Read Jinghpaw Common Language Bible 2009 1 KORINHTU 8 Bible Online

1 KORINHTU 8 - Jinghpaw Common Language Bible 2009 bible

1 KORINHTU 8

¹Ya nanhte laika hte san dat ai sumla ni hpe nawng jau ai lusha ni hte seng nna ngai tsun htai dan na nngai. “Anhte yawng hte wa machye machyang rawng ai ni hkrai rai ga ai,” nga nna shanhte tsun ai gaw teng nga ai. Rai ti mung, dai baw machye machyang gaw masha hpe gumrawng gumtawng shangun nga ai.

²Marai langai ngai, ngai lama mi chye nngai nga nna myit a yang gaw, shi chye mai ai hpe pyi kaja wa shi n chye wu ai.

³Rai ti mung Karai Kasang hpe tsaw ra ai wa gaw, Karai Kasang e chye chyap masat da ai hpe hkam la nga ai.

⁴Dai rai nna, sumla ni hpe nawng ai hkungga lusha a lam hte seng nna tsun ga nga yang, sumla ngu ai gaw kaja wa asak hkrung shamu shamawt ai lam n nga ai, hpa n re ai rai nga ai hpe mung, langai sha rai nga ai Karai Kasang hta kaga shaje n nga ai hpe mung, anhte dum chye ga ai.

⁵Sumsing lamu hte ginding aga ntsa e, “hpara ni” ngu nna shamying ai ni nga shajang ma ai rai nna, “hpara ni” law law hte “madu ni” law law nga ma ai.

⁶Rai ti mung, anhte a matu gaw Kawa ngu ai Karai Kasang langai sha rai nga ai rai nna, shi gaw yawng mayawng hte hpe hpan da ai wa hte, shi a matu anhte asak hkrung nga ga ai. Yesu Hkristu ngu ai Madu mung langai sha rai nna, shi a marang e yawng mayawng tai wa ai hte shi a majaw anhte asak hkrung nga ga ai.

⁷Rai ti mung masha shagu wa dai chye ginhka ai machye machyang lu ma ai n rai. Masha nkau mi gaw sumla naw man mat ai ni rai lai wa sai majaw, dai ni du hkra hkungga nawng ai shahpa sha ai shaloi, dai gaw sumla hpe nawng ai lusha re ngu nna myit la ma ai. Shanhte a htauli htaula myit n-gun kya malu ai majaw, shanhte sha ai shahpa gaw shanhte hpe awu asin byin shangun nga ai ngu nna myit la ma ai.

⁸Shahpa gaw Karai Kasang hte anhte a matut mahkai ai lam hta mahku mara jat ya ai n rai, anhte n sha yang mung, anhte hta hpa sum hkrum ai lam n nga ai, sha yang mung hpa akyu jat wa na n rai.

⁹Rai ti mung, nanhte ndai zawn n dut n dang sha lu ai ahkaw ahkang gaw, Karai Kasang hpe kam sham ai lam hta n-gun kya nga ai ni hpe lam shadam, mara galaw shangun ai lam n byin u ga, sadi nga mu.

¹⁰Ndai zawn re ai lam hta, lama rai nna “htauli htaula myit” n-gun kya ai masha langai mi gaw, htauli htaula myit rawng ai nanhte wa sumla nta hta shat sha nga ai hpe mu ai rai yang, sumla hpe nawng ai hkungga lusha sha gwi u ga, n-gun jaw ai lam n byin na kun?

¹¹Dai rai nna, chye ginhka ai htauli htaula myit n-gun kya ai na a hpu nau wa a matu Hkristu si hkam ya sai rai ti mung, na a chye ginhka ai “htauli htaula myit” a majaw dai wa hten byak mat wa na n rai hka!

¹²Ndai hku nna nanhte gaw tinang a Hkristan hpu nau wa hpe shut nna n-gun kya ai htauli htaula myit hpe hkala nba machyi hkrum shangun myit yang gaw, nanhte Hkristu hpe shut hpyit nga myit dai.

¹³Dai rai nna, shahpa a majaw nye hpu nau wa hpe myit kataw nna mara galaw shangun na she rai yang gaw, nye a hpu nau wa hpe n kataw shangun na matu, ngai prat dingsa e shan n sha na ni ai.