sharawng ai tara hte gasat hkat nga ai kaga tara langai mi amu galaw nga ai hpe ngai mu we ai. Dai tara gaw nye a hkum shan hta shamu shamawt amu galaw nna ngai hpe yubak a tara hta bawng dung shangun nngai.

²⁴Chyum sha hkrum ai ngai wa e! Ndai si shangun ai hkum hkrang hta na, ngai hpe kadai wa mawai la na law e?

²⁵Anhte a Madu Yesu a marang e mawai la ai Karai Kasang a chyeju hpe ngai shagrau sha-a nngai! Dai rai nna nye a mabyin gaw ndai hku rai nga li ai; Nye a myit mang ai hte Karai Kasang a Tara hpe daw jau nga timung hkum shan mahtang gaw yubak a tara hpe daw jau nga ai.