Read Jinghpaw Common Language Bible 2009 1 KORINHTU 4 Bible Online

1 KORINHTU 4 - Jinghpaw Common Language Bible 2009 bible

1 KORINHTU 4

¹Anhte gaw Karai Kasang a sung htum nna makoi magap da ai teng man ai lam ni hpe lit la nna kunhting tai nga ai Hkristu a shangun ma ni re ai ngu nna nanhte myit la ang myit dai.

²Shing rai lit la nna magam gun hpai ai shangun ma wa hta nga ra ai atsam marai langai mi gaw, shi a Madu a ntsa e kangka sadi dung na lam rai nga ai.

³Ya e ngai hpe jep san jeyang ai mi rai rai, shawa tara rung madang hku jeyang ai mi rai rai, ngai hpa zawn n nawn nngai. Ngai gaw nye a hkum hpe pyi n jeyang nngai.

⁴Hpa majaw nga yang, ngai hkum dai myit asan sha, mara n lu dum nngai; rai ti mung ngai hta mara n kap ai ngu nna ngai n tsun mayu nngai, Ngai hpe jeyang ai wa gaw dai Madu rai nga ai.

⁵Dai re ai majaw, aten hkrak garai n du yang, kadai hpe mung hkum jeyang myit. Hpang jahtum na jeyang daw dan ai lam hpe, dai Madu bai du sa ai nhtoi shani du hkra la nga lu na rai nga ai; Shi gaw nsin hta makoi magap da ai nga manga hte hpe mung, masha a myit kraw lawang kata hta makoi magap da ai myit mang yaw shada ai lam ni hpe mung, shapraw shadan dan na ra ai. Dai shaloi e langai hte langai gaw tinang hte ging dan ai hte maren Karai Kasang kaw na shakawn shagrau ai hpe hkam la na ra ai.

⁶Hpu nau ni e, nanhte a matu mai kaja ai lam hpe myit tau yu let, ndai lam hta ngai hte Apolo a lam hpe ga shadawn kasi shatai nna tsun dan made ai. Dai hku tsun dan ai lam gaw, “Hkan sa tara madung hpe lai nna hkum galaw mu,” nga ai ga malai a sung ai lachyum hpe nanhte chye na lu na matu rai nga ai. Nanhte gaw langai wa hta myit kaba gumrawng nna kaga wa hpe n gawn n sawn hkum rai myit.

⁷Kadai wa mi nang hpe masha kaga hta grau shangun nga a ta? Nanhte lu ai yawng mayawng hte gaw Karai Kasang jaw ai n rai ni? Dai re ai mi nanhte hkam la lu ai arai ni gaw Karai Kasang kaw na hkam la lu ai chyeju kumhpa n re ai zawn nanhte gumrawng ai gaw, kaning re ai rai ta?

⁸Ya nanhte hta ra mara hkum tsup hkra lu rau manit dai n rai ni? Nanhte lu su rau wa manit hka i? Anhte pyi hkawhkam garai n tai yang nanhte hkawhkam tai wa manit hka! Rai sa, nanhte hkawhkam tai yang she anhte mung nanhte hte rau hkaw dung lu na re ai majaw, kaja wa nanhte ni hkawhkam tai na ngai ra nga nngai.

⁹Hpa majaw nga yang, majan poi awng dang nna yan hkawm dan ai shaloi, sat kau hkrum na bawng ni hpe hpang ningdim e hkan nang shangun ai zawn, Karai Kasang gaw shinggyim masha ni hte lamu kasa ni a man e jawm yu mada mu ga, anhte kasa ni hpe hpang ningdim tawn da mi ai ngu nna ngai myit nawn nngai.

¹⁰Hpa majaw nga yang, anhte gaw Hkristu a majaw mana angawk ni rai nga ga ai, nanhte mahtang Hkristu hte langai sha rai nga ai hpaji rawng ai ni rai nga myit dai! Anhte gaw n-gun n ja ga ai, nanhte mahtang n-gun ja myit dai; anhte arawng hpoi saga ai, nanhte mahtang hpung rawng ai ni rai nga myit dai.

¹¹Ya ten du hkra anhte kawsi hpang gara, singgu krin, adup ajin zingri hkrum nna nga shara garen let shara mi kaw nna shara mi de hkawm nga ga ai.

¹²Anhte a lata hte shakut nna bungli shaja galaw sha ga ai, anhte matsa mawa hkrum yang shaman ya ga ai, zingri zingrat hkrum yang anhte hkam sharang ga ai.

¹³Anhte roi asawng ai hkrum yang, ga ngwi ga pyaw hte htan ga ai. Anhte gaw ya du hkra ndai mungkan ga a shanut shanaw hte masha yawng mayawng e kabai ayai da ai maza mala zawn rai nga ga ai.

¹⁴Nanhte hpe kaya jahkrum na matu ndai lam ngai ka nngai n rai; ngai tsaw ngai ra ai nye a kashu kasha ni hpe zawn ngai nanhte hpe shadum jahprang made ai.

¹⁵Hpa majaw nga yang, nanhte a Hkristan asak hkrung lam hta nanhte hpe sharin achyin ya na sara mun mi dang lu myit ti mung, nanhte kawa langai sha lu myit dai. Ngai gaw dai Kabu Gara Shiga hkaw dan ai hku nna, nanhte hpe Hkristu hte kahkyin gumdin ai asak hkrung lam de du wa shangun ai nanhte a shangai kawa tai wa ni ai.

¹⁶Dai re ai majaw nye a kasi hkan ai ni tai nga mu ga ngu nna ngai nanhte hpe hpyi lajin made ai.

¹⁷Dai lam a majaw ngai gaw Hkristan asak hkrung lam hta nye a tsaw ra ai, kangka sadi sahka nga ai ngai sha Timohti hpe nanhte hpang de ngai shangun dat we ai. Shi gaw, ngai nan hkan sa nna shara shagu na nawku hpung ni yawng hpe sharin shaga ya ai Hkristu hte langai sha re ai asak hkrung lam ningnan a lam nanhte hpe bai myit dum shangun na matu shadum jahprang na ra ai.

¹⁸Nanhte hpang de ngai bai n sa du sana zawn nawn nna, nanhte hta na nkau mi gaw gumrawng gumtawng rai wa masai.

¹⁹Dai Madu hkraw a yang gaw, ngai nanhte hpang de alawan sa du na ring ngai. Dai shaloi shing rai gumrawng gumtawng nga ai ni a n-gup atsam hpe sha n rai, shanhte a n-gun atsam hpe mung ngai nan chye la lu na ring ngai.

²⁰Hpa majaw nga yang, Karai Kasang a mungdan gaw n-gup aga hta rawng nga ai n rai, n-gun atsam hta she rawng nga ai.

²¹Ngai gaw nanhte hpang de shingna lang nna sa na rai ni? Shing n rai, tsaw ra nna sumnung shingdi ai wenyi hte nanhte hpang de sa du na kun? Nanhte gara mahtang hpe grau ra sharawng nga myit ta?