Read Jinghpaw Common Language Bible 2009 2 KORINHTU 10 Bible Online

2 KORINHTU 10 - Jinghpaw Common Language Bible 2009 bible

2 KORINHTU 10

¹Nanhte a man e akya shala rai myit grit myit nem ai lam madun nhtawm, nanhte hte tsan gang jang laja lana nden marai madun ai wa, ngu shatan hkrum ai ngai Pawlu nan nanhte hpe lajin dat made ai.

²Hkristu a sumnung ai hte myit gyip ai hpe tau yu nna nanhte kaw du sa ai shaloi sheng mareng nga nna ga shaga ai kaw n du ra na matu hpyi nem dat nngai; hpa majaw nga yang, anhte hpe mungkan a ra marit ai hku maw mawn ai myit hte asak hkrung ai ni re ngu nna tsun ai ni hpe sheng mareng ngu nna ngai hkrak sha tsun shaga lu nngai.

³Anhte gaw mungkan e nga nga ga ai teng ti mung, mungkan a maw mawn ai myit hku nna gasat nga ga ai n rai.

⁴Anhte a majan gasat ai hta lang ai laknak ni gaw mungkan shinggyim masha ni lang ai baw laknak n rai, ngang kang ai hpyen dap ni hpe jahten kau lu ai Karai Kasang a n-gun atsam hte hpring ai laknak ni rai nga ai. Anhte gaw n teng n man ai ndang kalang ga ni hpe jahten kau ga ai.

⁵Anhte gaw Karai Kasang hpe chye chyang ai hpaji hpe dingbai dingna jaw ai amu yawng hpe run hpya jahten kau ga ai. Anhte gaw masha myit mang ai lam nga manga hpe rim sharen da nhtawm Hkristu a ga madat mara shangun ga ai.

⁶Nanhte gaw anhte a ga hpe tup hkrak madat mara nna sadi dung ai lam hpe chye lu jang, anhte gaw sadi n dung ai hpa lam hpe mung ari jaw na matu jin jin rai nga saga ai.

⁷Nanhte gaw hpa lam hpe mung ntsa lam hku sha yu nga myit dai; “Ngai gaw Hkristu hte seng ai wa rai nngai,” nga nna tinang hkum hpe myit nawn ai wa langai ngai nga a ni? Lama nga ai rai yang, kalang mi bai shi hkum hpe shi sumru yu u ga. Hpa majaw nga yang, shi gaw Hkristu a maga na masha rai nga ai hte maren, anhte mung Hkristu a maga na masha ni rai nga ga ai.

⁸Ngai gaw Karai Kasang jaw ai ahkang aya hte seng nna ladu lai hkra lama wa gumrawng hkrup ai rai ti mung, dai ahkang aya gaw nanhte hpe sharun shabya na matu n rai, nanhte hpe gaw gap sharawt na matu she rai nga ai.

⁹Dai rai nna nye a shagun dat ai laika ni hte nanhte hpe jahkrit shama mayu ai hku nna lachyum n shapraw mayu nngai.

¹⁰Hpa majaw nga yang, masha nkau mi gaw, “Pawlu a laika ni gaw grai sawng nna n-gun atsam namnak rawng ai laika ni rai lu ai, rai ti mung shi hkum nan anhte hte rau nga ai shaloi, shi gaw n-gun kya nna hpung n rawng ai hte shi a ga ni hpa tang n du lu ai,” nga nna tsun ma ai.

¹¹Shing nga ai masha wa chye na da na lam gaw, anhte gaw tsan gang ai shara e nga nga ai shaloi laika ka dat ai hte maren, masha hkum nan nanhte kaw sa du ai shaloi mung, dai hte maren sha anhte galaw na ga ai.

¹²Kaja wa nga yang, tinang a hkum hpe shagrau shatsaw la ai masha hpan hta hti lawm nna anhte a hkum ni hpe shanhte hte madang n shabung gwi ga ai. Shanhte gaw tinang a madang hpe chye shadawn na matu tinang dai madang masat la ma ai. Dai masat da ai madang hte tinang dai shadawn la nga ma ai. Shing re ai ni gaw gade wa angawk angak rai nga ma hka!

¹³Anhte chyawm gaw, gumrawng ang ai madang hta shalai nna gumrawng na ga ai n rai. Nanhte kaw anhte galaw gun hpai ai amu hte hpawn, anhte gun hpai na matu Karai Kasang shi nan masat da ya ai magam amu shingwang kata e sha anhte gumrawng lu ga ai.

¹⁴Nanhte gaw anhte a matu Karai Kasang masat da ya ai magam amu shingwang kata hta lawm nga myit dai majaw, anhte gaw Hkristu a kabu gara shiga hpe nanhte hpang de la sa ai shaloi magam bungli gun na masat da ai ga jarit tawt lai ai hku n galaw saga ai.

¹⁵Dai re ai majaw anhte gaw Karai Kasang e anhte a matu masat da ya ai amu hta lai nna masha kaga ni galaw ai magam amu hte seng nna anhte grang ai ga tsun ga ai n rai. Shing rai na malai, galoi mung Karai Kasang masat da ya ai shingwang kata e anhte a makam masham kunghpan wa na hte nanhte a lapran e grau kaba ai bungli galaw maden jat lu na hpe anhte myit mada nga ga ai.

¹⁶Dai hpang anhte gaw nanhte a buga shinggan de lai nna kaga mungdan ni hta Madu Yesu a lam kabu gara shiga hkaw tsun dan lu na ga ai. Bai nna masha kaga ni a ginra ni hta galaw shangut da sai magam amu a lam hta shakawng gumrawng ra na ga ai n rai.

¹⁷Rai ti mung chyum laika hta, “Arawng mala mayu ai wa gaw, dai Madu galaw ai magam amu hta arawng mala gumrawng nga u ga,” nga nna tsun da nga ai.

¹⁸Hpa majaw nga yang, tengman ai arawng hkam la ai wa gaw tinang hkum dai tinang shagrau shatsaw ai wa n rai, Karai Kasang e shagrau shatsaw hkrum ai wa she rai nga ai.