Read Jinghpaw Common Language Bible 2009 ROMA 8 Bible Online

ROMA 8 - Jinghpaw Common Language Bible 2009 bible

ROMA 8

¹Dai re ai majaw ya gaw Hkristu Yesu hte langai sha rai nga ai ni a matu daw dan hkrum shara n nga ai.

²Hpa majaw nga yang Hkristu Yesu hte rau langai sha tai shangun ai asak jahkrung ya ai Wenyi hte seng ai tara gaw yubak a tara hta na mung si mat ai tara hta na mung ngai hpe shalawt dat ni ai.

³Shinggyim hkum shan n-gun kya ai majaw jep ai Tara e n shabyin ya lu ai amu hpe Karai Kasang kaw nna shabyin ya nga ai. Karai Kasang gaw shinggyim hkum shan hta asak hkrung shamu shamawt nga ai yubak tara hpe shi a Kasha hpe nan shangun dat ai hte daw dan kau nu ai. Dai gaw yubak hpe jahten sharun kau na matu yubak kap ai shinggyim hkum shan hte bung ai hkum shan dagraw la nna du sa ai lam rai nga ai.

⁴Karai Kasang ndai hku galaw shabyin ai lam gaw anhte gaw masha hkum shan myit ra ai hku n re ai sha Wenyi a myit ra ai hku asak hkrung nga ai anhte ni dai jep ai Tara hta matsun da ai ding hpring ai lam hpe hkan shadik lu na matu rai nga ai.

⁵Hkum shan myit e shangun ai hku asak hkrung ai ni gaw hkum shan a ra marit ai lam ni e shanhte a myit ni hpe up hkang kau ya mu ai. Wenyi e hkang ai hku asak hkrung ai ni gaw Wenyi ra ai hku shanhte a myit ni hpe up hkang nga ma ai.

⁶Hkum shan myit e up hkang kau ai gaw si mat ai hpe shabyin nga ai; Wenyi e up hkang kau ai gaw asak hkrung ai lam hte ngwi pyaw ai lam hpe shabyin nga ai.

⁷Dai rai nna masha langai mi gaw hkum shan myit e up hkang kau ai shaloi Karai Kasang a Tara hpe n madat n mara lu sai majaw shi gaw Karai Kasang a hpyen tai wa ai; kaja wa nan shi n madat n mara lu nu ai.

⁸Hkum shan myit e ngu ai hku madat mara hkan nang ai ni gaw Karai Kasang a myit awng sharawng ai ni n tai lu ma ai.

⁹Rai ti mung, nanhte a hkum shan myit e hkang ai hku n re ai sha nanhte hta Wenyi nan shanu nga yang gaw Wenyi e hkang ai hku galaw hkawm sa myit mang lu na rai myit dai. Kadai rai ti mung Hkristu a Wenyi n rawng ai wa gaw Hkristu hte n seng nga ai.

¹⁰Hkristu gaw nanhte hta e nga nga yang, nanhte a hkum hkrang ni gaw yubak a majaw si na rai nga ai, rai ti mung Wenyi gaw nanhte hpe asak hkrung shangun na ra ai; hpa majaw nga yang nanhte gaw Karai Kasang a man e ding hpring wa lu manit dai majaw rai nga ai.

¹¹Dai hta kaga, si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte nanhte a si chye ai hkum hkrang ni hpe mung jahkrung ya na marin dai.

¹²Dai re ai majaw, hpu nau ni e, anhte gaw Karai Kasang a Wenyi e sharin shaga ai hte maren hkan sa galaw na lit lu ai ni rai nga ga ai, hkum shan myit ra ai hku hkan nna asak hkrung na matu n rai.

¹³Hpa majaw nga yang, nanhte gaw hkum shan a myit ra ai hku asak hkrung myit yang gaw nanhte si na rai nga myit dai; rai ti mung tinang a yubak hte seng ai arawn alai ni hpe dai Wenyi a karum ai hte sat kau myit yang gaw, nanhte hkrung nga na myit dai.

¹⁴Karai Kasang a Wenyi e lam madun woi awn ai hta hkan nang ai ni yawng mayawng hte gaw Karai Kasang a kasha ni rai nga ma ai.

¹⁵Hpa majaw nga yang Karai Kasang nanhte hpe jaw ya ai Wenyi gaw nanhte hpe mayam shatai myit dai n rai, hkrit myit mung rawng shangun myit dai n rai, shing rai na malai dai Wenyi gaw nanhte hpe Karai Kasang a kashu kasha tai shangun manit dai hta n ga, dai Wenyi a n-gun atsam hte shi hpe Wa e! Nye a Wa e! ngu nna nanhte gang shaga lu na ahkang lu nga ai.

¹⁶Anhte Karai Kasang a kashu kasha ni rai nga ga ai lam Karai Kasang a Wenyi nan anhte a Wenyi hte rau sakse hkam tsun shana shabra ya mi ai.

¹⁷Anhte gaw shi a kashu kasha ni rai nga ga yang gaw shi a amyu masha ni a matu san da ai sali wunli ni hpe anhte hkam la na ga ai. Hkristu a matu Karai Kasang san da ai hpung shingkang hpe mung anhte hkam la lu na ga ai, hpa majaw nga yang anhte gaw Hkristu hte rau nni nkri hkrum nga ga yang, shi hte rau hpung shingkang hpe mung anhte hkam la na rai nga ga ai.

¹⁸Ya ndai prat e anhte hkrum hkra ai tsin-yam tsindam gaw du na ra ai aten hta anhte hpe hkam la shangun na ra ai hpung shingkang hte shadawn n ging nga ai ngu nna ngai myit nga nngai.

¹⁹Karai Kasang gaw shi a kasha ni paw pru na ra ai lam ni hpe hpan da hkrum ai mungkan ting gaw myit n dawt ai hte ala nga ma ai.

²⁰Dai hpan da hkrum ai nga yawng nga pra chyawm gaw shi a myit mada yaw shada ai lam shagawm shamat kau hkra daw dan ai hkrum nu ai. Dai zawn byin shangun ai gaw mungkan ga gaw shi a myit ra ai hku n re sha Karai Kasang dai hku byin shangun mayu ai majaw rai nga ai. Rai ti mung myit mada shara naw nga ai.

²¹Hpa majaw nga yang lani mi na nhtoi hta hpan da hkrum ai mungkan ga gaw hten za ngu ai a lata hta mayam tai nga ai kaw na raw dat ai hkrum nna Karai Kasang a kasha ni hte rau shalawt dat ai hte hpung shingkang hpe hkam la lu na ra ai.

²²Hpa majaw nga yang hpan da hkrum ai ndai mungkan ting gaw shinggyim machyi ai zawn ya ndai aten du hkra machyi madai sharung nga ai hpe anhte chye ga ai.

²³Rai ti mung hpan da hkrum ai mungkan sha n rai, Karai Kasang a shawng nnan na chyeju kumhpa rai nga ai Wenyi hpe hkam la sai anhte ni mung Karai Kasang a yin la ai kasha shatai la ai chyeju hte anhte a hkum hkrang ting raw dat hkrum na lam hpe mung ala nga let anhte a kraw kata hta madai nga ga ai.

²⁴Hpa majaw nga yang myit mada ai hte anhte hkye hkrang la ai hkam la saga ai rai ti mung mu lu ai arai hpe myit mada nga ga yang gaw, dai gaw myit mada ai lam majing n rai nga ai. Mu lu ai arai hpe kadai wa myit mada nga a ta?

²⁵Rai ti mung n mu lu ai mahtang hpe myit mada nga ga yang gaw, dai hpe anhte hkam sharang ai hte ala nga ga ai.

²⁶Dai hte maren dai Wenyi mung anhte a gawng kya ai lam hpe karum ya na matu du sa ai; hpa majaw nga yang anhte gara hku kaning ngu akyu hpyi mai na lam n chye ga ai; dai Wenyi nan anhte a n-gup aga hte n hkawn n tsun lu ai kraw kata e madai nga ai hte anhte a matu hpyi htinglu ya mi ai.

²⁷Anhte a kraw lawang ni hpe sawk yu nna mu chye ya nga ai Karai Kasang chyawm gaw Wenyi a myit hpa rai nga ai gaw chye ya nga ai; hpa majaw nga yang, dai Wenyi gaw Karai Kasang myit ra ai lam hte maren shi a amyu masha ni a matu mara Karai Kasang kaw hpyi htinglu ya nga ai.

²⁸Karai Kasang hpe tsaw ra nna shi a shatawng shada da ai hte maren shaga la hkrum ai ni a matu mara yawng mayawng hta mai kaja ai lam byin wa u ga, Karai Kasang gaw shanhte hte rau amu galaw nga ai hpe anhte chye ga ai.

²⁹Shi a Kasha gaw kahpu kanau lanlak hta e kasha alat ningshawng tai u ga, Karai Kasang gaw shi lata san da sai ni hpe mung, shi a Kasha a gawng shingyan hte bung wa na masha lata san da mu ai.

³⁰Dai rai nna shawng nnan san tawn da sai ni hpe mung shi shaga la mu ai, shaga la sai ni hpe mung, shi a man e ding hpring ai ni ngu nna hkap la nhtawm shi a hpung shingkang lu la shangun mu ai.

³¹Dai rai yang gaw, ndai hte hpe yu nna anhte hpa naw tsun lu na ga ta? Karai Kasang gaw anhte a maga de nga nga a yang gaw, anhte hpe hpyen ai maga de kadai wa mi nga lu na ta?

³²Kaja wa Karai Kasang hta dai hku n rai, shi a Kasha hpe pyi n lahpawt dum ai sha anhte mahkra a matu mara shagu hkungga di nna nawng kau ai Karai Kasang gaw nga manga hpe mung shi anhte hpe n jaw ai nga na a ni?

³³Karai Kasang a lata la ai ni hpe kadai wa mi mara shagun lu na a ta? Shanhte hta mara n nga ai lam Karai Kasang shi nan shapraw shadan tsun ya sai.

³⁴Daw dan lu ai wa gaw kadai wa mi rai nga a ta? Si hkam ai hta n ga, si mat ai ni hta na hkrung sharawt la hkrum nhtawm Karai Kasang kaw hpyi htinglu ya ai wa Hkristu Yesu shi nan rai nga ai.

³⁵Dai rai nna Hkristu a tsaw ra ai hta na anhte hpe kadai wa mi jahka kau lu na mi ta? Tsin-yam tsindam atsu atsam hte yak hkak jam jau lam shing n rai zingri zingrat hte hku hku hpang gara lam, shing n rai singgu krin matsan chyaren lam hte hkrit hpa ri nhtu si hkrung si htan lam hkrum yang she jahka kau lu na myit ni?

³⁶Dai gaw, “Na a jaw e anhte shani shagu sat kau ai hkrum ga ai; sat na san da ai sagu hpe zawn anhte hpe nawn da mi ai,” nga nna Chyum Laika hta ka da ai hte maren rai nga ai.

³⁷Anhte hpe n jahka kau lu mi ai hta n ga, anhte hpe tsaw ra nga ai wa a majaw ndai mahkrum madup yawng hte hpe anhte awng padang tsep kawp lu ai ni rai ga ai.

³⁸Hpa majaw nga yang, si ti mung prawn ti mung, lamu kasa rai ti mung, tawa magam ya e nga ai arai, htawm e du na arai hte

³⁹lahta tang na arai lawu tsang na arai, hte hpan da mada hpa rai ti mung anhte Madu Yesu Hkristu hta e Karai Kasang a tsaw ra ai hta na anhte hpe n jahka kau lu na ni ai, ngu nna ngai myit hkut nga nngai law.