Read Jinghpaw Common Language Bible 2009 1 KORINHTU 12 Bible Online

1 KORINHTU 12 - Jinghpaw Common Language Bible 2009 bible

1 KORINHTU 12

¹Hpu nau ni e, nanhte laika hte ka san dat ai Wenyi a chyeju kumhpa ni hte seng nna, de a teng man ai lam nanhte hpe chye shangun mayu nngai.

²Nanhte gaw maigan masha ni naw rai nga ai shaloi e, lam amyu myu hku nna lam dam ai hte asak n rawng ai sumla ni hpe naw lai wa manit dai hpe nanhte nan chye nga myit dai.

³Kadai rai ti mung, Karai Kasang a Wenyi a lam woi awn ai hpe hkam la lu ai wa rai yang gaw, Madu Yesu hpe matsa mawa n nga lu ai. Chyoi pra ai Wenyi a lam madun woi awn ai hpe n hkam la lu ai rai yang, Madu Yesu gaw Madu rai nga ai nga nna kadai mung n yin la lu ai lam ngai nanhte hpe chye shangun mayu made ai.

⁴Ya Wenyi kumhpa ni gaw amyu myu nga ai, Rai ti mung dai chyeju kumhpa ni hpe Wenyi langai kaw nna jaw ya nga ai.

⁵Daw jau gun hpai na bungli lam amyu myu nga ai, rai ti mung daw jau na Madu gaw langai sha rai nga ai.

⁶Magam gun hpai na atsam amyu myu nga ai, rai ti mung yawng mayawng hpe tinang gun hpai daw jau nga ai laksan amu a matu atsam jaw ai Karai Kasang gaw langai sha rai nga ai.

⁷Yawng mayawng a matu akyu pru u ga she, langai hte langai hta dai Wenyi shanu nga ai lam, amyu myu hku madun shadan dan nga ai.

⁸Hpa majaw nga yang, langai ngai hpe dai Wenyi gaw hpaji hte hpring ai mungga jaw wu ai; kaga wa hpe dai Wenyi gaw machye machyang hte hpring ai mungga jaw wu ai.

⁹Bai kaga wa hpe dai Wenyi gaw Karai Kasang hpe kam sham ai chyeju atsam, kaga wa hpe dai Wenyi gaw machyi makaw shamai shatsai ya lu ai atsam jaw mu ai.

¹⁰Dai Wenyi nan kaga wa hpe lamik kumla galaw dan na atsam; kaga wa hpe myihtoi htoi na ahkang; kaga wa hpe Wenyi kaw na jaw ya ai chyeju atsam hte re ai n re ai hpe chye ginhka hparan lu ai atsam, kaga wa hpe ga amyu myu chye tsun na atsam, bai kaga wa hpe tsun ai ga a lachyum hpe htai sanglang dan lu ai atsam jaw shajang mu ai.

¹¹Rai ti mung dai chyeju atsam yawng mayawng hte chyawm gaw, dai Wenyi langai sha e nan shabyin wu ai rai nna, shi myit ra ai hte maren, shi gaw langai hte langai hpe laklai ai chyeju atsam kumhpa kaga ga garan kachyan shagu wu ai.

¹²Hkristu gaw daw shan law law rawng ai hkum hkrang hte bung nga ai; dai hkum hkrang a daw shan ni gaw law law rai ma ti mung, hkum hkrang langai sha rai nga ai.

¹³Dai hte maren anhte yawng gaw, Yuda ni rai ti mung, Yuda amyu masha n re ai ni rai ti mung, mayam ni rai ti mung, mayam n re ai ni rai ti mung, Wenyi langai sha hta hkalup hkam la nna hkum hkrang langai sha tai wa saga ai hte, nlang hte a myit masin hta dai Wenyi langai sha hpe hkam la saga ai.

¹⁴Hpa majaw nga yang, dai hkum hkrang hta daw shan langai sha nga ai n rai, law law wa rai nga ma ai.

¹⁵Lagaw mahtang gaw, “Ngai lata n rai nngai majaw hkum hte n seng nngai,” nga nna tsun a yang gaw, shing nga tsun ai majaw shi kaja wa hkum hkrang hte n seng ai n rai.

¹⁶Bai dai na gaw, “Ngai myi n rai nngai majaw hkum hkrang hte n seng nngai,” nga nna tsun a yang gaw, shing nga ai a majaw, kaja wa hkum hkrang hte n seng ai n rai.

¹⁷Hkum ting gaw myi langai mi sha rai mat yang gaw kaning rai nna na lu na rai ta? Hkum hkrang ting hta na hkrai rai mat yang mung kaning rai sama manam lu na rai ta?

¹⁸Ya chyawm gaw, Karai Kasang shi ra ai hte maren, daw shan ni langai hte langai hpe shi shara hte shi shachyaw tawn da mu ai.

¹⁹Bai yawng mayawng daw shan langai sha rai nga a yang gaw, hkum hkrang byin wa lu na n rai!

²⁰Ya chyawm gaw daw shan law law nga ti mung, hkum hkrang langai sha rai nga ai.

²¹Dai re ai majaw, myi gaw, “Nang lata hpe ngai n ra de ai,” nga nna n tsun lu ai. Baw mung, “Nang lagaw yan hpe ngai n ra nngai,” ngu nna n tsun lu nga ai.

²²Dai hta n ga hkum hkrang hta na n-gun grau kya ai zawn san ai daw shan ni mung, n lawm n mai rai nga ai.

²³Hkum hkrang hta na dai daram manu n rawng ai zawn san ai daw shan ni hpe anhte grau nna ahkyak shatai ai hte lanu lahku ga ai. Anhte a n tsawm n htap ai daw shan ni hpe grau nna sari sadang rawng hkra mawn sumli nga ga ai.

²⁴Tsawm htap nga chyalu rai sai daw shan ni hpe gaw mawn sumli n ra ai. Arawng n lu ai daw shan ni hpe grau nna arawng lu shangun na matu Karai Kasang shi nan dai ni hpe gumhpawn shabawn da mu ai.

²⁵Dai rai nna, hkum hkrang hta na daw shan ni shada da shai wa bra wa ai lam n nga ai sha, shada da myit tsang hkat nga ma ai.

²⁶Shing rai daw shan langai mi nji nmu hkrum yang, daw shan kaga ni yawng mung, dai hte rau machyi hkrum ma ai. Daw shan langai mi shakawn shagrau ai hkrum yang, daw shan kaga ni yawng mung rau kabu gara nga ma ai.

²⁷Ya nanhte yawng gaw Hkristu a hkum hkrang rai nga ai hte, langai hte langai gaw de a daw shan ni rai nga myit dai.

²⁸Karai Kasang gaw dai Hpung hta e, langai ngu na shara hta Kasa ni, lahkawng ngu shara hta myihtoi ni, masum ngu na shara hta sara ni, dai hpang e lamik kumla galaw ai ni, dai hpang machyi makaw shamai shatsai na atsam lu ai ni, masha kaga ni hpe karum madi shadaw lam madun chye ai atsam lu la ai ni, lam woi ningshawng ni hte, laklai ai ga amyu myu chye shaga ai ni hpe mung shi shara hte shi san tawn da manu ai.

²⁹Shanhte yawng hte wa kasa rai nga ma ai kun? Yawng hte wa myihtoi rai nga ma ai kun? Yawng hte wa sara ni rai ma ai kun? Yawng hte wa lamik kumla galaw lu ma ai kun?

³⁰Shanhte yawng hte wa machyi makaw shamai shatsai na chyeju lu la ma ai kun? Yawng hte wa laklai ai ga shaga ai ni rai ma ni? Yawng hte wa tsun ai ga amyu myu a lachyum hpe chye htai sanglang dan lu ai ni rai nga ma ai kun?

³¹Dai rai nna, nanhte gaw grau htum ai chyeju kumhpa ni hpe tsam mari marit nga mu. Dai hta n ga, grau htum ai lam langai mi ngai nanhte hpe naw madun dan na made ai.