Read Jinghpaw Common Language Bible 2009 2 KORINHTU 11 Bible Online

2 KORINHTU 11 - Jinghpaw Common Language Bible 2009 bible

2 KORINHTU 11

¹Ngai loi mi angawk ai mara hpe nanhte sharang ya mi ga ngai ra nga nngai. Chyeju hte kaja wa sharang ya mi.

²Karai Kasang gaw nanhte a ntsa e nsu nnawn myit[2] rawng nga ai zawn ngai mung nanhte a ntsa e nsu nnawn myit rawng nga nngai. Nanhte gaw Hkristu shi nan hte sha hkungran na matu ngai ga sadi jaw da sai hkawn sek hte bung nga myit dai.

³Ewa gaw lapu a hpaji rawng ai zai byeng-ya hte masu hkalem hkrum ai zawn, nanhte mung nanhte a myit mang ai lam jahten kau hkrum nna, nanhte a hpring tsup nna san seng ai myit hte Hkristu hta maju jung kam sham daw jau ai lam hpe kau da na myit tsang nga nngai.

⁴Hpa majaw nga yang, nanhte hpang de masha langai ngai sa du nna anhte n hkaw dan yu ai kaga Yesu langai mi a lam hkaw dan ai shaloi, nanhte gaw kabu gara hkap la myit dai, bai nanhte gaw anhte kaw na hkap la lu sai wenyi hte kabu gara shiga hte tsep kawp nhtan shai ai wenyi hte kabu gara shiga hpe hkap hkalum la nga manit hka!

⁵Ngai gaw dai nanhte a kaba htum ai kasa ni ngu nna shagrau da ai kasa ni hta kachyi mi pyi grit ai wa n re ngu nna ngai nawn nga nngai.

⁶Lama wa ngai gaw hkaw tsun shaga ai lam hta n kung ai wa rai hkra rai ti mung, kaja wa chye chyang ai lam hta gaw dai zawn n rai, anhte gaw aten shagu mabyin masa lam yawng hta ndai lam nanhte hpe asan sha mu chye shangun saga ai.

⁷Ngai gaw nanhte hpe shagrau shatsaw na matu ngai hkum nan hpe shagrit kau nna, jahpu n hpyi ai sha Karai Kasang a kabu gara shiga nanhte hpe hkaw dan ni ai. Shing rai galaw ai gaw ngai hta shut ai lam rai ni?

⁸Ngai nanhte kaw amu gun hpai nga ai ten hte hta kaga buga hpung ni ngai hpe madi shadaw ma ai, dai gaw nanhte hpe karum la na matu kaga buga hpung ni kaw na ngai mya la ai re ngu ga.

⁹Dai hta n ga, ngai gaw nanhte hte rau nga nga ai ten e ja gumhpraw ra wa ai shaloi karum la na matu ngai nanhte hpe n shatsang nngai. Makedoni mung na sa du ai hpu nau ni chyawm gaw ngai ra mara a matu la sa wa ya ma ai. Lai wa sai ten hta mung, nanhte hpe lit n shali nngai zawn, du na ra ai ten hta mung nanhte hpe ngai galoi mung lit n shali na nngai.

¹⁰Hkristu a teng man ai ga ngai hta rawng nga ai hte maren, ndai nye a gumrawng ai lam hpe Ahkaia mung shara shagu hta kadai mung jasim shangap kau ya lu na n rai, ngu nna ngai ga sadi jaw nngai.

¹¹Ngai ning nga nna tsun ai gaw, ngai nanhte hpe n tsaw ra ai majaw rai ni? Ngai nanhte hpe tsaw ra ai gaw Karai Kasang chye nga ai.

¹²Anhte galaw ai hte maren shanhte mung galaw ga ai nga nna kaga “Kasa ni” tsun gumrawng na ahkang n lu mu ga, ya ngai galaw ai hte maren matut nna ngai naw agalaw nga na nngai.

¹³Dai masha ni gaw teng man ai “Kasa ni” n rai ma ai. Shanhte gaw Hkristu a kasa jet ni zawn san hkra hpyi hpun nhtawm masu hkalem bungli galaw ai ni rai ma ai.

¹⁴Ning rai galaw ai gaw mauhpa n rai nga ai! Satan pyi gaw nhtoi a lamu kasa hkrang hpe naw masu dagraw lu nga ai!

¹⁵Dai re ai majaw shi a shangun ma ni nan mung ding hpring ai lam hpe hkaw tsun sakse hkam ai shangun ma ni hte yu bung hkra hpyi hpun masu ai gaw mauhpa n rai nga ai. Hpang jahtum e shanhte hkan sa galaw ai hte maren shanhte hkam la na mara ai.

¹⁶Bai ngai kahtap tsun mayu nngai gaw, ngai hpe angawk ai wa re ngu nna kadai mung n mai sawn la ai. Rai ti mung, nanhte dai hku sawn la ai rai yang mung, dik shale ngai hpe angawk ai wa langai mi hku nna hkap la mi. Shing rai ngai mung gumrawng ai ga loi mi tsun na nngai.

¹⁷Teng sha nga yang, ya ngai tsun gumrawng nga ai lam gaw Karai Kasang tsun shangun mayu ai lam n rai nga ai; ndai tsun gumrawng ai lam hta ngai gaw kaja wa angawk ai wa langai mi zawn ngai tsun nga nngai.

¹⁸Rai ti mung masha law law wa masha a galaw lu ai atsam hta gum rawng ma ai majaw ngai mung gumrawng na nngai.

¹⁹Nanhte nan hpaji nau rawng nna angawk ai ni hpe kabu gara ai hte hkam sharang nga myit dai!

²⁰Nanhte gaw, nanhte hpe reng sha ai ni, nanhte a ntsa e ahkaw ahkang la ai ni, nanhte hpe mahkam hte rim la ai ni, nanhte hpe yu kaji ai ni, nanhte a myi man kahpret ya ai ni kadai hpe mung nanhte hkam mana nga myit dai.

²¹Anhte gaw dai zawn re ai lam ni hpe galaw na matu gawng kya la ga ai lam yin la na matu pyi gaw kaya saga ai! Rai ti mung marai langai ngai lam lama ma hta gumrawng yang gaw ngai mung angawk angak re ai wa zawn tsun gwi da we ai.

²²Shanhte Hebre masha ni rai ma ni? Ngai mung rai nngai. Shanhte Abraham a aru arat ni rai ma ni? Ngai mung rai nga nngai.

²³Shanhte Hkristu a shangun ma ni rai ma ni? Mana ai wa a ga zawn gaw nga ai, rai ti mung ngai gaw shanhte hta grau kaja ai shangun ma rai nngai. Ngai gaw shanhte hta grau nna amu bungli galaw shaja nngai, shanhte hta grau nna law law lang htawng hkrat nngai, shanhte hta grau nna shingna hkam sha ni ai, si hkrung si htan law law lang ngai grau hkrum nngai.

²⁴Yuda masha ni ngai hpe kalang myi kayat yang sumshi jahku lang di nna manga lang kayat ai hkrum ni ai.

²⁵Roma ni e masum lang hkawn hte adup ai mung ngai hkrum nngai; lang mi nlung hte kabai ai mung ngai hkrum nngai; masum lang li hten ai hta ngai lawm ni ai; kalang mi gaw nammukdara hta hkying hkum hkun mali waw hkawm nga nngai.

²⁶Ngai law law lang bu hkawm sa ai hta hka tung wa nna hkrum ai tsin yam, damya hkrum ai tsin yam, nye a Yuda amyu masha ni di ai tsin yam, maigan amyu ni e di ai tsin yam, mare kahtawng hkan hkrum ai tsin yam nam mali hkan hkrum ai tsin yam, nammukdara e hkrum ai tsin-yam, masu ai hpu nau ni e di ai tsin yam ni hpe hkrum katut lai wa ni ai.

²⁷Bungli hte kyin dut ai, law law lang yup n lu sha ai, kaw si hpang gara hkrum ai, law law lang, lusha dumhprut ai, shingbyi shara n lu ai hte singgu krin re ai tsin yam ahkrum nga nngai.

²⁸Dai hta kaga, hpung ni yawng hte a lam myit ru myit tsang ai gaw shani shagu ngai hpe shadut shatsang nga ni ai.

²⁹Gawng kya ai wa langai ngai nga yang, ngai mung gawng kya ai hpe hkam sha nngai, masha langai ngai yubak hta kataw mat yang, ngai myit ru nga nngai.

³⁰Ngai gumrawng na rai yang gaw, ngai gade gawng kya ai ngu ai lam hta she gumrawng na nngai.

³¹Ngai masu magaw ga n tsun ai gaw Madu Yesu a Kawa Karai Kasang chye nga ai. Dai Madu Karai Kasang a mying ningsang gaw tut nawng a nga u ga law!

³²Damasku mare e ngai nga ai ten hta hkawhkam Areta a npu na munggyi wa gaw ngai hpe rim la na matu mare chyinghka ni hta sin langa ni hpe jahkrat da wu ai.

³³Rai ti mung hpung masha ni ngai hpe ka hta bang nhtawm mare bunghku hta hpaw mahka nga ai hku langai mi kaw nna ga de shayat jahkat dat mi ai majaw, shi a lata na lawt mat wa nngai.