Read Jinghpaw Common Language Bible 2009 ROMA 9 Bible Online

ROMA 9 - Jinghpaw Common Language Bible 2009 bible

ROMA 9

¹Ngai gaw Hkristu hte seng ai wa rai nna teng man ai ga ngai tsun nga nngai, hte ngai n masu nngai. Ngai teng man ai ga tsun nga nngai gaw dai Chyoi Pra ai Wenyi e up hkang ai hpe hkam la nga ai nye a kraw lawang myit e sakse hkam ya nga ai.

²Nye amyu masha ni nye a sai daw sai chyen ni a matu nye a kraw lawang e matut manoi ngai hkam sha nga ai yawn hkyen ai hte machyi hkrum ai lam gaw ngai tsun na nga yang grai kaba la nga ai n rai ni?

³Hpa majaw nga yang nye a sai, nye a shan nan rai nga ai shanhte ni a matu mara Karai Kasang e dagam dala ai hkrum na hpe mung, Hkristu hte daw hka mat ai hkrum na hpe mung ngai hkam la mai yang hkam la mayu nga nngai.

⁴Shanhte gaw Karai Kasang e lata la ai amyu rai nga ma ai; Karai Kasang gaw shanhte hpe kasha yin la nna, shi a hpung shingkang shadan dan mu ai hte shanhte hte ga shaka tawn da nna jep ai Tara jaw mu ai. Shanhte gaw teng man ai nawku daw jau ai lam hte Karai Kasang a ndat ga ni hpe mung hkam la lu ma ai.

⁵Shanhte gaw mying gumhkawng ai Hebre kaji kawa ni kaw na yu hkrat wa ai ni rai ma ai rai nna masha labau hku gawn yang Hkristu gaw shanhte kaw na rai nga ai. Yawng mayawng a ntsa e up nga ai Karai Kasang hpe htani htana shagrau sha-a nga ga law! Amen.

⁶Karai Kasang a ga sadi gaw dik tup wa sai ngu nna ngai n tsun nngai; hpa majaw nga yang Israela amyu masha ni yawng wa Karai Kasang a masha ni n rai ma ai.

⁷Abraham a aru arat re ai ni mung, yawng hte wa Karai Kasang a kashu kasha ni rai ma ai n rai. Karai Kasang gaw Abraham hpe, “Isak kaw nna mahtang na aru arat mayat maya wa na ra ai ngu nna ngai ga ndat jaw de ai,” nga ai.

⁸Ndai gaw lachyum ndai hku rai nga ai. Shawoi na hku shinggyim hkum shan e shangai ai kashu kasha ni gaw Karai Kasang a kashu kasha ni majing n rai ma ai![4] Karai Kasang a ga ndat tawn da ai hte maren shangai wa ai kashu kasha ni chyu sha matu mara majing ni re ngu nawn da mu ai.

⁹Hpa majaw nga yang, Karai Kasang gaw ladu hkrum jang, “Ngai sa du na nngai rai nna Sara gaw shadang sha ba na ra ai,” nga nna tsun wu ai.

¹⁰Dai hta n ga, Rebeka a shadang sha lahkawng gaw anhte a kaji kawa Isak hte lu ai kasha yan rai ma ai.

¹¹Rai ti mung kasha yan pyi garai n shangai ai rai nna kaja ai hte n kaja ai garai n chye galaw ai ten kaw nna pyi Karai Kasang gaw Rebeka hpe, “Na kasha kaba ai wa mahtang kaji ai wa hpe daw jau na ra ai,” ngu nna tsun wu ai.

¹²Karai Kasang ning nga nna tsun ai gaw shi a yaw shada da ai hte maren kasha kaba wa hpe n shaga la ai sha lata la ai lam hta shi gaw masha galaw ai magam bungli hta madung dat nna lata la ai n rai, shi a myit ra ai hku she lata la nga ai.

¹³Chyum laika hta mung, “Yaku hpe ngai tsaw ra nna Esaw hpe ngai n dawng n yawt nngai,” nga nna ka da nga ai.

¹⁴Dai re ai majaw Karai Kasang gaw n ding n hpring nga ai rai ni? N rai law.

¹⁵Hpa majaw nga yang, shi gaw, “Ngai matsan dum mayu ai wa hpe matsan dum na we ai; ngai chyeju galaw mayu ai wa hpe chyeju galaw na we ai,” nga nna Mawshe hpe tsun dan nu ai.

¹⁶Dai rai nna Karai Kasang a lata la ai lam gaw masha a myit ra ai lam shing n rai masha a shakut shaja galaw ai hta n madung nga ai; Karai Kasang a matsan dum lama ai hta she madung nga ai.

¹⁷Hpa majaw nga yang, Karai Kasang gaw Egutu Hkawhkam hpe, “Ngai nang hpe Hkawhkam tai shangun ai lam gaw nang hta nye a daru magam atsam madun dan nna ga ntsa ting nye a amying gumhkawng wa shangun na matu she rai nga ai,” nga nna tsun ai lam Chyum Laika hta ka da nga ai.

¹⁸Dai rai nna Karai Kasang gaw, Kadai hpe mung chyeju galaw mayu yang galaw nga ai, kadai hpe mung myit shaja mayu yang shaja ya nga ai.

¹⁹Rai ti mung nanhte hta na marai langai ngai, ngai hpe, “Dai rai yang gaw, Karai Kasang gaw masha hpe gara hku mara tam lu na rai ta? Karai Kasang a myit ra ai lam hpe kadai wa ban hkum lu a ta?,” nga nna san mayu ai nga na nhten!

²⁰Jinghku wa e, nang gaw kadai wa mi rai nna Karai Kasang hpe dai hku htan lu n ta? Ga dibu langai mi gaw galaw da ai wa hpe, “Hpa majaw nang ngai hpe ning di galaw da n ta?,” ngu nna san na a ni?

²¹Dibu sama wa gaw kagam ga hpe shi ra ai hku galaw na ahkaw ahkang shi lu da wu ai rai nna ga gumdin langai sha hta na chyen mi hpe ahkyak ai poi shingra ni hta lang na dibu kaja, bai chyen mi hpe yu maya shara hta lang na matu dibu galaw lu ai n rai ni?

²²Karai Kasang mung dai zawn galaw nga ai, Shi gaw shi a pawt sindawng ai hpe madun nna shi a atsam hpe shadan dan mayu nga ai. Rai ti mung, shi a pawt sindawng ai a majaw hten run sum hkrum mat na ging dan ai ni hpe myit galu ai hte hkam sharang ya nga ai.

²³Dai hta n ga Madu gaw shi a matsan dum lama ai lam hkam la na masha ni ngu ai anhte hpe shi a n hpaw n ya re ai hpung shingkang hpe mu lu shangun na matu ra sharawng nga ai. Dai ni gaw Karai Kasang a hpung shingkang hkam la lu na matu hkyen lajang shajin da sai masha ni rai nga ma ai.

²⁴Hpa majaw nga yang anhte gaw Karai Kasang e shaga la sai masha ni rai nna Yuda ni hta na sha n rai, maigan amyu ni hta na mung rai nga ai.

²⁵Dai hte maren Madu gaw Hosea a laika hta, “Nye a masha n re ai ni hpe ‘Nye a masha ni’ ngu na nngai. Ngai n tsaw ra ai amyu masha ni hpe ‘Ngai tsaw ra ai amyu masha ni’ ngu na nngai.

²⁶Bai ‘Nanhte nye a amyu masha ni n rai nga myit dai,’ nga nna shanhte tsun kau hkrum ai shara dai yang e pyi, hkrung nga ai Karai Kasang a kasha ni ngu na marin dai,” nga ai.

²⁷Israela amyu a lam Esaia jahtau tsun ai gaw, “Israela kashu kasha ni gaw nammukdara makau na zaibru zawn law ma timung, shanhte hta na kau chyen chyu sha hkye hkrang la ai hkrum na mara ai.

²⁸Hpa majaw nga yang, Madu gaw mungkan ga na masha ni hpe lawan ai hku tara jeyang ai lam shadik shatup na ra ai,” nga ai.

²⁹Dai hte maren, shawng e Esaia tsun da ai gaw, “Daru magam atsam rawng ai Karai Kasang a matu mara nkau mi hpe n ngam da taw gaw anhte gaw Sodom zawn tai nna Gomora hte bung na ga ai,” nga ai.

³⁰Dai re ai majaw anhte tsun mayu ai lam gaw ndai hku rai nga ai. Karai Kasang a man e ding hpring ai ni tai lu na matu n shakut ai maigan amyu ni gaw, shi hpe kam sham ai a marang e Karai Kasang a man e ding hpring wa lu ma ai.

³¹Rai ti mung, Israela amyu masha ni gaw Karai Kasang a man e ding hpring wa shangun na tara langai mi hpe tam shakut ma timung n mu tam ma ai.

³²Hpa majaw law nga yang shanhte gaw kam sham ai hta n shamyet shanat ai sha tara hkan shadik ai hte sha hkan shachyut ma ai majaw n dep lu ma ai. Dai rai nna shanhte gaw Chyum Laika hta tsun da ai, “Lunghkrung,” hta ahtu nna kataw mat ma ai.

³³Dai hpe Chyum Laika hta, “Yu u, masha ni ahtu kataw na nlung langai mi hte myit kataw shangun na lunghkrung langai mi hpe Ziun hta e ngai tawn da se ai. Rai ti mung nlung ngu ai Hkristu hpe kam sham ai wa gaw galoi mung myit daw hten na lam nga na n rai,” nga nna ka da nga ai.