Read Jinghpaw Common Language Bible 2009 1 KORINHTU 11 Bible Online

1 KORINHTU 11 - Jinghpaw Common Language Bible 2009 bible

1 KORINHTU 11

¹Dai rai nna ngai gaw Hkristu a kasi hpe la ai zawn, nanhte mung nye a kasi hpe la mu.

²Nanhte gaw lam shagu hta e ngai hpe adum nga nna, ngai nanhte hpe jaw da ai matsun maroi ga hte maren, nanhte hkan sa galaw myit dai majaw, ngai nanhte hpe shakawn made ai.

³Rai ti mung, lasha nlang hte a baw gaw, Hkristu rai nga ai, numsha a baw chyawm gaw lasha rai nga ai, Hkristu a baw chyawm gaw Karai Kasang rai nga ai lam ngai nanhte hpe chye na shangun mayu made ai.

⁴Kadai lasha mung akyu hpyi yang, shing n rai, shawa nawku hpawng hta Karai Kasang a mungga htawn tsun ai shaloi, baw magap nga a yang gaw, tinang a baw a arawng jahpoi nga ai.

⁵Kadai numsha mung akyu hpyi yang, shing n rai shawa nawku hpawng kaw mungga htawn tsun nga ai shaloi, baw n magap a yang gaw, madu wa a arawng hpe jahpoi nga ai; shi gaw baw shangun shakrin kau ai num langai mi hte hpa n shai nga ai.

⁶Numsha gaw baw n magap na rai yang, kara mung doi kau u ga; rai ti mung, kara doi na, shing n rai, baw shangun na gaw, numsha a matu arawng jahpoi ai lam rai nga yang gaw, shi baw magap nga u ga.

⁷Lasha chyawm gaw Karai Kasang a hkrang bung sumla hte hpung shingkang nsam shapraw ai wa rai nga ai majaw baw magap na n sut nga ai. Numsha mahtang gaw lasha a hpung shingkang nsam shapraw nga ai.

⁸Hpa majaw nga yang, lasha gaw numsha kaw na hpan da sai n rai, numsha mahtang lasha kaw na rai nga ai.

⁹Dai lasha mung numsha a matu hpan da wu ai n rai, numsha hpe mahtang dai lasha a matu hpan da wu ai.

¹⁰Dai rai nna, lamu kasa ni hpe hkungga ai hku nna numsha gaw tinang a ntsa e madu wa up nga ai ngu ai kumla shapraw na matu shi a baw magap na htuk nga ai.

¹¹Rai ti mung, dai Madu hte anhte a kanawn mazum asak hkrung ai lam hta lasha gaw numsha n lawm yang n mai nga ai hte maren, numsha mung lasha n lawm yang n mai nga ai.

¹²Hpa majaw nga yang, numsha gaw lasha kaw na hpan da sai rai ti mung, lasha gaw numsha kaw na shangai wa ai wa rai nga ai; dai hta n ga, yawng mayawng hpe byin tai wa shangun ai Madu gaw Karai Kasang nan rai nga ai.

¹³Nanhte gaw tinang dai myit aru yu mu; Numsha gaw baw n magap ai sha Karai Kasang hpe nawku ai shawa hpawng kaw akyu hpyi yang htuk nga ai kun?

¹⁴Lasha gaw kara galu madat yang, shi a matu arawng hpoi lam rai nga ai gaw, shingra maka e nan nanhte hpe madun dan nga ai n rai ni?

¹⁵Rai ti mung, numsha mahtang gaw kara madat yang shi a tsawm htap ai lam rai nga lu ai. Shi a kara galu gaw shi a baw magap tai na matu jaw da nu ai.

¹⁶Rai ti mung marai langai ngai, dai lam hte seng nna ndang kalang hkat mayu dam a yang gaw, anhte hta mung, Karai Kasang a hpung ni hta mung, nawku daw jau ai hpawng hta, htung lai kaga n nga ai, ngu nna dai wa hpe ngai tsun na we ai.

¹⁷Nanhte nawku daw jau na matu hpawng ai zuphpawng ni gaw kaja wa akyu jat na matu hpawng myit dai n rai, akyu yawm na hku hpawng myit dai majaw, lawu de na matsun da ai lam ni hta ngai nanhte hpe shakawn made ai n rai.

¹⁸Langai ngu na hta nanhte a hpung zuphpawng ni hta myit n hkrum ninghkap ai ni nga ai lam ngai na nngai; dai mung, daw chyen mi gaw jaw ai ngu nna ngai kam nngai.

¹⁹(Nanhte hta hka bra wa ai lam byin na sha rai nga ai. Shaloi she kadai ni gaw jaw ai maga rai nga ai ngu ai teng man ai lam asan sha dan pru wa na ra ai.)

²⁰Dai re ai majaw, nanhte rau hpawng ai shaloi, dai Madu a Shana Shat sha na matu hpawng nga myit dai n rai.

²¹Hpa majaw nga yang, nanhte sha ai shaloi, tinang a lusha tinang hkrai sha myit dai, nkau mi gaw kawsi nga ai, nkau mi gaw sabyi chyaru nang ai ni gaw nang rai nga myit dai.

²²Ataw, sha na lu na matu tinang a nta n lu myit ni? Shing n rai Karai Kasang a Hpung hpe n gawn n sawn jahpoi asawng nna, n lu n su ai ni hpe kaya jahkrum ai ga rai myit ni? Ngai nanhte hpe ndai lam hte seng nna kaning ngu tsun na ra ai ngu nna nanhte myit mada myit ta? Ngai nanhte hpe shakawn na rai ni? Kaja wa nanhte hpe ngai shakawn na made ai n rai.

²³Hpa majaw nga yang, ya ngai nanhte hpe shalai ap ya ai sharin shaga ai lam gaw dai Madu kaw na ngai hkam la se ai: dai gaw, hpyen ni a lata de ap kau hkrum na shana e, Madu Yesu gaw muk hpe la nna,

²⁴chyeju shakawn ngut jang, muk hpe ahkyep alep nhtawm, “Ndai gaw nanhte a matu ya kau ai nye a hkum rai nga li ai, ngai hpe adum nga na matu ndai galaw mu,” ngu nna tsun mu ai.

²⁵Dai hte maren, Shana Shat sha ngut jang, gawm hpe mung shi la nhtawm, “Ndai gawm gaw nye a sai hte dazik dawk nna gaw da ai Karai Kasang a ga shaka ningnan rai nga ai, ndai gawm kaw na sabyi lu ai ten shagu ngai hpe adum nga na matu ndai galaw mu,” ngu nna tsun mu ai.

²⁶Nanhte gaw galoi mung ndai muk sha nna ndai gawm hta na sabyi hpe lu ai ten shagu dai Madu a si hkam ai lam hpe, shi bai du sa ai ten du hkra sakse hkam tsun shana ya ai lachyum rai nga ai.

²⁷Dai rai nna, kadai rai ti mung, n ging n dan ai hte dai Madu a muk sha nna gawm hta na lu a yang gaw, dai Madu a hkum hte asai hpe shut kau da wu ai.

²⁸Dai majaw kadai wa mung, tinang hkum hpe shawng san dinglik yu nhtawm, dai muk sha nna dai gawm hta na lu u ga.

²⁹Hpa majaw nga yang, dai muk sha nna dai gawm hta na lu ai shaloi, dai Madu a hkum hkrang a lachyum hpe n chye na ai wa gaw, tinang dai tara dara la ai hku lu sha nga ai.

³⁰Dai re ai majaw, nanhte hta na n-gun kya ai hte n hkam kaja ai masha law law wa nga nga ma ai, si mat ai ni mung tsawm ra wa rai nga ma ai.

³¹Anhte gaw tinang dai shawng gawn dinglik yu ga yang gaw, Karai Kasang a jeyang daw dan ai hkrum na ga ai n rai.

³²Rai ti mung, anhte hpe ndai zawn Karai Kasang e jeyang daw dan nna ari jaw ai lam gaw, anhte hpe mungkan masha ni hte rau daw dan n hkrum shangun na matu sharin shaga ai lam rai nga ai.

³³Dai rai nna, nye a hpu nau ni e, Madu a Shana Shat Sha Poi sha na matu nanhte zuphpawng nga myit yang gaw, nanhte shada da ala nga mu.

³⁴Dai rai nna, Madu a Shana Shat Sha Poi sha na matu nanhte zuphpawng nga myit yang, Karai Kasang a tara dara ai hkrum na matu n rai u ga, masha langai ngai kawsi a yang gaw, nta e sha la u ga. Kaga ra ai lam ni hte seng nna ngai du sa ai shaloi she lajang sanglang na we ai.